منتدى وندر لاند - عرض مشاركة واحدة

مشاهدة أوسمتي · 06-23-2020, 06:43 PM

((2))
شهر مضى شهر من عمري .. وانا انتظر اغلا اثنين على قلبي كله ..
انتظر نايف .. يتخرج وصورته ماتفارقني ابد .. حتى بنومي اشوفه احلا فارس ..
يمكن في البدايه خفت اني اقوله اني احبه بس شكرن ياربي سهلت اموري معه ..
ويارب تبعد سلمى ..
انا موب حقوده علشان اقول يصير فيها شي .. مهما يكون هي مو ذنبها اول ماتكبر يقولون لها انتي لـ نايف .. ولا هو ذنبي وانا احبه قبلها ..
ودام نايف اختارني انا .. الله يوفقها مع غيره ..!
صحيح اني مااحبها مره لانها تحب تعاندني وتغايضني بأنها لنايف ..
انا صحيح مااحب اتزوج واحد فيه غيري يحبه لكن دامني انا اللي حبيته قبلها .. انا اسفه سلمى مااقدر اتخلى عنه دامه اختارني صدقيني لو اختارك رغم حزني بكون سعيدة لك لكن ماعندي شي اقوله اكثر من كيذا .. الله يوفقك ..!
وانتظر فيصل الشخص الثاني ..
اللي باقي له كم اسبوع ويرجع من شهر عسله مع نجوى ..
مع نجوى اللي انا متأكده مليون بالميه انها معيشته على احلا عيشه ..
سعيدة جدا لاني قربتها لك وكمان قربت نوير وعلمتها وشلون تصلح الغلط .. فيه شي يقول مدري وشهو مثل ولا حكمه خخخ المهم ياحظ من وفق راسين بالحلال ..!
واااهـ يارب متى اكون مع نايفي ..

فيصل من يوم ملك على نجوى معاد صرت اشوفه مغير الا يوم الجمعه ولقطات هاه يعني .. بالساعات مرتز عند نجيو احسن من مروى
صحيح نسيت اقولكم شي يمكن حدث صار وو شبه نسيته رغم اني حزنت لاني ماحضرت .. ميشو تملك على مروى وسمعت يعني والله اعلم انهم مابيسوون عرس والسبب مدري يمكن فيه شي حكمة لام نايف بس مو مهم عندي ..
بس اخاف انا بعد زفتي تصير كذا .. لالا اكيد نايف الولد الوحيد مستحيل مايسوون له فرح ولا موب أي فرح .. الكل يحضره ..
بس حتى لو ماصار عرس اصلا موب لازم كلها مظاهر تنتهي وتبقى البنت واخلاقها ..

و...
وو...
ووو... مضى شهر ..!
شهر كامل .. يعني ثلاثين يوم بالتمام والكمال ..
وانا على نار انتظر متى يارب اخلص ثانوي .. حطيت كل جهدي هادي السنه بس علشان اتخرج من الثانوي .. انا موب كسلانه بس ظروفي اللي امر فيها غصب عني تخليني ارسب وبعدين فيها تكرار للمعلومات ومااتوقع اني غبيه لهادي الدرجه يعني ماقدرت احفظ اللي قبل ..
ممم كل يوم وفي كل حصه عيني على الساعه متى يارب تجي الحصه الاخيره ويجي تركي ..
يمكن تسألون ليه تركي بقى يوصلني يمكن علشان عمي عنده شغلات بـ أبها صراحه شكيت ان عمي متزوج واحده يعني كل يومين طاقها لابها وعادي ولا كأنه بوه شي ولما يرجع الوجه منور ..
استغفر الله يعني وش العيب لو تزوج ليه بيوزي مرته عننا .. اكيد اشغال بس احب استهبل شوي يمكن اضيع وقتي ..
البيت فاضي ابدا مول ولا احد فيه الا بعض الاحيان اذا طفشت للاخر اصعد لثامر ولد عمي استحي صراحه ارز وجهي عند سامر ونوره بدون عزيمه خلهم بكيفهم ولو انه لو عليهم والله لنا شهر كامل ولا شفت وجههم اصلا زين اذا ارسلت نوير رساله بس ..
ههه مابحسدهم الله يوفقهم ويتمم على كل المحبين يارب ..!

*
*
ناظرت الساعه اووف وراه تأخر ذاه .. حرقتني الشمس برا والبنات شوي ويروحون ..
ثواني وشفته على طول رحت ..
وصعدت السياره ورميت كتلة جسدي وعلى طول تلثمت واطلقت آهـ صغيره ..
لف علي : وش فيك انتي بعد ..
هزيت كتوفي : ابد .. مير اني احس اني تعبت طول الشهر ماطلع منها الا نجوى مسافره و

ه وانا هينا اكرف .. ولا نهى اجازة وطيران .. ونوير مع ذا الوجه مقابله سامر ومرتزتن له ..
نص ابتسامه انرسمت على وجهه : انزين لا تحسدينهم
طلع من وذاني بخار : وش احسدهم هادي غبطه .. غبطه افهم يعني اتمنى الشي عندي بس يتم عندهم ..
رفع لي حاجب وحرك السياره : انتي روحي افحصي تأكدي انك بنت .. وجهك مغسول ابد
طاح وجهي من كلمته .. الحين دامه اعتدل وصار رجال الحين بيكبر راسه ..,
ظليت فتره اناظره الحمدلله اللثمه خافيه ابتسامتي اللي ظهرت فجأه ..
قلت : جزاي افضفض لك ..
سكت عني وطنشني ياكرهي لك تريك لاصرت كذا احس ودي اذبحك ..
ومشينا بهدوء وانا اشوفه بطيء جدا احسن علشان يضيع وقت ويمر الشهر الجاي ونخلص ..
مليت من الهدوء .. قلت : واختك حضرتها ماهي بجايه علشان الاختبارات ..؟
ناظرني ورجع يناظر الطريق وهو رافع حاجب : ليش أي اختبارات ؟
كتمت ضحكت شوي لمدة ثواني ثم ماقدرت وناوي ينجح مع وجهه ذاه ..
ويسألني أي اختبارات بعد ..!!
ضحكت بخفه : اما عاد ! وش أي اختبارات .. نسيت الثنوي يعني اختبارات ومابقى شي ترا ..
كأنه تذكر وتفشل بنفس الوقت ..,
لف بوجهه وهو مبرطم وطفولي .. تفاجأت لما مرينا على البقـّاله ووقف ..
لف علي : تبين شي ..؟
ناظرته فتره ثم قلت : ممم لا .. مممم يصير انزل معك ..
رفع حاجب وفتح الباب ثم لف علي : على تبن !

ضحكت بـ مبزرة عليه ماكان قصدي اقوله كذا بس مليت احس نفسي لاصقه بالكرسي بالساعات اوف بس ..!!
ناظرت ساعتي وجع ايه مايبيني انزل علشان ياخذ راحته ويتجول هنا وهنا .. واتوقع انه يتفشل من شكل البرنسيسه اللي هي انا بنت خاله ..
هـــه ! مع وجهه يبي لي اعطيه طراق يلفه حول نفسه مرتين .. لالا .. موب طراق لا صار رجال نسيت صح .. يبي له مممم .. ههه مايبي له شي ..!

شفته جاء ودخل رمى علي الاكياس وطاحوا بحظني على طول ناظرتهم ورفعت عيني له وهو مطنش ولا عنده فيها وش فيه صاير دفش خخ قلنا تغيّر وصار رجال بس موب كذا ..
ظليت اناظره يمكن الفت انتباهه شوي بس ولا أي حركه تعرفون قسم لولا الحيا اعطيته طراق ..
ولا لف .. قلت بقهر : خير ..؟
مد يده لي ولا هو يناظرني وكانه يقولي افتحيلي شي ..

ماانكر اني انقهرت بس حسيت بسعاده فتحت الكيس بهدوء وبديت اناظر وش به شفت شي بس كتمت ضحكتي لاني بسويها فيه اخذت مصاص احمر وفتحته وحطيته بيده ..
ولا انتبه اصلا وش اخترت له وعلى طول دخله بفمه .. شوي وشاله وناظره ورفع حاجب بنص ابتسامه ..
هنا على طول ضحكت عليه مدري ليش يمكن لان شكله كـ بزر يناسبه ..
لف علي : بزر عندك تعطيني ذاه ..؟
هزيت كتوفي بمكر : تراك انت اللي شاريه موب انا ..
عقد حاجبينه فتره كأنه يفكر بـ عذر .. ثم قال : ايه شريته للبزير اللي بجنبي ..
سكتت فتره استوعب .. ثم شهقت : اييش ..؟
ولا كأنه قال شي رجع المصاص لفمه وكمل يناظر الطريق ..
ابتسمت داخل نفسي على شكله وكأنه بيبي والله بيبي مسويه فيها انجليزي يعني لا والله شكله جونان خخخ ..
طق علي عرق العناد ..
سحبت المصاص من فمه وفتحت الشباك بشويش وكبيت على المصاص مويا يقالي اغسله ورجعت قفلتها .. فكيت لثمتي وحطيته بـ فمي ..
عقد حاجبينه مستنكر اللي سويته ماانكر حسيت بفشله بس كيفي ..
قال : وراك فكيتي اللثمه ..
ووجع .. ماقال ليش اخذتيه من فمي ولا علق اصلا على اني غسلته وكأني اقول اتقرف اكل من بعدك ولا شي .. مافكر الا باللثمه ..!
قلت : ابي اكل ..
رجع يناظر الطريق : وخير يعني ماتعرفين تاكلين الا لما تفتشين .. طايب تبين تاكلين شي كلي شي يناسبك ..
طق عرق النذاله : موب انت اللي قلت انك شاريه لي ..
شفت شبح ابتسامه انرسمت على شفته لف علي وسحب المصاص وحطه بـ فمه ..
وقال : هاتي ..!!

فتحت عيني على الاخر غريب حتى اصلا ماغسله او شي رغم انه يعني انا نفسي انقرف لا اكلت شي ثم تركته وارجع اكله بدون اغسله .. كيف لو من شخص ثاني ..؟!
والشي الثاني انه سحبه عادي وكانه طايحه الميانه .. هـه مو كني قبل شوي سحبته ..؟
قلت بقرف : يعع ..!
شاله من فمه ورجع يدخله .. يسوي حركات مبزرة وكنه يحسرني او يتلذذ بوه ..
قلت : لا من جد جراثيم فمي على فمك ..
رفع حاجب بدون مايناظرني : مزآج سعودي ..
ابتسمت ووطيت راسي وش قصده يعني ..
سوير ماقصده شي .. لا تشغلين بالك ..,
بديت افتش بالاغراض اللي جابهن ابغا اشغل نفسي بشي .. غير التفكير ..

سحبت ليز ازرق زي نايف اول مره وبديت اناظره وكاني محتاره افتحه ولا لا ..
رسيت على اني افتحه وفعلا بديت اكل في الواقع كنت بس ابغا اجرب اكل وانا بالسياره يمكن بس كذا مزاج سعوديات خخ يعني ودي اكل زي تركي او اجرب شعور شفت اكثر من مرة مروى او سلمى او حتى فيصل ونايف يسوونه وانا لا ..
يمكن ربي كاتب اول مره اسويه مع تركي ..!
مر على بالي سؤال بس خفت اني طيحت بوه الميانه بقوة لما اسأل ..
سميت بالله وقلت : ولد عمتي ..!
ولا كانه معي الظاهر سرحان وهو مييّل اصلا طريق ثاني غير عن الطريق اللي حفظته للبيت .. يمكن عنده مشوار ثاني .. او يمكن من السرحان ..
في ايش .. مدري !!
رجعت كررت : تركي ..!
شوي حسيته انتبه .. بس موب لدرجه قويه : هاه ..
بلعت ريقي الظاهر اني صحيته من سرحانه قايله اني ملقوفه .. انزين وش دخلت بوه انتي ..
سكتت عنه وهو سكت شوي كأنه انتبه كُليّا وناظرني ورجع يناظر الطريق ..
تركي : قلت هاه ..؟
مدري أي جرأه اللي جاتني اول مره احس نفسي فيها اصلا انا مع نايف بالـ يالله اتكلم كلمتين ولولا ان ميشو اصغر مني كان والله ماتجرأت اقوله شي .. يمكن استحي او يمكن احب انعزل ..
بس الحين تعودت على الناس والجلسات .. وفجأه كذا يروحون نهى ونوره ونجوى ولا .. فيصل بعد !!
قلت : مم يعني انت
سحبته بطاطس ودخلتها في فمي كأني بطول الوقت والسؤال ..
وكملت : انت ليش مبرطم ..؟
مرت ثانيه وثانيتين ..
ومرت الثالثه وتلتها الرابعه .. ظنيت انها مرت دقيقه اصلا ..!!
وهو ماتفوه ولا بأي كلمه شفت علامات خيبه على وجهه او تضايق مثلا ..
عضيت على شفتي بهدوء وتلثمت وكاني اخفي احراجي منه ..
وقلت : خلاص انسى السالفه ..
وقف السياره وناظرني فتره ووجهه صاير غير ابد استحيت اكمل اناظره ووطيت عيوني ..
حسيت فعلا اني انثى .. مشاعر الخجل اللي جاتني من نظرة رجل ..!
قال : وش مبرطم ..؟
بلعت ريقي بس ابتسمت من داخلي انا اخاف منه خخ
وفتشت مره جديدة وبرطمت : يعني كذا ..
شفته ابتسم اووف اشوى الحمدلله ماقال شي غير انه ابتسم ..
انتظرت الاجابه منه بس ولا شي
وشوي اطلق ضحكه قويه رجت كل الدنيا ثم حرك السياره مره جديدة ولازالت ضحكته تردد صداها على عقلي .. وملامح ضحكته لاتزال موجودة ..!!
شوي وقال بهدوء : اول مره حد يسألني كذا !!
رجعت اكل بطاطس وهمهمت كأني اقوله قل الاجابه : همممم ..؟
قال : طايب ليه انتي حاجبك مكسور كذا ..؟
تفاجأت سؤال وضحكت اقلد : اول مارا حد يسألني كذا ..!
ابتسم : مارا ...؟!
اكتفيت بالابتسامه على وجهي طريقة التقليد لدلع الراء .. احسها تلوق له اكثر ..,

تنهدت : ممم حاجبي كذا لانه كذا .. خلقة ربي وربك يعني .. وشلون يعني تبيني اغيرها ..؟
كأنه موب مهتم لكلامي : لا بس نفس طريقة سؤالك طايب يعني وشلون اغيره انا .. خلقة !
فتحت عيني وكأني منصدمه موب معقول يعني هو كذا ..؟
وانا اللي من يومني بالخير احسه مبرطم ومايعجبه العجب ولا الصيام في رجب ...؟
مرت لحظات صمت ثم قال : ليه ماقولتي اني ميّلت الطريق ..؟
سكتت لان ماعندي جواب .. لاني حسيت فعلا المفروض اقوله ..
همهمت بخفه : عادي حصل خير ..
سحب الشيبس : هاتي ذاه ..
سحبت المصاص : وهات ذاه ..
عقد حاجبه بقرف : وينها اللي تقول يععع وقرف اطلعه من فمي ثمن ارجعه ..؟
سكتت ولفيته بالكلينيكس وحطيته بدرج السياره : فيك خير ارجع كله ..
وكأني اقوله بس ابغا اقهرك ..
سكت عني حسيت نفسي طيحت الميانه وام الميانه سكتت لين وصلنا للبيت ..
ورميت كلمة مدري وشلون طلعت مني وكأني ابرر لنفسي واحط حدود لقلبي لا يميّل ..
قلت : تراك بايخ مارا ..
نص ابتسامه وشفته حرك .. توقعت بينزل للبيت بس راح .. وعيوني تلحقه .!
تشيعه بنظرات بريئه هو من صدقه موب مبرطم ولا بس انا اللي اتخيل ..
دخلت البيت وعلى اول مرايا مرايا المدخل ناظرت حاجبي .. هو صدق مكسور .. تحسسته برقه وابتسمت ..,
اول يوم في حياتي اعيشه زي كذا مااخاف شي ..
اول مره مااخاف ان عمتي تعصب علي زي لما طلعت مع نايف .. اول مره احس ان خالي مستحيل يقدر يمنعني اني اضحك على راحتي ..
اول مره احس .. اني ضايعه !
جاتني عمتي بقلق باين على وجهها .. وقالت : وينه تركي ..؟
بلعت غصه : راح !
مشيت وكأني اقول دامه راح انا كمان بروح .. اكرهك تركي والله اكرهك ..!

*
*
*

مسكت جوالي بملل الساعه طقت الست مغرب وانا قدام الكتاب مليت ياناس ايوه قلت بنجح بس موب لذا الدرجه احبس نفسي ..
طايب لو نزلت وش يصير مابوه لا نجوى ولا نهى ولا حتى نوير من جد ملل ..
ابتسمت لذكر ريم .. صح هي اللي بدت تعلمني وشلون اكون اجتماعيه واطوي الانطوائيه خخخ صايره امزح بس احس ان مزحي ثقيل واستهبالي طينته ماتنطاق ابد ..
حسيت نفسي ودي اكل شيبس ليز مدري ليه .. ههه اتوحم على غفله .. استغفر الله قمت اهلوس ..
قمت للمرايا وتركت كتبي اوف بكرا الاربعاء واخيرا يارب احس ان مايمضي شهر الا وانا هنا متوفيه ..,
طرق على بابي ودخلت عمتي ابتسمت بهدوء بابتسامه خفيفه ..
عمتي : عسى ماعطلتك ..؟
هزيت بـ نفي .. كملت : مليت وانا تحت قلت بعد اذنك بـ بقى معك ..
هزيت راسي بالايجاب بوناسه وجلست ..
حسيت ماعندي أي سالفه وعمتي تناظرني ..!!
حبيت ابدي : نجوي ميب جايه للاختبارات ..؟
حطت يدها على جبهتي وكانها تسألني انتي صاحيه ..؟
بس سؤالها تغير لما شالت يدها
عمتي : بنت اخوي انتي متأكده انك جالسه معنا بالبيت ..؟
عقدت حاجبيني باستغراب .. وش صاير ؟
قالت : نجوى فصلت خلاص معاد تبي تدرس .. هو فيصل ماقالك ..
ابتسمت لذكره : هو انا صرت اجلس معه كله عند نجيو من يوم ملك ..
تنفست بسعاده وبدعوه حسيتها طالعه من قلب : الله يوفقهم ان شاء الله ..
أمّنت بـ سرّي على دعاءها ..!

شوي وابتسمت : غريب ماقالك لانه فصلها له فتره موب يوم ولا يومين .. والاغرب اخوك وماقالك .. واخته وماقالت له ..
فهمت ان تركي مايدري هه .. مع سرحانه اليوم ايقنت انه موب معنا بالبيت ..
قلت بضحكه : احسن عشان اذا رسب تركي ذا السنه يلقى من يجلس معه ..
تفاجأت انها رضت بالتنكيت اللي قلته على ولدها رغم انها ماترضى عليه ..
بس سكتت يمكن ضحكت مجامله لي او يمكن انا بس الللي احس نفسي ثقيلة دم ..
قالت : لا يارب ينجح ويفكني .. " تنفست " اوف ماظني يخلص الجامعه الا وروحي طالعه معه ..
اول مره عمتي تقولها همهمت احثها على التكمله ..,
كملت على طول وكان السؤال جاء بوقته : ماصدقت انه دخل الثانوي 9 سنوات دراسه واقول خله بس يخلص الثنوي ويعرس ويفكني ابغا اشوفه معرس موب عجله بس اتطمن عليه ..
سكتت لاني حسيت بهمها شوي .. هو ليش مايحس لها ؟
وش ناقصه .. ماعنده ضغط مثلي .. بالعكس مريحته على الاخر .. ابغا اسأل هو ليش يسوي كذا ..؟
ابتسمت : بس والله لو انه ماينجح ذا السنه والله لأزوجه ولا عندي فيه .. والله ماناقصه شي عن غيره !
ابتسمت : حتى ميشو ولد خالتي اعرس يعني ممم هو اصغر مني بسنه وهو ماكمل اصلا الثالث .. خالتي اللي يهديها طايب تبين تعرسينه انتظري شوي .. الا تبي تقلد فيصل بكل شي ..
قالت : خالتك مشاعل ..؟
عقدت حاجبيني : ليه هو فيه غيرها ..؟
ضحكت وهزت بـ لا ..!
قلت : ايه احسب بعد وانا مااعرف ..
ابتسمت بخفه لي حسيت بسعاده لاني اعيش بهدوء وسلام ولا أي شي يخوفني ..!

*