منتدى وندر لاند - عرض مشاركة واحدة

08-06-2022, 05:47 AM

@Y a g i m a;

السلام عليكم
سراب عامله ايه؟!
ان شاء الله تكوني بخير
موضوع جميل ولطيف حتى من عنوانه
مترتب و طريقه طرحه فعلاً جميله
تسلم ايدك علي التصميم و علي التنسيق اللي يفتحو النفس

فكرة ان الإنسان يكون لطيف سهله و صعبه في نفس الوقت
خصوصاً ان في ناس بطبعها زي ما بنقول في مصر " دبش"
فالصعوبه هنا، يعني لو حد دبش و كلامه دايما مش لطيف
هيكون صعب عليه يحسن من طبعه و سهل في نفس الوقت لو
انه حب يتغير و يحسن من نفسه و اتبع النصائح دي انه يكون لطيف.
و الصعوبه كمان في المجتمع نفسه لانه في فئه من الناس بطلت
تشوف ان دا نوع من انواع التربيه اللي مفروض نشجعها ولكن بيحصل
العكس والناس اللطيفه بيتم انتقادها و التنمر عليها و بيتقال عنها
انها يا اما شخصيه بتدعي او انهم ناس هبله.
بس احنا لا لينا دعوه لا بالنوع دا ولا بالنوع دا.

احنا خلينا في الناس اللي بتفهم و الناس اللي لسه
عايشه و تستاهل انه نكون لطاف معاهم، الناس اللي
لسه بتقدر الكلمه الحلوه و الناس اللي لسه عارفين وفاهمين ان
" الكلمة الطيبه صدقة "
في ناس محتاجه للكلمه الطيبه لأنها يمكن الحاجه الوحيده اللي بتهون عليهم وفي ناس محتاجه انها تطلع الكلمه الطيبه لان ميزانها محتاج يتملي.

اغلب النصائح اللي ذكرتيها في موضوعك دا لو مكنش كلها
هي وصايا وتعاليم الدين الإسلامي، سبحان الله مهما حاولنا
نتعلم و نفهم ونحاول نحسن من التربيه بنرجع لنفس النقطه
الانهائية و هي انه الدين الإسلامي وصانا بكل دا.
علشان كدا الدين الإسلامي هو الدين الحق فكل الحياه البشريه.
الحمد لله على نعمه الاسلام

عندي تعقيب صغنننن علي الموضوع و هي اول نقطه
" النظافة "
انا عارفه انها حاجه مهمه و جدا في حياتنا عموماً
بس انا شفت ناس كتير هدومها و نظافتها اقل بكتير
بس لسانها بينقط حب ولطفه زي الراجل العجوز
اللي مرمى فالشارع و بيشحت ومش لاقي هدوم نضيفه يلبسها
وشفت ناس بتحط أغلى البرفانات و لابسه دهب
في اليمين والشمال ولكن لسانها بينقط جيفه وسم
وصعبه جدا في معاملتها مع البشر اللي زيها.
الخلاصه اني مش متفقه مع النقطه الأولى ابدا
على قوله محمد هنيدي في فلم صعيدي في الجامعه الامريكيه
" الناس مش بخلجاتها ياما ناس كتير لابسة بس جليله الرباية "

شكراً لموضوعك الجميل يا جميله
دمت بخير وفي رعاية الله وحفظه
مع السلامة