يمسح الدمع بشكوى *مكتملة*

وصلنا المستشفى ولقيناهم مدخلين عمر غرفة العمليات

وجلسنا ننتظر .. انا واحمد وابو احمد وابو فهد

وقفت بعيد عنهم شوي وانا اسمع ابو فهد اللي فاق من الصدمة شوي والحين قاعد يقول لابو احمد على اللي صار وانه ما امداه يستوعب والا ونايف هج من البيت

جلسوا على الكراسي نحتري الدكتور وكل واحد جالس بصمت

وانا واقف بعيد عنهم شوي

التفتت لابو فهد وضميري يأنبني ... لقيته منزل راسه ويدعي بينه وبين نفسه

مدري ليه احسه يدعي علي ... ياربي وش بيقول اذا عرف اني السبب


= يبه وش صااااار

التفتت متفاجأ لمصدر الصوت اللي قطع صمتنا .. وشهقت ...

مصعب وابوه

غطيت وجهي بيدي .. منحرج من مصعب ...

ياربي اخر شي تمنيته اشوف مصعب الحين ... هو يعرف كل شي ... يوم يزورنا ببيت عمر علمته ان نايف مأذيني ويحسب انا اللي مبلغ الهيئة

بيكرهني .. بيكرهني

سمعت ابو فهد يعيد الكلام اللي قاله لابو احمد على مصعب وابوه

وانا اطالعهم وساكت واحتري ردة فعل مصعب اللي شكله ما انتبه لي

ابو مصعب = يبه هد شوي ... اتصلت انا على الشرطة اول ماعلمتني بالتلفون ... حسبي الله ونعم الوكيل ... هالشباب متعبنا ( ووقف بجنب ابوه متنرفز )

شفت احمد يمشي متوجه لي ووقف بجنبي

احمد = رايد هذا ولد عم عمر ؟ ( واشر على مصعب )

طالعت مصعب وولقيته منحني على جده ويكلمه

هزيت راسي بأيه

احمد = وشسمه ؟

رايد بتنهيدة = مصعب

احمد = اهاا ( وتوجه لمصعب وشفته ياخذه على جنب )

طالعتهم وهم واقفين بعيد عني و يتكلمون .. شوي وشفت احمد يطلع من جيبه اغراض عمر وعطاه مصعب

نزلت راسي ورفعت يدي اشوفهم ... مليانات دم يابس

فركت يدي ببعضهم وصورة السكينة وهي تدخل وتطلع تكرر ببالي

= رايد

رفعت راسي ولقيت مصعب واقف قدامي مباشرة

طالعته بخوف ... وحاولت ابرر لنفسي

رايد = نااايف ( وسكتت مدري وش اقول )

هز مصعب راسه بايه

مصعب = ادري .. من يوم علمنا جدي بالجوال جا ببالي نايف على طول

نزلت راسي وبكيت بندم

رايد = عمر كذب عليه امس وتهاوشوا ... واليوم ( وبكيت اكثر وعجزت اكمل )

حسيت بيد مصعب على كتفي

مصعب = ان شاء الله عمر يطلع بالسلامة ... ونايف هذا ماني ساكتله ..

جانا احمد وطلب مني على الاقل اروح اغسل ثوبي بدورات المياة .. يقول افزعت العالم بثوبك

أيده مصعب ورحت لدورة المياة اغسل وانا بالي ماهو معي

خايف على عمر .. ومحتار مدري وين اروح ... ما اقدر ارجع لبيت عمر بعد اللي صار ... يكفي عمر اللي جاه

بس وين اروح ويييييييين... ما ابي ارجع لعمي ... امس اول ماشافني ضربني بس لأني اخذت اخواتي ... كيف الحين لو ارجع

اروح لخوالي ؟ ( هزيت راسي بلا بقوة ) عمي ما كان كذا بحياة امي وابوي ... تغير علينا فجاءة .. ما استبعد خوالي يصيرون مثله .... مابي امر باللي مريته مع عمي ...

ما اقدر اروح لخوالي ... مابي اصير انا بديرة واخواتي بديرة

حطيت يدي على صدري .. ياربي وش اسوي .. وين اروح

دخلت يدي بجيبي وطلعت كل اللي معي

ثلاث مية ريال وكم عشرة والورقة الوحيدة اللي دايم معي

هذا اللي املكه بهالدنيا ...

فتحت الورقة بيأس .. مافيها الا رقم مصعب ورقم بيت عمر

ياربي هذا الرقم اللي عطيته مريم عشان اذا احتاجتني تتصل علي ... الحين اذا احتاجتني وين تلقاني ؟

وين اروح ... احس نفسي ضايع

كيف انفعها وانا ماعندي لو غرفة انام فيها ( غطيت وجهي بالورقة وبكيت )

بعدت الورقة عني وطالعت الفلوس اللي معي .. ثلاث مية بس .. الباقي من الخمسمية اللي عطانياها عمر ... وش اسوي بثلاث مية ياربي.. تأجرلي غرفة والا توكلني

دخلت الفلوس والورقة بجيبي ورحت للمغسلة اغسل يدي وثوبي

طلعت من دورة المياة والدم عيا يروح من ثوبي

رحت للبقية ولقيت الضابط عندهم .. واول ماشافني احمد ومصعب نبهوا الضابط

احمد = هذا اللي كان مع عمر وقت الحادث

مشيت متوجه لهم وانا منزل راسي

وعلمت الضابط بكل شي .. ولما سألني الضابط عن سبب الهوشة

رفعت راسي له بخوف وبعدها التفتت لجد عمر وعمه والبقية

اطالعهم واحد واحد بخوف ... كلهم بيكرهوني

كيف اقول قدامهم ان سبب الهوشة انا ...

التفتت للضابط ونزلت راسي

رايد بحزن = مدري

الضابط = عموما اخذنا اسمه وعنوان بيته .. ماراح يطول الموضوع ان شاء الله اتطمنوا .. بينمسك على طول بحول الله

ابو مصعب = حسبي الله ونعم الوكيل

شوي و راح الضابط يكمل شغله

عرفت ان عمر طلع من غرفة العمليات وقت ماكنت بدورة المياة

رحت لاحمد اسأله عن عمر

رايد = احمد .. سمعت ان عمر طلع من العمليات .. وش قالوا ؟ .. طمني

احمد = تطمن .. الحمد الله عمر بخير .. الحين اهله ( وأشر على جد عمر وعمه ومصعب ) يحترون الدكتور يسمح لهم يشوفونه

رايد = انا ابي اشوفه بعد

احمد = قل لمصعب .. انا وابوي بنروح الحين للبيت وان شاء الله نزوره بكرة

نزلت راسي بحزن

ابي اشوف عمر الحين واودعه بدون مايدري اني ماراح ارجع لبيته ... اذا عرف اني ابترك البيت ماراح يسمح لي مثل اليوم الصبح قبل يروح للجامعة

ياليتني ماسمعت كلامه الصباح كان ماصار اللي صار

راح احمد وابوه وطلعوا من المستشفى

وجلسنا نحتري

ابو فهد ومصعب وابوه جالسين على الكراسي وانا واقف بعيد عنهم شوي

ساعة

ساعتين


وحنا الى الحين نحتري

قام ابو مصعب بعد ما مل من الانتظار وسمعته يكلم ابوه متنرفز

ابو مصعب = انا ابروح للدكتور اكلمه ( وراح )

نص ساعة ورجع

ابو مصعب = يله يبه .. سمح لنا الدكتور ربع ساعة نشوفه ... عمر بغيبوبة ولازم يرتاح ومانقدر نطول ( وساعد ابوه على الوقوف )

ناديت مصعب قبل يبتعدون

رايد = مصعب

التفت مصعب لي وجاني

مصعب = اكيد تبي تشوف عمر

رايد = ايه .. ياليت

مصعب = طيب يله امش معنا .. ( وتنهد ) جدي تعبان بعد اللي صار .. الصراحة ماودي انه يشوف عمر الحين ...

سكتت وماعلقت

رحنا لغرفة عمر و دخلنا عليه ولقينا عنده ممرض يتابعه

طالعت عمر بألم .. ممدد على السرير .. وغايب عن الوعي .. والوايرات حوله

والشاش على راسه ومعالجين الكدمات اللي امس وخاصة الجرح الكبير اللي كان بشفته السفلية

وقف ابو فهد وابو مصعب بجهه وانا ومصعب بجهه

حطيت يدي على كتف عمر وانا اشوف ابو فهد منحني و يسلم على راس حفيده

ابو فهد وهو يعتدل واقف = حسبي الله ونعم الوكيل على اللي كان السبب

شهقت وطالعته .. مدري ليه حسيته يقصدني

اخذت نفس احاول اتمالك نفسي .. وانحنيت على عمر وسلمت على خده وخده الثاني وراسه

طالعت وجهه بحزن .. ماقصرت معي ياعمر ... دخلتني بيتك واكرمتني ... وجا الوقت اللي اودعك فيه واريحك مني ..

( سلمت على خده مرة ثانية ) اتمنى ماتكرهني بعد اللي صار ... سامحني ( سلمت على راسه ) واعتدلت واقف وانا أتأمله ومهموم... وين اروح ياعمر علمني ... ما اعرف احد هنا

سمعت ابو مصعب يسأل الممرض الفلبيني

ابو مصعب = وشلون جرح هنا ( واشر على بطن عمر ) ان شاء الله كويس ؟

طلع الفلبيني يعرف عربي

الممرض = ايوة كويس .. بطن مريض كويس .. رجل راس كلو كلو كويس

التفت ابو مصعب على ابوه وكأنه تذكر شي

ابو مصعب = صح يبه .. تدري وش قال الدكتور .. يقول انه عاد الخياطة القديمة اللي كانت بفخذ عمر ... طلع عمر يعرج من خياطة برجله ماهو كسر من لعب الكورة مثل ماقالنا عمر

التفت ابو فهد لولده منصدم

ابو فهد = خياطة بفخذه .. وش منه ؟

رفع ابو مصعب اللحاف عن رجل عمر لين فخذه وهو مستغرب

ابو مصعب = مادريت الا من الدكتور ... وانا مصدق عمر حسبته يعرج من كسر بساقه

.. وشفنا فخذ عمر ملفوف بشاش

جلس ابو فهد بتعب على الكرسي بعيد شوي عن السرير وهو ماهو مصدق

ابو فهد = حسبي الله ونعم الوكيل ... اشوف الدم قبل شوي يطلع من رجله كنت احسبه طاعنه مع فخذه اللي اسمه نايف

ابو مصعب = يبه شكلهم متهاوشين قبل هالمرة وطاعنه مع رجله ... وهذا ( وأشر على عمر ) مكذب علينا ( وكشف اللحاف عن بطن عمر وشفنا لزقة متوسطة )

ابو فهد منفعل = وليش يكذب .. كان بلغنا عليه قبل يصير اللي صار اليوم ... لا حول ولا قوة الا بالله ... هالولد متعبني

سمعت مصعب يضحك بصوت خفيف وهمس يسمعني
مصعب = مقرود ولد عمي .. الراس والبطن والفخذ كلهم ملفوفين بضمادات

تنهدت وانا اشوف عمر لما انتبهت لهالشي

انتبهت على ابو مصعب وهو منقهر ويوجه كلامه لابوه

ابو مصعب = الولد يعرج قدامنا من زمان وحنا مصدقينه .. حسبي الله ونعم الوكيل بس

رفعت راسي لمصعب مستغرب ...

رايد = مصعب اللي برجل عمر بسبب حادث سيارة ... هم فاهمين غلط

سمعت بجنبي مصعب يهمس

مصعب = حبل الكذب قصير .. جاك الموت يامعاذ

والتفت لي و انحنى وهمس باذني

مصعب = اسكت لا تعلمهم خلهم على عماهم الحين ... هذا بسبب اخوي معاذ بس تكفى لا تقولهم

رفعت حواجبي منصدم

رايد = وشلون ؟ عمر قال حادث سيارة ما قـ

وقاطعني

مصعب = ايه ادري انه حادث سيارة .. بس معاذ هو اللي غلط عليه ( واعتدل واقف وهمس بصوت واطي ) ماراح يعديها ابوي على معاذ اذا عرف

نزلت نظري لعمر وحطيت يدي على راسه

ويقولون عمر شري ويغلط على الناس ... طلع هم بعد يغلطون عليه ... والله انه طيب ... انا مادري وش سالفة معاذ هذا ولا اعرفه اللهم اني شفته مرة بحارة عمي وقتها اول ماشفته حسبته مصعب ... ولا ادري وش بينه وبين عمر حتى توصل بينهم انهم يغلطون على بعض بحادث

ولا يهمني هذا كله ... اللي يهمني اني اريح عمر مني .. عمر اكرمني .. بس انا جبت له مشاكل هو بغنى عنها

انحنيت على عمر وسلمت عليه سلام اخير واستاذنت من ابو فهد وابو مصعب وطلعت من غرفة عمر

طلع مصعب معي وعرض علي يوصلني

مصعب = خلني اوصلك

التفتت لمصعب وهزيت راسي بلا وحاولت اصرفه ..

رايد بحزن = لا .. اباخذ ليموزين

دخل مصعب يده بجيبه وطلع بوكه وفهمت عليه و قاطعته قبل يعرض علي

رايد = معي فلوس

مصعب = اكيد ؟

رايد = ايه اكيد ...

وعطيته ظهري وطلعت من المستشفى وانا اجر رجولي جر مهموم

وقفت عند الطريق العام .. وانا ادور حول نفسي واطالع البيوت حولي

ما اعرف احد ... وين اروح ... كل الناس بتدخل بيوتهم الا انا

طالعت السيارات اللي تمشي بسرعة ... كل واحد له مكان يروحله

طلعت دموعي غصب عني وانا اشوف السيارات ... خايف ... احس اني غريب ... وحيد

نزلت نظري لثوبي والدم الى الحين فيه

ما اقدر امشي بالشارع وانا بهالشكل .. لازم اغسله ... بس وين ؟

مالي بيت .. ولا حتى غرفة على الاقل

تلفتت ادور بعيوني على أي شي يحسسني بالامل بس مدري وش ادور ... مدري وش اسوي

قطعت الشارع العام ... ورحت للمحلات اللي قبالي

مدري ليه .. المهم امشي

اروح للرياض ؟ ... بس مابي اخلي مريم ودانه ... المشكلة اني عطيتها رقم بيت عمر ... اخاف تتصل ولا اجيها مثل ما اتفقنا ... راح تخاف علي ... بكيت غصب عني .. محتاجها

طلعت من بيت عمي .. على بالي اقدر ادبر نفسي واخذ اخواتي ... بس طلعت غلطان

انتبهت لنفسي و رفعت راسي ولقيت نفسي داخل حارة

تلفتت اطالع البيوت ... انا وين

مامر علي سنة ببريدة ... ولا اعرف حاراتها زين

رجعت و طلعت من الحارة ولقيت على شارع فرعي محل مغسلة

ايوة صح .. ماجا ببالي المغاسل ... فرصة اغسل ثوبي الحين ....

دخلت للمغسلة وطلبت من الهندي يغسل ثوبي غسيل مستعجل

سألته عن الساعة.. وقال 10 ونص

طلعت اغراضي .. ونزلت ثوبي وعطيته الهندي

وقفت عند عتبة المحل وانا ماعلي الا ملابسي الداخليه واحتري العامل يخلص

واقف عند باب المحل وعاقد يديني عند صدري واطالع السيارات القليلة اللي تمشي بالشارع وبالي مو معي واحس بضيق بالتنفس من الهم

يمه .. يبه .. انا بعدكم تعبااااااان ... ضايع

وين اروووووح ... على الاقل هالليلة وين اناام












* عمر *


تحركت منزعج من الاصوات اللي حولي .. حلقي نااااشف عطشاااااااان ...

فتحت عيوني بتعب وبديت اميز الاصوات .. تلفتت بعيوني احاول استوعب المكان اللي انا فيه

هذا المستشفى .. غمضت عيوني بقوة لما حسيت بألم فظيييييييع ببطني

= هييييه شوفوا عمر تحررررك

فتحت عيوني وشفت مها تطل علي من فوق .. وبعدها شفت راس امي بجنبها

شوي شوي وبدت الروس تطل علي واحد واحد

مها وامي ومن الجهه الثانية مصعب وسعود وعمي

طالعت امي بتعب ... تطالعني وتبكي وما اسمع منها الا ( الحمد الله .. الحمد الله .. الحمد الله )

حاولت اتكلم بس ريقي نااااشف مرة ... عطشاااااااااان

حركت فمي بدون صوت

عمر = ما

مها = ايه انا مها

غمضت عيوني بقوة لما حسيت بطني يتمزق

سمعت عمي

ابو معاذ = الحمد الله على سلامتك

وكرروا البقية نفس الكلمة

فتحت عيوني وطالعت امي يمكن تفهمني وحاولت ارفع صوتي

عمر بهمس = ابي ما

واخيرا استوعبوا طلبي

دفعت امي مها وجت بمكانها

امي = وخري يبي ما

مها بزعل وهي تبتعد عن طريق امي

مها بزعل = اثره يقول ماء احسبه يقول مها .. فرحت احسبه يهوجس بي

سمعت ضحك مصعب وسعود عليها

حطت امي الكوب عند فمي وشربتني

ابو معاذ = عطيه شوي يام عمر .. الدكتور ماينصح يشرب سوايل واجد

ابعدت امي الكوب على طول بعد كلام عمي ... مارويت وابي اكثر ... بس مالي حيل اتكلم

مسحت امي على شعري ودموعها على خدها

امي = حسبي الله عليه ... فجعني فيك ... الله لا يوفقه ... حسبي الله ونعم الوكيل ... مالي غيرك وش يبي فيييييييك حسبي الله علييييه

غمضت عيوني لما تذكرت نايف و اللي صار

فاجئني ... اول مافتحت الباب لقيته قدامي ...

حطيت يدي اليمنى على بطني ... ماتوقعت نايف يتجرأ ويطعني بسكينة

حاولت احرك يدي اليسرى بس ماقدرت بسبب المغذي

مها = الحمد الله انك صحيت بوقت الزيارة

فتحت عيوني وطالعت مها بصمت

مصعب = أي والله شوي وكنا بنروح

= وخروا عنه خلونا نشوفه

انتبهت .. هذا صوت جدي

صح .. جدي ... كان وراي .. وينه .. وش صار عليه

ابتعدوا كلهم عن السرير بعد كلمة جدي .. وجلس عمي على الكرسي وامي راحت للجهة الثانية من السرير ... ومها ومصعب وسعود واقفين بعيد عني شوي

التفتت لجدي ولقيته جالس على كرسي ويطالعني

ابتسمت براحة ..

جدي = الحمد الله على سلامتك

هزت راسي بايه وهمست بتعب

عمر = الله يسلمك

سعود = عمر وش يبي منك هالخايس

ابو معاذ بصرخة = سعود مو وقته ... خلوه يرتاح

طالعت السقف بصمت وانا اتذكر نايف

ماتوقعت منه هالحركة ... صح امس هددني بس على بالي ماتتعدى المسأله ضرابة وهواش ...على حسب كلام الشباب ان نايف مر بايام صعبة وابوه متبري منه وطارده والهئية تدور عليه ... بس انا مالي ذنب .. هو اللي جابه لنفسه

اذا كان يبي يلوم احد يلوم نفسه .. مايلومني انا

التفتت لجدي ولقيته يطالعني بحزم

لفيت وجهي عنه بضيق ... مااحب اشوف جدي يطالعني بهالشكل .. اعرف وش يجيني بعدها

الله يعيني عليه ... راح يستلمني تحقيق ... عاد الحين كل شي صار قدامه وش يفكني منه

انحنت امي علي تسألني

امي = عمر .. يعورك شي الحين ... اقول لمصعب ينادي الدكتور ؟

احس بطني يتمزق .. وكل ما اخذت نفس انشدت الخياطة

طالعت امي بتعب .. بحالتها هذي مااقدر اشتكيلها

هزيت راسي بلا و همست اطمنها

عمر = مايعورني شي

انحنت امي علي اكثر وضمتني وخدها على خدي وتدعي الله يحفظني لها بصوت باكي وتدعي على نايف

غمضت عيوني مستمتع بحنان امي ... من زمان عنها ... تزوجت وانشغلت عني

* الجــزء الثــامن عشــر *











انحنت امي علي اكثر وضمتني وخدها على خدي وتدعي الله يحفظني لها بصوت باكي وتدعي على نايف

غمضت عيوني مستمتع بحنان امي ... من زمان عنها ... تزوجت وانشغلت عني

ابتعدت امي عني واعتدلت واقفة والتفتت لعمي معصبة

امي = ماني متطمنة على ولدي وهم مامسكوه ... ليه ماتمسكه الشرطة ؟ .. ليش هالاهمال ...

عمي = استهدي بالله .. هم يدورونه الحين ...

رفعت حواجبي مستغرب .. عليه حظ هالنايف هذا ... قبل الهيئة تدور عليه ومالقته .. والحين الشرطة ..

طالعت الدريشة ابي اعرف كم مر علي بالمستشفى

التفتت لمصعب اللي واقف فوق راسي وهمست

عمر = حنا الحين بأي وقت ؟

مصعب = الظهر الساعة 12 .. باقي ما اذن

طيرت عيوني منصدم .. الظهر ... يعني انا من المغرب امس الى الظهر ماني داري عن حالي

قام عمي واقف

عمي = يله قربت تخلص الزيارة .. خلوا عمر يرتاح ( والتفت لي ) عمر العصر بيجي جاركم ابو احمد وعياله .. واخوياك اتصلوا على مصعب يبون يجون يسلمون عليك

ردت امي على عمي منفعله

امي = انا ودي ازوره العصر .. يمكن يحتاجني

مها = ام عمر وحنا وشوله جايين الحين .. انا وانتي مانقدر الا الصبح .. العصر للي يبي يزور من الرجال

امي بعصبية = وانا ابي ازوره العصر .. يمكن يحتاجني والا شي .. اذا كنتوا ما انتوا جايبيني العصر ابقعد هنا

زفر عمي بطفش = انا لله ( والتفت لامي معصب وبصراخ ) وش فيك انتي يامره ... تجلسين عنده وهو بقسم الرجال ... خلاص زرتيه الحين ما حنا جايبينك العصر .. يله بس مشينا

قربت مها مني وهمست تعلق على امي

مها = وش يطلعها امك الحين هههههههههه

طالعت عمي بقهر وانا اشوفه يهاوش امي

امي بعصبية وهي تكلم عمي = امه اهـم والا هـ

قاطعت امي ... وبذلت مجهود عشان اطول صوتي

عمر = يمه

مابيها تاخذ وتعطي معه ... ما اتحمل اشوفه يصارخ عليها قدامي واتفرج .. اقنع امي باسلوبي احسن

التفتت امي لي

عمر = ماعليك يمه .. ترا فيه ممرضين اذا احتجت شي اقولهم

طالعتني امي وهي ساكته .. واضح عليها تبي تبقى معي .. و ماتقدر تقول شي

ابتسمت لها

عمر = وعشان تتطمنين ابتصل عليك كل فترة

ماردت علي ورفعت يديها تعدل شيلتها وتنزل نقابعا على وجهها وواضح معصبة

ياربي ... وش فيني .. تكلمت شوي وتعبت .. احس كل شي يعتمد على عضلات البطن .. اذا حركت رجليني عورني بطني .. واذا تكلمت بصوت عالي عورني بطني واذا حاولت ارفع راسي عورني بطني

حسبي الله عليك يانايف .. ماتوقعتها توصل لهالدرجة

حسيت بيد على كتفي .. رفعت نظري ولقيت مصعب واقف فوق راسي ويطالعني من فوق

مصعب = خذ ( وطلع مفاتيحي وبوكي وجوالي من جيبه ) هذي اغراضك عطانياها احمد ولد جاركم

قطبت حواجبي مستغرب بوكي ومفاتيحي وشوله يجبونها لي .. كان عطاه رايد عنده بدل مايجيبها لي هنا ... ما احتاجهم بالمستشفى

طالعت مصعب

عمر = ابي جوالي بس ( ومديت يدي بصعوبة واخذت الجوال منه ) بوكي ومفاتيحي عطه رايد يحطهم بغرفتي

وابتسمت لما تذكرت ان اثبات رايد بالبوك

مصعب = احمد امس قالي ان رايد عيا ياخذ اغراضك معه .. مدري ليه

استغربت بس ماعلقت

عمر = طيب خلاص اذا جا رايد العصر انا اعطيه الاغراض

فيه مفاجأة له بالبوك .. انا متأكد انه بيطير من الوناسة .. وابتسمت اكثر متحمس ابي اشوفه وش يسوي اذا شاف اثباته

لحظة .. صح وشلون بيجي رايد للمستشفى ومامعه سيارة ... اكيد بيحتاج مفتاح سيارتي

رفعت نظري لمصعب

عمر = والا اقول .. رايد مامعه سيارة .. انت رح لرايد بالبيت و عطه البوك ومفتاح السيارة .. ( وابتسمت ) وقل لرايد فيه مفاجأة له بالبوك

مصعب مستغرب = مفاجأة ! ( وطالع بوكي اللي بيده بفضول )

عمر = ياويلك اذا فتحته

مصعب = وش فيه البوك ؟

عمر = مالك دخل .. عطه رايد وبس

مصعب = طيب وش فيها اذا فتحت البوك ... مافيها شي

لفيت وجهي عنه .. بطني يعورني مالي حيل اخذ واعطي معه .. خله يتحرقص بمكانه احسن

مصعب = بتعلمني والا وشلون ؟

سكتت اطالع امي ومها وهن يعدلن عباياتهم ومطنشه

مصعب بقهر = اهب عليك ... وش فيها اذا علمتني ؟

مارديت عليه

مصعب بعصبية = طيب ابروح بس عشان رايد ... والا انت ماتستاهل

التفتت له يوم شفته عصب .. زين انه عصب من كيفه .. حلو ارفع ضغطه اكثر

عمر بهمس = قلت لك ما احتاجك ... ماتبي تودي الاغراض لا توديهم .. الاغراض بتوصل لرايد كان بك والا بغيرك

حط مصعب الاغراض بجيبه وهو يطالعني

مصعب = اكبر عقلي احسن ... ابروح بس عشان رايد ومنها اشوفه .. امس حالته حاله على واحد حقود ومغرور ومتكبر .. اخلاقك زفت

وتوجهه للباب معصب وهو يكلم البقية

مصعب = احتريكم عند السيارة

وطلع ... طالعت الباب مستانس ... ماعرفناله ... دايم احاول اخليه يعصب و مايعصب .. واذا كان ماببالي شي وكلمته عادي عصب

سلموا علي البقة وراحوا


فتحت جوالي ولقيت 4 رسايل واردة .. فتحتها ولقيتها من الشباب وكلها من نفس الوقت ( مشعل .. وعبد الله .. ومنصور )

ابتسمت مرسلين الساعة 10 صباحا وبنفس الدقيقة تقريبا ..


فتحت اول رساله .. رساله منصور
( سلامات يابو سعود
اجل صارت مخاوفك امس بمحلها )

قطبت حواجبي مستنكر ... مخاوفي ؟ صحيح نايف هددني بس قال بيسلم لي على احد ... الى الحين عجزت افهم قصد نايف بالشخص اللي يبي يسلملي عليه .. ووش دخل اللي صار بالشخص هذا

فتحت الرساله اللي بعدها .. رساله مشعل

( ابوي عرف من جدك وعلمني
وانا عاد سويت بالواجب وعلمت الشباب
سلامتك ماتشوف شر )

فتحت رساله عبد الله

( والله وطلع نايف ماعنده لعب
سلامتك ياحلو .. تراني ابزورك العصر انا والشباب
ماعمري شفت قربة مشقوقة .. واليوم تحققت امنيتي )

ضحكت بس قطعت ضحكتي وحطيت يدي على بطني بألم

افففففف حتى اذا ضحكت عورني بطني

ابتسمت على رساله عبد الله .. اجل صار بطني قربة مشقوقة

نزلت جوالي على صدري وطالعت السقف .. ودي اتصل على رايد .. ابي اعرف ليه سمح لنايف يدخل بيتي .. وكيف نايف دخل بيتي اصلا


فجأة جت رساله بجوالي

فتحت الرساله وكانت من مصعب

( اسمع ابوي وجدي عرفوا ان اللي برجلك
ماهو من لعب الكورة
اذا قلت انه من معاذ اباخذ بطاقاتنا منك وارجع
سيارة معاذ له – وانت كيفك )

اوووهووو ... وش يخلصني من جدي الحين ... ووش اقوله عشان يسكت عني ..
اممم اقوله حادث بس ما اقول انه من معاذ .. لازم ادور لي كذبه يصدقها جدي

اخذت جوالي متنرفز .. خلني اتصل على رايد بس

اتصلت على بيتي .. ولا رد

اتصلت مرة ثانية ولا رد

عادة رايد مايرد على طول .. ودي اعرف ليه سمح لنايف امس يدخل بيتي

اتصلت اكثر من اربع مرات ولا رد .... نزلت جوالي تحت مخدتي تعبااااااااان

احاول اتصل عليه وقت ثانية ...








العصر

قمت من النوم يوم سمعت باب غرفتي يفتح .. وطل منه احمد

احمد بابتسامة = السلام عليكم ( وفتح الباب بالكامل ودخل ووراه ابوه ومحمد ) سلامات سلامات ماتشوف شر ( وانحنى علي يسلم )

عمر = الله يسلمك ( حاولت ارفع راسي واجلس بس ماقدرت .. احس بطني يتمزق مع كل حركة ... اخر شي تخيلته اني اصير يوم من الايام عاجز )

وبعدها سلموا علي اخوه وابوه ... وبعد السلام والاطمئنان

احمد = عطيت الضابط اسم نايف بالكامل .. ويقول انهم راح يمسكونه .. هم شاكين انه برا بريدة .. وعمموا عنه

هزيت راسي بايه ... معقول هج برا بريدة .. بسم الله مسرعه

مرت ربع ساعة علينا بدون أي حديث خاص .. كلها سلام واطمئنان .. ماكان بيني وبينهم ميانة ... صح الجدار بالجدار بس انا قليل اجلس بالبيت ولا اختلط فيهم واحمد من يوم كنا بالثانوي وهو هادي وكل وقته جاد .. وانا مايعجبوني الجادين

فجأة سألني محمد واعتقد انه وصل صف ثالث متوسط

محمد = عمر .. رايد يقربلك ؟

تفاجأت من سؤاله

عمر = لا

ابو احمد مستغرب = ماهو ولد عمك عبد العزيز ؟

عمر = ولد عمي عبد العزيز اسمه سعود .. هو كبر رايد ومحمد

ابو احمد = ايه اللي اعرفه ان عمك عبد العزيز له ولد كبر ولدي محمد بس ما اعرف اسمه ( والتفت لاحمد مستغرب ) و حسبته هو هذا رايد

احمد = عمر .. اذا كان رايد مايقربلك ولا شي وش يسكنه عندك وهو بهالعمر .. اشوفه صغير يسكن بعيد عن اهله .. والا انا غلطان ؟

سكتت متردد شوي وبعدها جاوبته

عمر = رايد يتيم الاب والام .. وماعنده الا عمه وطرده قبل 4 شهور تقريبا

تفاجئوا كلهم .. شوي وتغيرت ملامحهم شفقة على رايد

ابو احمد = لا حول ولا قوة بالله

محمد = انا مرة حاولت اسولف معه وحنا طالعين من المسجد بس اشوفه يتهرب مني ومايطلع من بيتك واجد .. هو يدرس ؟

مارديت عليه

ابو احمد = ورايد وينه الحين ؟

عمر = بالبيت

احمد = لا مو بالبيت ... الوالدة اليوم ارسلت مع محمد غدا لرايد بس ما احد فتح له الباب ... والعصر قبل شوي بعد .. طقينا عليه الباب نسأله اذا كان يبي يروح معنا نزورك بس ماحد فتح لنا

قطبت حواجبي مستغرب

عمر = كيف !!

كمل احمد كلامه

احمد = امس رجعنا انا وابوي للبيت وهو قعد بالمستشفى مع ولد عمك اللي اسمه مصعب ..

طالعت السقف مستغرب .. الظهر مروا عليه ولا فتح .. والعصر مروا بعد ولا فتح

التفتت لاحمد وانا مستغرب

عمر = يمكن نايم

هز احمد كتوفه ماعنده جواب

ربع ساعة ودخلوا الشباب ( مشعل .. وعبد الله .. ومنصور )

استأذن احمد بهدوء وطلع هو وابوه ومحمد

احمد مايعرف من شلتي الا نايف حتى عيال عمي مايعرفهم .. كنا ندرس انا وهو بمدرسة اهليه ايام الثانوي وكان معنا نايف .. بعد التخرج دخلت انا ونايف نفس الجامعة وهو دخل جامعة ثانية

انتبهت على منصور يكشف اللحاف عني ورفع فنيلة المستشفى عن بطني

عمر = هيييييييييه وش تسوي

منصور وعينه على بطني = حسافة عليها هاللزقة ( والتفت لي وكمل ياستبهال ) تسمح اشيلها ؟

حطيت نفسي معصب عليه

عمر = مهبول انت

عدل فنيلتي وهو يضحك

منصور = ههههههههههه عبد الله يقول ودي اشوف قربة مشقوقة .. ياهو ضحكت عليك .. المشكلة قالها لي وحنا بالمحاظرة .. عجزت امسك نفسي وانا اتخيلك

التفتت لعبد الله ودي اتطنز عليه واهزءه على ضحكه علي بس شفته هو ومشعل يتهامسون وملامحهم جاده

عمر مستغرب = وش تقولون انتم ؟

التفت عبد الله لي بنظرات جاده سكت شوي وبعدها

عبد الله = عمر اظن انا ومشعل فهمنا قصد نايف يوم يقولك يبي يسلملك على واحد

جيت ابقول مين بس سبقني منصور بنفس السؤال متحمس

منصور = مين يقصد ؟

التفتوا عبد الله و مشعل على بعض ورجعوا التفتوا لي

مشعل = شف .. انا وعبد الله ربطنا تهديده لك قبل امس مع اللي سواه وقلنا اكيد هذا اللي قصده من السلام

عمر بملل = ادخل بدون مقدمات .. يعني مين . ؟

واستغربت لما شفتهم مرتبكين وكل واحد يناظر الثاني يحتريه هو اللي يتكلم

منصور بعصبية = بتكلمون والا وشلووووون ؟

وجه عبد الله كلامه لي مرتبك

عبد الله = حنا مو متأكدين وتوقعنا كله شك .. بس هذا اللي فهمناه

زفرت بضيق احتريه يكمل

عبد الله = عمر .. نايف طاعنك .. يعني الرجال كان ناوي يخلص عليك .. لولا حفظ الله لك كان انت رحت فيها ... وانت قبلها قلت لنا انه هددك بواحد .. تذكر وش قال بالضبط ؟

عمر بملل = قال انا ابي اسلملك على واحد

مشعل = وبعدها جا وطعنك

عبد الله = اظن وضحت

طالعتهم مستغرب ماني فاهم شي .. التفتت لمنصور اللي واقف فوق راسي

عمر = فهمت شي ؟

طنش منصور سؤالي ووجه كلامه لعبد الله

منصور = يعني نايف يقصد الدكتور .. ( وابتسم ) عمر ماراح الا للدكتور ماراح لواحد ثاني

مشعل = هذا لأن الله سلمه .. لو ما سلم وش بيشوف عمر ؟

شهقت كأني فهمت

عمر = يعني نايف يقصد ملك الموت .. بس الله سلمني وما مت .. هذا اللي تقصده ؟

هز عبد الله راسه بايه

عبد الله = هذا اللي اتوقعه ... بس مثل ماقلت ترا كل كلامنا شك وتوقعات

ضحك منصور

منصور = هههههههههههه نايف يسمع بالتهديد .. بس مايعرف

لفيت وجهي عنهم و سكتت ماني مصدق .. مو معقول نايف توصل فيه لهالدرجة عشان كذبة كذبتها عليه ..

التفتت لعبد الله وحاولت اغير الموضوع

عمر = اقول بس لا عاد تتوقع وخلك على القربة المشقوقة

ضحك عبد الله وبدينا نسولف باشياء جانبية .. وبالي مشغول بكلامهم

صح .. معهم حق ... نايف دخل بيتي وطعني بغفلة مني ليش مايصير كلامهم صحيح ...

ومع اذان المغرب دخل مصعب علينا الغرفة

صافح الشباب وبعدها وقف بجنبي من الجهه الثانية ومد علي بوكي ومفاتيحي

رفعت راسي له مستغرب

عمر = انت بعد مافتحلك رايد ؟

حط مصعب بوكي ومفاتيحي على صدري

مصعب = ما احد فتحلي .... طاحت يدي وانا اطق .. وقلت يمكن رايد اخذ ليموزين وجا عندك

طيرت عيوني منصدم .. لا يكون رايد سواها وطلع من بيتي

امس قبل اروح للجامعة قال يبي يطلع من عندي ... بس انا اقنعته انه يقعد .. ليش طلع الحين

وش هالتفكير اللي فيه ... اجل يقول يبي يطلع لانه سبب لي مشاكل على حد فهمه الغبي .. يوم ملى علي البيت و حسسني بمعنى الاخ الصغير يطلع .. ما ابي ارجع للوحدة مرة ثانية ... مابي ارجع لبيت موحش مافيه الا انا

مديت يدي واخذت المفاتيح ومديتها على مصعب

عمر = مصعب تكفى خذ المفاتيح وادخل البيت وشف رايد فيه والا لا

مصعب مستغرب = ليه يمكن هو اخذ لموزين وعلى وصول الحين ... او يمكن راح مشوار

عمر بترجي = تكفى مصعب .. رح وشف

سكت مصعب شوي وبعدها ابتسم ابتسامة جانبيه

مصعب بابتسامة = دايم تقول ما انت محتاجني .. والحين ترسلني

كشرت بوجهه متضايق ..

عمر = وانا الى الحين ماني محتاجك ( والتفتت لمشعل بعصبية ابي ارسله ) مشعل

بس قاطعني مصعب واخذ المفتاح مني

مصعب = لا لا خلاص خلاص .. انا ابروح

وطلع

يارب رايد موجود بالبيت ... يارب انه ماطلع ... حاولت اتذكر اخر كلامنا مع بعض .. ما شفت اغبى منه .. وش المشاكل اللي سببها لي بزعمه .. انا اصلا راعي مشاكل من يوم كنت صغير .. انا راعي مشاكل من قبل اعرفه .. ليه يتوقع كذا ..

= عمر وش فيك

انتبهت على عبد الله اللي واقف بمكان مصعب ورفعت نظري له متضايق

عمر = رايد .. اظنه طلع من بيتي

استغربوا كلهم

مشعل = ليه وش مسويله انت .. ترا رايد حساس .. وانت الصراحة جلف حتى معنا

تغيرت ملامحي وانا احاول اتذكر معاملتي معه

ايه انا اتطنز عليه .. واسبه .. وارسله واجد .. وبعض الاحيان اضربه .. بس والله حبيته مثل اخوي الصغير ... رايد حسسني بمعنى الاخو اللي محروم منها

مديت يدي واخذت بوكي وحطيته تحت مخدتي بصمت

منصور = يمكن رجع لعمه ؟

رديت عليه بصوت مخنوق

عمر = احتري مصعب الحين يتأكد اذا كان بالبيت والا لا

وغمضت عيوني بألم .. ما اعتقد عمه الحقير راح يستقبله .. خاصة انه بزعمه ان رايد هو اللي كسر سيارته .. يااارب يحصله مصعب بالبيت

سمعت اصوات ضحكات خفيفة حولي وفتحت عيوني مستغرب .. ولقيت منصور ومشعل وعبد الله كل واحد ماسك ضحكته

استغربت والصراحة فرحت .. يمكن مسوين مقلب ويعرفون رايد وين

عمر = وش فيكم ؟

وانفجروا ضحك اول ماسمعوا سؤالي

احتريتهم يخلصون موجة الضحك هذي وانا اطالعهم واحد واحد مستغرب

عبد الله وهو يضحك = سبحاان مغير الاحوال ... عميران تذكر مين اللي كان معيي يسكن رايد عنده ههههههههههههههه

منصور = شوفوا شكله شوي ويصيح ههههههههههههه

مشعل وهو يتكم ضحكته = يارجال تلقى رايد راح مشوار هنا والا هنا .. لا تنسى ماله احد ببريدة .. ورايد حالف مايرجع لعمه .. يعني الولد ماله مكان الا بيتك

تفشلت من اكتشافهم لي .. وبنفس الوقت ماني متطمن لكلامهم .. وما اقدر اجادلهم اكثر عشان ما ابين لهم ان كلامهم صحيح

سمعنا يقوم للصلاة بس الشباب حالتهم نفس حالتي مع الصلاة

قعدنا نسولف وانا بالي ماهو معهم .. احتري مصعب

نص ساعة ودخل مصعب الغرفة علينا بسرعة وبدون سلام ولا مقدمات

مصعب = عمر رايد شكله مارجع البيت من البارح

شهقت وحاولت اجلس بس عجزت

مشعل = وانت وش عرفك انه مارجع البيت

التفت مصعب لمشعل

مصعب = دخلت بيت عمر ( والتفت لي ) وشفت الدم ومناشف عند عتبه الباب الداخلي .. لو رايد رجع كان على الاقل وخر المناشف عن الطريق

ليه يارايد ليييييييييه

ليه طلعت .. معي مفاجأة لك

عبد الله = معه جوال ؟

هزيت راسي بيأس

عمر = لا ( وهمست بألم ) ليتني شريتله

مشعل = يمكن رجع لعمه .. ماعليكم اذا رحت لحارتنا ابسأل ولد عمه بندر عنه واشوف

طالعت مشعل بصمت .. ما اعتقد انه رجع لعمه ... حتى لو رجع يمديه طرده مرة ثانية عشان سالفة السيارة ...



الثلاثاء ... الساعة 12 الظهر


منسدح على سريري لا شغل ولا مشغله .. تعبت من السرير ومليت

امي ومها وجدي عندي من الساعة 9 .. بالي مشغول برايد طلعوا الشباب من عندي ولا واحد اتصل علي يطمني

مشعل قال بيسأل بندر بس ما اتصل علي الى الان .. ومصعب اكيد وكالعادة يمر على بيت جدي .. بس ما اتصل علي اذا سأل والا لا

بالي مشغول .. الخوف اذا راح رايد للرياض عند خواله ... اكيد بيستقر عندهم هناك وارجع انا لوحدتي وارجع لهواجيسي والاشباح اللي اتخيلها بالبيت

طيب على الاقل يزورني ... ترا كل اللي انا فيه عشانه ... اخر شي يروح ولا حتى يسأل عن صحتي بعد اللي صار ( تنهدت بضيق ) وينك يارايد ؟

انتبهت على جدي يكلمني بس ما استوعبت كلامه .. التفتت له اتأكد

عمر = تكلمني ؟

مها = اللي ماخذ عقلك يتهنابه .. ابوي يسألك من اليوم

جدي = انت قبل هالمرة متهاوش مع نايف ؟

لفيت وجهي عنه بضيق .. ماني فاضي لتحقيقاته الحين

عمر بدون نفس = ايه .. تهاوشت معه

جدي بحزم = طيب ليه كذبت علي وقلت ان اللي برجلك من لعب الكورة

التفتت له مستغرب

عمر بعدم استعياب = هااه

جدي وبدا يعصب

جدي = ليه ماعلمتنا انك تهاوشت معه ... ليه قلت لنا ان اللي برجلك من لعب الكورة

قطبت حواجبي مستغرب .. وش جاب هذي لهذي ... انا احسب يسألني عن اللي براسي ... سكتت يوم تذكرت رساله مصعب .. زين جدي جاب كذبة جاهزة بدل ما اتعب نفسي وادور عذر

جدي بصراخ = ليش ماترد

مها = يدور كذبه

امي = مها خليك محضر خير

التفتت لجدي

عمر = رجلي من نايف بس وقتها ماحبيت اقولكم .. كنت اظن اني .. آآآ ... احل المشكلة بيني وبينه

هزت امي راسها بقلة حيلة

امي بتنهيدة = الله يهديك

مها = واللي براسك بعد منه ؟

هزت راسي بايه

مها = هذا يمشي ويطقك ( وضحكت )

كشرت بوجهي لها

عمر = بايخة

جدي = طيب سيارتك وينهي ... من زمان ماشفتها معك .. ما اشوف معك الا سيارة معاذ

التفتت مها لجدي تأيده

مها = ايه انا بعد مستغربة ( والتفتت لي ) اللي اعرفه عمر ومعاذ مايتدانون .. كيف يعطون سياراتهم لبعض ... وش صاير بالدنيا

التفتت لجدي ولقيته يطالعني بحزم ويحتريني ارد ... تورطت مدري وش اقول

مها = ماااااترد

التفتت لمها معصب

عمر بعصبية = انت وش تبين الحين ؟

جدي بنفاذ صبر = عمر سيارتك وينهي ؟

التفتت لامي اللي جالسة بجنبي وتحتريني ردي مثلهم

طالعت جدي وانا طفشان من هالتحقيقات اللي كل يوم

عمر = بالورشة .. خربانة ... خربت علي عند الجامعة ووديتها للورشة .. فيها شي هذي ؟ .. انتم الحين جايين تزورون والا جايين تحققون معي ...

مها = الاثنين

التفتت لمها هالسوسة

عمر = اسكتي انتي

فجأة سمعته يذن الظهر

عمر بعصبية = خلاص .. خلصت الزيارة

قامت امي وحطت يدها على صدري

امي = لا خلاص بنسكت عنك

مها بعصبية = تطردنا ياللي ماني بقايلة

رفعت نظري لامي ولقيتها تطالعني بنظرات حزن وخوف

زفرت بضيق .. وش فيني شاب ضو اليوم

حطيت يدي على يد امي

عمر بضيق = لا تزعلين يمه .. والله ماقصدت ( والتفتت لجدي ) جدي لا تزعل مني مــ

وقاااطعتني امي

امي = خلاص ياوليدي ماحنا مضايقينك .. الله يرضى عليك

مها = طيب و انا ما استسمحت مني

عمر = اهاا بس

قام جدي وجا عندي ووقف بجنب امي

جدي = الله يصلحك ويهديك .. انا اسألك من خوفي عليك

ابتسمت .. وقلت اغير الموضوع

عمر = جدي انت شفت ابو بندر ؟

قطب جدي حواجبه مستغرب من سؤالي المفاجئ

جدي = لا .. امس ماشفته

عمر = ولا شفت رايد بالحارة .؟

جدي = رايد ؟ مو انت قلتلي انه عندك بالبيت ... ورحت معك عشان اشـ

قاطعته

عمر = رايد طلع من البيت من يوم دخلت المستشفى والى الحين مارجع

امي مستغرب = مين رايد ؟

التفتت لامي

عمر = اللي ساكن معي

مها بصدمة = رايد اليتيم اللي بحارتنا هو اللي ساكن معك ( وجت عندي من الجهه الثانية )

جدي = لا ماشفته بحارتنا ابسأل عمه عنه واشوف .. هو مازارك ابد ؟

عمر = ايه

وسكتت ودي اقول لجدي يتصل على ابو بندر الحين ويطمني ... بس ما ابي ابين لهم اني مهتم مرة ... اخاف يضحكون علي مثل ماضحكوا علي الشباب


اخذوا شوي وطلعوا راجعين للبيت

اخذت جوالي و اتصلت على مشعل ولا رد ... اتصلت على مصعب ولا رد .. اتصلت على عبد الله ولا رد

رفعت حواجبي متنزفر وين ذلفوا هذولي

ابي اسألهم عن رايد .. ليش مايردون

افففففف .. مليت وانا بالمستشفى .. لازم اطلع

حطيت يدي على بطني بألم .. الدكتور مانعني عن الجلوس اسبوع كامل لين يلتئم الجرح على الاقل مبدئيا .. بس وش يصبرني اسبوع بالمستشفى

عناااد بهالدكتور ابحاول اجلس وامشي ... لو اسمع كلام هالدكاترة عز الله عفنت عندهم
جلست بصعوبة وببطئ على السرير .. شوي شوي نزلت من السرير ببطئ .. شوي شوي حاولت امشي داخل الغرفة وخارجها ادرب نفسي على شوي شوي .. الجرح اللي بفخذي متعبني ... مر عليها اكثر من اسبوع والى الان الجرح بفخذي ما التئم .. بسبب نايف وهوشاتي معه عادوا خياطتها ثلاث مرات ... يارب ما اتهاوش مع احد وتبرا ... تعبت وانا اعرج

العصر الساعه 4

منسدح على سريري تعبان من الم بطني .. بكل حركة احس الجرح ببطني ينفك ...


= السلام عليكم

التفتت على مشعل ومنصور وعبد الله اللي دخلوا فجأة علي بدون ما انتبه

عمر = وعليكم السلام

وبعد السلام والتعليقات اللي اكثرها من عبد الله .. التفتت لمشعل

عمر = هيييييه انت واياه اتصل عليكم ليش ماتردون

مشعل = اتصلت وانا عندي اخر محاضرة .. بتورينا انك باجازة.. يقالك نسيت جدولنا الحين وشوله تتصل بهالوقت

وضحكوا علي

رفعت حواجبي .. صح نسيت

التفت عبد الله يكلم مشعل ويعلق علي

عبد الله = ناوي يقهرنا هههههههه

طنشت تعليق عبد الله

عمر = مشعل سألت عن رايد ؟

سكتوا كلهم شوي وبعدها تكلم منصور

منصور = تونا مرينا انا ومشعل وعبد الله على حارتكم

هزيت راسي احثه يكمل

عمر = ايه وبعدين

منصور = سألنا الولد اللي اسمه بندر .. ولد عم رايد .. يقول ان رايد اخر مرة جاهم يوم يكسر سيارة ابوه ( وهز اكتافه ) هذا كلام الولد

مشعل = ابوي علمني قبل يومين ان سيارة ابو بندر الجيب مكسورة واللي كسرها رايد ..

انفعلت منقهر منهم .. ماجابوا شي جديد

عمر = ماجبتوا شي جديد هذا كله اعرفه ... كل اللي تقولونه صار قبل ادخل المستشفى .. وقبل يختفي رايد ( وسكتت اطالعهم واحد واحد ) اللي ابي اعرفه رايد عند عمه الحين والا لا ؟


منصور = بندر يقول اخر مرة جاهــم يوم يكسر سيارتهم ... و سألناه رايد موجود قال لا

لفيت وجهي عنهم متضايق .. وينه اجل .. لا يكون راح للرياض .. لا يكون بيستقر هناك .. مابيه يروح لخواله يمكن يعجبه الوضع هناك وينساني

ليه انا حظي كذا .. الوحدة وراي وراي

مشعل = انا متأكد انه راح لخواله ؟

منصور = اظن خواله بالدمام صح ؟

مشعل = لا .. بالرياض

عبد الله = طيب وشلون نتاكد ؟

التفتت لعبد الله .. صح سؤال وجيه ... وشلون نتأكد ؟؟

عمر = طيب كيف نعرف اذا كان عند خواله والا لا ؟

وسكتنا نفكر

مشعل بتفكير = اممممم مافيه الا نسأل عمه

التفتت بسرعة لمشعل

عمر = لا .. فكنا من عمه ... هذا واحد كذوب

عبد الله = اجل نسأل بندر

التفت منصور على عبد الله

منصور = هذا بزر وش يعرفه ؟

مها

مافيه الا مها ... عمتي مها ... ابطلب منها تتصل على اخت رايد وتسأل خوالها عن رايد .. مافيه الا كذا

التفتت للشباب

عمر = خلاص .. خلوها علي .. ابقول لاهلي يسألون اخته .. او ناخذ رقم خواله من اخته واسألهم بنفسي


التفتوا الشباب لبعضهم يتبسمون وكل واحد ماسك ضحكته

انقهرت منهم .. ليه يضحكون علي اذا شافوني مهتم برايد

اشرت عليهم بسبابتي

عمر بعصبية = والله تضحكون والا ماتضحكون ماني راااد عليكم

وكأني قلت نكتة ... انفجروا ضحك



ربع ساعة وتفاجأت بزيارة الشيبان ( 4 من جيران جدي بالحارة ومنهم ابو مشعل وعم رايد ) يدخلون علي وجدي وعمي معهم ... وتفاجأت اكثر لما شفت عم رايد معهم

سلموا منصور وعبد الله ومشعل علي وطلعوا ... تمنيت اطلع معهم ... حسدتهم الصراحة ... ماجلسوا مثلي يسمعون النصايح و المواعظ من هالشيبان

استلموني .. ومابلسانهم الا ( هذي اخرتها و ماجا من هالشباب الا المتاعب ) .. ومن هالكلام .. وكأنهم يحشون راس جدي علي ...

وتحاشيت الخايس عم رايد وماسألته عن رايد ابد ... لانه اولا كذوب ثانا الشباب سألوا بندر وقال لهم انه مو موجود .. اجل وشوله اتعب نفسي و اسأل هالشايب الكذوب



الاربعاء .. الفجر

منسدح على سريري وماجايني نوم ... هذا ثالث يوم لي بالمستشفى ... احس بتطلع روحي من الملل ... ما اقدر اتحرك واجد وتعبت من السرير ومليت من المسشتفى

امس بعد ماطلعوا الشيبان من عندي ... مرني الدكتور وترجيته يكتبلي خروج .. بس ماش .. رافض وبقوة ... والسبب الاصابة تحتاج متابعة

وطوال الليل وانا نايم .. كنت ناوي اتصل على مها امس بس غلبني النوم ... مافيه الا انتظرها اذا جتني وقت الزيارة ... المشكلة كيف اطلب منها .. اقولها اتصلي على البنت .. اخاف تفهمني غلط .. عاد مها مايحتاج لسان طويل


وقت الزيارة

دخلوا علي امي وجدي وجدتي ... طالعتهم مستغرب ادور مها

عمر = وين مها ؟

امي بابتسامة = بنات عمك جن معي من عنيزة .. يقولن يبن يزورن مها و مدام اني رايحه لبريدة رايحة .. راحن معي

التفتت متضايق .. شي اكيد .. اخوات معاذ مايجي منهم خير... لولاهم كان زارتني مها وطلبت منها تتصل .. وش يصبرني الحين ... قلبي ماهو مرتاح لين اعرف رايد وينه


التفتت لجدي و طلبت منه يلح على الدكتور يخرجني .. رفض بالبداية بس لحيت عليه واقنعته وراح يكلم الدكتور

امي = وليه تبي تطلع الحين .. انت تعبان .. لازم ترتاح

عمر = ارتاح بالبيت .. مليت وانا هنا .. طفشت

قامت امي وحطت يدها على راسي وانحنت علي

امي = ابيك تصير عندي بالبيت بعنيزة .. ابي انتبهلك بنفسي واشوف احتياجاتك ( وابتسمت )

رفعت حواجبي متفاجأ من عرضها

انا اجلس ببيت عمي ... احس مكاني غلط .. خاصة ان شقة امي فوق و صغيرة ..

وفوق هذا امي حامل .. راح اتعبها بوجودي واصاباتي .. اعرج وقربة مشقوقة على قولت عبد الله .. و الدكتور معطيني حمية خاصة لمدة شهر

نزلت نظري لبطن امي بصمت ... انا ملاحظ كبر بطنها ... امي بنفسها تحتاج راحة ..

رفعت نظري لامي احاول ادور لها عذر يعفيني عن اجلس ببيتها

بس امي فهمت صمتي على انه موافقه

اعتدلت واقفة وهي مبتسمة برضى

امي = ابجيب من بيتك ملابس غيار وارسله مع مصعب العصر

تذكرت الدم اللي عند الباب الداخلي .. وماحبيت امي تشوفه .. و بيتي ماحد دخله الى الان واكيد كل شي على وضعه

عمر = لا يمه انا ابتصل على مصعب واقوله

امي بابتسامة = ليه ... انــ

وقاطعتها

عمر = انا اصلا ابي مصعب بحاجة

هزت امي راسها بايه والتفتت على جدتي تسولف معها

شوي ودخل جدي

جدي = خلاص قلت للدكتور يكتب لك خروج على مسؤوليتي

فرحت وقبل اتكلم

جدي = بس بشرط

اوووووه بدينا بالذل ..

عمر = فيها شروط بعد ؟

جدي = تجي عندي ببيتي لين تتحسن وبعدها عاد بكيفك

جدتي = ايه والله ياوليدي ياليت

التفتت لامي وانا ساكت

عارضت امي ووجهت كلامها لجدي

امي = بس انا قلتله يجي عندي بعنيزة .. انا ودي انه يكون عندي

التفت جدي لامي

جدي = بس يام عمر وشلون تبين ولدك يركب الدرج وهذي حالته .. ولدك تعبان والحركة ماهي زينه له

صح ماطرى علي العذر هذا قبل شوي

همست امي باقتناع

امي بهمس = ايه صح .. بيتي فوق ( وسكتت تفكر شوي ) خلاص ابستاذن من ابو معاذ واجي عندكم لين يطيب عمر

ابتسم جدي = الله يحييك

طالعتهم بصمت وانا اشوفهم يتفاوضون عشاني .. وابتسمت




يُتبع ..

العصر

جاني مصعب يزور بس على طول ارسلته لبيتي يجيب لي ملابس غيار .. نص ساعة ورجع ومد علي كيس

مصعب = جبت بنطلون وتي شيرت .. مدري يناسبك ؟

عمر = اللي يسمعك يقول انت اللي شاريه لي .. تراك جايبه من بيتي .. اكيد ماشريته انا الا انه مناسبني

واخذت الكيس منه ونزلت من السرير متوجه للحمام

مصعب = لا اقصد يعني غرفتك حوسه يالله يالله لقيت هذا

طنشته ودخلت الحمام

شوي وطلعت ولقيت مصعب جالس على السرير يحتريني

عمر = مارحت تكمل اجراءات الخروج ؟

مصعب = وليه انا اللي اكمل الاجراءات .. ليه مو انت .. مو انت دايم تقول مانت بحاجة احد ؟

وقفت بمكاني وانا اطالعه .. مسكها علي هذا .. كل شوي يعيدها علي

حطيت يدي على الجرح ببطني يوم حسيت بألم .. ورديت على مصعب بعناد

عمر = وانا صدق ماني محتاجك ... وآسفين غلطنا وطلبنا منك شي .. انا اللي راح اكمل الاجراءات .. انت خلك

اخذت اغراضي ( جوالي وبوكي والمفاتيح واوراق الموافقة من الدكتور ) وطلعت من الغرفة ومصعب يمشي بجنبي

انا بسبب رجلي والاصابة ببطني .. امشي ببطئ بالممرات واتساند على الجدار بتعب

ومصعب يمشي بجنبي وكلنا ساكتين ..لزقة مصعب هذا .. اذا كان مايبي يخدم وشوله جاي وناشب فيني

وقفت والتفتت لمصعب

عمر = خلاص رح لسيارتك .. اخلص اللي بيدي واجيك .. وشوله لاحقني ؟

مصعب = ماوراي شي

حطيت يدي على بطني لما حسيت بألم فظيع

غمضت عيوني .. احس الالم داخلي والمشي يتعبني بسرعة

مصعب = يعورك ؟

فتحت عيوني والتفتت لمعصب

عمر بعصبية = يا إما رح لسيارتك .. والا خلك ساكت

مصعب بعناد = ماني رايح لسيارتي وماني ساكت

سفهته وكملت امشي بممرات المستشفى الطويلة ..

ربع ساعة و خلصت الاجراءات وطلعنا من المستشفى وركبنا سيارة مصعب متوجهين لبيت جدي

وطوال الطريق ساكتين .. ولا واحد يكلم الثاني

تنهدت افكر بحالي ... والله حاله ... خاطوا الجرح اللي بفخذي للمرة الرابعه
وخاطوا الجرح اللي براسي للمرة الثانية
والحين بطني

صدق يعني صدق مليت .. صار جسمي كله خياطات

اعترف اني راعي هوشات وما ارتاح الا اذا رفعت ضغط احد بس عاد ماهو لهدرجة يرقع جسمي ورا بعض

طالعت الدريشة اللي بجنبي يوم تذكرت رايد

له ثلاث ايام مدري وينه .. وين راح ... اذا كان ماهو عند عمه .. وين يكون راح اجل ؟

معقول راح لخواله للرياض ... ودي اتأكد بس وشلون .. وشلون اقول لمها تكلم اخته .. لازم اخذها على جنب واقولها ...

مصعب = عمر

انتبهت على مصعب والتفتت له بصمت

التفت مصعب لي وبعدها طالع قدام وهو يسوق

مصعب = دايم ودي اسألك بس كل ماجيتك القاك معك احد ( والتفت لي ورجع يطالع قدام ) وش بينك وبين نايف ؟

قطبت حواجبي مستغرب من سؤاله

عمر = بيني وبين نايف ؟

مصعب = ايه .. الرجال طاعنك يعني ناويها ذبح .. واللي اعرفه انه يبي رايد مايبيك انت ... يوم اجيكم انت ورايد ببيتك علمني رايد انه يطارده .. واللي اعرفه انه انت ونايف بنفس الشلة وتسهرون بنفس الاستراحة .. وش اللي خلاه يقلب عليك وهو اصلا يبي رايد مايبيك انت ؟

التفتت للدريشة اللي بجنبي بدون ما ارد عليه

مصعب = ادري انك ماتدانيني ولا تداني معاذ .. ياخي لا تعتبرني ولد عمك .. اعتبرني خويك .. زميلك بالجامعة .. أي شي ... بس جاوبني تكفى

مارديت عليه اطالع السيارات بجنبي وساكت

مصعب بترجي = عمر ودي اعرف وش يبي هالكلب منكم .. تكفى رد علي

تنهدت ... رايد ماترك بيتي الا بسبب نايف ومضايقته لنا .. همست

عمر = مدري

مصعب = وش اللي ماتدري ... تكفى علمني وش اللي خلى هالكلب يطعنك ؟

طلعت بوكي من جيب بنطلوني وفتحتها وطلعت منها بطاقة عايلة رايد اتاملها .. ولا شعوريا فضفضت لمصعب

عمر = من كثر نايف مايضايق رايد وادافع عنه .. خلاه يعاف السكن معي ... وش ذنبي انا يتركني رايد ولا يزورني ... ( تنهدت وسندت ظهري على المرتبه وانا اطالع قدام بألم ) آآآه بعد ماتركتني امي قعدت بالبيت لحالي... وكل مادخلت .. اتخيل حركات وجنون ... بعدها سكن رايد معي وماكمل شهرين الا وهو تاركني .. بالضبط مثل ماتركني غيره .. سويت كل شي عشانه بس نايف ماكان يخلينا بحالنا .. كل شوي وهو ناط علينا ... هددنا باخت رايد وسكـتنا عنه ومابلغنا ... ياليتني ماسمعت كلام رايد وبلغت عليه .. كان ماتركني واختفى ... ماكنت ادري ان كل شي بـينقلب علي ... مدري وش استفدت الحين ... نايف حاول يذبحني ورايد تركني .... و ما الخاسر الا انا ( واخذت نفس احاول اهدي نفسي وكملت ).. كنا تونا جايين انا ورايد من برا ولقينا نايف يحترينا عند الباب .. الكلب يشوف رايد ماله احد ومستقوي عليه ... جانا يلهث يبي رايد يعطيه فلوس .. ( وابتسمت بسخرية ) هه يشوفه بزر ويخاف منه ولا يقواه قال خلني العب عليه ... وعشان انهي هالمهزلة كذبت على نايف وقلت انا اللي بلغت الهيئة مب رايد ... ثار نايف وزعل وعصب ... بس وقتها ماهتميت .... ماكنت متوقع انها بتوصل لهالدرجة .. ( نزلت نظري للبطاقة وابتسمت بسخرية ) هه والحين شف .. واحد يطعني والثاني يتركني ولا يزورني

مصعب = صح رايد غلطان بس كأني اشوفه قدامي .. مايدري وين يودي وجهه منك ..

قعدت اطالع البطاقة بين يدي واتأمل الاسماء فيها

مريم
رايد
دانة

بالذات اسم رايد ... اللي حسسني بمعنى الاخوة وراح ..

تاريخ ميلاده .. مكان الميلاد .. سجله المدني ... اصغر مني بست سنوات

اربع شهور او اكثر وهو قدامي .. من يوم كنا بالاستراحة الين دخلته بيتي وهو معي وناكل بصحن واحد وننام بنفس الغرفة ... يوم بديت اتعود عليه يرجّعني للوحدة مرة ثانية ...

= من بطاقته هذي ؟

انتبهت من سرحاني على سؤال مصعب

مصعب = اشوف ( ومد يده وهو يسوق يعني عطني البطاقة )

دفعت يده بعيد عني

عمر = لا

ودخلت البطاقة ببوكي ودخلتها بجيب بنطلوني عنه

مصعب = ليه لا طيب .. ماني ماكلها ياخي

التفتت للدريشة بجنبي وسفهته

مصعب = مدري على وش تكرهني ؟ ما اذكر اني سويت لك شي ؟

تنهدت بألم وسكت مالي نفس ارد عليه

حظي النحس يكرهني بكل الناس

لا ابو شفته بحياتي ... ولا ام تتحمل معي معاناتي .. ولا اخوان ولا اخوات ... حتى الشخص الوحيد اللي اعتبرته اخوي تركني لأتفه سبب .. لو انا اللي مضايقه قلنا معذور بس مب انا .. وش ذنبي .... ليه مايصير لي مثل مصعب ومعاذ .. اخوان

حى لو بأخو مستعار

وصلنا الحارة ونزل مصعب وحاولت انزل بحذر عشان الخياطة

وانا احاول انزل وقف مصعب عند بابي ..

مصعب = امك تراها هنا

نزلت من السيارة ووقفت قباله

عمر = ادري

ولان مصعب واقف مباشرة قدام باب الراكب دفعته شوي على ورا عشان اقدر اسكر باب السيارة

مصعب = تبيني اجيب سيارتك .. اقصد سيارة معاذ ؟

عمر = ايه هاتها

مصعب بابتسامة = طيب وسيارتك متى اجيبها ... الصراحة اشوفك زودتها مع معاذ

طالعته شوي

عمر = مر الورشة وشف اذا خلصوا منها والا لا .. وعطني خبر

طير مصعب حواجبي

مصعب = افهم انها يعني ماخلصت .. معقول ؟

سكتت ... انا قايل للتركي ياخذ راحته على الاخر ويبدّي أي سيارة بعدي .. ان شاء الله انها ماخلصت الى الحين

فجأة حسيت بشي يجر بنطلوني من تحت وصوت صغير ينادي
= هيييييه هييييه

نزلت نظري للارض مستغرب ... وشفت دانة ماسكه بنطلوني من تحت بيدها الصغيرة وتجره عشان انتبهلها وتطالعني بعيون بريئة وعلى وجهها احلى ابتسامة وصديقتها اللي دايم معها وراها

ابتسمت بفرح وغصب عني ضحكت

عمر = ههههههههه دانه

رفعت دانه يدها يقالها بتصافحني

ضحكت اكثر ... ومسكت يدها الصغيرة

حاولت انحني واشيلها بس ماقدرت بسبب الاصابة والتفتت لمصعب

عمر = مصعب شيلها تكفى ووقفها على كبوت سيارتك .. ودي اسلم عليها

ضحك مصعب .. وشالها وحطها مثل ما قلت

مصعب = تقولك هييييه .. الحرمة جايه تسلم ههههههه

ضحكت مستانس ... عرفتني .. وجت خصيص لي .. احس قلبي يرفرف من الوناسة

وقفت قدام الكبوت ودانة واقفة عليه .. ولفيت ذراعي حوليها وضميتها

عمر = احلى هييه سمعته بحياتي ( وابعدتها عني اطالعها واتأملها .. ابعدت شعرها الحوسة بيدي عن وجهها وسلمت على خدها وخدها الثاني وقربت وجهي من وجهها وهمست ) قولي عمر

دانة = عمل

ضحكت مستمتع بنطقها لاسمي .. والتفتت لمصعب اللي واقف بجنبي

عمر بفرح = توني ادري ان اسمي حلو هههههههه

ابتسم مصعب بدون ما يرد

التفتت لدانة وضميتها مرة ثانية ... شكلها اخذت علي لاني دايم اكلمها واشتري لا من الدكان ... توني ادري ان كم ريال بيحبب البنت فيني .. ابشجعها وارغبها .. خلاص من اليوم وطالع كل ماشفتها ابوديها للدكان

اخذت شوي وابعدتها عني وانتبهت على بنطلونها البني .. وتصنمت بمكاني وانا اطالع بنطلونها

تذكرت .. بنطلونها هذا نفس بنطلونها يوم كان رايد يراسل اخته ويرسله مع دانه ... ايه ( طالعت احدى جيوب بنطلونها ولا شعوريا دخلت اصبعي باحد جيوبها الصغيرة يمكن القى ورقة من رسايل رايد منسية هنا )

فاضي ... دخلت ابعي بالجيب الثاني ونفس الشي فاضي .. اخذت نفس والتفتت على ورا اشوف بيت عمها ابو بندر ... كيف فاتت عن بالي هذي

ليه ما اسوي نفس الطريقة واراسل مريم اسألها عن رايد ... هزيت راسي اطرد الفكرة عن بالي .. لا لا ..

مصعب مستغرب = عمر وش فيك ؟

انتبهت على مصعب والتفتت له .. وبالي مشغول بالفكرة اللي طرت على بالي اول ماشفت بنطلون دانة

اللي ابسويه خطأ والا لا ؟

التفتت على دانة ومسحت على شعرها وانا اشاور نفسي .. اراسل مريم والا لا ؟

مصعب = عمر

التفتت لمصعب وملت اتجاهه و قربت وجهي لوجهه وهمست له عشان ماتسمع دانه

عمر = انت سألت عن رايد اذا ببيت عمه والا لا ؟

مصعب بهمس = سألت الولد اللي اسمه بندر ويقول لا مو عندهم

اعتدلت واقف .. والفكرة تلح براسي

مصعب = يله خلنا ندخل .. يحترونك

طالعت دانة وابتسمت لها وانا امسح على شعرها

عمر = دندون ابعطيك فلوس وروحي اشتري اللي تبينه من الدكان ( وطلعت بوكي من جيبي ناوي اعطيها عشرة بس تفاجأت ببوكي فاضي .. مافيه الا البطايق )

احم اثرني مطفر .. رفعت نظري لدانة وابتسمت متورط .. مو معقول ابروح اسحب من الصرافة الحين عشان عشرة .. التفتت لمصعب

عمر = معك عشرة ؟

مصعب بسخرية = والله مدري مين اللي معه بطاقتي

عمر = اهاا بس معك والا لا ... ارجعها لك ياخي لا تخاف

زفر مصعب بطفش وطلع بوكه وعطاني عشرة وعلى طول عطيتها دانة .. وقلت عشان اشجعها

عمر = هذا لك ... وكل مااشوفك راح اعطيك بعد واشتري لك اللي تبين

حسيت بمصعب ينغزني مع كتفي والتفتت له مستغرب

عمر = وش

أشر مصعب بعيونه لحاجة بجنبي من الجهه الثانية

التفتت وشفت صديقة دانة واقفة وتطالعنا بعيون بريئة من تحت

مصعب = اخذنا خويتها ونسنيناها ... احسها تحتري وقتها نعبرها ونسلم عليها مثل ماسلمنا على دانة

سألت مصعب وعيوني على البنت

عمر = من بنته هذي .. مااعرفها ؟

مصعب = ولا انا اعرفها .. عطها عشرة مثل دانة ..

التفتت لمصعب بعصبية

عمر = شايفني جمعية خيرية اوزع

مصعب = ياخي مثل ماعطيت صديقتها عطها ... يصير بنفسها بعدين ويمكن تغار من دانة

عمر = عطها انت انا ماني معطيها

مصعب بضيق = افففففففففف ( وطلع عشرة من بوكه وعطاها البنت ونزل دانة من الكبوت وراحن يتراكضن بمرح باتجاه الدكان )

التفتت لمصعب

عمر = ترا عشرة دانة بس اللي ابرجعها لك ... العشرة الثانية ماني مرجعها

مصعب وهو معطيني ظهره = هذا اذا رجعت عشرة دانة اصلا


دخلنا البيت ولقيت امي ومها وجدي وجدتي بانتظاري



وقت صلاة العشاء

جالس بالصاله سرحان وافكر .. جدي راح يصلي .. ومصعب راح لعنيزة وجدتي راحت تصلي .. وامي بالمطبخ ومها عندي بالصاله وتطقطق بلاب توبها و انا محتار

اراسل اخت رايد والا لا ... صح والا غلط

انا بس ابي اسألها عن رايد ...

مها = عمر

بس المشكلة اخت رايد ماتعرفني وشلون بترد على رسالتي ... هي صح تعرف ان رايد ساكن ببيت ورايد بنفسه طلب رقم بيتي عشان يعطيها اخته .. بس ماتعرف ان راعي البيت انا

مها = عمر

صح .. اكتب لها اني انا اللي رايد ساكن معه عشان تتجاوب معي بالرسايل ..

مها = عمر

لا لا .. يمكن رايد يزعل اذا عرف اني راسلت اخته من وراه .. لا لا ... اشيل الفكرة من راسي احسن ..

مها بصراخ = عووووووووومممممممممررررر

رفعت راسي والتفتت لمها اللي ازعجتني من اليوم ... اعوذ بالله .. الواحد مايقدر يفكر براحته

عمر = وش تبين ... وشوله تصارخين .. اسمع

مها = واذا كنت تسمعني ليش ماترد

عمر = اففففف المهم الحين وش تبين ؟

مها بتنهيدة = شف يمكنك ناسي شي

قطبت حواجبي مستغرب ...

عمر = ناسي شي ؟ وش ؟

مها = حاول تتذكر

نزلت راسي افكر .. وحاولت اتذكر وش ناسي .. بس ما اشوف أني ناسي شي ورفعت راسي اطالع مها

عمر مستغرب = ماني ناسي شي ..

مها = ابد ؟

عمر مستغرب = شي مثل وش ؟

اخذت مها نفس وانتفخت معصبة

مها = ماكأنك ناسي الصلاة ... ابوي من زمان رايح للمسجد .. وانت قاعدلي هنا

لفيت وجهي عنها .. اصلا ماطرت الصلاة ببالي .. زفرت بضيق من حالي مع الصلاة .. متى اتغير واحافظ عليها ... احس ماني مرتاح وانا تاركها بس مدري وش اللي يمنعني اصلي

نزلت مها الاب توب عن حظنها وطلعت

قمت بصعوبة ورحت اصلي بالمجلس ورجعت للصاله ولقيتها فاضية

جلست على الكنب وانا افكر والى الحين متردد وادرس الموضوع ... ارسل والا ماارسل


شوي وجت مها .. وجلست بالارض ممده رجولها واخذت لاب توبها وحطته بحظنها وبدت تطقطق

اخذت نفس والتفتت لمدخل الصاله اشوف اذا احد بيجي والا لا ..

فرصة اكلم عمتي مدام اننا لحالنا بالصاله

قمت بصعوبة وانا ماسك بطني وجلست على الكنبة عند مها وهي جالسة تحت بالارض

احم .. وشلون ابدأ افتح معها الموضوع الحين ... كيف اقولها تكلم مريم وتسألها عن رايد

دققت بشاشة الاب توب ولقيتها تكلم بالمسن ومندمجة

فكرة الرسايل ماهي مفيدة .. صعب اراسل مريم

مالي الا مها .. احم

عمر = آآآآآ ... مها ...

تطقطق ولا ترد

عمر = مها

ولا رد

اخذت نفس ابدا بالموضوع على طول احسن

عمر = مها لك والا للذيب

مها = للذيب للذيب (وهي تشر بيدها لي يعني رح بعيد )

لفيت وجهي بضجر .. غلطان اللي يطلب من مها خدمة .. المشكلة مالي غيرها .. رجعت اناظر مها من فوق

عمر = مها تعرفين اخت رايد الكبيرة ؟

واول ماخلصت كلمتي وقفت اصابع مها عن الحركة فوق الكيبورد .. شوي والتفتت لي تطالعني من تحت

مها = اخت رايد الكبيرة ؟

عمر بحرج = ايه ... اقصد يعني تعرفينها .. عمرك كلمتيها ؟

ابتسمت مها ابتسامة جانبية بسخرية

مها = وانت وش عليك اكلمها والا ما اكلمها ... وش تبي بالضبط ؟

عمر = ابيك تسألينها عن رايد هو عند خواله والا لا ؟

قطبت مها حواجبها مستنكرة

مها = رايد الى الحين مارجع لبيتك ؟

عمر = ايه .. وابيك تسألين اخته عنه

مها = لا عمر .. صعبة اسألها ... البنت حالتها تكسر الخاطر تبيني ازيدها واخوفها على اخوها

عمر = كيف يعني تزيدينها

مها بتنهيدة = اخته حالتها صعبة .. مرة عمها مشغلتها بالبيت وكارفتها كرف .. واسمع الحريم يوم يجن عند امي يقولن عمتها بس تهاوشها قدامنا وتهينها والحين تبيني اقولها عن اخوها انه ضايع .. تبيني ازيد همها هم

عمر = نبي نشوف يمكن عند خواله

مها = مو رايد طرده عمه من اربع شهور ؟

عمر = ايه

مها بحزن = هذا بحد ذاته هم .. صعب على الاخت تشوف اخوها الصغير مطرود ومتشرد بالشوارع ولا تدري وين ارضه .. كيف عاد باخو بعمر رايد مراهق ماتعدى 15 سنة

عمر = رايد كان يزور اخته بالدس

طيرت مها عيونها متفاجأة

مها = صدق ؟

عمر = ايه ( وكملت اترجاها ) تكفين اتصلي عليها واسأليها اذا كان عند خواله والا لا

سكتت مها مترددة

مها = بس انا ماعمري كلمتها .. مرة بس شفتها بمناسبة ببيتهم وكانت تجلس بعيد عنا بعد .. ماتختلط باحد هي

ابتسمت بألم .. مثل رايد .. كان يجلس بعيد عن الشباب ولا يختلط بااحد

عمر = اطلبيها بالتلفون الحين واسأليها .. مافيها شي

مها = الحين .. بهالليل

عمر = تونا مصلين العشا .. تونا بدري .. يله مها

التفتت مها لشاشة الكمبيوتر بتردد .. ولاحظنا نافذة المسن مليان كلمات ..( وينك .. وين رحتي .. الووووو )

شهقت مها

مها = خليتني انسى خويتي .. شكلها زعلت وطلعت اوف لاااين

عمر = ترجع بعدين ( ودفعتها مع كتفها احثها ) يله مها كلمي اخت رايد الحين

نزلت مها لاب توبها عن حظنها وجلست على الكنبة بجنبي

مها = وش اقولها طيب ... اقولها وين رايد ترانا مضيعينه ؟

عمر = لا .. قولي لها امممم .. اخوياه يسألون عنه هو بالرياض والا لا ... بس

سكتت مها مترددة

عمر = يله

مها بضيق = عمر اخاف نخوف البنت على الفاضي ... واذا طلع اخوها مو عند خواله وش نقول للبنت حزتها .. والله بتخاف عليه وهي مابيدها شي .. يكفي معاملت مرة عمها معها .. ما ابي ازيد عليها

عمر = اذا طلع مو عند خواله قوليلها راح ندوره ونحصله ان شاء الله ... وبعدين هي تراها تعرف ان رايد ساكن ببيت مع واحد .. بس ماتدري ان الواحد هذا انا

مها = وانت وش تراك انها تدري

عمر = رايد مرة اخذ رقم تلفون بيتي عشان يعطيه اخته تتصل عليه اذا احتاجته

مها بشفقة = ياعمري

عمر = يله اتصلي الحين قبل يجي احد

قامت مها وجلست عند التلفون ومسكت السماعة بتردد

عمر احثها = يله

تنهدت مها بضيق وضغطت ازرار التلفون بس فجأة دخلت امي علينا وجلست بجنبي

طالعنا بعض انا ومها .. ونزلت مها السماعة وقامت وجلست بجنبي من الجهة الثانية بصمت

قربت راسي من راسها وهمست

عمر = قومي اتصلي عليها من غرفة ثانية

هزت مها راسها باية وقامت وطلعت من الصالة

انتبهت على يد امي على ركبتي وبدت تسألني عن صحتي وتعلمني وش طبخت لي ووش جهزت ووين ابنام وكل شوي تذكرني لازم ما اتحرك كثير ولا انسى علاجي ووش اسوي ووش مااسوي


اجتمعوا جدي وجدتي بالصاله وانا على اعصابي احتري مها اللي طلعت تكلم والى الحين ماجت

اخذت ربع ساعة تقريبا ومها ماجت ... كل هذا كلام بالتلفون .. ماصارت

جيت ابقوم بس منعتني امي

امي = وين بتقوم .. قل وش تبي و انا ابجيبه لك .. ما قلتلك لا تتحرك واجد

زفرت بضيق من امي و من زود خوفها علي

جدتي = اسمع كلام امك الله يصلحك .. انت طالع(ن ) من المستشفى قبل يبرا الجرح وهذا مب زين لك

عمر = الجلوس بالمستشفى يجيب المرض ... احس كل امراض الدنيا فيني وانا بهالمستشفى .. اطلع احسن وش له اقعد

جدي = اسكتن عنه ... انتن تكلمن واحد مايفهم الكلام

لفيت وجهي بطفش

عمر = اوووووه

فجأة جت مها ووقفت عن المدخل و من دون مايشوفها البقية واشرت لي بيدها يعني تعال وراحت

اخيرا ... اكيد عرفت رايد وينه

قمت واقف بس وقفتني امي بسؤالها

امي = وين ؟

التفتت لامي وحاولت اصرفها

عمر = آآآآ ... للحمام

وطلعت ورحت للمطبخ ولا لقيت مها .. رحت للغرفة الثانية ولقيتها هناك جالسة على الكنبة وتحتريني .. وبلهفة جلست بجنبها

عمر = هاااه وش قالت ؟

تنهدت مها بحزن وسكتت

عمر = وش فيك .. تكلمي

* الجــزء التــاسع عــشر *









قمت واقف بس وقفتني امي بسؤالها

امي = وين ؟

التفتت لامي وحاولت اصرفها

عمر = آآآآ ... للحمام

وطلعت ورحت للمطبخ ولا لقيت مها .. رحت للغرفة الثانية ولقيتها هناك جالسة على الكنبة وتحتريني .. وبلهفة جلست بجنبها

عمر = هاااه وش قالت ؟

تنهدت مها بحزن وسكتت

عمر = وش فيك .. تكلمي

جلست مها على جنب مقابلتني

مها بضيق = شفت ... اللي خايفة منه صار .. وش استفدت الحين .. خليتني اخوف البنت على اخوها ... والله حسيت من صوتها شوي وتبكي .. ويمديها تبكي الحين .. حرام عليك .. انت ماتدري وش يجيها من عمتها

عمر = وش فيك اكلتيني بقشوري ... رايد عند خواله والا لا .. علميني وش قلتي لها ووش قالت لك

مها = انتم كذا يالعيال ماهمكم الا نفسكم وبس

عمر = اووووه بتكلمين والا وشلون .. لك ربع ساعة وانتي بالتلفون

مها بصراخ = لي ربع ساعة احاول اهديها خليتني اخوفها على اخوها وهي مابيدها شي تسويه .. ( ولفت وجهها عني و اخذت نفس تحاول تهدي نفسها وانا ساكت واطالعها )

شوي ورجعت التفتت لي

مها بضيق = اتصلت على بيتهم وطلبتها .. اخذوا شوي على بال مايعطونياها اكلمها .. المهم كلمتها و قلت لها ان ولد اخوي .. اللي هو انت ( واشرت على وجهي بكش ) يسأل عن اخوك رايد .. وطلب مني اتصل عليك اسألك عنه ... قالت لي ان اخوها ساكن مع واحد اسمه عمر .. قلت لها ايه عمر هو ولد اخوي ويسأل عن اخوك هو عند خوالك والا لأ ... ( وضربت مها يديها ببعض بقلة حيلة ) ومير يوم قلت لها هو عند خوالك والا لا وهي تخاف .. ويالهو يالهل هديتها

عمر باستغراب = ليه ؟ .. نبيها تتصل على خوالها وتسأل بس

مها بحزن = تقول خالها اليوم الصباح متصل عليها وماجاب طاري ان رايد عندهم

طيرت عيوني بصدمه

عمر = وش ... اذا كان مو عند خوالها ولا عند عمه اجل وين ؟

كملت مها متحسفة

مها بضيق = ياليتني ما اتصلت عليها .. كانت غافله البنت .. تقول خالها يوم كلمها .. كان عادي بالعكس كان يسأل وشلونها ووشلون رايد ودانه ... لو كان رايد عندهم ماسألها عن حاله .. ياليتني مااتصلت .. على بالها ان رايد معك ... الحين يمديها شايله هم اخوها ماتدري وينه ... ياعمري عليهم ... المشكلة اخوها مراهق وينخاف عليه الصراحة .. الله يعينها

مسكت راسي بين يدي بألم ... وين راح اجل .. ليش طلع من بيتي اصلا

مها بحزن = كله منك ... ليتني ماسمعت كلامك وما اتصلت عليها ( وهمست ) حاسة فيها .. اكيد هي على نار الحين

فجأة ضربتني مها على كتفي وانا ماسك راسي بين يدي وماهتميت لضربتها

مها بصراخ = يله الحين ورني وش بتسوي .. خليتنا نخوف البنت وهي غافلة .. يقالك مهتم برايد ... اصلا انت عمرك ماهتميت باحد ... حنا وحنا اهلك ما تسأل عنا .. عيال عمك وهم عيال عمك دايم متهاوش معهم ... والحين جايني تسأل عن ولد لا هو اخوك ولاهو ولد عمك .. انا البقرة اللي سمعت كلامك وطاوعتك واتصلت على اخته

قمت متضايق وطلعت من الغرفة ابتعد عن مها وصراخها علي

طلعت للحوش ورحت لمجلس الرجال وجلست على الكنب متضايق وحطيت يدي على بطني يوم حسيت بألم فضيع ..

رفعت التيشرت عن بطني ابي اشوف الخياطة بس تفاجأت بلزقة كبيرة تغطيه

مسحت بيدي على اللزقة بتفكير سارح .. يعني رايد ببريدة .. طيب وين راح .. رايد مايعرف احد هنا .. لو كان بالرياض كان تطمنا عليه .. لا لا احسن انه ماهو بالرياض .. فيه امل يرجع رايد ويسكن معي مرة ثانية .. بس وينه ... له ثلاث ايام مختفي .. من يوم دخلت المستشفى ماشفته ولا زارني ...

معقول ساكن مع احد غيري .. تنهدت .. وليه مو معقول رايد سكن معي وهو مايعرفني

بس الخوف اذا كان مع شباب يعلمونه على الشر .... خاصة ان رايد يعطي شكله ضعيف ويُستغل بسرعه

اخذت ربع ساعة متضايق وافكر وين ممكن نحصل رايد

ياربي وش اسوي

رفعت راسي لما تذكرت الشباب .. صح مالي الا الشباب يدورون عنه

طلعت جوالي من جيب البنطلون واتصلت على مشعل

شوي ورد

مشعل = هلا بعمير

عمر بضيق = وينك ؟

سكت مشعل مستغرب من سؤالي بدون مقدمات ولا سلام

مشعل مستغرب = بالبيت

عمر = تعال انا جنبك ببيت جدي

مشعل بصدمة = طلعت انت من المستشفى ؟

عمر = ايه والحين انا ببيت جدي

مشعل مستغرب = وشلون سمحلك الدكتور تطلع بدري

زفرت بضيق افففففف

عمر = مو وقته الحين .. تعال مشعل احتريت بالشارع

سكت مشعل شوي

مشعل = طيب .. يله جاي

وسكرت عنه

قمت بتعب و طلعت عند باب الشارع احتري مشعل .. وتفاجأت بدانة جالسة على عتبة باب بيتهم بجسمها الصغير والنحيف وتتفرج على العيال اللي يلعبون كورة .. وخويتها هالمرة ماهي معها

وش قصتها دانة .. دايم بالشارع .. حتى ملابسها ووجها وشعرها وسخ ومبهذله ... مافيه احد يهتم فيها والا وش السالفة ... مادري وين اختها عنها

رفعت صوتي انادي دانه وانا الوح بيدي يعني تعالي .. انتبهت لي وقامت تركض ناحيتي

جلست على عتبه باب بيت جدي .. وفتحت يدي الثنتين لها استقبلها وارتمت بحضني

ضحكت وجلستها على فخذي السليمة

عمر بابتسامة = وش اسمي انا ؟

حركت دانة اكتافها يعني مدري

عمر = افااااا توني قلت اسمي لك العصر .. مسرع تنسينه .. اسمي عمر .. قولي عمر

دانة = عمل

ضميتها لصدري وانا مستمتع بنطقها لاسمي

عمر = قولي بعد مرة ثانية عمر

كررت دانة اسمي بنطقها المميز

عمر = امممم وش اسم صديقتك اللي دايم معك ؟

دانة = ليان

عمر = وين ليان .. مااشوفها معك .. وين راحت ؟

دانة = دخلت بيتهم تاكل عسى

عمر = صح .. الحين وقت عشى .. ليه ماتدخلين انتي بعد وتاكلين عشاك

رفعت نظرها لي وبرطمت

دانة = انا لحت بس ماما تقول بعدين

قطبت حواجبي مستغرب

عمر مستغرب = ماما ؟

سكتت افكر مين تقصد بماما .. اختها يعني والا ايش

سألتها عشان استوعب

عمر = وش اسم ماما ؟

هزت دانة اكتافها بـ مدري

عمر = اسمها مريم ؟

هزت راسها بلا

قطبت حواجبي مستغرب وسكتت ..

رفعت راسي وشفت مشعل من بعيد يمشي متوجه لنا وهو يدخن بتلذذ

نزلت دانة من حظني وقمت واقف ونزلت نظري لها

عمر = دندون تبين اعطيك شي داخل البيت ؟

رافعت راسها وتطالعني ببراءة وساكته .. البنت مهملينها .. واضح ما احد بيسأل عنها .. خلني ادخلها البيت واعطيها أي شي تاكله

رفعت نظري وشفت مشعل قريب عندنا

مسكت يدها ودخلنا الحوش بس سمعت صوت مشعل يصيح فيني اول ماوصل عند الباب

مشعل بعصبية = هييييييييييييه عميران... مطلعني من البيت واخر شي تدخل اول ماتشوفني

التفتت لمشعل وانا وسط الحوش وهو عند الباب

عمر = لحظة شوي .. جايك الحين

و دخلت انا ودانه الممر الداخلي

فجأة رجع علي الالم ووقفت عن المشي لين يهدأ الوجع .. ووقفت دانة معي

حطيت يدي على بطني ... حسبي الله عليك يانايف .. وش لي انا بهذا كله

التفتت لدانة ولقيتها تطالعني ببرائة ومستغربة ليش وقفنا

ابتسمت لها بألم

عمر بتعب = بطني يعورني

دانة = لوووح حمام

بغيت اضحك بس منعت نفسي بسبب ألم بطني الفظييييع

اخذت شوي احتري الالم يخف وبعدها دخلنا الصاله انا ودانة

ولقيت جدي وجدتي وامي طاقينها سوالف ومها جالسة معهم وتطقطق بلابتوبها والسماعات باذنها وماهي معهم ( عقليا )

اول ماشافوا دانة وهم يسكتون مستغربين

امي مستغربة = مين البنيّة هذي ؟

جدتي مستغربة = عمر هذي ماهي دانة ؟

التفتت لجدتي وابتسمت

عمر بابتسامة = الا هذي دانة .. البنت شكلها جوعانة وقلت خلهاا تتعشى عندنا

التفتت لجدي ولقيته يطالعني وساكت ..

جدتي = بس اخاف يدورن عنها اهلها ومايلقونها .. ياوليدي لازم تعلمهم انها عندنا

التفتت لجدتي ورديت بسخرية

عمر = من هالناحية اتطمني مااحد بيسأل عنها

اخيرا انتبهت مها لنا ورفعت نظرها عن جهازها وصاحت اول ماشافت دانة

مها = ياااااقلبووووو

و نزلت سماعاتها ولاب توبها بسرعة وجت تركض وشالت دانة وقعدت تحبحبها

عمر = مها عطيها أي شي

وعطيتهم ظهري ابطلع من الصاله بس وقفتني امي

امي = عمر وين .. انت ماتعشيت

التفتت لامي

عمر = شوي يمة .. خويي عند الباب ..

امي بخوف = الله يصلحك .. الحركة ماهي زينه لك .. وخويك لاحق عليه ( وكملت بضجر ) ووش استفدنا من اخوياك غير المتاعب .. يكفي اللي سواه فيك اللي مايخاف الله .. ابعد عنهم ياوليدي لا تفجعني فيك

عمر = هذا مشعل ولد جارنا .. شوي يمه ماني مطول

وطلعت من الصاله .. وقبل اطلع للحوش .. سمعت مها تناديني

التفتت لها ولقيتها تمشي ناحيتي وهي شايلة دانة بين يديها ووقفت قدامي وقربت وجها من وجهي وهمست بسخرية

مها بهمس = متحسف على اللي سويته عشان كذا جبت هالبنيه عندنا يقالك تبي تصلح غلطتك

اخذت نفس معصب

عمر = اولا انا ماسويت شي عشان اصلح غلطتي ...

مها بعصبية = انتم كذا يالعيال ماتهتمون الا بنفسكم .. خليتني اتصل على اخته وهي غافلة وتقول ماسويت شي

عمر بعصبية = اصلا هي غافلة حتى عن اختها ( واشرت على دانه ) شوفي البنت وشلون شكلها .. ملابسها وسخه وشكلها مبهذل وكل وقتها بالشارع .. ماحد يسأل عنها .. وفارقي عني .. الشرهة مب عليك .. الشرهة على اللي يطلب منك خدمة


وطلعت للحوش معصب

ولقيت مشعل واقف عند بابنا ويدخن واول ماسمع خطواتي التفت لي

مشعل = هلا هلا .. ( ومد السيجارة لي ) دخن بمناسبة خروجك من المستشفى

ابتسمت .. مشعل وعبد الله دايم يحاولون فيني وبمنصور ندخن مثلهم

بس انا اللي يمنعني الخوف من امي وجدي والا عادي عندي ادخن مثلهم ومنصور نس الحالة خايف من ابوه

ابعدت يده عني

عمر = ماتملون انت وعبد الله .. اقولك مااقدر اخاف جدي يشم ريحة الدخان معي .. عاد بعدين دبرني

مشعل = كيفك انت الخسران ( وحط السيجارة بفمه ونزل نظره لبطني واشر براسه ) اشوف

عمر مستغرب = وش تشوف ؟

مشعل = ورني عمايل نايف

رفعت التيشيرت وكشفت عن بطني

مشعل باستهبال = افتح الكبوت

اخذت نفس معصب .. الحمار يقصد اللزقة اللي ببطني

عمر بعصبية = تتطنز ( وعدلت التيشيرت )

مشعل = هههههههههه امزح معك يارجال

عمر = المهم .. انا تعبان ماني فاضي لمزحك .. ( ومسكت يده ابيه يساعدني ) مشعل رايد هنا ماهو بالرياض

ناظرني مشعل بجديه

مشعل = وشلون عرفت .. بالعكس احتمال كبير انه بالرياض عند خواله ..

عمر = انا خليت الاهل يتصلون على اخته ... تقول اخته انها توها مكلمها خالها وما ذكر انه عندهم

طير مشعل عيونه فيني

مشعل بصدمة = وشلووووون .. كيف ماهو عندهم .. اجل ثلاث ايام وين رااااح ( وسحب يده مني وحطه على ذقنه يفكر ) انا الصراحة ماهتميت بموضوع رايد مرة .. كنت متوقع انه بالرياض ( والتفت لي مستغرب ) عمر تهقى رجع لبيتك وانت ماتدري ... رايد بزر اصغر حتى من اخوي ياسر اللي مايعرف يدبر شي كيف عاد رايد .. اذا كان ماهو عند عمه ولا عند خواله ولا عندك اجل وين ؟

عمر بترجي = تكفى مشعل خذ الشباب ودوروا عليه .. ودي ادور عليه بنفسي بس تعبان

مشعل = وين تبينا ندوره هذا ؟

عمر = شف .. اذا طلعتوا من الجامعة بكرة رحـ

وقاطعني مشعل يصححلي

مشعل بسخرية = وش عليك غايب لك اسبوع .. يالحبيب بكرة خميس مافيه دراسه

انتبهت

عمر = آآآآ صح .. طيب حلو فرصة .. رح انت دور عليه بالاستراحات .. وعبد الله يدور عليه بالمستشفيات .. ومنصور بمكان ثاني السوق مثلا .. المهم دوروا عليه بكل مكان

طير مشعل عيونه فيني

مشعل = يرحم امك .. تبيني انا ادور عليه بالاستراحات .. صاحي انت .. استراحات بريدة كثر النمل ... الاستراحات اكثر من السكان

عمر بضيق = اوووه مشعل .. مافيه الا الاستراحات .. تذكر يوم تجيب رايد لاستراحتنا .. جلس معنا رايد عادي وهو مايعرفنا .. اكيد الحين نفس الشي .. اكيد جالس باستراحة مع شباب مايعرفهم

قطب مشعل حواجبه يفكر بهالاحتمال

مشعل = معقول !!

حسيت بالالم رجع مرة ثانية .. حطيت يدي على بطني بألم وتعب

عمر بتعب = اتوقع .. بس الخوف انه يصير جالس مع شباب يستغلونه

سكت مشعل يفكر .. وانا احتريه يرد علي بس طول وهو ساكت ومارد .. وماني قادر اوقف اكثر

عمر بألم = هااااه .. اعتمد عليك .. قل للشباب بكرة يطلعون يدورون عليه .. وانا ابتصل بمصعب يدور عليه بعنيزة بعد

هز مشعل راسه بايه وراح وهو يكلم نفسه ويعدد الاستراحات .. شكله انلحس مخه يوم قلت له يدور بالاستراحات

معذور

دخلت الحوش وسكرت الباب ومشيت اعرج بتعب لداخل البيت .. وقفت عند الباب الداخلي وانا حاط يدي على بطني بألم

عمر = آآآه بطني ...

احس كل حركة تعتمد على عضلات البطن .. وماني قادر اتحمل اكثر

تحاملت على نفسي ورحت للصاله وانا اتساند على الجدار

وماصدقت وصلت الصاله .. على طول تمددت على اقرب كنبه

واستلقيت على ظهري و يدي على بطني و رجلي السليمة على يد الكنبة ورجلي اللي اعرج منها على الارض .. وماقدرت امنع صوتي يطلع بـ آآآه

قامت امي بفزع يوم دخلت عليهم بهالطريقة .. وجلست بثقل على ركبها بالارض قدام الكنبة

امي بخوف = عمر وش فيك ( وحطت يدها على يدي اللي فوق بطني ) يعورك شي ؟

عمر بألم = بطني يمه بطني

وعلى طول تجمعوا جدي وجدتي ومها عندي

جلس جدي على الكنبة الثانية عند راسي .. وجدتي بجنب امي واقفة.. ومها واقفة ورا امي

جدتي بخوف = الله يهديك .. انت ماطبت الى الحين وطالعـ(ن) من المستشفى قبل يسمحلك الدكتور

جدي = لا حول ولا قوة الا بالله ( وحط يده على الشاش اللي براسي ويمسح على شعري بحنان ) ليتني ماطاوعتك وطلعتك من المستشفى ..

التفتت امي لجدي

امي = عمي خلنا نرجعه للمستشفى

التفتت لامي بتعب

عمر بألم = لا يمه مابي ارجع .. شوي وبيخف العوار

مها = ملقوف والا وش يطلعك وانت ماوراك شي

وراحت واختفت عن انظاري .. شكلها جلست بنص الصاله .. ماشوفها من امي وجدتي اللي قدامي

جدي = قم ارجعك المستشفى

رفعت نظري لجدي اطالعه من تحت

عمر = مابي اروح .. خلاص .. شوي ويخف العوار .. ومب متحرك بمكاني خلاص بس مابي ارجع المستشفى ..

ضغطت امي على يدي كانها ماعجبها الكلام

حاولوا فيني شوي .. بس اصريت برايي

قامت امي بثقل بسبب الحمل وجلست على كنبه بعيدة شوي

وجدتي راحت برا الصاله وجدي الى الحين بمكانه

سكتت .. توني شفت بقية الصاله منهم

ابتسمت لا شعوريا لما شفت دانه جالسة بالارض بنص الصاله وقدامها صحن متوسط تاكل منه وتطالعني ببرائة تشوف على ايش متجمعين .. ومها جالسة بالارض بجنبها وماده رجلها

نزلت نظري لصحنها واشوف الرز متنثر بالارض من اكلها




11