منتدى وندر لاند - عرض مشاركة واحدة

مشاهدة أوسمتي · 09-21-2022, 02:05 AM

@بَحر;

السلام عليكم ورحمه الله وبركاته
كيف الاحوال ؟
يارب كل حاجه تكون بخير
حبيت فكره موضوعك جدا جدا .. حسيتها لطيفه
فتره المراهقه اظن انها من أصعب الفترات اللي ممكن تمر علينا
خصوصا لو البنت تكون بعيده عن أهلها وقتها بيكون من الصعب السيطره جدا
واحيانا بتحصل كوارث كبيره
سمعت عنها كتير جدا جدا وقريت قصص أشخاص اكتر
اللقاء الاول أو البدايات بتبقى خادعه جدا وللاسف المعظم بينخدع بيها فعلا
في دراسه قالت إننا لازم نركز مع الشريك لمده سنه كامله ونشوف تغييرات الفصول وتغيراته معاها
لان مفيش شخص هيقدر يتصنع تصرفات لمده عام كامل .. اصلا التصنع مرهق جدا ومش بيدوم كتير وبيتكشف بعد وقت قصير
هتكلم عن نفسي بالنسبه لنصايحك
في العاده مش بتدخل مع أي شخص لدرجه اننا نتكلم في مواضيع عميقه ذي دي لكن لو شخص اتكلم معايا عن حبيباته السابقات حرفيا هسيبه وامشي
اظن انها هتبقى قله احترام وقله تقدير ليا
مش هتبقى كمان حاجه حلوه في حقه بس لو كان بيفهم اصلا
انتقاد المظهر !
لو قالي مناخيرك كبيره انا ممكن اضربه على مناخيره
اكتر شيء بكرهه هو انتقادات شكل الجسم حرفيا انا ممكن اعمل مصائب لو لقيت واحد بيقول لواحده على حاجه ذي كده
بتبقى حاجه مقرفه جدا بجد
الحبيبه السابقه الخائنه الشريره تقريبا بيبقى كداب
اكيد هو اللي بيبقى خاين اصلا
اظن أن تفاصيل الماضي مش من حق أي حد يسأل عنها حتى لو شخص هرتبط بيه
يعني مش من حقه يحاسب على وقت هو مكنش موجود فيه اصلا ولا عارف اني عايشه !!
شرط اكمال الدراسه
افتكر كان في شخص متقدملي زماااااان وكانت من ضمن شروطه اني مكملش دراسه ولا اشتغل .. وقتها هي دي كانت نقطه اعتراضي عليه
حتى من غير م اعرف اي حاجه مكملتش الكلام معاه وطفشته بالادب
افتكر مواقف كتير ذي دي من الأشخاص اللي اتقدمولي قبل كده
انا شاطره اوي في التطفيش
اوكى في نقطه هنا انا معترضه عليها .. اللي هي أنه يوعدها أنه مش هيتواصل مع أي بنات غيرها
عندي واحده اعرفها اتخطبت لواحد وفعلا مبقاش يكلم بنات غيرها بس للاسف مقابل النقطه دي غيرته عليها كبيره جدا لدرجه قالتلي انها اتخنقت منها وبتفكر تنهي الخطوبه كمان
حاجه كويسه قصاد حاجه وحشه هه
تفتيش الموبايل ده من الأشياء اللي بكرهها.. بالرغم اني مش بخبي حاجه بس بجد دي حاجه تخنق
انا حتى والدتي واخواتي الشباب مش بيلمسوا موبايلي اخلي انا بقى واحد غريب يفتش فيه ؟! ده بعينه
اصلا النقطه دي بتثبت أنه مش واثق في نفسه وكمان ممكن يكون خاين .. يارب ابعدنا عن الأنواع دي
التعارف أسوأ حاجه فعلا
في شخص كان اخ صديقتي وجه كلمني وقالي انا معجب بيكي وخلينا نرتبط وكان ردي عليه طبيعي .. روح بيت اهلي وهما يردوا عليك
وهو لقيته بيقولي نتعرف الاول ونعرف طباع بعض
وطفشته
قولتلك عندي خبره كبيره في التطفيش
يدور على الفلوس ااااااه .. ده بقى النوع البخيل
أسوأ نوع ممكن نقابله من البشر
افتكرت موقف ضحكني دلوقتي
كنت أنا واتنين من صديقاتي قاعدين على الكورنيش ومن الطبيعي أن في ثنائيات بيكونوا موجودين ف واحنا قاعدين لقينا واحد وواحده قاعدين جنب بعض وهو راح بص على بنت تانيه كانت ماشيه وتابعها لحد م اختفت وبمجرد م بص للبنت اللي جانت قاعده جنبه وقامت الحرب العالمية التالته
كانت شكله مضحك اوي وهي بتزعق معاه
اللهم لا شماته في الاشكال دي
التدخين
اظن أن من شروط الاختيار أنه يكون ميدخنش .. اظن أن السجائر بتجذب للمخدرات
وللاسف حال الشباب كلها كده وفي النادر لو لقينا شخص مش بيتعاطى المخدرات حاليا .. اللهم احفظنا
اهم حاجه الاخلاق فعلا وأنه يكون عارف ربنا وده اهم شيء
ولازم الاختيار يكون دقيق لانه هيكون شريك حياه
احنا مش كاملين و اكيد هو كمان مش هيكون كامل بس على الاقل يكون في توازن
او يكون الصفات الكويسه اكتر من الصفات اللي مش كويسه
حبيت موضوعك جدا وحبيت اتكلم فيه
اشوفك في موضوع جديد
في امان الله