منتدى وندر لاند - الفضي| الصلاة راحة ليك مش حمل عليك

@باران;

السلام عليكم ورحمة الله وبركاته

دايما كان بيجي في بالي " هي ليه الصلاة هي الفرض الوحيد اللي أتفرض في السماء السابعة ؟" .. لحد ما لقيت شيخ بيقول " لأن ده من علو مكانتها ."

و كان بيجي في بالي دايما " ليه الصلاة اسمها صلاة؟ يعني في حكمة في كده ؟ " .. لحد ما لقيت جواب لشيخ بيقول " لأنها الصلة بين العبد و ربه " .

وكان بيحي في بالي دايما " ليه فيها ركوع و سجود ؟ يعني ليه مانفضلش نصلي وأحنا واقفين ؟ " ..لحد ما عرفت أن ذنوبنا اللي بنعملها بتبقى مكانها على راسنا و على أكتافنا ف لما بنيجي نركع و نسجد ؛ الذنوب بتاعتنا بتقع من علينا .

وكان دايما بيجي في بالي " ليه الوضوء بيكون أني أغسل بعض أعضاء جسمي ؟ " .. لحد ما لقيت جواب لشيخ بيقول " لأن معظم الأعضاء دي هي أكتر أعضاء ممكن نستخدمها في الحرام ف غسيلك للأعضاء دي بيغفر لك الذنب اللي عملته بيها .. زي أن غسل الأذن بيغفر لك أي حاجه حرام سمعتها و المضمضة بتغفر لك أي ذنب عملته بلسانك وهكذا ."

و كان بيجي في بالي دايما " ليه في الأذان بنقول حي على الصلاة و بعدها علطول حي على الفلاح ؟ " .. لحد ما لقيت جواب لشيخ بيقول " لأنه لا يفلح من لا يصلي ."

و كان بيجي في بالي " ليه الصلاة هي آخر وصية للرسول قبل ما يموت؟" .. لحد ما لقيت جواب لشيخ بيقول " لأن اللي بيصلي حاله هيتعدل للأحسن مهما كان وحش .. لكن اللي عمره ما ركعها ف عمره ما حاله هيتعدل ."
-
تخيل أن الصلاة هي العبادة الوحيدة اللي جواها عبادات كتير جدا ؟
يعني جواها :

١-قراءة القرآن ؛ لأنك بتقرأ فيها الفاتحة و أي سورة قصيرة .
٢- الذكر ؛ لأنك بتسبح فيها ربنا في الركوع و السجود ، بتكبر في الصلاة في البداية و في أول كل ركعة ، كمان بتحمد فيها ربنا عند الرفع من الركوع و بتستغفر فيها ربنا بين كل سجدتين .
٣- الصلاة على محمد ؛ لأنك بتصلي عليه في التشهد الآخير .
٤- الدعاء ؛ لأنك بتدعي في السجود و قبل السلام.
-
تخيل كمان أن فيها جميع أركان الإسلام!
فيها :

١- الشهادة ؛ لأنك بتقولها في التشهد الأول
٢- الصيام ؛ لأنك بتكون ممتنع عن الأكل و الشرب و بعض المباحات .
٣- الزكاة ؛ لأن الصلاة بتاخد من وقتك اللي ممكن المفروض تكون بتشتغل/ بتذاكر فيه عشان يطلع لك بعد كده راتب و تقدر تطلع منه زكاة.
٤- الحج ؛ لأنك بتستقبل القبلة يعني بتستقبل مكان الكعبة .
-
أقم صلاتك ، أستشعرها و أخشع فيها .. الصلاة راحة ليك مش حمل عليك .