ما بعرف شو ممكن يخطرلي أني بوسط انشغالات الحياة افتح اللاب واكتب اسم ووندلاند بالبحث وادخل اشوف المنتدى
اليوم تذكرت أول رواية قرأتها من كتابة أحد على الإنترنت
القصة وما فيها إني كنت مسجلة بمنتدى اسمه سبيستون .. كان عمري ١١ سنة وما كنت اعرف استخدم الإنترنت
فوحدة من منتدى سبيستون نقلت رواية اسمها "سأرسم ابتسامتك بفرشاتي" من منتدى ما كنت اعرفه
الرواية كانت مكتملة ف قررت افتح عالمنتدى يلي ما اعرفه وأكمل الرواية
فتحت .. وكملت الرواية .. وبلشت برواية تانية .. ورواية تالتة وهكذا
كنت طفلة وكانت عطلة صيف فكنت بقضي وقتي كله ع روايات المنتدى يلي اكتشفت ان اسمه كان "عيون العرب"
بعدين قررت اسجل بالمنتدى
هاد الحكي كان بال ٢٠١٦ تقريبا
ومن وقتها .. لما اتذكر هلا كل تفاصيل نشاطاتي عالمنتدى بحس بحنين..
عيون العرب اسم اله كتير وقع على قلبي
ايام المسابقات والسهرات يلي كان النت يفصل بنص السهرة والروح الفعالية
ايام مسابقات الردود والمدونات
وكم كنت اشارك حتى ازيد مشاركاتي بالمنتدى وأربح أوسمة
وأطلب تصاميم من معرض التصاميم .. لما كنا نكتب بملاحظات بعض .. ولما كنت اضطر اغيب يومين وارجع اشوف التنبيهات مليانة
لما حد يغيب عن المنتدى وما يفتح وكل ملفه الشخصي يكون عالم مشتاقة اله وقلقانة عليه
ولما يرجع يقلنا انه عاد بقوة
المنتدى رافقني بكل سنين طفولتي وبأصعب أوقات حياتي .. خلاني أكسب كتير عالم هونوا علي الأوقات الصعبة
لحتى انا سرقتني الحياة وصرت افتح نادرا .. بعدين خرب المنتدى وصار فيه منتدى جديد اسمه ووندرلاند.. صح غبت وبغيب بس ما بنسى
جد هالتفاصيل كلها والاشياء بتخليني أحن للطفولة .. وبتخليني سعيدة أني قضيت طفولتي بالمكان الصح ومع الأشخاص الصح
اشتقت للمنتدى واشتقت للجميع 3>
|