التفت جدي لابو بندر
جدي = خلاص يابو بندر هات كرت العايلة حق عيال اخوك وعمر يوصلها له
التفت لي ابو بندر بحقد وسكت
نفخت صدري وانا اطالعه بتحدي وابتسمت
اخيرا اثباتك بيوصلك يارايد ... راح تنحل كل مشاكلك وترتاح
التفتت للموجودين اذكرهم بحق رايد بالضمان .. فرصه بما ان هالشياب الظالم مسوي فيها طيب قدامهم
عمر = وحق رايد بالضمان ... رايد مايوصله ريال منه
رد علي ابو بندر وهو ماسك نفسه والود وده يحفر قبري بمكاني
ابو بندر = خله يجيني ... انا ماعندي مانع يرجع يسكن عندي ... هو اللي طلع من كيفه
عمر = هو مايبـ
وقاطعني جدي يكلم ابو بندر
جدي = خلاص يابو بندر .. لنا كلام معك ومع رايد لما تجتمعون ( والتفت لي وعطاني نظرة )
الله يطلعني سالم من بيت جدي اليوم ... شكله بيستلمني بعد مايروحون الرجال
نص ساعة واذن المسجد لصلاة المغرب
طلعوا الرجال من المجلس وجدي معهم .. كان على بالي بيروح معهم للمسجد بس تفاجأت فيه رجع
جدي = عمر يله مشينا للمسجد
طالعت جدي مستغرب
وش صار بالدنيا بالعادة يروح جدي بدون مايطلب مني اروح معه
عمر مستغرب = آآآآآ ... رح انت للمسجد وانا الحين الحقك
جدي = لا .. ابي اتكلم معك وحنا ماشين
ايوووووة قل كذا من البداية وابتسمت بوجه جدي بخوف .. الله يعدي الليلة على خير
طلعنا انا وجدي من البيت متوجهين للمسجد... وعلى طول سألني
جدي = اول شي وش منه اللي بوجهك ؟
عمر = قلتلك هوشه بين ثنين وفرقنا بينهم ..
جدي = هو نفسه اللي ضربك مع راسك
سكتت ومارديت .. جدي ماهو مصدقني انها هوشة
جدي = والله مادري وش سالفتك ياوليدي ... كل يوم داخل علي بحاله ... وسيارة معاذ لي مدة اشوفها معك ... سألت عمك عبد العزيز وقالي عيال عم ويتفاهمون ... بس اشوف سيارة معاذ طولت معك ... ماتقولي سيارتك وينهي ؟ وكل يوم داخل علي ملفوع ... ( والتفت علي ووقف عن المشي ووقفت مثله ) قلي ياوليدي انت مديون ؟ ... بايع سيارتك... احد يطلبك ؟
التفتت لجدي وانا ابتسم
عمر بابتسامة = ابد والله لا مديون ولا شي .. راتب ابوي مكفيني وزيادة وفوقها مكافأتي بعد
جدي = اجل سيارتك وينهي ... ووش منه اللي بوجهك والضربة اللي براسك ؟
زفرت بضيق وسكتت
و يوم ماشاف مني رد .. مشى وهو يهز راسه بقلة حيلة
جدي = لا حول ولا قوة الا بالله ... ( وتنهد ) طيب الله يصلحك ابي اكلمك الحين عن اللي قبل شوي .. واضح ياوليدي انك تعرف رايد ... وبعد الصلاة بنروح لابو بندر ناخذ كرت عيال اخوه وانت تعطيه رايد مثل ماقلت قدام الرجال ... بس قبلها ابيك تعلمني كيف عرفت رايد ؟ الولد له اربع شهور من طلع من الحارة ومانعرف عنه شي ... كيف عرفته انت ؟
اخاف اقوله انه كان باستراحتنا بس اعرفه جدي مايحب شلتي .. ودايم يحذرني منهم .. اقوم الحين اقوله ان رايد كان معنا ... اعرفه جدي بيقول خربتوه ومن هالكلام اللي يسم البدن
والمشكلة اخاف اقوله الحين ببيتي ويعلم ابو بندر بمكانه بما انه عمه ومسؤول عنه
انتبهت على صوت جدي
جدي = هاه ما انت معلمني ؟
اخذت نفس .. خربانة خربانة ... خلاص ابقوله ويصير اللي يصير اهم شي الزم عليه مايعلم عمه بمكانه
وقفت قدام جدي و خليته يضطر يوقف عن المشي
عمر = ابقولك بس اوعدني ماتعلم الخايس الكلب عمه ابو بندر
طالعني جدي وهو ساكت يحتريني اكمل
عمر = احم .. رايد كان معنا باستراحتنا .. جابه مشعل عندنا بعد ماطرده عمه
طير جدي عيونه فيني منصدم
جدي = وشلون ؟ مشعل جابه لهالشلة الصايعة ... ( ورفع صوته علي معصب ) انا الحين اهاوشك عنهم ابيك تبعد عن الفساد تروحون تجرون هالولد اليتيم .. انتم تبــ
قاطعت جدي قبل ما يستلمني
عمر = شلتنا اللي ماهي عاجبتك هي اللي ضفت رايد من الشارع ... وش سويتوا انت والشيبان اللي قبل شوي عندك ورايد غايب عن حارتكم اكثر من ثلاث شهور ؟ سألتوا عنه .. دورتوا عليه ؟
سكت جدي ولف وجهه عني مايدري وش يرد علي فيه
جدي = امش تأخرنا عن الصلاة
ابتسمت بانتصار ... شعور حلو لما تغلب اللي اكبر منك بالكلام ومايقدر يرد عليك
مشيت بجنب جدي اللي رجع يسألني
جدي = ووشلون رايد الحين مرتاح بالاستراحة ؟ .. لا يكون خربتوه .. تكفى ياوليدي تراه يتيم
اخذت نفس عميق ... الحين جا وقت الخبر الثاني
عمر = رايد ماهو بالاستراحة الحين ... رايد عندي بالبيت له اكثر من شهر
وقف جدي والتفت لي منصدم
جدي منصدم = اللي ساكن معك بالبيت هو رايد ؟
عمر = ايه ( والتفتت لجدي اترجاه ) بس الله يخليك جدي لا يدري عمه
جدي مستغرب = مو تقول ان اللي ساكن معك واحد من اخوياك يدرس بالجامعة
ابتسمت بحرج
عمر = ماهي اول مرة اكذب ...
ابتسم جدي بفرح
جدي = يعني رايد عندك الحين بالبيت
هزيت راسي بايه
جدي وهو يطالعني باعجاب
جدي بفرح = الله يجزاك خير عنه ياوليدي ... ويكثر من امثالك ... والله فرحتني بهاليتيم ( وسكت شوي يفكر ) بعد الصلاة نمر ابو بندر وناخذ الكرت واروح معك لبيتك واسلم على رايد
ابتسمت لما شفت فرحة جدي وهزيت راسي بأيه
عمر بابتسامة = صااااار ... بس اهم شي لا يدري عمه انه عندي
صلينا و طلعنا من المسجد انا وجدي ومرينا بيت ابو بندر ودخلنا مجلسه ... طلبنا منه الكرت وعطاه جدي وملاحظ عليه انه ماهو معبرني ... والدليل يوم مديت يدي ابي اخذ الكرت سفهني ومده على جدي ... ضحكت مستانس واضح انه منقهر مني
طلعنا من عنده ... وتنهدت بضيق .. كنت اتمنى اشوف دانه ... وينهي ؟ ... بالعادة تلعب المغرب بالشارع ... وحنا ببيت ابو بندر قبل شوي كنت كل شوي اتلفت يمكن اشوفها
بس ماشفتها لا ببيت ابو بندر ولا بالشارع
ركبنا سيارتي انا وجدي وطلعنا من الحارة متوجهين لبيتي
التفتت لجدي ومديت يدي
عمر = عطني البطاقة انا بعطيها رايد
عطاني جدي البطاقة .. وقعدت اقراها وانا اسوق واشوف تاريخ ميلاد كل واحد منهم
مريم
رايد
دانه
امممم مريم هذي اصغر مني بسنتين .. مادري ليه كنت اتخيلها كبر عمتي مها مع ان رايد قاللي مرة ان عمه رافض يدخلها الكلية .. بس غصب عني ارجع واتخيلها انها كبر مها بالثلاثين
البطاقة صغيرة من الشكل الاخير المعتمدة لكروت العايلة ... دخلت البطاقة ببوكي وحطيتها بجيبي
وطوال الطريق افكر كيف افاجأ رايد بأثباته ... ودي بمقلب اسويه فيه قبل اعطيه الكرت ... وابتسمت بنذاله يوم طرا ببالي مقلب يرفع ضغط رايد شوي
* رايد *
بعد صلاة المغرب
طلعت من المسجد مهموم ... المفروض ارجع لمريم واوديها للمستشفى بس بعد ماصار امس من عمي مالي جرأة اخذ اختي ... ومااعتقد مريم لها جرأة تطلع مرة ثانية من بيت عمي
دخلت بيت عمر وانا شوي وابكي من الهم وسكرت الباب وراي ....
وفوق همي هم
عمر فتح لي بيته وفوق هذا ماهو سالم مني ... بسبب هالعله نايف ... كل يوم وعمر متهاوش معه بسببي ... عمر صح دفش بس والله مايستاهل ... فتح بيته لي وامه ماتجي لبيتها كله عشاني ... ياليت عمر وافق اطلع من بيته يوم قلته اليوم الصبح
مابي اسببله مشاكل اكثر من كذا ...
مادري وش يبي مني عمر ...
انا ما استاهل
انا عاله على عمر .. ومافيني فايدة لمريم ... وما اقدر احمي دانه .. ومالي اثبات انفع نفسي على الاقل ( مديت يدي ابي افتح الباب الداخلي بس سمعت صوت حركة بالحوش وقطع علي افكاري ..
التفتت ورا اشوف مصدر الصوت بس ماشفت شي ... طالعت باب الشارع ولقيته مسكر
رجعت لنص الحوش مستغرب احاول اعرف مصدر الصوت
عجيب ... انا متأكد اني سمعت شي ... رفعت راسي لدرايش ابو احمد ( جار عمر ) ولقيتها انوارها شغاله بس كلها مسكرة ... طالعت الممر اللي يودي للحوش الخلفي وماشفت شي .. هزيت راسي اطرد الوهم من راسي .. يمكن اتخيل
رجعت للباب الداخلي وفتحته ودخلت وسكرت الباب وراي
رحت للصاله وفتحت ازارير ثوبي عشان انزله بس سمعت صوت حركة مرة ثانية
التفتت وراي بخوف وطلعت من الصاله وانا اعدل الازارير
واستغربت لما شفت الباب الداخلي يفتح على شوي شوي
همست مستغرب
رايد بهمس = عمر ؟
وشهقت لما شفت راس نايف يطل من الباب
شافني نايف قدامه وجاني يركض .. ومسكني بعنف ولصقني على الجدار
نايف بعصبية = وين عمر ؟
رفعت راسي اطالعه وانفاسي سريعة من الخوف ومن دخوله المفاجأ
رايد = مـ .. مــ .. مو هنا ... وووو ... وشلون دخلت انت ؟
قرب نايف وجهه مني معصب
نايف = ادري انه مو هنا ... من الظهر وانا احتريه ... وين ذلف .. ليه الى الحين ماجا من الجامعة ؟
سكتت مدري وش اقول ... مااقدر اقوله ان عمر عند جده عشان ما يأذيه
رفع نايف يده وعطاني كف وصرخ بوجهي
نايف = تكللللم .. وين رااااح ؟
سكتت بعناد .. ماني معلّمه يكفي عمر اللي جاه من وراي
شفت نايف يدخل يده بجيبه وطلع منها حاجة وغزها على رقبتي
شهقت بقوة يوم حسيت بألم السكينة على رقبتي .. ورفعت راسي اطالعه اترجاه
رايد بترجي = نااايف
نايف = علمني وين عمر ... هو بيجي اليوم والا لااااااا ؟ من الظهر وانا احتريه وييييييييينه ؟
رايد بخوف = و .... وش تبي منا ... آآآآ ... خلنــ
قاطعني نايف وهو يقرب وجهه مني
نايف = ابي عمر ... وينه ؟ ابوي تبرا مني وهو اللي فتّن علي عند الهيئة وفضحني ... قبل على بالي انه انت ... بس انت ورع كم كف تخليك تنتفض قدامي ... اما عمر غير ... واليوم حطيته برااسي ( وسحبني ودفعني على الجدار بقوة وهو ماسكني ) وين عمر ... متى بيجي ؟
سكتت وانا اتذكر كلامي مع عمر امس
)))))))(((((((
رايد = عمر انت اللي بلغت الهيئة ؟
عمر = لا
رايد = بس انا سمعتك تقول لنايف انه انت
التفت لي عمر ورش على وجهي ماء
عمر = عشانك ياخبل ...
)))))))(((((((
طلعت دموعي وانا اتذكر كلمته .. كذب على نايف عشاني والحين بيدفع ثمن هالكذبة .. بعد عشاني
رفعت راسي لنايف وانا مااقدر اشوف من الدموع
رايد = تكفى لا تسوي بعمر شي ... مو هو اللي بلغ .. يكذب عليك ... والله يكذب عليك .. تكفى لا تسوي فيه شي
نايف = اهااا بس .. مب لعبه عندكم انا ..
رايد = والله مب هو
نايف = هو قال بنفسه انه هو اللي بلغ ... عمر اعرفه نذل ... وشري ( وغز السكينه برقبتي اكثر ) متى بيجي ؟
رايد = مدري
ولفيت وجهي عنه وبكيت اكثر
ياليت مايجي عمر ... ياليته مايجي ... بس مشكلته اتصل علي وقالي بيجي المغرب ... يارب يارب مايجي
تحرك نايف للباب الداخلي وهو يجرني معه
نايف = اجل نحتريه عند الباب لين يشرّف ( وسكر الباب الداخلي برجله ولصقني على الجدار بجنب الباب والتفت لي ) نحتريه هنا احسن عشان اول مايدخل تكون هالسكينة بوجهه ( ورفع السكينه قدامي ) ابوي طردني من البيت وتبرا مني ... لولا عمر كان انا وسعد ما انفضحنا ولا تبرا مني ابوي .. تبهذلت بسبته و الحين ابي اطلعها من عيونه ( والتفت للباب ورجع التفت لي ) من الظهر وانا احتريه بالشارع .. اكيد عند الشباب الحين .. احتريه هنا احسن وين بيروح يعني ...
نزلت راسي وانا اتذكر كلمه عمر لي امس
عمر = عشانك ياخبل
ياليته ماكذب على نايف .. بس عشاني كذب .. ليش كل ماروح بمكان يصير فيه مشكلة بسببي ... دخلت بيت عمي وتغير علينا مع انه ماكان كذا بحياة امي وابوي .. دخلت استراحة الشباب وانطردوا كلهم منها .. دخلت بيت عمر وتسلط نايف وشكله هالمرة ماهو ناوي على خير
بكيت بيأس
وقف نايف بجنبي وهو ملصق ظهره بالجدار وماسك السكينة ومستعد
نايف بجنب الباب وانا بجنب نايف
مر علينا ربع ساعة وحنا واقفين عند الباب
تعبت من الوقوف و جلست ببطء عى الارض وانا اسحب ظهري على الجدار
سمعت صوت نايف يكلمني
نايف = خلني اسمع صوتك بس .. واذا تسوي شي ..هالسكينة بتصير بظهرك على طول ... تفهم ؟
ضميت ركبتي لصدري وغطيت وجهي وانا ادعي الله ان عمر مايجي
|