لكل بدايه أساس | إجتماع العائله.

V I T A L I A

بسم الله الرحمن الرحيم
اللهم صل وسلم وبارك على سيدنا محمد وعلى آله وصحبه أجمعين وسلم تسليما كثيرا إلى يوم الدين.

إفتتاح اول موضوع للقسم ان شاء الله وبدايه جديده في بيت جديد ، عسى الله يجعلنا ممن ينتفع بهم.

معلش اتكلم كم كلمه عندي بالعاميه علشان أعرف بس أعبر علي كد ما أقدر ، و حاولو تعملو نفسكم مش شايفين الأخطاء الإملائية. :63:
من كم يوم عرفنا ان بيتنا الاول و الأخير مبقاش لينا للأسف شخصياً لما عرفت حسيت ولأول مره بمعني إن كنت في مكان و طردوني منه و بقيت في الشارع ، بعيد إن فكره اننا نعمل منتدي جديد و ندخل فيه مكنتش متخيله انها هتحصل ولا كنت متقبله إننا بس نجرب بس في كلمه اتقالت خلتني اكون ممنونه إني معاكم وهي " نعمل المنتدي و نتجمع فيه علشان منتفرقش و يبقا كل واحد فينا في مكان" للأسف مش فاكره اوي مين قالها بالظبط بس والله الكلمه دي خلتني أحس إني معايا نعمه كبيره انا مكنتش عرفاها وهي أنتم ، كل فرد فيكم بلا استثناء.

دا بيتنا الجديد اللي هو أساساً كل الاعمدة اللي فيه من حطام البيت الأول ، ذكريات و وسام شيدو لنا الأركان الاربعه و أساس البيت ، باقي دورنا علشان نكمل بعدهم فرجاء خاص نتعلم من كل أخطانا اللي كانت في الماضي و نبدأ تاني ، ننسا كل اللي فات من مواقف ملهاش اي لزمه تبقا معانا غير الحلو منها و الجميل الباقي اكتبوه في ورقه و قطعو الورقه و ارموها في الهواء وخليه ياخدها بعيييد اوي عننا.

قلة النشاط و النشاط و الأهتمام بقسم معين عن غيره ياريت منعملش كدا حتي لو القسم مش محبب لينا ، نحاول نجبر بخاطر كل واحد هيتعب و ينزل موضوع اشتغل عليه ، انا نفسي قررت ادخل اقسام الانمي و المانجا اللي جديا مش بفهم فيها حاجه بس الفكره إن وضع عيون سابقاً ميتكررش ، علشان زي ما قلت محدش هيبني المكان الا سكانه الأصليين الناس اللي هتاجي بعدين هتمشي على اللي احنا هنعمله غير كدا لا.

أتمنى يكونو الكلمتين دول مفهومين و هنعمل بيهم من اول عضو كبير هنا عمرا ل أصغر واحد فينا.

بسم الله

الموضوع دا طاوله كبيره هنجتمع عليها كلنا علشان نخطط و نرسم كل حاجه هنمشي عليها ان شاء الله ، اللي عنده افكار ل اقسام معينه يقول واللي عنده سؤال خاص ب الإداره يتفضل ، المسابقات - الكرنفالات - المسابقات التفاعليه - القوانين كل دي امور لازم نتكلم فيها و نشوف هتبقا ازاي.
نقاش مفتوح لكم جميعاً.

" قوانين الموضوع "
هو مش تشديد والله بس الموضوع مهم و مش حابه يقلب علي فرح بنت العمده و يبقا فوضي :damit:

- ممنوع اي نقاش جانبي مش متعلق بالموضوع.
- ممنوع اي حوار او طرحه غير هدف الموضوع.
- اللي هيقلب الموضوع هزار هقلب الترابيزه علي راسه. :c066:
- تسجيل دخولكم للموضوع يكون بفكره او اقتراح علشان ميبقاش عدد مشاركات علي الفاضي.
- الاحترام في الاسئله و توجيه إلاعتراضات.

استمتعوا :ert-15: