يمسح الدمع بشكوى *مكتملة*

وصلنا المستشفى ولقيناهم مدخلين عمر غرفة العمليات

وجلسنا ننتظر .. انا واحمد وابو احمد وابو فهد

وقفت بعيد عنهم شوي وانا اسمع ابو فهد اللي فاق من الصدمة شوي والحين قاعد يقول لابو احمد على اللي صار وانه ما امداه يستوعب والا ونايف هج من البيت

جلسوا على الكراسي نحتري الدكتور وكل واحد جالس بصمت

وانا واقف بعيد عنهم شوي

التفتت لابو فهد وضميري يأنبني ... لقيته منزل راسه ويدعي بينه وبين نفسه

مدري ليه احسه يدعي علي ... ياربي وش بيقول اذا عرف اني السبب


= يبه وش صااااار

التفتت متفاجأ لمصدر الصوت اللي قطع صمتنا .. وشهقت ...

مصعب وابوه

غطيت وجهي بيدي .. منحرج من مصعب ...

ياربي اخر شي تمنيته اشوف مصعب الحين ... هو يعرف كل شي ... يوم يزورنا ببيت عمر علمته ان نايف مأذيني ويحسب انا اللي مبلغ الهيئة

بيكرهني .. بيكرهني

سمعت ابو فهد يعيد الكلام اللي قاله لابو احمد على مصعب وابوه

وانا اطالعهم وساكت واحتري ردة فعل مصعب اللي شكله ما انتبه لي

ابو مصعب = يبه هد شوي ... اتصلت انا على الشرطة اول ماعلمتني بالتلفون ... حسبي الله ونعم الوكيل ... هالشباب متعبنا ( ووقف بجنب ابوه متنرفز )

شفت احمد يمشي متوجه لي ووقف بجنبي

احمد = رايد هذا ولد عم عمر ؟ ( واشر على مصعب )

طالعت مصعب وولقيته منحني على جده ويكلمه

هزيت راسي بأيه

احمد = وشسمه ؟

رايد بتنهيدة = مصعب

احمد = اهاا ( وتوجه لمصعب وشفته ياخذه على جنب )

طالعتهم وهم واقفين بعيد عني و يتكلمون .. شوي وشفت احمد يطلع من جيبه اغراض عمر وعطاه مصعب

نزلت راسي ورفعت يدي اشوفهم ... مليانات دم يابس

فركت يدي ببعضهم وصورة السكينة وهي تدخل وتطلع تكرر ببالي

= رايد

رفعت راسي ولقيت مصعب واقف قدامي مباشرة

طالعته بخوف ... وحاولت ابرر لنفسي

رايد = نااايف ( وسكتت مدري وش اقول )

هز مصعب راسه بايه

مصعب = ادري .. من يوم علمنا جدي بالجوال جا ببالي نايف على طول

نزلت راسي وبكيت بندم

رايد = عمر كذب عليه امس وتهاوشوا ... واليوم ( وبكيت اكثر وعجزت اكمل )

حسيت بيد مصعب على كتفي

مصعب = ان شاء الله عمر يطلع بالسلامة ... ونايف هذا ماني ساكتله ..

جانا احمد وطلب مني على الاقل اروح اغسل ثوبي بدورات المياة .. يقول افزعت العالم بثوبك

أيده مصعب ورحت لدورة المياة اغسل وانا بالي ماهو معي

خايف على عمر .. ومحتار مدري وين اروح ... ما اقدر ارجع لبيت عمر بعد اللي صار ... يكفي عمر اللي جاه

بس وين اروح ويييييييين... ما ابي ارجع لعمي ... امس اول ماشافني ضربني بس لأني اخذت اخواتي ... كيف الحين لو ارجع

اروح لخوالي ؟ ( هزيت راسي بلا بقوة ) عمي ما كان كذا بحياة امي وابوي ... تغير علينا فجاءة .. ما استبعد خوالي يصيرون مثله .... مابي امر باللي مريته مع عمي ...

ما اقدر اروح لخوالي ... مابي اصير انا بديرة واخواتي بديرة

حطيت يدي على صدري .. ياربي وش اسوي .. وين اروح

دخلت يدي بجيبي وطلعت كل اللي معي

ثلاث مية ريال وكم عشرة والورقة الوحيدة اللي دايم معي

هذا اللي املكه بهالدنيا ...

فتحت الورقة بيأس .. مافيها الا رقم مصعب ورقم بيت عمر

ياربي هذا الرقم اللي عطيته مريم عشان اذا احتاجتني تتصل علي ... الحين اذا احتاجتني وين تلقاني ؟

وين اروح ... احس نفسي ضايع

كيف انفعها وانا ماعندي لو غرفة انام فيها ( غطيت وجهي بالورقة وبكيت )

بعدت الورقة عني وطالعت الفلوس اللي معي .. ثلاث مية بس .. الباقي من الخمسمية اللي عطانياها عمر ... وش اسوي بثلاث مية ياربي.. تأجرلي غرفة والا توكلني

دخلت الفلوس والورقة بجيبي ورحت للمغسلة اغسل يدي وثوبي

طلعت من دورة المياة والدم عيا يروح من ثوبي

رحت للبقية ولقيت الضابط عندهم .. واول ماشافني احمد ومصعب نبهوا الضابط

احمد = هذا اللي كان مع عمر وقت الحادث

مشيت متوجه لهم وانا منزل راسي

وعلمت الضابط بكل شي .. ولما سألني الضابط عن سبب الهوشة

رفعت راسي له بخوف وبعدها التفتت لجد عمر وعمه والبقية

اطالعهم واحد واحد بخوف ... كلهم بيكرهوني

كيف اقول قدامهم ان سبب الهوشة انا ...

التفتت للضابط ونزلت راسي

رايد بحزن = مدري

الضابط = عموما اخذنا اسمه وعنوان بيته .. ماراح يطول الموضوع ان شاء الله اتطمنوا .. بينمسك على طول بحول الله

ابو مصعب = حسبي الله ونعم الوكيل

شوي و راح الضابط يكمل شغله

عرفت ان عمر طلع من غرفة العمليات وقت ماكنت بدورة المياة

رحت لاحمد اسأله عن عمر

رايد = احمد .. سمعت ان عمر طلع من العمليات .. وش قالوا ؟ .. طمني

احمد = تطمن .. الحمد الله عمر بخير .. الحين اهله ( وأشر على جد عمر وعمه ومصعب ) يحترون الدكتور يسمح لهم يشوفونه

رايد = انا ابي اشوفه بعد

احمد = قل لمصعب .. انا وابوي بنروح الحين للبيت وان شاء الله نزوره بكرة

نزلت راسي بحزن

ابي اشوف عمر الحين واودعه بدون مايدري اني ماراح ارجع لبيته ... اذا عرف اني ابترك البيت ماراح يسمح لي مثل اليوم الصبح قبل يروح للجامعة

ياليتني ماسمعت كلامه الصباح كان ماصار اللي صار

راح احمد وابوه وطلعوا من المستشفى

وجلسنا نحتري

ابو فهد ومصعب وابوه جالسين على الكراسي وانا واقف بعيد عنهم شوي

ساعة

ساعتين


وحنا الى الحين نحتري

قام ابو مصعب بعد ما مل من الانتظار وسمعته يكلم ابوه متنرفز

ابو مصعب = انا ابروح للدكتور اكلمه ( وراح )

نص ساعة ورجع

ابو مصعب = يله يبه .. سمح لنا الدكتور ربع ساعة نشوفه ... عمر بغيبوبة ولازم يرتاح ومانقدر نطول ( وساعد ابوه على الوقوف )

ناديت مصعب قبل يبتعدون

رايد = مصعب

التفت مصعب لي وجاني

مصعب = اكيد تبي تشوف عمر

رايد = ايه .. ياليت

مصعب = طيب يله امش معنا .. ( وتنهد ) جدي تعبان بعد اللي صار .. الصراحة ماودي انه يشوف عمر الحين ...

سكتت وماعلقت

رحنا لغرفة عمر و دخلنا عليه ولقينا عنده ممرض يتابعه

طالعت عمر بألم .. ممدد على السرير .. وغايب عن الوعي .. والوايرات حوله

والشاش على راسه ومعالجين الكدمات اللي امس وخاصة الجرح الكبير اللي كان بشفته السفلية

وقف ابو فهد وابو مصعب بجهه وانا ومصعب بجهه

حطيت يدي على كتف عمر وانا اشوف ابو فهد منحني و يسلم على راس حفيده

ابو فهد وهو يعتدل واقف = حسبي الله ونعم الوكيل على اللي كان السبب

شهقت وطالعته .. مدري ليه حسيته يقصدني

اخذت نفس احاول اتمالك نفسي .. وانحنيت على عمر وسلمت على خده وخده الثاني وراسه

طالعت وجهه بحزن .. ماقصرت معي ياعمر ... دخلتني بيتك واكرمتني ... وجا الوقت اللي اودعك فيه واريحك مني ..

( سلمت على خده مرة ثانية ) اتمنى ماتكرهني بعد اللي صار ... سامحني ( سلمت على راسه ) واعتدلت واقف وانا أتأمله ومهموم... وين اروح ياعمر علمني ... ما اعرف احد هنا

سمعت ابو مصعب يسأل الممرض الفلبيني

ابو مصعب = وشلون جرح هنا ( واشر على بطن عمر ) ان شاء الله كويس ؟

طلع الفلبيني يعرف عربي

الممرض = ايوة كويس .. بطن مريض كويس .. رجل راس كلو كلو كويس

التفت ابو مصعب على ابوه وكأنه تذكر شي

ابو مصعب = صح يبه .. تدري وش قال الدكتور .. يقول انه عاد الخياطة القديمة اللي كانت بفخذ عمر ... طلع عمر يعرج من خياطة برجله ماهو كسر من لعب الكورة مثل ماقالنا عمر

التفت ابو فهد لولده منصدم

ابو فهد = خياطة بفخذه .. وش منه ؟

رفع ابو مصعب اللحاف عن رجل عمر لين فخذه وهو مستغرب

ابو مصعب = مادريت الا من الدكتور ... وانا مصدق عمر حسبته يعرج من كسر بساقه

.. وشفنا فخذ عمر ملفوف بشاش

جلس ابو فهد بتعب على الكرسي بعيد شوي عن السرير وهو ماهو مصدق

ابو فهد = حسبي الله ونعم الوكيل ... اشوف الدم قبل شوي يطلع من رجله كنت احسبه طاعنه مع فخذه اللي اسمه نايف

ابو مصعب = يبه شكلهم متهاوشين قبل هالمرة وطاعنه مع رجله ... وهذا ( وأشر على عمر ) مكذب علينا ( وكشف اللحاف عن بطن عمر وشفنا لزقة متوسطة )

ابو فهد منفعل = وليش يكذب .. كان بلغنا عليه قبل يصير اللي صار اليوم ... لا حول ولا قوة الا بالله ... هالولد متعبني

سمعت مصعب يضحك بصوت خفيف وهمس يسمعني
مصعب = مقرود ولد عمي .. الراس والبطن والفخذ كلهم ملفوفين بضمادات

تنهدت وانا اشوف عمر لما انتبهت لهالشي

انتبهت على ابو مصعب وهو منقهر ويوجه كلامه لابوه

ابو مصعب = الولد يعرج قدامنا من زمان وحنا مصدقينه .. حسبي الله ونعم الوكيل بس

رفعت راسي لمصعب مستغرب ...

رايد = مصعب اللي برجل عمر بسبب حادث سيارة ... هم فاهمين غلط

سمعت بجنبي مصعب يهمس

مصعب = حبل الكذب قصير .. جاك الموت يامعاذ

والتفت لي و انحنى وهمس باذني

مصعب = اسكت لا تعلمهم خلهم على عماهم الحين ... هذا بسبب اخوي معاذ بس تكفى لا تقولهم

رفعت حواجبي منصدم

رايد = وشلون ؟ عمر قال حادث سيارة ما قـ

وقاطعني

مصعب = ايه ادري انه حادث سيارة .. بس معاذ هو اللي غلط عليه ( واعتدل واقف وهمس بصوت واطي ) ماراح يعديها ابوي على معاذ اذا عرف

نزلت نظري لعمر وحطيت يدي على راسه

ويقولون عمر شري ويغلط على الناس ... طلع هم بعد يغلطون عليه ... والله انه طيب ... انا مادري وش سالفة معاذ هذا ولا اعرفه اللهم اني شفته مرة بحارة عمي وقتها اول ماشفته حسبته مصعب ... ولا ادري وش بينه وبين عمر حتى توصل بينهم انهم يغلطون على بعض بحادث

ولا يهمني هذا كله ... اللي يهمني اني اريح عمر مني .. عمر اكرمني .. بس انا جبت له مشاكل هو بغنى عنها

انحنيت على عمر وسلمت عليه سلام اخير واستاذنت من ابو فهد وابو مصعب وطلعت من غرفة عمر

طلع مصعب معي وعرض علي يوصلني

مصعب = خلني اوصلك

التفتت لمصعب وهزيت راسي بلا وحاولت اصرفه ..

رايد بحزن = لا .. اباخذ ليموزين

دخل مصعب يده بجيبه وطلع بوكه وفهمت عليه و قاطعته قبل يعرض علي

رايد = معي فلوس

مصعب = اكيد ؟

رايد = ايه اكيد ...

وعطيته ظهري وطلعت من المستشفى وانا اجر رجولي جر مهموم

وقفت عند الطريق العام .. وانا ادور حول نفسي واطالع البيوت حولي

ما اعرف احد ... وين اروح ... كل الناس بتدخل بيوتهم الا انا

طالعت السيارات اللي تمشي بسرعة ... كل واحد له مكان يروحله

طلعت دموعي غصب عني وانا اشوف السيارات ... خايف ... احس اني غريب ... وحيد

نزلت نظري لثوبي والدم الى الحين فيه

ما اقدر امشي بالشارع وانا بهالشكل .. لازم اغسله ... بس وين ؟

مالي بيت .. ولا حتى غرفة على الاقل

تلفتت ادور بعيوني على أي شي يحسسني بالامل بس مدري وش ادور ... مدري وش اسوي

قطعت الشارع العام ... ورحت للمحلات اللي قبالي

مدري ليه .. المهم امشي

اروح للرياض ؟ ... بس مابي اخلي مريم ودانه ... المشكلة اني عطيتها رقم بيت عمر ... اخاف تتصل ولا اجيها مثل ما اتفقنا ... راح تخاف علي ... بكيت غصب عني .. محتاجها

طلعت من بيت عمي .. على بالي اقدر ادبر نفسي واخذ اخواتي ... بس طلعت غلطان

انتبهت لنفسي و رفعت راسي ولقيت نفسي داخل حارة

تلفتت اطالع البيوت ... انا وين

مامر علي سنة ببريدة ... ولا اعرف حاراتها زين

رجعت و طلعت من الحارة ولقيت على شارع فرعي محل مغسلة

ايوة صح .. ماجا ببالي المغاسل ... فرصة اغسل ثوبي الحين ....

دخلت للمغسلة وطلبت من الهندي يغسل ثوبي غسيل مستعجل

سألته عن الساعة.. وقال 10 ونص

طلعت اغراضي .. ونزلت ثوبي وعطيته الهندي

وقفت عند عتبة المحل وانا ماعلي الا ملابسي الداخليه واحتري العامل يخلص

واقف عند باب المحل وعاقد يديني عند صدري واطالع السيارات القليلة اللي تمشي بالشارع وبالي مو معي واحس بضيق بالتنفس من الهم

يمه .. يبه .. انا بعدكم تعبااااااان ... ضايع

وين اروووووح ... على الاقل هالليلة وين اناام












* عمر *


تحركت منزعج من الاصوات اللي حولي .. حلقي نااااشف عطشاااااااان ...

فتحت عيوني بتعب وبديت اميز الاصوات .. تلفتت بعيوني احاول استوعب المكان اللي انا فيه

هذا المستشفى .. غمضت عيوني بقوة لما حسيت بألم فظيييييييع ببطني

= هييييه شوفوا عمر تحررررك

فتحت عيوني وشفت مها تطل علي من فوق .. وبعدها شفت راس امي بجنبها

شوي شوي وبدت الروس تطل علي واحد واحد

مها وامي ومن الجهه الثانية مصعب وسعود وعمي

طالعت امي بتعب ... تطالعني وتبكي وما اسمع منها الا ( الحمد الله .. الحمد الله .. الحمد الله )

حاولت اتكلم بس ريقي نااااشف مرة ... عطشاااااااااان

حركت فمي بدون صوت

عمر = ما

مها = ايه انا مها

غمضت عيوني بقوة لما حسيت بطني يتمزق

سمعت عمي

ابو معاذ = الحمد الله على سلامتك

وكرروا البقية نفس الكلمة

فتحت عيوني وطالعت امي يمكن تفهمني وحاولت ارفع صوتي

عمر بهمس = ابي ما

واخيرا استوعبوا طلبي

دفعت امي مها وجت بمكانها

امي = وخري يبي ما

مها بزعل وهي تبتعد عن طريق امي

مها بزعل = اثره يقول ماء احسبه يقول مها .. فرحت احسبه يهوجس بي

سمعت ضحك مصعب وسعود عليها

حطت امي الكوب عند فمي وشربتني

ابو معاذ = عطيه شوي يام عمر .. الدكتور ماينصح يشرب سوايل واجد

ابعدت امي الكوب على طول بعد كلام عمي ... مارويت وابي اكثر ... بس مالي حيل اتكلم

مسحت امي على شعري ودموعها على خدها

امي = حسبي الله عليه ... فجعني فيك ... الله لا يوفقه ... حسبي الله ونعم الوكيل ... مالي غيرك وش يبي فيييييييك حسبي الله علييييه

غمضت عيوني لما تذكرت نايف و اللي صار

فاجئني ... اول مافتحت الباب لقيته قدامي ...

حطيت يدي اليمنى على بطني ... ماتوقعت نايف يتجرأ ويطعني بسكينة

حاولت احرك يدي اليسرى بس ماقدرت بسبب المغذي

مها = الحمد الله انك صحيت بوقت الزيارة

فتحت عيوني وطالعت مها بصمت

مصعب = أي والله شوي وكنا بنروح

= وخروا عنه خلونا نشوفه

انتبهت .. هذا صوت جدي

صح .. جدي ... كان وراي .. وينه .. وش صار عليه

ابتعدوا كلهم عن السرير بعد كلمة جدي .. وجلس عمي على الكرسي وامي راحت للجهة الثانية من السرير ... ومها ومصعب وسعود واقفين بعيد عني شوي

التفتت لجدي ولقيته جالس على كرسي ويطالعني

ابتسمت براحة ..

جدي = الحمد الله على سلامتك

هزت راسي بايه وهمست بتعب

عمر = الله يسلمك

سعود = عمر وش يبي منك هالخايس

ابو معاذ بصرخة = سعود مو وقته ... خلوه يرتاح

طالعت السقف بصمت وانا اتذكر نايف

ماتوقعت منه هالحركة ... صح امس هددني بس على بالي ماتتعدى المسأله ضرابة وهواش ...على حسب كلام الشباب ان نايف مر بايام صعبة وابوه متبري منه وطارده والهئية تدور عليه ... بس انا مالي ذنب .. هو اللي جابه لنفسه

اذا كان يبي يلوم احد يلوم نفسه .. مايلومني انا

التفتت لجدي ولقيته يطالعني بحزم

لفيت وجهي عنه بضيق ... مااحب اشوف جدي يطالعني بهالشكل .. اعرف وش يجيني بعدها

الله يعيني عليه ... راح يستلمني تحقيق ... عاد الحين كل شي صار قدامه وش يفكني منه

انحنت امي علي تسألني

امي = عمر .. يعورك شي الحين ... اقول لمصعب ينادي الدكتور ؟

احس بطني يتمزق .. وكل ما اخذت نفس انشدت الخياطة

طالعت امي بتعب .. بحالتها هذي مااقدر اشتكيلها

هزيت راسي بلا و همست اطمنها

عمر = مايعورني شي

انحنت امي علي اكثر وضمتني وخدها على خدي وتدعي الله يحفظني لها بصوت باكي وتدعي على نايف

غمضت عيوني مستمتع بحنان امي ... من زمان عنها ... تزوجت وانشغلت عني