علي قد ماانا مستغربة من اللي بيحصل علي قد ماانا فرحانة ومصدومة في نفس الوقت
انا فعلا من الناس اللي صعب عليا اكون صداقات وممكن اكون انطوائية شوية واصحابي في المنتدي قلة بسيطة دول يتعدوا علي صوابع الايد
بس الايام دي فعلا حصلت حاجة غريبة اول مادخلت المنتدي هنا اتفاجات فعلا بكم الناس اللي رحبت بيا وبعضهم بقي صديق ليا حسيت فعلا ان احنا هنا عيلة واحدة واصدقاء واخوات كنت حاسة اني لوحدي بس بعد اللي شفته بدء احساسي ده يتلاشي واتمني فعلا من قلبي ان احنا نفضل اصحاب

يؤسفني فعلا انت ترحل كل الذكريات الجميلة وتختفي البسمة من الوجوه ولايبقي فقط سوي الحزن والالم والذكريات السيئة

نكبر وتكبر احلامنا معا بعضها يتغير وبعضها يبقي كماهو لايهم ماهي احلامنا المهم ان تكون لدينا القدرة علي تحقيقها
والصبر علي المصاعب حتي نصل اليها

مغامرات في المدرسة
من كام يوم كده كنت بدور في وسط هدومي علي حاجة الف بيها شعري
وانا بدور لاقيت في وسط الهدوم ايشرب ابيض وجميل الايشرب ده عمره 9 سنين
اول مامسكته افتكرت ذكريات قديمة ليها علاقة بيه بس كانت ذكريات حلوة
الايشرب ده كان هدية من صديقة امي الله يرحمها
صديقة امي دي اتوفت من حوالي سنتين
كنت بحبها جدا وهي كمان كانت بتعتبرني زي بنتها
قصة الايشرب بدات لما انا نجحت في اولي اعدادي وكنت داخلة تانية اشتريت وقتها لبس المدرسة وكان عبارة عن زي باللون الكحلي ومطلوب مننا نلبس عليه طرحة باللون الابيض انا في الوقت ده كنت جبت اللبس وفاضل بس الطرحة وفي يوم ماما دخلت عليا وقالت لي بصي جبتلك ايه وقتها فتحت العلبة واتفاجات من اللي فيها كان فيها 2 ايشرب باللون الابيض انا فرحت جدا بالهدية وحبيتها اوي وقلت لماما اني مش هجيب طرح انا هلبس الايشرب وفعلا عملت كده وقتها كانت كل البنات بتلبس طرح ومعدش حد بيلبس ايشرب بس انا مااهتمتش وكنت الوحيدة في المدرسة كلها اللي بلبس ايشرب طبعا البنات كانت بتتريق عليا بس من ورا ضهري لان مفيش واحدة فيهم كانت هتتجرا وتقول حاجة قدامي خلصت السنة ودخلت السنة اللي بعدها وفي يوم وقفت مع بنات اصحابي وبدءنا نستعيد الذكريات مع بعض وقتها واحدة صاحبتي ذكرت قصة الايشرب وسالتني انت ليه كنت بتلبسيه انا كنت عايزة اقوللك كده من زمان بس خايفة وكل البنات كانت بتتريق علي الايشرب من وراكي
وقتها انا ضحكت وقلت لها انا كنت بلبسه لانه هدية من شخص عزيز عليا وانسانة بحبها جدا وبعتبرها امي
ولحد دلوقتي لسه محتفظة بالهدية لما افتكرت الذكري دي ضحكت من قلبي ولبست الايشرب وفضلت اضحك يومها لحد ماامي افتكرت اني اتجننت لحد ماحكت لها القصة وضحكنا سوا
الخلاصة اوعي تهتم بكلام حد واعمل اللي انت عايزه طالما انت بتعمل حاجة صح
ماتخليش التنمر والسخرية تقلل منك او تحبطك
والاهم حافظ علي الذكريات الجميلة مهما كانت صغيرة لان في الاخر كلنا هنرجع للتراب ومش هيفضل منا غير الذكريات فحافظ عليها

حالي وانا قاعدة جمب الفيس بستني اي خبر عن الدراسة
عامل بالظبط زي اللي عايز يعمل من الفسيخ شربات