منتدى وندر لاند - عرض مشاركة واحدة - [الختمـ الإداري]| The Dark Side ; تجارب في علم النفس و ضحايا !

مشاهدة أوسمتي · 04-08-2020, 06:33 PM

Y a g i m a

السلام عليكم ورحمة الله
كيفك إليوت؟ شخبارك؟ ان شاء الله تمام
من أول مادخلت الموضوع ماقدرت أوقف قراءة، ولا حتى تأمل
التنسيق جداً جبار ومتميز والألوان تدخلك جو بالقراءة غصب
فعلاً الموضوع وافر بالمعلومات تستحقين الختم الإداري بجدارة والله
غالباً لما نقرأ عن علم النفس بنلقى التجارب المثيرة واللي لها نتائج
وقليل نلقى الجانب المظلم لها في أولى نتائج البحث كل مابحثنا
~
تجربة ميلغرام أشوف انها الأقل في الوحشية نظراً للممثلين المتواجدين
لو كانوا ضحايا كبقية التجارب راح تكون وحشية وفضيعة كالبقية
فعلاً أشوف ان تلقي الأوامر غالباً بيأثر على السلوك ومافي طريقة ننفي هذا الشيء
لكن من ناحية ثانية الشخص نفسه بيأثر على سلوكه ومدى تنفيذه للأمر
وأشوف انه كان من الأفضل عدم رؤية المتطوع للمتعلم (الممثل)
لأنه لو فعل الله اعلم ايش كان بيصير بالتجربة من قضايا واتهامات

~
تجربة سجن ستانفورد كانت جداً بشعة وبتوضح فعلياً تأثير الجانب السادي للبشر
الوضع مخيف لما بتشوفيه من هالناحية وان البشر العاديين
ممكن بظرف كم يوم يصيروا وحوش ساديين يستمتعون بآلام غيرهم
أصلاً من يوم شفت صورة العالم زيمباردو وأنا غاسلة يدي تماماً
وضع الضحايا كان جداً يائس ومزري، اختفت المقاومة مابينهم وتقبلوا المصير
كيف قدروا يواجهونهم بعد نهاية التجربة؟ مجرد تخيل أشكالهم جداً احزنني

~
آلبرت الصغير، آلبرت الصغير ما يهم مين كان الطفل أو ايش هي هويته
مجرد انك تعمل تجربة وضحيتها طفل هذا قمة الاجرام والشناعة
جداً انصدمت كيف ممكن يقبلوا يسووا هذي التجربة على طفل؟
وكيف قبلت الأم من الاساس أياً كانت العوائد أو مقدار المال على مشاركة طفلها بالتجربة؟
الصغير آلبرت جداً قطّع قلبي
والأغلب انه صار يخاف من كل شيء ابيض وله فراء او ما يشبهها

~
تجربة دراسة الوحش، وفعلاً اقل مايقال عن العالم انه وحش
22 طفل! ماكانوا يدرون بإنهم داخل تجربة عقيمة بتأثر عليهم مستقبلاً
فكرة انهم يأثروا على الأطفال المتلعثمين ليحسنوا النطق كانت جميلة
لكن انهم يسووا العكس ويأثروا على الأصحاء ليتلعثموا كانت جداً بشعة
ابتساماتهم بالصور وضحكاتهم تمزق القلب صراحة، ما انكر ان التجربة اثبتت كون التلعثم نفسي
لكن مساوئها كانت أكثر من محاسنها ونتائجها فعلاً سيئة
لدرجة التأثير على طفل ويفقد قدرته على الكلام بسبب هذا؟

~
التوأم بروس وبريان كانوا اكثر الضحايا المتأثرين سلباً بالتجارب
فوق التأثير السلبي معاملة وحشية للطفلين ونزع ملابسهم ومقارنة؟
سيريسلي؟ أياً كانت الاسباب كيف يجبر طفلين على خلع ملابسهم والمقارنة بينهم؟
اشك انه كان صحيح العقل ومو معتل او مجنون، المفروض قبل يسوي احد تجربة
يكشفون عليه اذا كان مجنون او انسان صاحي يقدر يقوم بها
للأسف ماكانت فيه رقابة زمان على التجارب مثل الرقابة الحالية
وفوقها يكذب ويجبر الوالدين يكذبون
يعني لا تجربة افلحت معه ولا نتائج شافية طلعت ولا ضحايا صاروا بخير
وفوقها شين وقوي عين، يكذب ويقول انها مشت تمام
الشناعة اللي سووها جداً ماتوصف فعلاً التجربة كانت شنيعة لدرجة كبيرة
حزنت على التوأم وكيف كان مصيرهم الموت، التجارب تأثر على الاطفال اكثر

موضوع مفيد جداً وفخم إليوت بجد تستحقين الختم الإداري للمرة الثانية بعد
استفدت وانا اقرأ وصدمتني حقيقة ان فيه وجود لذي التجارب
وفيه وجود لعلماء مابيهتموا بالضحايا قد مايهتموا بتجاربهم والنتائج
نورتي قسم علم النفس وان شاء الله نشوفك كثير هنا
لا تحرمينا من ابداعاتك وبانتظار الباقي منها بشوق
وبس والله اتمنى لك يوم سعيد ولطيف جداً