* الجــزء الرابــع عشــر *
رايد بصراخ = لاااااااااااااا .. والله لاذبحه ... والله لاعلمكم منهو راااايد
عمر = ماراح تستفيد شي .. الشرطة على طول بتقبض عليك
رايد = ماعلي من احد ... خلنيييي عمر خلنيييييييي
وش اسوي الحين .. كيف اخذ السكينة منه .. مشيت خطوة بس صارخ علي رايد بصوت عالي وهو يمشي على ورا لين لصق ظهره بالباب
رايد = والله لاحذف السكينة عليك .. خلنييييييي .. ابعد عنييييي
التفت رايد على الباب وبعدها التفت لي بسرعة .. وبيده اليسرى اللي ماسكة المفتاح تحسس على مقبض الباب وعيونه علي
رايد = لا تتبعنيييييي .. ابروح اشغل السيارة .. ارجع .. مابيك تتبعني
رفعت يدي اليسرى احاول اهديه
عمر = رايد لحظة لحظة .. خلنا نفــ
قاطعني رايد يسكتني
رايد = ابروح لعمي والله لاذبحه ... اذلف اذلف
عمر مرتبك = طيب طيب مثل ماتبي .. بس البس ثوبك على الاقل ( وابتسمت مرتبك ) بتطلع كذا ؟
رايد = مالك دخل .. لا تتبعني .. ارجع ارجع .. والله لاحذف السكينة عليك اذا قربت مني ( ورفع السكينة فوق .. شوي و يحذفها علي )
شهقت .. ياربي وش اسوي مع هالمتهور ...
تذكرت عكازي اللي معي .. وضغطت بيدي على العكاز
عمر = رايد مب كذا تحل مشاكلك مع عمك
رايد = مااااااااااالك دخل ... مااااااااعلي منكم
قطبت حواجبي اخوفه ورفعت عكازي فوق
عمر بعصبية = ترا بعكازي الحين ... نزل السكينه اشوف
ومشيت خطوة بس وقفت بمكاني يوم شفت رايد يحرك السكينة بقوة عشان ما اقرب منه
رايد بصراخ = ياااويلك .. لا تقرب
خايف يحذف السكينة علي صدق ... رايد مب بعقله
عمر = آآآآ .. طيب ابروح معك ( ومشيت خطوة احاول اقرب منه اكثر )
صاح رايد فيني
رايد بصراخ = لااااااااااااااااااا تقررررررررررب
وقفت بمكاني وانا الى الحين رافع عكازي فوق
عمر = رايد السيارة مب لي
رايد بعصبية = مالك دخل .. والله لاذبحه
عيني مع السكينة اللي يحركها رايد بجنون .. بيجني على نفسه هالخبل
اخذت نفس وبحركة سريعة مشيت بخطوات طويلة و هويت بعكازي بقوة على يد رايد اللي ماسكة السكينة
صاح رايد باعلى صوته بألم ومسك يده اللي ضربتها بالعكاز وطاحت السكينة بمسافة قريبة منه
حذفت عكازي وهجمت على رايد وطرحته بالارض وركبت فوقه.. حاولت اجلس على بطنه بس ماقدرت بسبب الجرح اللي برجلي .. وحشرته بالارض متمدد فوقه عشان اثبته بالارض ومايتحرك
عمر بصراخ = خبل انت ... كذا بتاخذ حقك ؟
بكى رايد اكثر بقلة حيلة وهو تحتي ومنقهر
رايد = وخررر مالك دخل .. خلني ارووووووح ( وصاح بألم ) آآآآآه يدي يدي
عمر بعصبية = وش قالك عقلك ... بتذبح عمك... ماتستفيد الا القصاص يابقرة
ضرب رايد راسه بالارض منقهر
رايد وهو يبكي = قهرني قهرني قهرني ..( يعيد الكلمة وهو يضرب راسه بالارض بقوة من القهر )
بسرعة حطيت يدي تحت راسه عن الارض وتنهدت
عمر = خلاص رايد .. حقك بيرجع وشوله منقهر
رايد وهو يبكي = ياكل من فلوسي وانا جوعان .. يلبس هو وعياله من فلوسي وانا ماعندي الا ثوبي اللي ماغيرته من ثلاث شهور ... ابي حقي .. ابي ارجع لاخواني
وبكى بصوت مسموع
عمر = حقك بيرجعلك بس ماهو بطريقتك هذي
رايد بصراخ = وخر .. يدي تعورنيييي
انا اثقل منه وهو عصاليك واصغر مني .. انقلبت على جنبي ونزلت عنه وبعدها جلست على الارض
التفتت على رايد ولقيته ماسك يده اليمنى اللي ضربتها بالعكاز والى الحين مستلقي على ظهره ..
كسر خاطري والله
عمر = خلاص رايد قم ندخل
انبطح رايد على بطنه على الارض وغطى وجهه بذراعه بيأس وقعد يبكي بصوت مسموع
تنهدت .. لا حول ولا قوة الا بالله
تلفتت ادور المفتاح ولقيته تحت الباب .. ولأننا قريبين من الباب انسدحت على ظهري ومديت يدي واخذت المفتاح وجلست مرة ثانية
حطيت يدي على فخذي يوم حسيت بعوارها .. يارب ماتنفك الخياطة مرة ثانية .. ابي اتشافى منها بسرعة تعبت وانا اعرج .. حسبي الله عليك بامعاذ
التفتت لرايد ولقيته الى الحين على وضعه يبكي
حطيت يدي على ظهره
عمر = خلاص رايد قم ياشيخ .. تراك تعبتني معك .. حقك بتاخذه ( وهمست بصوت خفيف ) ولو بعد حين
مارد علي
مسكت ذراعه وجلسته غصب
دموعه اربع اربع ووجهه احمر
رايد بصوت باكي = ابي ارجع بيتنا بالرياض .. عمي بااااعه .. ( وطالعني بيأس وعيونه حمر ) ماخلا لي شي ..
عمر = خلاص اهدا الحين ( وحطيت يدي على كتفه ) قم ندخل البيت وارتاح وبكرة لها الف حلال
حط رايد يده اليسرى على صدره يوم حس بضيق بنفسه
رايد = ماااالي بيت .. عمي باع بيتنا ( وزاد بكاه اكثر )
حسيت بتطلع دموعي من شكله .. يالله يسحب نفسه من القهر .. ودموعه مغطيه وجهه .. وصوت بكاه وهو منقهر يكسر خاطري
رفعت نظري للسماء .. احاول امنع دموعي ماتنزل.. واخذت نفس اهدي نفسي
طالعت رايد مرة ثانية وهو الى الحين يبكي .. وماقدرت امنع نفسي سحبته لصدري وضميته ولفيت يديني حولينه
عمر بهمس = خلاص رايد
صح خواف .. ودايم مفهي لكن مسكين .. متشرد وما بيده ريال
لف رايد يده اليسرى على رقبتي وتشبث فيني وغطى وجهه على كتفي وهو يبكي
رايد = ابي حقي عمر ... ليه ياخذ راتب ابوي لييييه ... هو ابوي انا ماهو ابوه عمر والله ماهو ابوووه ..
رصيت رايد اكثر متأثر من اسلوبه في الكلام .. رايد مراهق .. صغير .. يصفقه عمه على هواه
رايد وهو يبكي = ليتني مت بالحادث ليتني مت
رفعت يدي ومسحت دمعتي اللي طلعت غصب عني ..
كيف ارجع حقه ... مابيدي شي اسويه
ابعدت رايد عني وقمت واقف وقومته غصب وانا ساكت ماتكلمت بكلمة ( خانقتني العبرة )
دخلنا البيت وقدت رايد للكنبة اللي بالصاله وجلسته عليها ... بس رايد انسدح على طول وغطى وجهه بأرضية الكنبة عني وهو ماسك يده اللي ضربتها بالعكاز
اعتدلت واقف واخذت نفس اهدي نفسي .. رحت للطاولة الصغيرة ووخرت ثوبي عنها واخذتها وحطيتها قدام كنبة رايد وجلست على الطاولة
عمر = رايد لا تفكر باللي فكرت فيه مرة ثانية
مغطي وجهه عني وما اسمع الا صوت مشاهقته
انتبهت انه الى الحين ماسك يده .. تنهدت شكلي عورته .. مديت يدي وسحبت يده اليمنى عشان اشوفها
عمر = وش فيها يدك .. لا يكون عورتك ؟
سحب رايد يده مني وضمها لصدره
رايد بصوت باكي = خلني بحالي
عمر = خلني اوديك الطوارئ يشوفونها
رايد = لا .. مالك دخل فيني .. خلني
جلست شوي وانا اطالعه .. شسوات الحين .. اخاف يتهور مرة ثانية .. ما اقدر اثق بعقله الحين ..
قمت وطلعت من الصاله ... من اليوم ورايح لازم مايطلع الا بعلمي
قفلت الباب الداخلي اللي يطلع للحوش .. ورحت للباب الداخلي الخلفي وقفلته
البابين هذولي بس هم اللي يطلعون للحوش .. ومن اليوم ورايح راح احبسه ..... ياربي الحين وشلون اوديه بكرة لدانة ..
تنهدت لما تذكرت دانة وهمست
عمر بهمس = دانه .. اخوك مجنون
الجمعة .. الساعة 11 ونص
قمت من النوم مكسل .. التفتت لمكان رايد ولقيته نايم على وضعه امس
انا مانمت الا بعد الفجر ... طار النوم عني بعد جنون رايد امس ومانمت الا بعد الفجر حتى الصلاة ماصليتها الا في البيت
رحت للمطبخ وانا اعرج .. جوعان .. بس كالعادة مالقيت شي ينفع للاكل جاهز
الا يعيني احتري وقت الغدا
رجعت للصاله وجلست على الكنبة مكسل .. التفتت على رايد .. وشلون الحين .. كيف يشوف دانه من دون مايمر على عمه ..
اخذت الريموت وقعدت اقلب في القنوات وبالي مشغول
شوي و تحرك رايد فجأة ورفع راسه يطالعني وبعدها جلس
ابتسمت
عمر = صح النوم
مارد علي وقام واقف وطلع من الصاله
عمر مستغرب = وين رااايح ؟
رايد = للحمام
عشر دقايق ورجع .. لاحظت عليه مايحرك يده اليمنى
عمر = يدك الى الحين تعورك ؟
جلس رايد على الكنبة بهدوء
رايد = شوي
قمت وجلست بجنبه وحطيت يدي على كتفه
عمر = هونها وتهون
يطالع الارض بحزن وساكت
عمر = رايد اسمعني زين ... ( التفتت للتلفون ورجعت التفت لرايد ) متى اخر مرة كلمت اختك الكبيرة على التلفون ؟
رايد بحزن = ماعمري كلمتها .. ( وتغير صوته ) هي يالله يالله تكلم خوالي
طيرت عيوني مستغرب بس سكتت ولا علقت
عمر = طيب كلمها الحين وخذ اخواتك واطلعوا على السيارة لاي مكان .. وتكلموا براحتكم
التفت رايد مستغرب
رايد = وشلون اخذهم .. عمي ماراح يسمح لهم
عمر = مب على كيفه .. انت اخوهم .. ماهن طلعات مع واحد غريب .. وماله حق يمنعك ... ( نزلت يدي عن كتفه ومسحت على ظهره ) انت مشكلتك ماعندك وسط .. يإما خايف من عمك مرة يأما بتخلص عليه مرة وحدة .. ماتعرف تواجه عمك بعقل ؟ خذ اخواتك لاي مكان وتكلموا وبعدها رجعهم للبيت .. فيها شي غلط هذي ؟
هز رايد راسه بلا و بيأس
رايد = انت مانت فاهم شي
عمر = فهمني طيب
رايد بضيق = مرة اختي الكبيرة بغت المستشفى .. قلت لها ابوديك بس هي خايفة من عمي .. تقول انت ماراح يجيك شي .. بس هي راح يضربونها اذا طلعت من دون علمهم
عمر = وليش تطلع من دون علمهم ؟
التفت رايد يطالعني مستغرب
رايد = وشلون اجل اخذها للمستشفى
عمر = اتصل على عمك بالتلفون وقل ياعم ابي اخذ فلانه للمستشفى .. و بس
رايد بصراخ = بعيي
عمر = وليه يعيي مب على كيفه .. اخت طالعه مع اخوها .. فيها شي ؟ مشكلتك انك خايف منه .. ابن امه يعيي ... وماله حق اصلا يعيي ..
سكتت رايد يفكر و سكتت انا .. الصراحة ابي اسأله ليه اخته الكبيرة تبي المستشفى بس خفت يعصب علي اذا سألت عن خصوصياتها .. لو دانه اقدر اسأله عنها بس اخته الكبيرة صعبة
ورفعت حواجبي لما تذكرت شي .. صح رايد قالي مرة يوم كنا بالاستراحة ان اخته مجنونة او حاجة زي كذا ... والحين يبي يوديها المستشفى .. لا يكون اخته الكبيرة مختلة عقليا
طالعت رايد ولقيته الى الحين متردد
عمر = يله اتصل عليهم الحين .. وقل بكرة ابي اخذ فلانه للمستشفى
التفتت رايد لي بخوف = وبيوافق ؟
تمللت منه
عمر بملل = ومن اليوم وش اقول ؟ اقولك ماله حق يوافق او مايوافق .. انت اخوها ... يله رح كلمهم
رايد بتردد = طيب وشلون اخدهم ماعندي سيارة
عمر = خذ سيارتي .. يله قم كلمهم
قام رايد وجلس على الكنبة القريبة من التلفون وحط التلفون بحظنه .. ورفع راسه كأنه يفكر
عمر = وش فيك ؟
رايد وهو يفكر = احاول اتذكر رقمهم
اخذ عشر دقايق ورايد يتصل وكل شوي يرد عليه رقم غلط ويرجع يحاول بارقام قريبة من رقمهم لين اخيرا جابه صح
رايد = الوووو .. هذا بيت ابو بندر ؟ ...... آآآ .. عطيني عمي ........ ايه انا رايد ......... عطيني عمي ابكلمه ...... لا الحين ابيه عطينيااه ........ تو الصلاة باقي عليها انا بس ابكلمه شوي ......... ( رفع رايد نظره لي وهمس يوجه كلامه لي ) الحين بيكلمني
هزيت راسي بايه اشجعه
فجأة ارتبك رايد والتلفون باذنه
رايد مرتبك = الووووو .. عمي انا رايد ( وسكت شوي يسمع كلام عمه ) انا مب صايع انت اللي طردتني يعني انت اللي صيعتني مب انا
هزيت راسي من اسلوب رايد بالكلام
رايد = ابي اخذ اخواتي بكرة ... ابي اخذهم بالسيارة .... ليه ... اباخذهم شوي وارجعهم .... مب على سيارتك بسيارة خويي ... ليه لا طيب ؟ ....... ( رفع نظره لي وبعدها نزل نظره للارض وهمس باسم اخته عشان ما اسمعه ) مريم تبي المستشفى ( ورجع صوته طبيعي ) وانا بوديها واباخذ دانه معنا
بغيت اضحك على اسلوبه .. انا شفت اسمها بكرت عايلتهم .. واعرف ان اسمها مريم .. الغبي وشوله يهمس باسمها عني خايف اعرف اسمها يعني ؟ .. شكله نسى انه عطاني كرت العايلة بنفسه .. صدق بزر .. يذكرني يوم كنا مراهين بالمتوسط كل واحد يتحدى الثاني باسم امه .. انا عرفت اسم ام فلان وانا عرفت اسم ام علان
انتبهت على صرخة رايد
رايد بصراخ = ليه لا طيب ليه لا ( وتغير صوته ) انت ليه معنا كذا وش سوينا لك
اشرت لرايد بيدي عشان يطالعني وهمست له
عمر = قل هن اخواتي واتحداك تمنعنا .. رايد خلك قوي
نزل رايد نظره للارض وعاد كلامي لعمه
رايد = هن اخواتي واتحداك تمنعنا ... ابجي بكرة واخذهم ... ( سكت شوي يسمع عمه وبعدها رفع صوته منقهر ) الا ابخذهم .. ( وتغير وجهه شوي ويبكي )
يوم شفته قرب يبكي .. اشرت له بيدي بسرعة يعني سكر بوجهه .. ما ابي عمه يعرف انه ضعيف وعلى طول يبكي
سكر رايد السماعة وطالعني وهو شوي ويبكي
رايد = عيااا
عمر بعصبية = وش فيك انت ... اقولك خلك قوي .. تقوم تبكي
رايد وهو يمش خشمه بيده = مابكيت
عمر = شوي وتبكي
لف رايد وجهه عني وسكت
عمر بتنهيدة = وش قال ؟
رد علي رايد وهو لاف وجهه عني
رايد = يقول انت صايع مابيك تاخذهم
عمر = ماعليك منه ... بكرة انا وانت نروح لحارة جدي تاخذ انت السيارة وتاخذ اخواتك وروحوا للمكان اللي تبون
التفت رايد بيأس
رايد = بس هو عيا
عمر = ماعليك منه اقول ... هن اخواتك وانت اخوهم .. انت بس كلم اختك وحددلها الوقت عشان تصير جاهزة
التفت رايد لي
رايد = وشلون اكلمها ماراح يعطوني اياها اكلمها
عمر = ماعندها جوال ؟
رايد = لا
سكتت افكر .. فجأة سمعت الجامع يذن للجمعة
عمر = نشوف بعدين وشلون تكلمها .. قم تروش
طاعني رايد و راح يتسبح .. ماطلبت منه يروح يتروش لله .. ابي أي شي يشغله عني عشان افتح البيبان الداخليه ولا يحس اني حابسه
استغليت غيابه ورحت افتح الباب الداخلي للحوش ... مدام اني عنده ماله داعي اقفل عليه ... اما اذا رحت للجامعة وقتها صح اقفل عليه وهو مايدري
طلعت للحوش ولقيت السكينة وعكازي طايحات بالارض على وضعهم البارح
اخذتهم ودخلت البيت .. تسبحت وطلعنا للجامع انا ورايد
الساعة 2 الظهر
جالسين بالارض انا ورايد ونتغدى وكالعادة غدا مطعم
ماد رجلي بسبب الجرح ورايد جالس بالارض مقابلني وياكل بشراهه .. وكل ماحط لقمة بفمه شكا من يده اليمنى
رايد بعد ماحط اللقمة بفمه = يدي تعورني
عمر وعيني على الصحن = احسن عشان مرة ثانية ماتفكر مثل تفكيرك امس
رايد = انت دفش تضرب بقوة
رفعت راسي له
عمر = والله مادري من اللي امس شوي و يقطعني شرايح لحم .. المهم ماعلينا .. اسمع .. وشلون الحين تكلم اختك الكبيرة تتجهز تطلعون بكرة بالسيارة ؟
رايد = يالله يالله كلمت عمي بالتلفون تبيني اكلمها هي .. مافيه الا اروح لها اليوم للبيت مثل دايم واقولها تتجهز بكرة
طيرت عيوني .. هه بعد جنونه امس بيدخل بيت عمه .. يحلم
عمر = تحلّم بس تحلّم .. روحه لبيت عمك انسى
رايد مستغرب = ليه وشلون اشوف اختي اجل ؟
عمر = وانا مقترح عليك تاخذهم بالسيارة ليه .. عشان تشوفهم بعيد عن عمك .. انت بعد خبالك امس .. انسى تدخل بيت عمك مرة ثانية .. تفهم ؟
رايد = ماني مسوي شي .. بس ابشوف اختي واقولها تطلع بكرة .. ابكلمها مثل العادة بالملحق وقت الظهر ... هم دايم بهالوقت يتغدون مايدرون عنا اننا بالملحق
اهااا عشان كذا مايروح لاخواته الا الظهر .. عشان وقت غداهم
تنهدت وسكتت شوي افكر
عمر بتفكير = امممم اسمع المغرب نروح لحارة جدي .. امس دانه ماطلعت تلعب بالشارع الا المغرب .. خذ ورقة واكتب لاختك الكبيرة وارسلها مع دانه
ابتسم رايد بفرح
رايد = صح .. فكرة
ابتسمت معجب بذكائي
عمر وانا نافخ صدري = طول عمري ذكي
خلصنا من الغدا وجلسنا على التلفزيون نتفرج وكل واحد معه بيبسيه
فجأة التفت رايد لي
رايد = صح عمر .. امس الساعة 10 بالليل جا نايف و طق جرس الباب وطوّل وهو يطق
التفتت لرايد منصدم
عمر = لا يكون فتحتله
رايد = لا انا مافتحت الباب .. بس رحت فوق لغرفتك اشوف منهو وشفته نايف
سكتت منقهر من نايف .. هذا الى الحين مانمسك
عمر = وش يحسب نفسه هذا .. اببلغ عليه ( واخذت جوالي )
رايد بخوف = لا لا لا .. تكفى لا تبلغ
التفت معصب من رايد هالخواف
عمر بعصبية = ياخي وش فيك خايف منه
رايد بخوف = قلتلك هددني بدانه
عمر بصراخ = تراك معطيه اكبر من حجمه ... ياخبل مايقدر يسوي شي .. اصلا راح ينمسك .. وش بيسوي وهو ممسوك
رايد = هو قال لا تحسب اذا بلغت علي اننا انتهينا ... يمكن يرسل احد .. وبعدين هو صح راح يمسكونه بس شهر شهرين و يطلع
سكتت .. صح كلامه ... اذا مسكته الهيئة شهر شهرين نقول خمس شهور وياخذون منه تعهد ويطلعونه ... صح ... نايف وسعد مشكلتهم ماهي كبيرة عشان ينسجنون سنه سنتين ... هم بس يشترون من العامل
نزلت جوالي على الطاولة الصغيرة وانا افكر بنايف وسعد
نقز رايد يوم سمعنا جرس الباب فجأة .. والتفت لي بخوف
رايد = اكيد هذا نايف
التفتت لرايد منصدم
عمر = اذكر القط يجيك ينط .. وش جابه الحين
رايد = انا ادري
نزلت البيبسي اللي بيدي وقمت
عمر = خلك هنا ابروح اشوف
رايد = بتفتحله ؟
مارديت عليه واخذت عكازي .. راح احتاج هالعكاز اكيد و طلعت للحوش .. وش يحسب نفسه هذا .. انا راح اربيه ... على باله اني مثل رايد خواف ... افتحله وافتح لابوه .. ويأنا ياهو
وفتحت باب الشارع معصب وكلي استعداد للهوشه والبكوس
فجأة شفت وجه مصعب قدامي
عمر مستغرب = مصعب ؟
ابتسم مصعب
مصعب بابتسامة = السلام عليكم .. جيت اشوف ضيفك
قطبت حواجبي .. ضيفي ؟
تذكرت اني علمت مصعب عن رايد ..
حط مصعب يده على صدري ووخرني عن طريقه ودخل الحوش متوجه داخل البيت
التفتت لمصعب
عمر = هيييييه انت على وين .. اظني الى الحين ماسمحتلك تدخل
التفت مصعب لي وابتسم بمرح
مصعب = يابن الحلال مابيننا رسميات ... وبعدين بيتك مافيه حريم .. عادي ادخل على طول .. ياخي مافيها شي
التفتت للباب وسكرته بقوة معصب .. مسكوها علي .. بيتك مافيه حريم بيتك مافيه حريم ... اخ يالقهر صاير بيتي سبيل لكل من هب ودب .. اول نايف والحين مصعب وقبلهم اغصبوني الشباب اسكن رايد عندي .. ليه .. لان بيتي مافيه حريم
صدق البيت اللي مافيه حريم يصير ماله هيبه .. يصير عش للي ماله عش
التفتت لمصعب
عمر بعصبية = حتى ولو مافيه حريم .. مالك حق تدرعم بهالشكل
ومشيت قدامه اعرج .. سمعت مصعب يكلمني وهو يمشي وراي
مصعب = طيب وش فيك معصب ...
دخلنا الصاله عند رايد
قام رايد منصدم يوم شاف مصعب ... واخذ شوي عشان يستوعب
مصعب بفرح = رايد عاش من شافك ... ( ولما شاف رايد واقف وفاهي ) وش فيك ماعرفتني ؟
ضحك رايد بفرح وراح لمصعب وسلم عليه
رايد = مصعب اشتقتلك والله ...
مصعب = ههههههه .. وينك يارجال ( والتفت لي ) اثرك ساكن مع ولد عمي وانا اخر من يعلم
جلست على الكنبة وقعدت اتفرج عليهم
واقفين بنص الصاله ..
رايد = مصعب دايم اتمنى اشوفك واشكرك على كل اللي سويته معي ... انت الوحيد اللي وقف معي لين امشي مرة ثانية على رجولي ..
مصعب = يارجال ماسوينا شي ... وينك اختفيت ؟ انا سمعت ان عمك طردك
نزل رايد راسه بحزن
رايد = ايه
عمر = بتظلون واقفين كذا
التفت مصعب لي وضحك ..
مصعب = ههههههههههه والله عمر اخر شي تخيلته رايد يسكن معك هههههههههه
وجا وجلس بجنبي على الكنبة
رفعت حواجبي وانا اطالعه .. على كل شي يضحك هذا .. الحمد الله والشكر
واحد على كل شي يصيح والثاني على كل شي يضحك
جا رايد وجلس على الطاولة الصغيرة قدامنا
رايد = مصعب .. انا من زمان اعرف ان عمر ولد عمك ...
قرب مصعب وجهه من رايد
مصعب = صح تعال .. وشلونها رجولك .. خلصت جلساتك بالمستشفى ؟
وقعدوا يتبادلون الاخبار بينهم .. وانا جالس واتسمع لهم ويوم خلصوا من بعض .. التفت مصعب لي ومد يده وحطها على الشاش اللي براسي
مصعب = وانت ماعلمتنا امس من وش هذا ؟
نزلت يده عني بضيق
عمر = لا تحشر خشمك واجد
شفت بطرف عيني مصعب يطالعني و ساكت وكأنه انجرح من معاملتي معه قدام رايد
قام رايد يوم شاف وضعنا ووجه كلامه لمصعب
رايد = آآآآ .. مصعب .. ابروح اسوي شاهي.. دقايق
وطلع من الصاله
اخذنا شوي وانا ومصعب ساكتين... انا اطالع التلفزيون وساكت .. ومصعب الى الحين يطالعني وساكت
فجأة همس لي مصعب بصوت خفيف
مصعب بهمس = عمر .. انت ليه معي كذا .؟
مارديت
مصعب = احاول اتقرب لك بس انت تبعد
مارديت
مصعب = يوم عرفت انك ضفيت هاليتيم عندك ... فرحت قلت والله عمر كبير بس يبي نتعرف عليه اكثر ... امس طوال الليل افكر فيك اقول لنفسي انا عارف ان ولد عمي طيب بس كثرة الهوشات بينا من يوم كنا صغار بعدتنا عن بعض
نزلت راسي وانا اسمعه
مصعب = مشكلتنا كبرنا والى الحين الهوشات بيننا
وسكت يحتريني اتكلم بس مارديت عليه
مصعب = صدقني عمر لو اشوف هالشاش براس اخوي معاذ والا سعود افزعله وماهي بعيدة يكون هذا اخر يوم بعمره ... ونفس الشي معاذ وسعود معي لو كنت انا المتضرر .. بس انت مين يفزعلك .. ماعندك اخو عضيد لك بهالدنيا ... وفوق هذا متكبر ومغرور على عيال عمك ... انا مستعد افزعلك على اللي ضربك واكون سندك بس انت بعدتني عنك والى الحين تبعدني عنك
همست بألم
عمر بهمس = ما احتاج لاحد .. من يوم طلعت على الدنيا مالي سند .. من يوم طلعت على الدنيا وانا وحيد .. من يوم كنا صغار لما نتهاوش اشوفك انت ومعاذ توقفون مع بعض وانا لحالي بينكم جت على هذي ( واشرت على الجرح براسي ) ... ما احتاج لك ولا لغيرك ... واللي ضربني اقدر اخذ حقي منه .. اتطمن ما احتاجك
مصعب = شفت يوم اقولك متكبر .. ماتصدقني
عمر = وفوق هذا اخذتوا امي الانسانة الوحيدة اللي ساكنه معي .. كأنـــ
انفعل مصعب وقاطعني بصراخ
مصعب بصراخ = اللي يسمعك يقول انا اللي ماخذها ... ابوي بغى حرمة ثانية وماشاف الا امك انسب وحدة له .. لا تتعذر بامك .. انت هذا اسلوبك معنا من قبل مايتزوجون امك وابوي
رفعت راسي اطالع التلفزيون وهمست
عمر = لا تطول صوتك علي ... شف اسلوب معاذ معي ثم تعال كلمني .. ( والتفتت له ) عمرك وقفت بوجه اخوك عشاني ؟
مصعب بتحدي = هذا انت قلتها اخوي
طالعته منجرح بس تكمتها بصدري ( والتفتت للتلفزيون ) صح معه حق اخوه .. انا وحيد واببقى طول عمري وحيد
مصعب = معاذ على الاقل مايغلط على احد وماهو مغرور مثلك
ابتسمت بسخرية
عمر = هه صح مايغلط .. لدرجة اني ما انقلبت بسيارتي ابد
مصعب = ذيك المرة كانت مزحة وماكان يقصد ... وفوق هذا انت حشرتني مع معاذ واخذت مكافئتي وانا مالي ذنب ( وسكت شوي ) عمر انا ولد عمك وامد يدي لك ومستعد افزعلك للي ضربك او لأي شي تبيه .. بس لا تردني
عمر = ماحتاجك
مصعب = عمر صف قلبك شوي
مارديت
مصعب بتنهيدة = ليه قلبك اسود
جيت ابرد عليه بس سكتت يوم شفت رايد يدخل علينا ومعه صينية الشاهي
* رايد *
نزلت الصينية على الطاولة الصغيرة ومسكت يدي اللي عورتني من شيلة الصينية والتفتت لعمر و مصعب .. سمعت صوت مصعب عالي وانا بالمطبخ بس ماميزت منه شي ... والحين سكتوا يوم شافوني ... احس الجو متكهرب بينهم
صبيت شاهي ومديته على عمر بس حرك يده يعني مابي
ومديته على مصعب واخذها
اعتدلت واقف محتار اروح عشان يكملون كلامهم والا اقعد ... انا اعرف ان عمر يكره عيال عمه .. بس وش اللي بينهم وليه .. مدري
طالعت عمر ولقيته منزل راسه ويلعب بالعكاز اللي راكزها على كتفه
اخيرا قررت اجلس عندهم عشان مصعب بس .. من زمان عنه .. صبيت لنفسي شاهي وجلست على كنبة مستقله عنهم
نزل مصعب الشاهي على الطاولة الصغيرة والتفت لي بابتسامة
مصعب = رايد من زمان وانت هنا ؟
هزيت راسي بلا وانا اشوف عمر الى الحين سرحان
رايد = لا .. ( وطالعت مصعب ) كنت باستراحة شباب بس صارت مشكلة بالاستراحة وجيت هنا مع عمر ( وابتسمت له ) مصعب انت جاي هنا صدفة والا انت عارف اني هنا ؟
التفت مصعب لعمر وبعدها التفت لي
مصعب = علمني امس عمر انك هنا ( وسكت شوي ) اقول رايد مين اللي فالق عمر براسه ... تعرفه انت ؟
التفت عمر لمصعب
عمر = ياهو انت حشري
مصعب = حشري احسن من مغرور ومتكبر ( والتفت لي يحتريني اجاوب )
ابتسمت معجب بمصعب .. الصراحة احبه اكثر من عمر
رايد = تهاوش مع نايف
قطب مصعب حواجبه مستغرب وعدل نظارته
مصعب مستغرب = مين نايف .. وليه ؟ اخاف ولد عمي هو الغلطان كعادته .. رايد تعرف سبب الهوشة انت ؟
التفت عمر للتلفزيون ووجه كلامه لمصعب
عمر = مالت عليك ... تقول ابفزعلك واخر شي تبي تحطني انا الغلطان
التفت مصعب لعمر وهمس
مصعب بهمس = انا ماقلت انك غلطان انا ابي اعرف سبب الهوشة بس
عمر وعينه على التلفزيون = اكرمني بسكوتك ما ابي منك شي
تدخلت بالكلام قبل يتهاوشون والصراحة ماعجبني اسلوب عمر مع مصعب
رايد = آآآآ .. نايف كان يبيني وعمر يبي يدافع عني وتهاوش مع نايف وطاح على الطاولة هذي ( واشرت على الطاولة الصغيرة ) .. بس
مصعب = كان يبيك انت ؟
رايد = ايه ... وعمر تهاوش مع نايف يدافع عني .. بس هذي كل السالفة
ابتسم مصعب والتفت باعجاب لعمر وسكت وهو يطالعه
بس عمر ماعبره ولا التفت له ... يطالع التلفزيون وساكت
مصعب بفرح = راعي فزعات ولد عمي ( والتفت لي بمرح ) هذي العناوين عطني التفاصيل
ضحكت مستانس ومعجب فيه .. يمزح ويضحك احسن من عمر اللي ماعمري شفته يمزح وفوق هذا دفش
و قبل ارد عليه .. التفت عمر لمصعب وصارخ بوجهه
عمر بصراخ = ياخي انت احد مسلطك علينا .. وش تفاصيله اللي تبي .. شفت رايد خلاص توكل على الله .. وبعدين ياهدر فيه احد يجي وقت القايلة .. ابي انام
تضايقت من اسلوب عمر مع مصعب ... ليه كذا ياعمر .. مصعب مايستاهل اللي يطرده بس سكتت ما اقدر اتدخل .. البيت بيت عمر مااقدر اقول شي
مصعب = رح فوق ونام .. ماحد منعك ( اخذ شاهيه وقام وجلس بالكنبة اللي بجنبي والتفت لي ) ما عليك منه .. علمني بكل السالفة
التفتت لعمر ولقيته يطالع مصعب وهو معصب .. ورجعت التفت لمصعب وعلمته عن نايف بكل شي .. انه يشري خمر من عامل وكان يرسلني وووووووو الى اخر شي .. يوم يطق نايف الباب علي امس وعمر ماهو موجود
مصعب مستغرب = امس جاك هنا بالبيت بعد ؟ .. يعني شكله مصر اللي اسمه نايف هذا ؟
رايد = ايه .. بس مادري وش يبي مني .. والله اني ماعلمت الهيئة بس هو عيا يصدق
التفت مصعب لعمر = نايف هذا يدرس معنا بالجامعة ؟
عمر بضيق وهو يطالع التلفزيون = خلك على جنب مالك دخل فيه
مصعب = يله عاد .. معنا بالجامعة والا لا ؟
التفت عمر معصب
عمر = ياهو انت نشبه ( وزفر بضيق ) ايه كان .. بس الحين مايجي عشان الهيئة ماتمسكه
مصعب = خلاص عطوني اسمه كامل وانا ابلغ عليه
شهقت وصحت بصوت عالي
رايد = لااااااااااا .. هو مهددني باختي دانه .. تكفى لا تبلغ عليه
وعلمته بكل شي
مصعب بعصبية = حقير .. اثره بعد يعرف اختك
قعدنا فترةو انا ومصعب نسولف ونتكلم
شفت عمر ينعس وهو جالس .. اخذ شوي وانسدح على الكنبة وهو متضايق
عمر = افففففففف هذا ماهو ناوي يروح ... ( والتفت لمصعب ) ودي انام ياهووووو .. توكل على الله رح
قرب مصعب راسه لي وهمس
مصعب = الله يعينك عليه .. وشلون متحمله انت
ضحكت بس ماعلقت
اخذنا شوي وانا ومصعب نكمل سواليف .. احيان عن نايف واحيان عن حقي اللي اخذه عمي واحيان وشلون اعتمد على نفسي وارجع لاخواتي
لين اذن العصر وحنا الى الحين نسولف
التفتنا لعمر ولقيناه متمدد على الكنبة و نايم
استغليت الفرصة وقربت لمصعب وهمست باذنه خايف من عمر يسمعني
رايد بهمس = مصعب لا يكون زعلت من اسلوب عمر ... تراه هو كذا دفش
تنهد مصعب وهو يطالع عمر
مصعب بهمس = انا اعرف انه يعاني من الوحدة بس مشكلته مغرور ومايحب الا نفسه
رايد = لا بالعكس هو طيب ..
مصعب = عجزت افهمه ( والتفت لي وقام ) المهم انا طالع
وصلته للحوش وعطاني رقم جواله بورقه وراح .. يقول اذا احتجتني او جاكم نايف اتصل علي
دخلت البيت وانا مستانس بزيارة مصعب .. ولقيت عمر الى الحين نايم
المغرب
طلعنا انا وعمر لحارة عمي .. وان شاء الله القى دانه تلعب بالشارع وارسل لمريم رساله معها مثل خطة عمر ... مدري ليه خايف من عمي ... ماراح يسمح لها تطلع معي
تنهدت متضايق .. اذا تذكرت كلام عمر تشجعت بس على طول يرجع لي الخوف مرة ثانية
على قولت عمر اخت واخوها طالعين مع بعض فيها شي ... سترك يارب
|