يمسح الدمع بشكوى *مكتملة*

دانه = عمل

انتبهت على دانه اللي نطقت اسمي وهي تشر باصبعها الصغير علي وعيونها على مها .. كأنها تعلمها

التفتت مها لي ورجعت التفتت لدانة وهي تضحك

مها = ايه هذا عمر ابو بطن

نزلت دانه راسها لصحنها ورجعت تكمل اكلها

رايد هنا ... بيلقونه الشباب ان شاء الله .. بيرجع لبيتي .. والله ماضايقته ولا زعلته .. ليش طلع من عندي .. اذا كان عشان نايف طيب مافكر اخوك انا وش ذنبي .. يوم لقيت الشخص اللي يحسسني بمعنى الاخ يتركني بدون أي سبب .. بس شكلي اضحك على نفسي يادانة

الاخوان مايتركون بعضهم لاتفه سبب .. بس رايد مايعتبرني اخوه ... مو مثلي متعطش لكلمة اخو

حتى التفكير بالزواج نسيته يوم دخل رايد بيتي .. الله ماكتب لي اخوان بس ان شاء الله يكتب لي عيال يملون علي حياتي المملة

شكلي ابرجع افكر بالزواج مرة ثانية .. مع اني اشوفها صعبة وانا ادرس .. الله يسامحك يارايد .. وش سويت انا عشان تخليني













= عمر عمر ... الله يصلحك قم

فتحت عيوني بكسل وانا اسمع اللي يناديني وشفت امي واقفة ومنحنيه علي ويدها على صدري

التفتت لمكان دانة ولا لقيتها .. والصاله اصلا فاضية ومظلمة .. استوعبت و فركت عيني بكسل شكلي نمت وانا افكر

شفت علي بطانية .. اكيد امي لحفتنياها وانا نايم .. رفعت راسي لامي مستغرب

عمر = كم لي وانا نايم ؟

امي = الحين حنا الفجر .. قم ابي اجيب لك شي تاكله انت نمت قبل تتعشى .. قم الله يصلحك صل الفجر وانا ابروح احرر عشاك ( ووخرت البطانية عني تحثني اقوم ) يله قم صل انت متأخر

جلست والتفتت لمكان دانة ثم رفعت راسي لامي

عمر = وين دانه ؟

امي = رجعها جدك لبيتها بعد ماتعشت .. خفنا يدورون عليها اهلها وهي عندنا

ابتسمت بسخرية بس ماعلقت وقمت وطلعت من الصاله




الخميس

المغرب

جالس بالصاله .. ومعي جوالي اكتب رساله ابي ارسلها لمشعلوه .. الحمار مارد علي وش سوا .. علم الشباب والا ماعلمهم .. طلعوا يدورون رايد والا ماطلعوا

وانا اليوم ماطلعت من البيت ابد ... الجرح ببطني متعبني .. وامي صايرة مثل الرادار علي ... أي حركة اسويها تحذرني منها

بجنبي مها تطقطق بالاب توب وامي وجدتي مندمجات بالسوالف

( مشيعيل وش سويت
علمت الشباب ؟ )
وضغطت زر الارسال لرقم مشعل ونزلت جوالي بجنبي احتري رده والتفتت اطالع لاب توب مها اتفرج على اللي تشوفه

مها = عمر شف شف .. مقطع رهييييب ( ونزلت السماعات من اذنها ومدته علي )

زفرت بضيق من مها .. هذا ثالث مقطع توريني .. اذتني بمقاطعها .. بالبداية حسبتها توريني شكل تصميم المقاطع والصور اللي فيه .. طلع تبي اسمع نفس المقاطع .. وكلها مقاطع عن سوء الخاتمة وحسنها او مقطع عن بر الوالدين وماني عارف ايش

سمعت المقطع بملل لين خلص ونزلت السماعات وهزيت راسي لمها مجامله

عمر = حلو

مها = سمعت القصه اللي قالها الشيخ ؟

اخذت جوالي وانا اهز راسي بايه .. سمعت بالمقطع ثلاث قصص على ما اعتقد ومادري أي قصه تقصد مها بس قلت ايه تسليك لها عشان تسكت عني

فتحت انشاء رساله و كتبت رساله لمصعب اطلب منه يدور رايد عندهم بعنيزة

دقايق وجتني رساله رد من مصعب

( وش يجيبه لعنيزة ؟ )

رديت عليه برساله

( مجرد احتمال .. قلت لخوياي يدورون عليه ببريدة
وابيك تدوره انت بعنيزة )

شوي وجاني رد

( اكيد بالرياض عند خواله )

رديت عليه

( لا
انت سو اللي قلتلك عليه
واذا شفتك علمتك بكل شي )

رد علي برد احرجني الصراحة

( ماطلبت .. تامر امر ياولد العم )

تنهدت من اسلوبه معي .. على كثر ما اسوي فيه .. مايزعل

مادري ماعنده احساس هذا والا وش قصته

= انتم كذاااااااااا ... النتايج الزينة على طوول تنسب للرياجيل والنتايج الشينة تنسب للحريم

التفتت مستغرب لمها اللي تكلم بعصبية مع امي وجدتي

امي = يابنت الحلال هذا اللي اشوفه

حاولت اعرف بدون ماسأل واركز معهم احاول اعرف على ايش يتناقشون

جدتي توجه كلامها لمها المعصبة

جدتي = اخوك عبد العزيز رجال وعادل بين حريمه عشان كذا نشوف ام عمر وام معاذ مثل الاخوات .. الله لا يغير عليهم

مها بعصبية = لاااااااااا ... الحين ام عمر وام معاذ هن طيبات مع بعض .. المدح وشوله تنسبونه لعبد العزيز .. عااااد شرط لو نشوف ضراير قشرات مع بعض السب بيصير عليهن هن .. وزوجهن بيقولون عنه الناس مسكين ويكسر الخاطر .. واذا صارن الضراير حليلات مع بعض .. قالوا الناس والله زوجهن والنعم فيه مسيطر على الوضع .. شي يقهر الحين هن اللي محترمات بعضهن وصايرات مثل السمن على العسل وش دخل المدح يصير للزوج

امي = الله يهديك يامها ... عبد العزيز ماهو مقصر علي بـ

وماكملت امي كلامها من مها وصوتها العالي

مها بعصبية = ماقلنا شي .. بس طيبكم مع بعض وشوله تمدحون رجالكم فيه .. ام معاذ طيبه معك وانتي طيبه معها ومع بناتها ابي اعرف اسلوبكن مع بعض وش دخل عبد العزيز فيه .. عشان هالمدح هذا كله ... مدري ليه المجتمع العربي مايحب يمدح الحريم ابد .. أي شي زين نسبوه للرجال حتى لو مالهم دخل فيه

اخذت الاب توب من حضن مها وحطيته بحضني وقعدت اطقطق و مطنش نقاشهم

شوي ودخل علينا جدي الصاله وجلس بجنب امي و قبالي انا ومها

جدي = عبد العزيز واهله بيتعشون عندنا الليلة يبون يتحمدونلنا على سلامة عمر ( والتفت لي يسألني ) عمر معاذ مازارك ابد ؟

نزلت نظري للاب توب وهزيت راسي بلا

عمر = لا .. ماشفته

سمعت همسة جدي

جدي = لا حول ولا قوة الا بالله .. الله يهديه هالولد متصلن عليه وانت بالمستشفى ابيه يزورك .. بس ما دري وش اقول .. ماكأنكم عيال عم

رفعت راسي ابرد على جدي بس سبقتني مها

مها بسخرية = ترا عمر ومعاذ مايتدانون تربية امهاتهم .. وسعود ومصعب هذا حليلهم تربية ابوهم

ضحكت امي وجدتي على نغزة مها بالكلام


ربع ساعة واذن لصلاة العشا

وهالمرة ناوي اروح للمسجد عذر اطلع من البيت وامر مشعل على طريقي بما ان بيتهم جار المسجد

وطبعا ولأن الصلاة ماهي اكبر همي رحت للمسجد والامام يصلي

.. صليت الركعات الاخيرة معهم بصعوبة وعلى طول طلعت من المسجد وانا اعرج ومريت بيت مشعل واتصلت عليه معصب منه ومن تطنيشه لي

شوي وجاني رده

مشعل = الووووووه

عمر بعصبية = اطلع الحين انا عند بابكم ( وسكرت بوجهه )

التفتت لباب المسجد اللي قدامنا وقعدت اتفرج على الرجال وهم يطلعون منه ..

طلع من المسجد ياسر اخو مشعل الصغير تقريبا باول او ثاني ثانوي

سلمت عليه وطلبت منه يشوفلي مشعل وينه

بس فجأة طلع مشعل لنا وعليه ملابسه الداخليه ..

مشعل = هلا هلا بعميران

التفتت لمشعل معصب

عمر بعصبية = ياحمار ليه مارديت على رسالتي ..

التفت مشعل لياسر

مشعل = ياسر رح هات مفتاح سيارتي

ياسر = بتروح مشوار وانت كذا ؟

مشعل = ماني رايح بس بنجلس بالسيارة شوي ... رح هات المفتاح اركض

راح ياسر يركض داخل بيتهم

التفتت لمشعل

عمر = ياخي قلي وش سويت بموضوع رايد .. علمت الشباب ؟ ارسلـ

وقطع كلامي وهو يجرني لسيارته ووقفنا عند باب الراكب

مشعل = يااخي وش فيك معصب ..

جا ياسر وطل علينا وهو عند بابهم وحذف المفتاح على اخوه ودخل

فتح مشعل باب الراكب واشر لي يعني تفضل

مشعل = اركب

عمر بعصبية = ماني راكب عمي واهله بيجون عندنا الحين لازم ارجع للبيت .. ليش مارديت علي .. وش سويتوا ؟


مشعل = اول شي ( ودخل جسمه داخل السيارة من عند باب الراكب وفتح الدرج وطلع منه بكت الدخان وطلع سيجارة منها ومدها علي ) خذ روّق وهد اعصابك

وعلى حظي وحظ مشعل .. طلع جدي صدفة من باب المسجد اللي قبالنا بالوقت اللي مشعل ماد يده علي بالسيجارة .. التفتت لجدي اللي واقف عند باب المسجد ويطالعني بنظراته الحازمة وهالمرة اكثر حده

التفت مشعل للمكان اللي التفتت له واول ماطاحت عينه على جدي خاف

مشعل مرتبك = احم ( وحط يده اللي فيها السيجارة ورا ظهره وهمس بصوت مايسمعه الا اللي بجنبه ) هلا هلا ابو فهد .. تبي وحده ؟

بغيت اضحك عليه وانا اطالع جدي بخوف .. ودخلت يدي لا شعوريا بجيوب بنطلوني .. احتري ردة فعله ونهاية هالنظرات

طالعني جدي معصب ولا خلصني من نظراته الا رجال طلع من المسجد وسلم على جدي اللي واقف قدام الباب

سلم عليه جدي وعطاني نظرة وراح معه يمشون لبيوتهم .. زفرت بضيق وش يخلصني منه الحين ... التفتت لمشعل نكمل سالفتنا

عمر = مااااارديت علي .. وش سويت

التفت مشعل لي وهو يحط السيجارة بفمه

مشعل = ماسوينا شي .. علمت عبد الله ومنصور واتفقنا بكرة الجمعة نطلع وندوره

عمر = وين بتدورون بالضبط ؟

مشعل = عبد الله ومنصور عليهم الاستراحات وانا ابدور عليه عند سوق الخضار وسوق البهايم واذا مالقيته هناك ابدور بالمستشفيات

تنهدت ... يعني ماسووا شي اليوم وانا جالس على اعصابي

عمر بضيق = طيب ليه مارديت على رسالتي ؟

مشعل = ماعندي رصيد

هزيت راسي بايه واستاذنت من مشعل وعطيته ظهري ابرجع

بس وقفني مشعل

مشعل = لحظة عمر قبل انسى

التفتت له بصمت

مشعل = جاني خبر ان سعد طلع

طيرت عيوني متفاجئ

عمر = طلعوه ؟

مشعل = ايه .. قالولي الشباب طلع

تنهدت ماعندي كلام اقوله .. هزيت راسي بايه ورجعت البيت وانا افكر ...

مشكلة سعد ونايف بسيطة بس نايف كبرها وهي صغيره .. خوفه من الهيئة خلاه يهج ومايسلم نفسه لهم .. لو انه متعوذ من الشيطان من البداية كان يمديه طالع ...
الحين مو بس الهيئة تدوره حتى الشرطة تدور عليه وهاج برا بريدة وحالته حاله بس وين يروح مصيره يطيح بيديهم

بس يااارب الشباب يلقون رايد .. اسبوع تقريبا مادري وينه ... وين اختفى هذا ... ماله مكان ببريدة الا بيتي

وقفت عن المشي وانا افكر .. صح يمكن رجع لبيتي وانا مادري ... ليه لا ... انا بعد الحادث مادخلت بيتي ابد .. ابتسمت متأمل بهالاحتمال وان شاء الله يكون احتمالي بمحله

طلعت جوالي من جيبي واتصلت على احمد

واول مادخلت حارتنا رد علي

احمد = هلا عمر

عمر = هلا بك .. كيف الحال احمد

احمد = الحمد الله بخير ونعمه .. وشلونك الحين .. ان شاء الله طيب .. ان شاء الله قريب يخرجونك ؟

عمر = الحمد الله تمام .. انا طلعت والحين انا ببيت جدي

احمد مستغرب = صدق .. ماشاء الله احسهم طلعوك بسرعة والا انا غلطان

عمر = طلعت على مسؤوليتي ( وكملت عشان ادخل بالموضوع ) اقول احمد .. ابسألك ماشفت رايد .. قلت يمكن رجع لبيتي .. مادري ماشفته عندكم بالحارة ؟

احمد = لا ماشفته .. والصراحة انا مستغرب بس قلت يمكن راح لاحد يعرفه غيرك

سكتت متحطم

يااااربي ويييين رااااح هذا


انتبهت على سيارة عمي السوبربان واقفة عند بيت جدي

احمد = عمر معي ؟

عمر بتنهيدة = ايوة معك ... آآآ .. طيب مشكور احمد مع السلامة

احمد = ياهلا مع السلامة

سكرت عن احمد وانا مستغرب وين اختفى رايد

وقفت بمكاني منصدم من اللي قدامي .. توني انتبه على دانه .. جالسة عند عتبة بابهم وشكلها تبكي وتمسح دموعها بانكسار ومجتمعين عليها بنتين صغيرات .. وحدة صديقتها والثانية شكلها باولى ابتدائي او ثاني

مشيت متوجه لهن ووقفت قبالهن وباب بيتهم مفتوح على الاخر

ابتعدت عن واجهة الباب ووقفت على جنب وانا اسمع البنت اللي شكلها باولى ابتدائي تمسح على شعر دانة وتحاول تسكتها

= خلاص دانة تعالي نلعب

عمر = دندون ليش تبكين ؟

ماردت علي تشاهق وتمسح دموعها بيديها الصغيره

حطيت يدي على بطني وانحنيت بشويش ومسكت يدها ووقفتها

عمر = تعالي عندي دندون وعلميني وش فيك

ابعدنا عن باب بيتهم شوي ووقفنا عند احد السيارات والبنيات معنا .. ودي اشيلها واحطها على الكبوت بس مااقدر .. مسحت على شعرها وانا واقف احثها على الكلام

عمر = الحلوة ليش تبكي .. قوليلي وانا اضربه لك

تكلمت بكلمات مافهمتها ولفت يديها حولين رجلي وغطت وجهها بفخذي تبكي .. حسب طولها بالنسبة لي

التفتت لبيت جدي .. افففف الناس يحتروني وانا هنا

نزلت نظري للبنات اسألهن

عمر = وش فيها ؟

تكلمت البنت اللي باولى ابتدائي

= امي ضربتها ..

قطبت حواجبي مستغرب .. امها ؟

عمر مستغرب = ليه ضربتها ؟

= هي كسرت لمبتنا

عمر مستغرب = وانتي وين بيتكم ؟

اشرت البنت على باب بيت عم رايد المفتوح

= هذا بيتنا

اهاا الحين فهمت ... شكل هالبنت بنت عم دانة ورايد

سألتها وانا امسح على شعر دانة

عمر = وش اسمك ؟

= شهد

عمر = اخوك اسمه بندر ؟

شهد = ايه

سكتت وانا اطالع شهد .. امك مستقويه على هالضعيفة اجل ..

وابتسمت بنذاله وانا اطالع شهد وافكر كيف اخلي امها تعرف كيف تمد يدها على دندون مرة ثانية

تلفتت يمين ويسار اشوف اذا فيه احد يشوفني والا لا

وماشفت الا بزارين هنا وهناك وكلن لاهي ورجعت التفت لشهد

مديت يدي فوق وبحركة سريعه فاجأتها .. ضربتها على خدها كف

شهقت شهد بصدمه .. وحطت يدها على خدها وباقل من الثانية تجمعت الدموع بعيونها وبكت وهي تطالعني بخوف

مسكت اذنها احفظها كلامي

عمر = روحي ياحلوة وقولي لامك اذا كنتي قويه فيه اللي اقوى منك ( ولويت اذنها بشويش ) وش تقولين ؟

صرخت شهد من اذنها وهي تبكي

ابتعدت صديقة دانة عني خايفة مني .. اما دانة ابعدت وجهها عن فخذي وقعدت تطالع بنت عمها وتطالعني مستغربة

عمر = هاااه وش تقولين لامك ؟

ردت علي شهد ودموعها اربع اربع ..

شهد وهي تبكي = اقول انت قوي


اممممم مو هذا الرد اللي ابيه يس بعد هذا رد حلو .. يفي بالغرض

تركت اذنها

عمر = يله انقلعي

دخلت البنت تركض وهي تبكي

التفتت لدانة ومسحت على شعرها

عمر = خلاص دندون اذا ضربتك الخبلة اللي داخل علميني

رافعة راسها وتطالعني بعيون دامعة .. ابتسمت لها ودي اضمها لصدري بس صحتي الحين ماتسمح اشيلها .. ان شاء الله مرة ثانية


تركها ورحت لبيت جدي .. اذا جا عم رايد فازع عشان بنته مافيه احلى من الكذب اصرفه فيها ومثل مايكذب على الشيبان اكذب عليه ..

( واشرت على نفسي ) ضربت البنت انا ؟ .. وابتسمت بنذاله .. ماضربت احد .. اتحداه يثبت

فجأة لقيت باب بيت جدي مسكر .. وعلى طول تذكر بنات عمي .. اكيد موجودات والا وشوله سكروا الباب الا عشان ما ادخل فجأة عليهم

اففففف .. من زينهن عااااد ... ضربت الباب .. دقايق و طلعت لي مها

مها بفرح =هلا عمور ... ماشاء الله هالمرة رايح للمسجد ؟

دخلت الحوش وانا اكلمها وهي تسكر الباب وراي

عمر = مليت من جلسة البيت ومنها مريت على خويي ابيه بشغله

جت مها ووقفت قدامي معصبة

مها = مالت عليك والله مالت عليك .. يعني رايح للمسجد مو لله ؟

سكتت ومارديت عليها .. احم وش اقول بالله .. وش اللي خلاني اصارحها انا الحين .. لساني يبيله قص

مها بعصبية = يالتيس لا تدخل لين انبه البنات ( وعطتني ظهرها وهي تكلم نفسها بعصبية ) فرحت على بالي المقاطع جابت نتيجه .... مالت عليييك والله

وقفت احتري يأذنون لي بالدخول .. انا بنفسي متضايق من حالي مع الصلاة تجي تزيد علي هذي

جاني سعود وسلم علي ودخلنا الصاله وهو يسالني عن صحتي


ولقيت الكل مجتمعين بالصالة الا مها واخوات معاذ

جالسين بالارض ومافيه الا الدلال بالنص

جلس سعود بالارض بجنب مصعب وسحب صينية الدلال وبدا يصب للجالسين

التفتت لجدي ولقيته يطالعني وعلى طول تذكرت سيجارة مشعل ونظرته لي عند المسجد .. لفيت وجهي عنه و سلمت على عمي ومرة عمي .. ولما وصلت عند معاذ ..

وقف وصافحته وسلم علي وهمس باذني وخدي على خده

معاذ بهمس = ابصم بالعشرة ان اللي طاعنك معذور

ابعدت وجهي عن وجهه اطالعه وحاولت ابتسم اغيظه وهمست

عمر بهمس = ايه طبعا معذور .. نفس عذري وانا ماخذ سيارتك لي اكثر من ثلاث اسابيع .. وانت جالس بدون سيارة وبدون مكافأة الجامعة ( وكملت اغيظه ) افااا تشحد من ابوك ؟

سحب معاذ يده من يدي بغيض

معاذ بهمس = سيارتي بترجعلي غصب عنك.. ما اكون معاذ اذا مارجعتها بكرة وتشوف ياعمير

قربت وجهي من وجهه وهمست بابتسامة احاول اغيظه

عمر = تبطي عظم

مارد علي يطالعني ومنقهر .. حسيت الود وده يلفعني باي شي بس ماسك نفسه قدام الجميع

ابعدت وجهي عن وجهه وعطيته ظهري بتعالي وجلست بجنب امي

امي جالسه بالارض وانا على الكنبة .. رفعت راسي لمعاذ ولقيته واقف الى الحين بنص الصاله ويطالعني بقهر وساكت

تكلم مصعب اللي حس باخوه

مصعب وهو ياخذ الدله من يد سعود = معاذ خذ فنجالك ووسع صدرك وماعليك من احد ( والتفت لي )

رجع معاذ لمكانه بجنب ابوه وجلس واخذ الفنجان من مصعب

طالعت مصعب وهو يصب للبقية .. نزلت راسي بحزن .. ياحظك يامعاذ لك اخو حس فيك على طول

شي طبيعي يوقف معك ويحس فيك .. مع انك انت اللي تحرشت فيني بالبداية .. بس مالي اخو مثلك يحس فيني

واحد بس حسيت انه مثل اخوي بس كنت اضحك على نفسي وطلع من بيتي لأتفه سبب

انتبهت من سرحاني من دخلت مها ومعها صينية كبيرة فيها حلا وفطاير

واول مانزلتهم بالارض .. اعتدلت واقفة وحطت يديها على خصرها ووجهت كلامها لعمي عبد العزيز

مها = وشلوووون الحين ابي اجلس معكم وابي اجلس مع البنات

عمي عبد العزيز = خليهن يتغطن ويجن .. عمر ولد عمهن ماهو غريب

التفتت مها لمعاذ ورفعت خشمها بانتصار

مها = ايه كذا

وطلعت برا الصاله .. دقايق وجن اخوات معاذ بعباياتهن وجلسن مستحيات

وبدت السهره بسلام بدون مااتبادل مع معاذ أي كلام

نزلت راسي بتفكير سارح ... مدري .. احس بتعب وبالي ابد ماهو معهم

من جهه الاصابة ببطني متعبتني ومن جهه رايد اللي مادري وينه ومن جهه وقفت مصعب مع اخوه بكل شي .. ليه يضحك علي اجل ويحاول يتقرب مني اذا كان بكل شي يوقف مع معاذ .. شكله يطبق ( انا واخوي على ولد عمي .. انا وولد عمي على الغريب )
غمضت عيوني بقهر لما تذكرت حواري مع مصعب ببيتي وهو يدافع عن معاذ

))))))))))((((((((((
عمر = لا تطول صوتك علي ... شف اسلوب معاذ معي ثم تعال كلمني .. ( والتفتت له ) عمرك وقفت بوجه اخوك عشاني ؟
مصعب بتحدي = هذا انت قلتها اخوي
طالعته منجرح بس تكمتها بصدري ( والتفتت للتلفزيون ) صح معه حق اخوه .. انا وحيد واببقى طول عمري وحيد
مصعب = معاذ على الاقل مايغلط على احد وماهو مغرور مثلك
ابتسمت بسخرية
عمر = هه صح مايغلط .. لدرجة اني ما انقلبت بسيارتي ابد
مصعب = ذيك المرة كانت مزحة وماكان يقصد ... وفوق هذا انت حشرتني مع معاذ واخذت مكافئتي وانا مالي ذنب ( وسكت شوي ) عمر انا ولد عمك وامد يدي لك ومستعد افزعلك للي ضربك او لأي شي تبيه .. بس لا تردني
)))))))))))(((((((((((((

رفعت راسي وطالعت مصعب اللي يسولف مع مها ...

اسلوب التقرب والتلزق مايمشي علي يامصعب .. وسالفة سيارة معاذ والله لاطولها وهي قصيرة .. عناد فيكم

ونشوف من اللي يمشي كلامه بكرة .. انا والا معاذ

بعد العشا وانا واقف عند المغاسل وعمي بجنبي بالمغسلة الثاني

عمي = عمر .. عمك ابو سامي يسلم عليك ويتحمدلك بالسلامة ويتعذر منك مشغول بجدة ولا يقدر يجي يسلم عليك

عمر = الله يسلمه .. مايحتاج يتعب نفسه .. انا ابتصل عليه بعدين

هز عمي راسه بايه ونشف يديه وراح

طلعت من المغاسل بس سد طريقي مصعب بمرح

مصعب = هاااه ياولد العم ماقلتلي وش سالفة رايد .. وليه توقعت انه بيصير بعنيزة ؟

طالعته بصمت شوي وانا احس اني متحطم من كل شي

من رايد اللي تركني ومن مصعب اللي يبدي اخوه علي

دفعته بيدي على ورا عشان امر

عمر بضيق = تبي تدوره دوره وانت ساكت .. ماتبي فارق .. ماني محتاجك

ومريت بجنبه بس هو مسكني مع يدي يوقفني

مصعب مستغرب = طالع .. مو انت قلتلي برساله جوال انك بتعلمني بسالفة رايد اذا شفتني

سحبت يدي منه وعطيته ظهري ومشيت عنه مطنشه

قلتلك اسلوب التقرب والتلزق مايمشي علي

رجعت الصاله ومالقيت مكان فاضي الا بجنب جدي اللي جالس على الكنبة وجلست بجنبه .. وعلى طول استلمني

التفت لي وقعد يكلمني بصوت بيني وبينه

جدي = وش تبي من مشعل ؟

تأففت ورديت عليه بضيق

عمر = مابيني وبينه شي .. خويي

جدي بشك = انت تدخن ؟

عمر بملل = لا والله ياجدي ماادخن ( والتفتت له متضايق من هالتحقيقات اللي كل يوم ) عمرك شميته معي ؟

لف جدي وجهه عني وسكت بس شوي ورجع التفت لي

جدي = صح قبل انسى .. ابو بندر يسأل عن كرت عيال اخوه

تفاجأت

عمر = وش قلتله ؟

جدي بتنهيده = ياوليدي ابو بندر بعد الحادث اللي صارلك درا عن كل شي وعلمته ان رايد كان ساكن معك

تنهدت و سكتت

مو مهم .. درا والا مادرا هالشايب .. بس المشكلة الحين مالي عذر يصير الكرت معي .. نزلت راسي افكر مدري وش نرد عليه بخصوص الكرت

هالكرت بصعوبة طلعناه من عينه .. اقوم ارجعه له ورايد اكيد يحتاجه

جدي = هاه ياوليدي وش اقوله .. بتعطيني الكرت ارجعه له والا وشلون ؟

حطيت يدي على ذقني افكر .. ان شاء الله الشباب بيلقون رايد .. مابي ارجع الكرت لهالشيبة .. الكلب مابيه يستفيد من راتب رايد ودانه .. بس وشلون ؟

رفعت راسي ولقيت مصعب جالس قبالي و يطالعني وهو ساكت .. لفيت وجهي لجدي

عمر = عطيته رايد

طير جدي عيونه فيني مستغرب = وشلون ؟ .. متى عطيته رايد ماهو انت تــ

قاطعته

عمر = خلاص قله الكرت مع رايد وخل ابو بندر يبلط البحر ( وكملت بتطنز ) يمكن يتحمس عشان الكرت ويدور رايد معنا هههههههههه

بس جدي ماضحك وقعد يطالعني مستغرب وكأنه موعاجبه الكلام


= عمر شوي ابيك

التفتت لمصدر الصوت ولقيت معاذ واقف بنص الصاله

قال كلمته وطلع برا الصاله يحتريني

قطبت حواجبي مستغرب والتفتت لمصعب اللي قبالي .. احاول اعرف وش يبي بس هو قام على طول وطلع ورا معاذ

* الجــزء العشــرون *
















= عمر شوي ابيك

التفتت لمصدر الصوت ولقيت معاذ واقف بنص الصاله

قال كلمته وطلع برا الصاله يحتريني

قطبت حواجبي مستغرب والتفتت لمصعب اللي قبالي .. احاول اعرف وش يبي بس هو قام على طول وطلع ورا معاذ

سكتت مستغرب وش يبي هذا الحين ودي اطنشه واكسحه بس الفضول ذابحني ودي اعرف وش يبي .. قمت ابي اطلع بس تقابلت مع وحدة من بنات عمي عند مدخل الصاله .. مدري ايهم .. متغطيه بالكامل

تراجعت البنت وفسحت الطريق لي .. مريت من عندها اعرج وطلعت ادور معاذ ومصعب
رحت للغرفة اللي بجنب الصاله ولا لقيتهم .. رحت للمغاسل ولا لقيتهم .. رحت للحوش واخيرا لقيتهم هناك

واقفين عند مدخل المجلس متقابلين وشكلهم يتكلمون وواضح عليهم ماشافوني ... حوش جدي كبير شوي ودايم انواره شغاله حتى في النهار .. معاذ واقف ومتساند على الباب وعاقد يديه قدام صدره ومصعب قباله ومندمج بالكلام معه

مشيت لين قربت عندهم .. اول ماشافني معاذ قعد يطالعني .. التفت مصعب لي على التفاتت معاذ وسكت عن الكلام اول ماشافني

وقفت عندهم وعقدت يدي قدام صدري ووجهت كلامي لمعاذ

عمر = خير ؟

اعتدل معاذ واقف ووقف قدامي مباشرة وهو الى الحين عاقد يديه قدام صدره ومصعب وراه

معاذ = كم تطلبني ؟

ابتسمت ابتسامة جانبيه على سؤاله ..

عمر = خمس طعش ألف

معاذ بعصبية = لا يادلخ كم باقي تطلبني ؟

سكتت احاول اتذكر كم سحبت من مكافأتهم ... بس معاذ ظن سكوتي غباء

معاذ بسخرية = انت ماتفهم ... كم باقي من الخمس طعش ياثور

عمر = ما اخذت من حسابك انت ومصعب الا الفين وخمسمية

معاذ = يعني تطلبني الحين .. امممم .. 12 الف وخمسمية ؟

هزيت راسي بايه

رفع معاذ راسه بتحدي

معاذ = خلاص اجل عطني بطايقنا وانا ابدفع اللي تطلبني كاش

تفاجأت ..

شهق مصعب ووقف بجنبنا وهو يكلم اخوه

مصعب متفاجئ = معاذ من وين بتعطيه كاش ؟

التفت معاذ له

معاذ = تركي وعدني يعطيني دين

مصعب مستغرب = تركي !!

قطبت حواجبي ماني عارف من تركي هذا بالضبط .. لكن اذا ماخاب ظني صديق معاذ اللي دايم اشوفه معه بالجامعة

سمعت صوت خطوات وراي والتفتت ورا اشوف

وشفت سعود جاي لنا يمشي ورجعت التفت لهم

مصعب = معاذ وش بتستفيد.. هذا دين وهذا دين

معاذ بعصبية = على الاقل خويي واعرفه بيصبر علي وابسدد له بنص المكافأة مو مثل ولد عمك هالنحيس ( واشر علي ) ماخذ مكافأتي ومكافأتك كلها

ابتسمت وانا الى الحين عاقد يدي قدام صدري وساكت

وصل سعود لنا وسألنا مستغرب

سعود باستغراب = وش فيكم واقفين هنا ؟

ماحد رد عليه

مصعب يسأل معاذ متضايق

مصعب بضيق = وهو كيف بيدبرها لك .. لا تنسى تراه ماله الا مكافأته مثلنا يعني هو الثاني يمكن يستلف المبلغ لك .. خلك على مقرودك لا يجيك اللي اقرد منه ( والتفت لي يترجاني ) عمر تكفى طلبتك رجع مكافأتي على الاقل .. تكفى والله محتاجينها انا ومعاذ

صارخ معاذ بصوت عالي

معاذ = بيرجعها غصب عنه وفوقها سيارتي ( والتفت لي معصب و مد يده يعني هات ) يالله رجع بطاقتي وبطاقة مصعب وسيارتي .. والاسبوع الجاي المبلغ عندك كاش

ابتسمت وانا الى الحين عاقد يدي قدام صدري واكلمه بهدوء اغيضه

عمر بهدوء = لا ياحلو هات المبلغ اول واعطيك بطاقتك

و شهقت متفاجأ من معاذ اللي مسكتني مع قميصي وجرني ناحيته وقرب وجهه من وجهي وهو يصارخ علي

معاذ بصراخ = وبعدين معك انت وبعدين معك .. ثور انت ثور

مسك مصعب معاذ من ورا وابعده عني .. وسعود حال بيننا وهو الى الحين مو فاهم شي

سعود بصدمة = وش فيكم

نزل معاذ شماغه بقهر ولوح شماغه قدامي ومصعب الى الحين ماسك بطنه من ورا

معاذ = قسم بالله كرهتني فيك ياعمر

مصعب = خلاص معاذ انا اتفاهم معه .. هد شوي ياخوي ( وترك بطنه ووقف على طول قدام معاذ ومعطيني ظهره ) اصبر معاذ اصبر خلني انا اتفاهم معه ( والتفت لي وحط يده على صدره يترجاني ) تكفى عمر تكفى طلبتك .. خذ سيارتي ورجع سيارة معاذ ... تكفى

تفاجات من عرضه .. اخذ سيارته

صارخ معاذ منقهر من اخوه

معاذ بصراخ = مصععععععب انطم .. يكفي مكافأتنا ماخذها تبي تعطيه سيارتك بعد

التفت مصعب لاخوه يترجاه

مصعب = معليش انا راضي بس خلنا نخلص من هالسالفة اللي اذيتونا فيها

الصراحة تضايقت من عرضه ... اذا اخذت سيارته كيف بيدور عن رايد بعنيزة ؟ ودي اسأله بس مو قدام اخوانه.. يعني مايعرض سيارته علي الا الحين

وحاولت اتهرب من عرضه وادور أي عذر يخلي سيارة معاذ معي

عمر = بس اللي غلط علي معاذ مو انت ؟

التفت لي

مصعب = انت اخذت مكافأتي وانا مالي ذنب جت على هذي

سكتت منحرج .. معه حق

سمعت سعود يكلم نفسه

سعود مستغرب = افاااا ماخذ مكافأتك عمر .. وانا اقووووول ليش تشحد مني

نزلت نظري لسعود اللي واقف قدامي ووجهه لمصعب

ابتسمت مستمتع على هالمعلومة

عمر بابتسامة = ومعاذ مايشحد منك

رفع سعود نظره لي مستغرب

سعود = ليه طيب .. فهموني

انتبهت على يد مصعب على كتفي

مصعب = هاه وش قلت

عمر = على وش ؟ توك طالب مني بطاقتك والحين تبي سيارة معاذ ارجعها ... وانا من وين لي سيارة ؟

مصعب = خذ سيارتي بس تكفى رجع بطاقتي .. وبطااقة معاذ خلها معك لين نسدد لك المبلغ ( وحط يديه الثنتين على اكتافي ولفني اواجهه مباشرة ) تكفى عمر ما ابغى معاذ يتدين حتى لو من خويه .. تكفى ارضى بهالحل .. والله صعبه نقعد انا ومعاذ بدون مكافأت و صعبه نطلب من ابوي كل شوي .. وكل يوم ماسكين خطوط رايحين راجعين للجامعة وليتها قريبة منا .. حنا بعنيزة وهي نطقها 20 كيلو لبريدة

تنهدت ماعندي شي اقوله .. حجرلي مصعب.. مااقدر اعترض .. سيارة بدل سيارتي مع انها خالصة اصلا ..

انتبهت على سعود يسألني

سعود مستغرب = عمر ليه انت ماخذ مكافأت اخواني .. اللي فهمته الحين انك تطلب معاذ بس وش دخل مصعب

سمعنا صرخة معاذ منقهر

معاذ = نذاله نذاله ماتعرفه يعني .. هذا واحد كلب .. جدي كبر راسه علينا ( ومشى ودفع اخوه سعود ومسك كتفي بعنف خلاني اواجهه غصب ) رجع مكافأة مصعب .. انا الغبي اللي خليتك تاخذها وهو ماله ذنب .. قبل انا خايف من ابوي وجدي يدرون بالسالفة بس ماني قادر اتحمل خلاص ..تراك مرقع وبلمسه على بطنك اخليك تتلوى

مصعب بضيق = معاذ

سكتت اطالعه .. الصراحة خفت .. انا بطني متعبني من دون ما يلمسه احد كيف لو اتضارب مع هالعصبي اللي قدامي .. بس كبريائي منعني اسكت

عمر = وش بتسوي يعني

جا مصعب وحال بيني وبين معاذ وابعدنا عن بعض

مصعب بضيق = خلاص انت واياه .. فكونا عاد ( ودخل يده في جيبه وطلع مفتاح ) خذ هذا مفتاح سيارتي .. يله رجع سيارة معاذ

التفتت لمصعب متضايق

عمر بضيق = و رايد

و انتبهت لنفسي .. طلع السؤال غصب عني بصوت عالي

مصعب مستغرب = رايد ؟ وش فيه ؟

معاذ مستغرب = رايد ( والتفت لاخوه يسأله ) من رايد ؟

سألني مصعب مطنشه

مصعب مستغرب == وش دخل رايد بمشكلتنا الحين

مسكت ذراع مصعب واخذته على جنب

عمر بهمس = اذا اخذت سيارتك كيف بتدور على رايد بعنيزة ؟

مصعب = ما فهمنالك الصراحة .. قبل شوي وحنا عند المغاسل قلتلي اذا ماتبي تدوره فارق ومانت محتاجني والحين تبيني ادوره ..

مسحت على شعري بضيق ولفيت وجهي عنه وسكتت

احس بدوامه مع مصعب .. ابي مساعدته وبنفس الوقت مابي

حط مصعب يده على كتفي وضغط عليها وقربني منه اكثر وكتفي يلامس صدره وهمس باذني

مصعب = انت بس لو تخلي عنك هالتكبر واللكاعة تصير بالف خير ( وابتعد عني وتنهد ) رايد ابدوره بدون ماتطلب مني وبالنسبة للسيارة لا تشيل هم .. عادي اخذ سيارة ابوي والا معاذ .. مو مشكله

نزلت راسي وسكتت .. تعبت من كل شي .. اختفاء رايد احسه كسرني .. ومعاملة مصعب يخليني احتقر نفسي ...

رايد بعد كل اللي سويته له تركني .. ادري انه مايبي يسبب لي مشاكل .. بس هو وحيد مثلي .. ماعنده اهل ..

ومصعب على اللي اسوي فيه يتقرب مني .. بس ماهو وحيد .. عنده اهل

رايد بس هو الوحيد اللي يناسب يسكن معي .. هو الوحيد اللي حسسني بمعنى الاخ

لييييييه .. ليه اللي ابيهم يبعدون عني ... واللي ما ابيهم يتقربون مني

اول امي ثم رايد

حسيت بدموعي بتنزل وغمضت عيوني احاول امنعها

حسيت بذراع مصعب يلف اكتافي ويسألني وصوته قريب من اذني

مصعب = عمر وش فيك ؟

مدري احس متحطم من كل شي

فتحت عيوني ورفعت راسي وانا ابعد ذراع مصعب عني

ودخلت يدي بجيب بنطلوني وطلعت بوكي .. ومديت على مصعب بطاقته

عمر بحزن = هذي بطاقتك ( ودخلت يدي مرة ثانية بجيب بنطلوني وطلعت المفتاح ) وهذي مفتاح سيارة معاذ

اخذهم مني ومشيت متعديه بس هو مسكني مع يدي ووقفني

مصعب مستغرب = وين بتروح

رديت عليه بدون ما اناظره

عمر بهمس = داخل

وسحبت يدي منه وسمعتهم وانا امشي و معطيهم ظهري

معاذ = اخييييرا مابغى

سعود = مصعب هذي بطاقتك ؟ .. يله الحين عطني حقي تراي اطلبك 50 ريال هههههههه

معاذ = ههههههههههه هذا وهي خمسين ... نحييييس طالع على ولد عمك

دخلت الممر الداخلي ووقفت بمكاني .. مالي نفس اقابل احد

ليتني اقدر افاتح جدي بموضوع الزواج .. بس المشكلة الدراسة ه غير هم الوظيفة مادري اذا تخرجت راح اتوظف والا لا

سمعت اصواتهم تقرب .. ومشيت على طول ودخلت الصاله .. ما ابي اصير لحالي مع مصعب

= تنحنح الله يصلحك قبل تدخل

انتبهت على جدي وهو يكلمني وتوني استوعبت اني مدرعم وبنات عمي موجودات .. التفتت لهن ولقيتهم يعدلن نقاباتهم ... احم انحرجت

اعتذرت منحرج وجلست بجنب عمي على الكنبة وكلـن رجع لسواليفه ... كل ثنين مع بعض
عمي يسولف مع جدي وجدتي
وامي مع مرة عمي ام معاذ
ومها مع البنات

نزلت راسي بصمت وانا اسمع مها تكلم وحدة من البنات بس بصوتها العالي

مها = ايه اقولكم يوم قرر ابوي من بكرة صار اللي صار .. وش تبوني اسوي .. حظناااااا

سمعت وحدة من البنات ترد عليها بس بصوت خفيف جدا .. ما اسمع الا همهمات

وعلى طول جا رد مها على دخلت الشباب الصاله

مها = ابقول لابوي الحين وان شاء الله يوافق

جا مصعب وجلس بجنبي ومد علي مفتاح

رفعت راسي مستغرب والتفت له

عمر = وش هذا ؟

مصعب = مفتاح سيارتي .. مو اتفقنا اذا رجعت سيارة معاذ اعطيك سيارتي

ابعدت يده عني بضيق

عمر = مابيها

مصعب مستغرب = ليه

عمر = ما احتاجها الحين .. صحتي ماتسمح اسوق سيارة هالفترة وسيارتي ماباقي لها شي وتطلع .. يعـ

وقاطعنا صوت مها بصوت اعلى شوي تكلم الجميع .. وجدي بالذات

مها = يباااااااا .. قل تم

سكتنا كلنا .. وجدي يرد عليها

ابو فهد مستغرب = على وش ؟

مها بترجي = اول قل تم

عمي ابو معاذ = تبينه يقول تم وحنا ماندري وش تبين

وعلى طول استسلمت مها

مها بترجي = يبا الله يخليك ابي اروح معاهم لعنيزة .. حنا كنا بنروح نقضي عندهم كم يوم بس هذا ( واشرت علي ) خرب علينا بهوشاته

طيرت عيوني .. صح .. توني اتذكر .. بنفس اليوم اللي صار فيه الحادثة قالي مصعب ان جدي وافق يجلسون عند عمي... صح نسيت

التفت لمصعب

عمر = صح .. مو تقول انك بتاخذ جدي لعنيزة عندكم

التفت مصعب لي بابتسامة

مصعب = الا بس انت على قولت مها خربت علينا

انتبهت على صوت جدي يكلم مها

جدي = لا .. تبين تروحين انتي روحي .. عمر توه طالع من المستشفى و تعبان ومانقدر نخليه

جيت ابرد .. بس سبقتني وحدة من بنات عمي منفعله .. ولاول مرة اسمع صوت وحدة منهن

= لييييه نبيك انت وجدتي بعد

مها بخيبة امل = لييييه كنا ناوين

سعود =طيب عمر عادي يروح معنا

معاذ = خله يولي

تكلمت امي ترد على معاذ

امي = الله يصلحك انا ماقدر اخلي وليدي

سعود بضيق = خوذيه معك بالبيت

قطبت حواجبي معصب على كلمته .. وش خوذيه معك هذي .. مافيه كلمه انسب من ذي

التفتت امي لسعود تفهمه

امي = ودي والله بس مايقدر .. شقتي فوق

ام معاذ = بس كذا .. نفتح الملحق له يام عمر

مها بترجي = هاه يبه تكفى خلنا نروح كلنا .. تراك وافقت ذيك المرة

جدي = ذيك المرة قبل يدخل عمر المستشفى ( وكمل بحزم ينهي الموضوع ) ماني رايح لين يطيب عمر .. تبين تروحين انتي وامك روحي .. غيره ماعندي

سكتوا كلهم بخيبة امل .. طالعتهم واحد واحد ... حتى مصعب تضايق من جدي

ومها طالعتني شوي متضايقة ولفت وجهها عني وهي تتأفف .. وسعود يشر لي على ذقنه يعني تكفى كلمه .. ومعاذ وجهه لا تعليق .. التفتت مرة ثانية لسعود اللي الى الحين يشر لي يعني كلمه

نزلت راسي بحزن .. كأني واحد ماله اسره .. يتحاذفوني مايدرون وين يحطوني.. لا انا محرم لبنات عمي عشان نسكن ببيت واحد ولا انا بزر اسكن مع امي وعمي .. رجال صعبة اضايقهم بشقتهم وفوق هذا عندي بيت مالي عذر

انتبهت على يد مصعب على فخذي وهمس باذني وهو يضحك بصوت خفيف

مصعب = ههههه ماعليك منه .. هو بس سعود واخواتي تحمسوا ذاك اليوم وجهزنا لهم غرفه وكل شي على اساس اني ابجيبهم بكره بس عاد ما الله كتب ... هم كلموا جدي الاسبوع اللي راح يوم انت بالمستشفى بس تعرف عاد جدي عنيد هههه ماعليك ماعليك .. الايام جاية

تنهدت وسكتت ... التفتت لمها ولقيتها تكلم مع البنات بصوت خفيف .. صح اصلا الفكرة مني .. انا اللي طلبت مصعب يكلم جدي عشان يغيرون جو لمها

وابتسمت ... انا ابقنع جدي بطريقتي ...

و ماتت ابتسامتي على طول .. بالمقابل لازم ارجع لبيتي ولوحدتي وهواجيسي ... صعبه اروح لبيت مليان بنات مو محرم لي .. وصعب اسكن عند امي وانا بهالعمر .. احس شكلي غلط



بعد مرور يوم ..

السبت .. بعد صلاة الظهر

جالس بالصاله ومنزل التيشيرت على جنب ولي ربع ساعة احاول انزل هاللزقة اللي ببطني .. ناشبه فيني نششششششششبه .. مدري وش مصنوع منه لزق هالمستشفيات ... ماتنزع عن الجلد بسرعة .. كل مانزعت شوي عورتني الخياطة والجلد اللي حوله

و مها جالسة قبالي وتعلق علي .. و امي جالسة بجنبي وتهاوشني ماتبيني انزل اللزقة .. وجدتي بالغرفة الثانية وتكلم .. وجدي برا البيت

امي معصبة = ياعمر لاتنزلها خلها عليك

رفعت راسي لامي متنرفز من هالضماد اللي مو راضي يفك

عمر بضيق = ابي انزلها .. ضايقتني .. اطرافها حادة .. منزلها منزلها يا انا ياهي

ونزلت راسي اكمل شغلي .. واحاول اقشع هالنشبة بشويش عن جلدي واسمع مها تضحك وتعلق

مها = ههههههههههههههه هات هات انا انزلها ... ابسوي كذا ( ويوم شافت مارفعت راسي لها ) شف شف

تأفف متنرفز وطالعتها

مها = هااااات ابنزلها كذا

وسوت بيديها حركة بالهواء كأنها تقشعها بس بعنف

شهقت يوم شفتها قامت من الكنبة متوجه لي .. تسويها مها ما استبعد منها شي ذي

عمر بعصبية = انقلعي .. والله لانتف شعرك ..

ماتت مها ضحك وغيرت وجهتها و اخذت لاب توبها اللي طايح ومفتوح بكنبة بعيد شوي عني .. ورجعت لمكانها تعلق علي

مها = هههههههههههه اصلا اباخذ لابتوبي ياخوااااف هههههه

انقهرت ماانتبهت ان الاب توب على طريقها

فجأة دخل جدي علينا ووجهه متضايق

جدي بضيق = السلام عليكم ( وجلس بجنب مها على الكنبة )

الجميع = وعليكم السلام

امي بخوف = عمي وش فيك .. عسى ماشر

جدي بتنهيدة = توني جاي من قسم الشرطة اشوف موضوع اللي اسمه نايف .. لا بارك الله في العدو

امي = هاه بشر عمي .. ان شاء الله مسكوه

جدي = لا .. يقولون احتمال انه بصحاري الشمال

طيرت عيوني بصدمه .. الله عليك يا نايف ... اللي خاف من الهيئة اكيد بيخاف اكثر من الشرطة .. وابتسمت اتخيل شكله وهو بالصحراء

ونزلت نظري للزقة ببطني .. اكمل فكها .. كل مانزعت منها شوي عورتني الخياطة والجلد اللي حولها

انتبهت على دعاوي امي

امي بخوف = حسبي الله ونعم الوكيل .. الله ياخذه ويريحني منه .. مايرتاح قلبي لين يمسكونه .. الله يسلط عليه

وقعدت تدعي .. امي عند طاري نايف تعصب

قاطعت امي احاول اهديها ويدي على هاللزقة

عمر = يمه لا تعصبين .. تراه لايهــ

والتفتت لي معصبة وعينها على بطني

امي بصرخة = لا تنزلها .. خلها علييييييك

و بسرعة لا شعوريا رجعت اطراف اللزقة اللي نزعته عن بطني

عمر = ان شاء الله

دخلت جدتي الصاله وقامت مها وراحت تجهز الغدا .. فرصة اكلمهم يغيرون جو عشانها

التفتت لجدي اناديه

عمر = جدي ( ولبست التيشيرت ) وش رايكم تروحون كم يوم عند عمي عبد العزيز

التفتوا كلهم لي متفاجئين .. جدي وجدتي وامي

امي مستغربة = وانت .. شقتي فوق وانا امك ماتقدر ترقـ

وقاطعتها

عمر = لا لا .. انا ابرجع لبيتي .. خلاص الحين الحمد الله احس احسن .. اسبوع كامل وانا بس اتسدح ( وابتسمت )

جدتي = ونخليك لحالك ؟ من يسوي غداك وعشاك

التفتت لجدتي

عمر = عادي ارجع مثل ماكنت .. اكل من المطاعم

هزت امي راسها بلا

امي = لا .. الدكتور كاتب لك حميه شهر على الاقل

عمر = ايه اقدر اطلب اللي يناسبني من المطاعم يمه .. وبعدين عندي بالبيت خفايف يصلح ( والتفتت لجدي وجدتي ) روحوا عند عمي غيروا جو

جدي = وليه انت ماتبي تروح .. وش يرجعك لبيتك لحالك

عمر بضيق = وش يوديني هناك جدي .. لا انا ولا بنات عمي ناخذ راحتنا .. وبعدين قبل امس عمتي ام معاذ تقول اجلس بالملحق .. وين والله لو اني سواق .. روحوا انتوا وانا عادي ماتفرق معي

سكتوا كلهم يفكرون بكلامي وامي واضح عليها تضايقت

طالعت امي احاول اقنعها اكثر

عمر = يمه والله عادي .. هنا اقضي وقتي كله نوم وهناك نفس الشي .. وبالتلفون يجيني الاكل لحد عندي .. و كل ماشفت نفسي طفشان ابجي عندكم

والتفتت لجدي الراس الكبير

وعلى دخلت مها

عمر = هاه جدي .. وافق

نزلت مها صحن الغدا بالارض و بلقافة بدون ماتدري وش السالفة

مها باستهبال = لا يبه لا توافق ... تراه يضحك عليك (واعتدلت واقفة )

ضحكت عليها

عمر = هههههههه كيفك عاد .. اذا ماوافق انتي الخسرانه

طالعتني مها مستغربة وسألتني

مها = وش السالفة اصلا .. وش يوافق عليه

طنشتها وسألت جدي اسمعها

عمر = هاه جدي روحوا غيروا جو

هز جدي راسه بايه مقتنع

جدي = على خير .. خلاص اقول لمصعب يوم الاثنين يجي ياخذنا

شهقت مها بفرح

مها = والله

ابتسمت فعلا على قولت مها وعيال عمي جدي مايرفض لي طلب .. وابتسمت اكثر .. لو طالب لي سيارة جديدة مو احسن

انتبهت على صرخت مها وهي تركض لجوالها فوق التلفزيون

مها = اببشر البنات

وقعدت تكتب رساله وهي واقفة.. وجدي وجدتي جلسوا بالارض يبدون بسم الله الاكل وامي طلعت من الصاله تجيب حميتي لا بارك الله في الدكتور اللي منعني من الكبسة قال وش قال ( تئيله على المعدة )

نزلت مها جوالها على التلفزيون وبعدها التفتت لجدي بغيرة

مها بضيق = يبه يعني الحين وافقت على عمر وماوافقت علي وعلى عيال عبد العزيز يوم نطلبك

تدخلت بتكبر

عمر = احمدي ربك اني كلمته

شوي وجت رساله لجوال مها



على وقت صلاة العصر

جالس بالصاله ومها قاعدة قبالي وكل شوي تتأفف .. سألتها وش شفيت .. ترد علي مافيني شي وترجع تتأفف .. وجدي طالع للمسجد وامي وجدتي كل وحدة بغرفة يصلن

وانا قاعد اتصل على مشعلوه مايرد علي ... الجمعة ما اتصلت على الشباب .. اسألهم وش سووا .. علمني مشعل ان الجمعة ناوين يطلعون يدورون عن رايد وماحبيت ازعجهم .. وبعد ما ابي ابين لهم اني مرة مهتم .. اعرفهم بيمسكوني تعليق .. ادري ماراح يلقونه خلال بحث باول يوم .. والمهابيل ولا واحد منهم اتصل علي يعلمني وش سوا

افففف وين راح هذا مايرد

اتصلت على عبد الله شوي ورد ..

عمر = الوووووه

عبد الله = هلا عميران .. القلوب عند بعضها تدري

عمر بعصبية = ايه كثر منها .. وش سـ

وقاطعني

عبد الله = له له له .. ليه ما اكثر منها .. عاد تصدق اني قريب عند حارتكم ( وكمل بمزح ) الله يسامحك اتهمك قلبي الرهيف

عمر = جد ؟ طيب يله الحين طالع عند الباب احتريك

واول ماسكرت الجوال فاجأتني مها بسؤالها وهي الى الحين تتأفف

مها = تدري وش معنى ( ويل للمصلين .. الذين هم عن صلاتهم ساهون ) هذا وهم يصلون بس يتأخرون عنها ويل لهم .. كيف للي يتركها .. تراني شفتك الفجر ماصليت والحين قاعد احتريك تروح تصلي العصر بس انت لوووووح


طالعتها والايه تزن براسي .. لفيت وجهي عنها وقمت وطلعت للحوش اتهرب منها

وقبل افتح باب الشارع وقفت بتفكير سارح

ويل للمصلين ؟

دايم تمر علي الايه هذي بس ماهتميت لها .. وهم يصلون ويل لهم
انا اجمع الصلوات وبعض الاحيان انام عنها وبعض الاحيان ابدي أي شي عليها

نزلت راسي بخوف .. ليش هذا حالي مع الصلاة ..

فجأ’ طلعني من سراحني صوت الجوال .. وطلعته من جيب بنطلوني

عبد الله يتصل بك

تنهدت وطلعت له عند الباب

وبعد السلام

عمر = هاه وش سويتوا امس .. طلعتوا

عبد الله = شف .. انا ومنصور مرينا ودرنا على استراحات بريدة اللي بالشمال وكلهم يقولون مانعرفه

عمر = مارحتوا الا للشمال بس

عبد الله = امس ما امدانا الا اللي بالشمال .. تعرف انت الاستراحات كثيرة

تضايقت الصراحة كنت متأمل يلقونه هناك لان استراحتنا يوم رايد معنا كانت في الشمال

عمر بتنهيدة = طيب لا تنسى فيه استراحات بالغرب وعندك اللي بالطرفية وعندك الجــ

وقاطعني عبد الله وهو يحط يديه فوق راسه ويمثل البكوة

عبد الله = اهييي اهييي اهييي

ابتسمت وانا اكمل

عمر بابتسامة = وعندك اللي بالجنوب اللوحات اللي تدل عليها راكبات فوق بعض من كثرها .. الله يعينك تمر عليهم كلهم

عبد الله بضيق = طيب ليه مانبلغ الشرطة انه مختفي

تضايقت من هالاقتراح

عمر بضيق = الشرطة تطلع تحقق واكيد بيجون لعمه يسألونه كم سؤال .. وين خواله وتتهم احد وماني عارف ايش ( وحركت يدي ) فكنا منهم

عبد الله = افففف طيب ( وكمل يغير الموضوع ) دريت ان سعد طلع

هزيت راسي بايه

عمر = ايه علمني مشعل

عبد الله = يقولون تغير 180 درجة .. صار مطوع ههههههههههههههه

طيرت عيوني بعبد الله استوعب .. شوي وانفجرت ضحك على سعد

اتخيله مطوع

عبد الله = مروا عليه الشباب يقولون مايبي يرجعلنا ... معتبرنا اصدقاء سوء وخايف على نفسه يرجع لاموره اللي قبل اذا رجع لنا هههههههههههههه

قطعت ضحكتي على كلمته

يعتبرنا اصدقاء سوء .. سكتت اتذكر سهرتنا بالاستراحة .. اغاني وافلام ودردشات ودخان وترك صلوات ومعاكسات .. جونا مايساعد على الثبات

تنهدت و لا علقت

اخذنا شوي واستاذن عبد الله يبي يمر مشعل ويطلعون يتمشون وطلبت من عبد الله بطريقهم يطلعون سيارتي من الورشة

و رجعت للمجلس وصليت

بعد مرور يوم

الاثنين .. بعد صلاة العصر بفترة

رجعت لبيتي بعد ما راحوا جدي وجدتي وامي ومها لعنيزة مع عمي عبد العزيز

دخلت البيت وفتحت الباب الداخلي .. فجأة وقفت بمكاني اشوف اللي قدامي بالارض

ورجعلي الالم ببطني اول ماشفته

كل شي على وضعه .. الارضيه ملطخة بدم يابس .. والمناشف عليها دم يابس وطايحات بالارض .. وفنيلتي الداخليه اللي كانت علي وقت الحادثة مقصوصة نصفين

تنهدت .. هالبيت ماحد يسكنه ويهتم فيه بغيابي .. الله يسامحك يمه ورايد معاك

تخطيت الارضية المتوسخة ودخلت الصاله .. واول ماشفتها بغت تطلع دموعي

بطانية رايد وبطانيتي منزويات على احد الكنبات .. نزلت نظري للطاولة الصغيرة وشفت عليها صحن صغير فيه بقايا رز .. ابتسمت شكله من غدا رايد اخر يوم له هنا

ضحكت بألم

عمر = هههه هذي عادتنا يارايد .. كل شي نخليه بمكانه لين يجي وقته ( وتنهدت ) بس هالصحن طول ينتظر

وطلعت دموعي غصب عني ...


... ليه ما احد راضي يبقى معي ببيت واحد

رفعت يدي ومسحت وجهي احاول اهدي نفسي .. وطلعت من الصاله ومريت المطبخ .. ولقيته ماينطب ابد .. الصحون متراكمة على بعضها وكل شي وسخ .. والصراصير والنمل ماليه المكان

انقرفت منه وطلعت من البيت ادور عامل ينظف البيت من .. الى




بعد اسبوعين

الاحد ... بعد صلاة المغرب

واقف بالصاله وانقز على رجلي اليمنى اجربها .. الحمد الله اقدر امشي عليها الحين

ثلاث اسابيع وانا بس يا اما نايم واياما جالس على النت .. لا شغل ولا مشغله

حتى الجرح اللي ببطني الحمد الله التئم

رجعت وجلست على الكنبة بحزن وماسك راسي بين يدي

مر اسبوعين والشباب يدورون عن رايد لين ملوا

كلهم ملوا .. عبد الله و مشعل ومنصور ومصعب .. وكلهم يقولون اكيد رايد بالرياض

الاسبوع اللي فات رحت يومين متتاليات لحارة جدي وقت الظهر .. قلت يمكن رايد يمر اخواته الظهر كالعادة .. يتسلق الجدارن ويدخل بيت عمه

بس ماصار .. وقبل امس مريت الحارة وقت المغرب عشان اشوف دانه واسألها اذا شافت رايد والا لا

بس تول ماشافته .. شوقتها لذكر اخوها على الفاضي

والحين الشباب ملوا .. طلبت من مصعب يقول لمها تتصل على اخته وتسأل بس مها عيت

وجدي وجدتي ومها الى الحين بعنيزة .. ارتاحوا هناك وكل شوي تتصل امي علي اتغدا عندهم واتعشى

طلعت من البيت وركبت سيارتي ورحت لعنيزة عند امي

عمي وجدي يتابعون موضوع نايف وقالوا لهم الشرطة الى الان ماحصلوه .. هم متأكدين انه ماطلع من المملكة

وعلمني جدي ان الشرطة حققت مع اهله عسى وربما يعرفون مكانه وين

وصلت بيت عمي وعلى طول رحت فوق عند امي

ولقيتها واقفة بالمطبخ وهي تتحرك ببطئ وبطنها قدامها .. ابتسمت .. ياحليله هالصغير متى يطلع

عمر = السلام عليكم

التفتت امي لي وهي تنشف يديها وعلى طول فتحت الثلاجة وطلعت لي الحلا وجرتني لحجرة التلفزيون عندها .. ورجعت للمطبخ تجيب القهوة وجلست بجنبي

امي = ليه ماجيت اليوم تتغدا

رديت عليها وانا مستمتع بالحلا

عمر = راحت علي نومة ( والتفتت لها او بالاصح لبطنها ) ولد والا بنت ؟

سكتت امي شوي وبعدها ضحكت بخجل

امي = هههههه ايه سألت بس ماعلمت عمك

شهقت و سألتها بلهفة

عمر = وش ؟

امي = يقولون ولد

ابتسمت وانا اطالع امي

اخوي .. انا بيصير لي اخ ... بعد 21 سنة يصير لي اخو ..

نزلت راسي وسكتت .. ما احس فرحتي كاملة .. حالتي ماراح تتغير .. ماراح يعيش معي .. امي وهو ببيت عند عمي وانا ببيت لحالي

امي = وش فيك وانا امك ما انت فرحان ؟

انتبهت على امي ورفعت راسي لها وابتسمت

عمر = لا لا ... اكيد فرحان بس .. آآآآآ .. انا اللي ابسميه وقاعد افكر باسم من الحين ههههههههه

صدقت امي كذبتي وضحكت

امي = ههههه ووش تبي تسميه .. انا من ناحيتي موافقة تسميه وعمك بعد اكيد ماعنده مانع

حطيت يدي على ذقني افكر باسم .. فيه اسم عاجبني من زمان

عمر = نادر ( وطالعتها ) وش رايك بنادر .. عاجبني هالاسم

امي مستغربة = نادر .. امممم حلو .. ( وابتسمت بفرح ) خلاص اذا طلع بالسلامة نسميه نادر ( وكملت بمزح وهي تشر على القهوة ) والحين ياخو نادر اشرب قهوتك عشان ننزل عندهم


الاثنين

الظهر

انزعجت من رنين التلفون وانا نايم بالصاله .. هذا ثاني مرة يرن

والحين رجع يتصل مرة ثانية .. شكله حالف الا يقومني من النوم

جلست وقمت على طول وانا اتأفف من هالمزعج

ورديت عليه بصوت نعسان

عمر = هالوووووه

= السلام عليكم .. هذا بيت عمر سعود ؟

صحصحت على طول من صوت هالرجال الرسمي والجاد

عمر مستغرب = وعليكم السلام .. ايه انا عمر .. آمر يالطيب ؟

= تعال عندنا بمركز الشرطة الحين

فرحت اخييييييييرا لقوا نايف ... والله لاشرب من دمه .. بسببه دخلت المستشفى وبسببه تركني رايد .. اخيرا طاح بيدهم .. شكلهم بعد ماحققوا مع اهله عرفوا مكانه

حلو .. حلو

رديت على المتصل بفرح و بصوت كله حماس

عمر = دقايق وانا عندكم

وسكرت عنه وعلى طول غيرت بنطلوني والتيشيرت وطلعت من البيت مستعجل

وصلت مركز الشرطة ونزلت من سيارتي وصــ

لحظة



لحظة



وشلون الشرطة اتصلت على بيتي ... وليه اتصلت علي انا اصلا

اللي يتابع الموضوع جدي وعمي .. اصلا حتى لو بغوني انا .. يتصلون على جوالي مو على البيت

صح وشلون فاتت علي هذي .. كان سألت المتصل قبل شوي .. على طول درعمت وجيتهم .. بدون ما افهم السبب

طالعت مبنى الشرطة مستغرب انا متأكد ماعمري عطيتهم رقم بيتي .. وشلون اعرفوه

تنهدت ودخلت المبنى وبراسي الف سؤال وسؤال .. وش مسوي انا

ما اذكر سويت شي


12

* الجــزء الواحد والعشــرون *














طالعت مبنى الشرطة مستغرب انا متأكد ماعمري عطيتهم رقم بيتي .. وشلون اعرفوه

تنهدت ودخلت المبنى وبراسي الف سؤال وسؤال .. وش مسوي انا

ما اذكر سويت شي

توجهت لمكتب الضابط بعد ما دلوني وقالوا لي انتظر الين يخلص اللي عند الضابط ثم ادخل عليه

وصلت عند المكتب وانا الافكار توديني وتجيبني .. اللي ببطنه ريح مايستريح

انا هوشاتي كثيرة .. لا يكون احد مشتكي علي وانا مادري .. بس من يوم دخلت المستشفى صاير مسالم .. لي شهر تقريبا ماتهاوشت مع احد .. من هذا اللي توه ينتبه ويشتكي

ووقفت بمكاني بصدمة وانا اشوف اللي قدامي .. وتأكدت شكوكي .. وش جاب هذا هنا .. اكييييييد هذا اللي مشتكي علي مافيه غيره يعرفني

يوسف احد زملائي بالجامعة .. بنفس شعبتي جالس على الكراسي قريب من مكتب الضابط اللي دلوني لمكتبه و بحظنه طفل

قطبت حواجبي احاول اتذكر .. ما اذكر اني تهاوشت مع يوسف هذا .. يتبلى علي والا وش قصته ... بس .. مابيني وبينه كلام لا داخل الجامعة ولا خارجها اللهم اعرف اسمه وانه بنفس شعبتي

احم .. كملت طريقي لين وقفت قدامه .. واول ماشافني يوسف وقف وهو شايل الطفل وتوني انتبه انها بنت من لبسها واستغربت اكثر لما شفت هالبنت وجهها مليان خدوش وتوها باكيه

يوسف مستغرب = عمر !! وش جابك هنا ( ومد يده يصافحني )

رفعت نظري ليوسف ( وصافحته وانا مستغرب ) والصراحة ارتحت لسؤاله .. لو هو اللي مشتكي علي ماسأل هالسؤال

عمر مستغرب = مدري الصراحة .. استدعوني بالتلفون وجيت .. وانت عسى ماشر اشوفك هنا

جلس يوسف على الكرسي

جلست بجنبه انتظر اللي قبلي يخلص من عند الضابط

يوسف بتنهيدة = والله مدري وش اقولك يارجال الدنيا صار مافيها امان

قطبت حواجبي وسألته

عمر = ليه ؟

التفت لي يوسف والبنت بحظنه

يوسف = وقفت سيارتي عند البقاله ونزلت ابي غرض بسيط ..وخليت بنت اختي نايمة ورا بالسيارة ( واشر على البنت ) قلت شوي اشتري غرضي وارجع على طول .. والله وكيلك .. يوم طلعت من البقالة مالقيت سيارتي .. اختفت .. يمين يسار مالقيتها

شهقت متحمس معه

عمر بصدمة = لا تقووووول ... وبنت اختك بالسيارة ؟

كمل يوسف منقهر

يوسف = اييييه ... انا ماهمتني السيارة بستين داهية .. انهبلت .. مدري وش اسوي البنت فيها .. وعلى طول اتصلت على الشرطة

نزلت نظري للبنت .. تقريبا عمرها سنة او اقل ورفعت نظري له و سألته متحمس

عمر = طيب اشوفها معك الحين وشلون لقيتوها ؟

يوسف بتنهيدة = الحمد الله .. ربك كريم .. اللي سرق السيارة صدم .. الكلب على حسب كلامه يقول مادريت ان فيه احد بالسيارة .. بس يلعبها على مين .. والله لأطلعها من عيونه .. واللي يقهر ماتضرر من الصدمة اللي هالبنية ( واشر على بنت اخته ) القزار اللي بجنبها تكسر عليها

عمر مستغرب = طيب اشوفك جالس برا .. ليه ماتنهي موضوعك مع الضابط

يوسف وهو يكشر بوجهه = نحتري ولي امر اللي سرق سيـ ( وسكت فجأة وكأنه تذكر شي والتفت لي بصدمه ) لا يكون انت اخوه .. اللي نحتريه اسمه عمر

ضحكت عليه وعلى غبائه

عمر = هههههههههه يوسف انا مالي اخوان ..

طير يوسف عيونه فيني متفاجئ من المعلومة الجديدة بالنسبة له .. انا وهو مانعرف بعضنا مرة .. اللهم كل واحد يعرف اسم الثاني .. انا بالنسبة لي ماعرف حتى اسم عائلته وهو اكيد مثلي مايعرف اسم عائلتي

يوسف = صدق ؟ ابد مالك اخوان ؟

عمر = ابد مالي اخوان ولا حتى اخوات

يوسف = اهاا .. اجل تشابه اسماء

هزيت راسي بايه ولا علقت

رجع يوسف يسألني

يوسف = عمر يعني انت وحيد امك وابوك ؟

هزيت راسي بايه

عمر = وحيد امي .. ابوي متوفي

يوسف = من زمان ماشفتك بالجامعة ؟

عمر = ايه ماخذ اجازة مرضية شهر ( والتفتت له ) متهاوش مع احد الشباب وعطاني المقسوم ودخلت المستشفى .. والحين الحمد الله تحسنت بس ماني راجع للجامعة الحين .. نبي نحلل الاجازة ههههههه

ضحك يوسف وهو يعلق علي

يوسف = ههههههههه لايكون متهاوش مع احد الحين ومستدعينك

رجع علي التساؤلات مرة ثانية .. انا ليش هنا ..

عمر بتنهيدة = مدري .. اتصل علي واحد من الشرطة وقال تعال .. وجيت مدرعم

يوسف = ههههههههههههه مطيع لولاة الامر ماشاء الله عليك هههههههههههههه

ضحكت

عمر = انت تشوف هههههههههههههه

وقعدنا نسولف عن الجامعة واسأله وش اخذتوا ووش ما اخذتوا

لين اخيرا طلعوا اللي قبلنا

استأذني يوسف يدخل قبلي عشان يخلص منهم بسرعة ويرجع البنت لاهلها

يوسف = معليش ابدخل للضابط قبلك ودي ارجع البنت لامها بسرعة

مديت يدي له يعني تفضل

عمر = خذ راحتك ماوراي شي .. وعن حقك لا تتنازل

يوسف = ايه اكيد

وقام ودخل للمكتب

طلعت جوالي من جيب بنطلوني وقعدت العب .. احتري دوري

= عمر سعود ؟

رفعت راسي للعسكري اللي واقف قدامي ويسأل

عمر = ايه انا عمر سعود

العسكري = نحتريك من اليوم وانت جالس هنا .. يله ادخل

التفتت لباب المكتب اللي دخله يوسف مستغرب ورجعت التفت للعسكري

عمر = واللي داخل ؟

.. بس هالعسكري معصب حبتين

العسكري = ادخل انت الحين

قمت ودخلت المكتب وشفت الضابط جالس ورا مكتبه .. ويوسف جالس على الكنبه قدام مكتب الضابط وبحظنه البنية

شهق يوسف يوم شافني وعلى طول التفت للضابط بصدمة

يوسف = هذا اخوه ؟

اشر الضابط بيده ليوسف يهديه

الضابط = هد شوي ( والتفت لي ) تفضل وعطنا بطاقتك

جلست على الكنبة قبال يوسف وبيننا طاولة صغيرة .. ونطالع بعضنا مستغربين

اخذ الضابط التلفون وضغط فيه زرين .. شوي وجاه رد

الضابط = يله هاته الحين ( وسكر السماعة والتفت لي بنفاذ صبر ) عطنا بطاقتك ورانا اشغال

التفتت له توني انتبه اني ماعطيته بطاقتي .. طلعت محفظتي وعطيته بطاقتي والتفتت ليوسف واشرت له يعني شسالفه

التفت يوسف للضابط يسأله

يوسف مستغرب وهو يشر لي = لو سمحت هذا ماله اخوان

رفع الضابط راسه ليوسف متفاجئ

الضابط = نعم ؟ ( والتفت لي على طول ) مالك اخوان ؟

عمر = ايه .. الحين وش دخلني انا باللي سرق سيارة يوسف

ابتسم الضابط ابتسامه جانبيه .. وسألني سؤال يقاله كونان على غفله

الضابط وهو يشر ليوسف = وانت وش دراك ان هالرجال مسروقة سيارته الا من اخوك

عصبت و كشرت بوجهي له و اشرت على يوسف بنفس طريقة الضابط

عمر = هو قالي قبل شوي .. وقلتلك انا مالي اخوان ... لا تتبلون علي

فجأة سمعنا طرقات على الباب ودخل عسكري وسمعته يضرب التحية

التفتت للعسكري من باب الفضول

وشهقت بقوة وقمت واقف ماني مصدق

عمر = رااااااااااايد

منزل راسه بانكسار والعسكري ماسكه مع ذراعه ... واول مانطقت باسمه رفع راسه لي

وصاح بشهقه

رايد = عوووووومرررر

وسحب ذراعه من العسكري وتوجه لي بخطوات سريعه وارتمى علي بثقل و يديه على خصري يرصني بقوة

تراجعت على ورا وتدراكت نفسي بسرعة قبل اطيح وسندت يدي على طاولة الضابط .. ورايد يرص يديه بخصري ويضغط جسمه علي

غمضت عيوني بألم مصدوم من شكل رايد

ثوبه الابيض تحول للون بني من وساخته والجيب الامامي مشقوق نصه ويتدلى وصاير اسمر اكثر اكثر اكثر اكثر من قبل وشاحب
والشعر اشهب ونحفاااااااان اكثر ماهو نحفان

اعتدلت واقف ولفيت يدي حول رايد ويدي الثانية ارص راسه على صدري

واخذت نفس اهدي نفسي .. عورني بطني من داخل .. الجرح التئم بس أي ثقل او حركة مفاجئه يعورني

مسحت على شعر رايد وانا اسمعه يبكي على صدري ويردد

رايد = عمر لا تخليني .. لا تخليني .. طلعني من هنااااا تكفى طلعني من هناااا

رفعت يدي ومسحت على شعري بقهر .. توني فهمت السالفة

رفع رايد راسه يطالعني ودموعه على خده

رايد = عمر طلعني .. لا تخليني .. تكفى عمر ( وغطى وجهه بصدري يشاهق )

سكتت متألم

صاير اسمر .. ووجهه شاحب وفمه يابس والهالات تحت عيونه

بصعوبة طلع صوتي وانا اسأل نفسي مليون مرة .. وين كان

عمر بألم = رايد وين كنت .. ليه طلـــ

وماقدرت اكمل .. مو وقت العتب الحين ..

رصيت راسه بصدري اضمه وانا احاول امنع دموعي تنزل

رص رايد يديه حولين خصري بقوة كأنه خايف اتخلى عنه ويردد نفس الكلام

رايد = طلعني عمر .. لا تخليني

التفتت ليوسف اللي جالس وفاتح فمه علينا ماهو فاهم شي .. وانا ورايد واقفين قدامه والضابط ورانا

ودي احل المشكلة بيني وبينه بدون تدخل الشرطة بس كيف ورايد ممسوك عندهم

ابعدت رايد عني ومسكت اكتافه وانحنيت شوي لمستواه .. وسألته منقهر

عمر بألم = ليييييه سرقت السيارة ؟

طالعني رايد وهو يشاهق

رايد بصوت باكي = غصب عني


اعتدلت واقف وانا اطالعه .. مدري وشلون احل المشكلة الحين

تنحنحت و التفتت للضابط اللي جالس وراي ولفيت يدي على اكتاف رايد وقربته مني .. وابتسمت ذيك الابتسامة العريضة عساها تلين القلوب

عمر = ماصار الا خير

قطب الضابط حواجبه معصب

الضابط = وش اللي ماصار الا خير ... ( واشر على رايد ) هذا اخوك والا لا ؟

سكتت ونزلت نظري لرايد

رفع رايد راسه لي شوي يطالعني وهمس

رايد = انا قلت لهم انك اخوي

طيرت عيوني فيه وهمست له

عمر = خبل انت .. اسمي واسمك يختلفون

رايد بحزن = وش اسوي ماعرف الا انت وخفت يجيبون عمي ( ونزل راسه بانكسار )

طالعت الضابط مدري وش اقوله ..توني قايل مالي اخوان

الضابط = هذا اخوك والا لأ ؟

اخذت نفس وجاوبت

عمر = لا بس خلــني افهمك

التفت الضابط لرايد معصب وصارخ عليه

الضابط = وتكذب علينا بعد .. ليه عطيتنا رقم هالرجال ( واشر علي )

دفعت رايد بيدي وخليته يوقف وراي وجلست على الكنبة وقاطعت الضابط احاول اهديه

عمر = آآآآ.. تقدر تقول انا ولي امره .. ( وسألت وانا عارف الجواب ) فهموني الحين وش المشكلة وان شاء الله نحلها

هنا انفعل يوسف معصب

يوسف = المشكلة انه هالكلب ( واشر على رايد ) سرق سيارتي وبنت اختي فيها

رد رايد وهو واقف ورانا

رايد = والله مادريت ان في احد ورا

التفتت لرايد منقهر من فهاوته

عمر = ثاني مرة اذا بغيت تسرق سيارة شف اذا فيها احد والا لأ

ونقزت يوم ضرب الضابط الطاولة بقوة معصب

الضابط = وتعلمه بعد

يوسف بعصبية = عمر اشوفك تشجعه

التفتت لهم منحرج

عمر = لا لا .. آآآآآ .. اقصد

وقاطعني الضابط يكلم رايد بعصبية

الضابط = هاااااات رقم ابوك

نزل رايد راسه بألم

رايد = قلت لك ابوي متوفي

الضابط = هات رقم عمك .. خالك .. قريبك .. ولا تلف وتدور

رفع رايد راسه

رايد بحزن = عمر هنا ( واشر علي )

الضابط = تستهبل انت .. تبي تكذب علينا بعد .. شايفنا مخفات عندك

تدخلت اهدي الضابط

عمر = لحظة خلني افهمك .. انا اقربله ( وحاولت اجيب أي صلة قرابه مالها دخل في الاسم ) انا ... آآآ .. ولد خالته

يوسف = بس هو يقول انك اخوه واتصلوا عليك

التفتت ليوسف اترجاه وامسح على ذقني

عمر = معليش يوسف امسحها بوجهي هالمرة .. والحمد الله على سلامة بنت اختك

الضابط يكلمني

الضابط = حنا الى الحين ماسجلنا بياناته .. اتصل على ولي امره خلصونا

التفتت للضابط

عمر = هاه .. ايه بياناته .. عندي ( ومديت رجلي وطلعت بوكي و طلعت كرت عايلة رايد ومديتها على الضابط ) هاه شفت يوم اقولك انا ولي امره

سمعت شهقت رايد ودار حولين الكنبه اللي انا جالس عليها ووقف فوق راسي وسحب الكرت من يدي قبل ياخذها الضابط مني

قراها وانفاسه سريعة وصاح

رايد = عمر هذا اثباتي ( وضحك ماهو مصدق ) هذا اثباتي .. وهذي اسمائنا

التفتت وراي اطالعه وتوني اتذكر انه مايدري عن اثباته .. وتنهدت متأثر من شكله .. يمسح دموعه عشان يشوف ويرجع يقرا الكرت ماهو مصدق نفسه

قمت واقف وصار بيني وبينه الكنبه .. تعب رايد شهور عشان هالكرت


عمر = ايه رايد هذا اثباتك .. اخذته من عمك ذاك اليوم

رفع رايد راسه يطالعني شوي

ولا شعوريا دخل البطاقة بجيبه الامامي اللي نصه مشقوق ومسك جيبه بيديه الثنتين كأنه خايف احد ياخذه منه

رايد = خلاص ابيه معي

درت حولين الكنبة بس رايد تراجع على ورا وهو يطالعني .. لين لصق ظهره بالمكتبة اللي وراه

رايد = خلاص معي معي

مسكت رايد مع اكتافه اهديه

عمر = رايد مو الحين .. عط اثباتك الضابط خله يشوف شغله

طالعني رايد شوي والتفت للضابط وكأنه انتبه لنفسه شوب و نزل راسه

فكيت يديه وسحبت الكرت من جيبه بدون مايقاوم .. متساهل معي

عطيت الكرت الضابط وهو مستغرب من رايد ويسألني

الضابط مستغرب = ممكن اعرف وش المشكلة

نزلت نظري لرايد وهو منزل راسه بانكسار ولفيت يدي حولين اكتافه وقربته مني

عمر = عنده مشاكل مع عمه وماكل حلاله

سكتوا ..

اما رايد بكى بصمت وهو منزل راسه

الضابط = لا حول ولا قوة الا بالله ... طيب اصلحوا بينهم .. ورجعوه .. شف هذا بدايتها سارق سياره .. هذا مراهق وماله الا عمه لين يحلها الله من عنده

سكتت ومارديت

طالع الضابط رايد شوي وبعدها راح يسجل بياناته

التفتت ليوسف ولقيته يطالع رايد وساكت

شوي وحول نظره علي

ضربت على صدري بصمت ( وكأني اقوله عشان خاطري )

وقعدنا نطالع بعض اتمنى يفهمني

قطع علينا الضابط وهو يكلمني

الضابط = عليكم تصليح سيارة يوسف ورايـ

قاطعته

عمر = ابي يوسف شوي على جنب اذا مافيه مانع واوعدك نحلها بيننا

قام يوسف قبل يرد الضابط ومعه بنت اخته

يوسف = طيب موافق

وطلعنا انا وهو برا المكتب

عمر بترجي = يوسف امسـ

وقاطعني يوسف يسألني

يوسف = اول شي علمني .. انت صدق ولد خالته ؟

سكتت شوي وتنهدت

عمر = لا

يوسف بعصبية = انت الحين مستوعب وش سوا هذا .. لو ماصدم ومسكته الشرطة كان ضاعت بنت اختي

مسحت على شعري مدري وش ارد عليه

عمر = يوسف تكفى .. سيارتك مستعد اصلحها بـ

يوسف بصرخة = ماهمتني السيارة بستين داهيه .. بس هالولد لازم يتربى

حطيت يدي على كتفه احاول اقنعه

عمر = لا تصير انت والظروف عليه ... رايد شاف اللي ماشافه غيره .. امه وابوه وبعض اخوانه ماتوا بحادث سيارة .. وعمه ماكل حلاله وبايع بيتهم وياكل راتب ابوه وفوقهم الضمان الاجتماعي .. وليته اكتفى .. قام وطرده حتى من اثباته حارمه .. قدامك قبل شوي ماصدق نفسه يوم شاف كرتهم معي .. يوسف .. رايد ثلاث اسابيع مختفي والله اعلم وش صار عليه .. ومدري وش اللي خلاه يسرق سيارتك ( وسكتت اهدي نفسي متأثر وصورة رايد ببالي ) تكفى لا تظلمه اكثر ماهو مظلوم

لف يوسف وجهه عني

يوسف = حسبي الله ونعم الوكيل

عمر = تنازل عنه .. خل هالضابط يسكت

سكت يوسف يشاور نفسه

واخيرا هز راسه مقتنع

يوسف = ابتنازل عنه شكر لله على سلامة بنت اختي

ابتسمت ومسحت على راس البنيه ..

عمر = مشكوووووور يوسف .. والله ما انساها لك .. الحين خلنا ندخل على الضابط

دخلنا المكتب ولقينا رايد واقف ومنزل راسه والضابط ينافخ عليه

تنازل يوسف عن رايد

بس اللي اكلها انا .. سلمني الضابط ورقة تصليح السيارة

وكمل الضابط اكمال الاجراءات المملة .. واول ماخلص من شغله ومد علي الاوراق ومنها كرت رايد

= ابي الاثبات معي

رفعت نظري عن الاوراق اللي معي والتفتت لمصدر الصوت

ولقيت رايد ماد يده ويكلمني وكمل

رايد = لا ترجعها لعمي

مايقدر يصبر لين نطلع من المكتب .. وعشان ماخذ واعطي معه قدام الضابط عطيته الكرت بصمت .. وعلى طول حطها باحد جيوبه الجانبية


و على اذان العصر طلعنا انا ورايد ويوسف من المركز

التفتت ليوسف وصافحته اشكره .. ولاف يدي على اكتاف رايد وهو منزل راسه بحزن

عمر بابتسامة = مشكووووووور يوسف .. والله اللي مايعرفك مايقدرك .. دايم اشوفك قدام خشتي بالجامعة بس مافكرت اتعرف عليك ههههههه

ضحك يوسف

يوسف = هههههههه .. نفس الحاله مافكرت اتعرف عليك ( والتفت لرايد ) اتمنى ماتعيدها

رفع رايد راسه ليوسف وبعدها نزل راسه و غمغم بصوت خفيف يعتذر

نزلت نظري لرايد وانا اكلم يوسف

عمر بابتسامة = لا ان شاء الله مايعيدها

تبادلت مع يوسف ارقام الجوال وركب سيارة لموزين وراح

ضغطت بيدي على كتف رايد وقربته مني وانا فرحان برجعته

عمر = مشينا للبيت

ودفعته قدام عشان يمشي .. مايمشي رايد الا بالدف ... من يوم طلعنا من المكتب وانا بس ادفدفه يمشي

توجهنا لسيارتي وهو الى الحين مارفع راسه .. ووقفنا عند باب الراكب وفتحت الباب له

عمر = يله اركب

بس مارد علي .. واقف بحزن وساكت

عمر = اشيلك يعني واركبك والا وشلون ؟

رفع رايد راسه وعيونه تلمع .. شوي وتنزل دموعه

رايد بحزن وهو يتحسس جيبه اللي فيه الكرت

رايد بصوت مخنوق = خلاص بطاقتي معي .. مابي اثقل عليك

تأففت من حساسيته الزايدة .. مسكتت ذراعه ودفعته داخل السيارة

عمر = ياشيخ اركب

ركبت السيارة وحركت .. التفتت لرايد وانا اسوق .. ولقيته منزل راسه بحزن

طالعت ثوبه .. كيف يمشي بالشارع وهو بهالشكل .. مايتفشل من شكله هذا .. تنهدت .. و طالعت قدام وغيرت وجهتي للسوق

ورجعت التفتت لرايد .. نحفااان .. هو قبل عصاليك والحين نحفان زياده

طالعت قدام شوي ورجعت التفتت له

وين كان طوال هالاسابيع .. وليه سرق السيارة وش يبي فيها .. بيبيعها مثلا والا كيف ؟

وصلنا السوق ووقفت السيارة قدام محل بدلات شبابية .. كل المحلات مقفلة الحين للصلاة .. ناوي اشتري بدله له ونمر الخياط افصل له ثوب

طفيت السيارة وجلسنا ننتظر المحل يفتح

شوي وحس رايد بوقوفنا ورفع راسه يتلفت و بعدها طالعني مستغرب

رايد = ليه وقفت هنا ؟

رديت عليه وانا اشر على المحل قدمنا

عمر = احتري هالمحل يفتح ( والتفتت له ) لا يكون عاجبك شكلك كذا ؟

رايد وهو يهز راسه = لا لا عمر .. مابي شي .. مابي اثقل علييييييك .. يكفي طلعتني .. لا تشتري شي .. مابي شي والله مابي شي

هزيت راسي بايه تسليك .. وسألته وانا اطالعه بتأمل وعاقد يدي قدام صدري ومتساند على الباب

عمر = متغير !!!

نزل رايد راسه وسكت

عمر = صاير وجهك اسود ونحفاااااااان مرة

تنهد رايد وهو الحين منزل راسه

رايد = ماكلت شي من ثلاث ايام الا فطيرتين سـ .. سـ ( وسكتت شوي متردد وكمل ) سارقها من بقاله

طيرت عيوني فيه بصدمة ..

عمر = وش حادك وبيتي مفتوح لك

بكى رايد بصمت ونزل راسه اكثر ورد علي بصوت باكي

رايد = مانسيت شكلك هذاك اليوم ... السكينة وهي تدخل وتطلع ماراحت عن بالي ( ومسح دموعه بيده )

قطبت حواجبي مستغرب

كمل رايد كلامه

رايد بصوت باكي = السكينة عيت تروح عن بالي .. مانسيت شكلك وانت طايح بالارض .. مانسيت جدك وهو خايف عليك .. خفت يلومني ابو فهد اذا عرف السبب.. خفت من مصعب يكرهني .. وخفت منك بعد.. خفت من كل شي .. ( اخذ نفس ورفع راسه يطالع قدام ) ذاك اليوم طلعت من المستشفى مدري وين اروح .. جيت ابروح للرياض بس ماعرف رقم خوالي اصلا كنت متردد مابي اروحلهم .. خوالي مثل عمي .. مثله بالضبط ..

عمر = طيب وين كنت ؟

سكت رايد شوي وهو يطالع اللا شئ

رايد = ساكن مع عمال هنود

شهقت بصدمة

عمر = ووووششش

رايد بحزن = بعد ماطلعت من عندك من المستشفى .. مريت مغسلة عشان اغسل ثوبي كـ .. كـ ( وتتنهد ) كان ثوبي مليان دم منك .. عامل المغسلة استغرب مني وعلمته اني ماعندي بيت ولا مكان ولا أي شي ( ونزل راسه وغطى وجهه بذراعه وبكى بصوت مسموع )

سكتت وانا اطالعه مصدوم .. طوال هالمدة ساكن مع عمال والشباب من استراحة لاستراحة يدورونه

والله اعلم وش نوع هالهنود .. مسلمين ولا مجوس .. بمكان محترم ولا خرابه

انتظرته لين يخلص من نوبة البكاء هذي .. وانتبهت على المحل اللي قدامنا يفتح

رفع رايد راسه وهو يمسح دموعه

رايد بصوت باكي = بعض العمال اللي معنا بالسكن على بالهم ان كل سعودي غني .. قالوا لي لازم ادفع معهم اجار الغرفتين اللي هم ساكنين فيها ..

عمر = ودفعت ؟

رايد = غصب عني دفعت .. ماراح القى غرفة ارخص من غرفتهم

عمر = وانت من وين لك تدفع اصلا ؟

التفت رايد لي بوجه شاحب وحزين

رايد = كان معي الباقي من الخمسمية اللي عطيتنياها

ضربت اصابعي ببعضها

عمر بصدمة = الله .. هذي الى الحين معك

نزل رايد راسه وكمل

رايد = سكنت معهم الاسبوع الاول بس مارتاحوا لي ولا انا ارتحت لهم ... عجزت اصبر عندهم .... واحد حاقد ويكلمني كأني ماكل حلاله .. واللي بس يتأمر علي .. واللي يتكلمون علي ويضحكون .. وبعضهم يعاملني كأني عندي فلوس الدنيا كلها .. وبعضهم عادي .. هذا غير اكلهم كل شي حار ..

عمر = وراعي المغسلة اللي جابك وشلونه معك ؟

رايد = كل وقته بالمغسلة .. اكثر العمال مايجون الا بالليل .. بس بعضهم اللي ( والتفت لي ) يشتغلون اعمال حرة مدري وش بالضبط .. احيان سباكين واحيان بناءين ..

هزيت راسي متفهم وسألته

عمر = طيب وبعدين .؟

رايد = طلعت ادور شغل .. رحت لسوق الخضرة بس لقيت مليان شباب سعوديين وعمال ومالقيت شغل لي ... ثلاث ايام وانا اروح ومالقيت شي ( وتنهد والتفت قدام وكمل ) بنص الاسبوع الثاني طلعت من سكن الهنود

عمر = ليه ؟

رايد = عجزت ارتاح عندهم

عمر = ورحت عند مين ؟

رايد = ماهو عند احد .. بالليل انام بالمزارع .. وبالنهار امشي من مكان لمكان وووو ( وسكت شوي متردد ) اروح للبقالات .. آآآ (ونزل راسه وسكت)

فاهم عليه بس ابيه يقولها

عمر = وش تسوي بالبقالات ؟

رايد بحزن = اول شي كنت ابي اشتغل بس مالقيت عندهم ومن الجوع صرت اسرق

عمر = طوال هالاسبوعين ماتاكل الا من السرق ؟

رفع رايد يده يمسح جبهته منحرج مني

رايد = البقالات والسوبرماركات بسهولة تسرق منها خاصة البقالات احط الفطيرة بمخباتي واطلع بدون مايدري العامل .. والبقالات كثيرة البقالة اللي اسرق منها ماارجع لها

تنهدت من حاله اللي كان فيها ..

عمر = وسيارة يوسف ليه سرقتها ؟

رفع رايد راسه يطالع قدام

رايد = شفتها مفتوحه قدامي وجا ببالي على طول اسرقها ناوي اكد عليها بس مادري منين طلعت البنت .. سمعت صوتها ورا وارتبكت وصدمت

سكت رايد منزل راسه وسكتت وانا متساند على الباب واطالعه بصمت

اعتدلت جالس و مسكتت الدركسون بيديني الثنتين افكر

الحين الكرت معه ... لازم من الحين يدور على وظيفة .. اثباته كان عندي من اربع اسابيع من دون فايدة .. والشايب عمه كل شوي يسأل جدي عن الكرت.. مع ان جدي عطاه خبر اننا ماندري وين رايد بس هو ماهمه الا الكرت كل شوي يقول لجدي مايعرفني الا انا اذا ضاع الكرت بس جدي يهديه ويسكته ( التفتت لرايد ) مااقدر اقوله شي الحين ونفسيته تعبانه

اخذت نفس متضايق ومحتار كيف اطلعه الحين من نفسيته واخليه يشوف الحياة بمنظر ثاني .. غير المنظر الاسود اللي يشوفه الحين

احم .. التفتت لرايد وابتسمت بمرح

عمر بابتسامة = خلنا من هذا الحين .. يله انزل خلنا ندخل هالمحل

التفت رايد لي بسرعة

رايد = لا لا لا .. والله مابي شي

عمر = اهاا بس ( ونزلت من السيارة ودرت حولينها لين وصلت عند باب رايد وفتحته ) يله انزل ( وسحبته من يده برا السيارة )

رايد بحرج = عمر اذا كان عن ثوبي .. خلاص ابمر حمام مسجد واغسله .. مابي اثقل عليك .. خلاص خلاص

طنشت هذرته وسحبته ودخلنا المحل

حاولت اخليه يختار البنطلون والتيشيرت على ذوقه .. بس كل شوي يعيد علي ( ابغسل ثوبي مابي شي )

اخر شي اضطريت اختار له من ذوقي .. طلعنا من المحل ومرينا الخياط يفصل له ثوب .. طبعا شغال تسحيب برايد

رايد بحرج = لا لا .. عمر مابي ثوب .. خلاص يكفي البنطلون اللي شريتلي

سحبته مع ذراعه ودخلنا محل الخياط

شاف العامل شغله واخذ المقاس واخترنا القماش ... طبعا باختياري انا .. ورايد يتصدد بوجهه عني منحرج ويعيد كلمته مابي ثوب مابي ثوب

طلعنا من السوق وتوجهنا للبيت وعلى اذان المغرب وصلنا

نزلنا من السيارة وفتحت باب البيت والتفتت لرايد فرحان برجعته

عمر = حي الله رايد

ابتسم رايد ابتسامة حزينة ومعه الكيسة

رايد = الله يحييك ( ودخل للحوش )

دخلت وراه وسكرت الباب

ومشيت قدامه وفتحت الباب الداخلي ورايد وراي

فجأة وقف رايد عند عتبة الباب الداخلي وسرح بفكره وعينه على شي معين بالارض .. كأنه شاف شي

ناظرت للمكان اللي يشوفه ومالقيت اي شي .. وعلى طول تذكرت الحادث ... قطبت حواجبي .. اكيد تذكر الحادث اول مادخل البيت .. مسكت ذراعه وسحبته للصاله

عمر = حياك حياك ادخل

ابتسمت وانا اشوف رايد يجلس على الكنبة اللي كان ينام فيها

اخيرا رجع ...

عمر = وش رايك تروح تتروش وتغير هالملابس الوسخة اللي عليك

رفع رايد راسه بصمت .. طالعني شوي وقام وطلع من الصاله ومعه الكيسة

شوي ورجع

رايد بهدوء = وين احط بطاقتي اخاف تضيع ( ودخل يده بجيبه وطلع اثباته )

مديت يدي له

عمر = هاته .. خله معي .. ومتى ما احتجته تلقاه

تقدم رايد لي وعطاني الكرت و طلع وهو يمشي بانكسار

تنهدت .. وشلون اطلعه من حالته هذي

جلست على الكنبة وطلعت جوالي .. واتصلت على اهم رقم عندي بالحياة

بطني

مسمي العامل اللي يجيب الطلبية ( بطني )

طوال وحدتي بهالبيت وانا اطلب من هالمطعم .. والعامل موكيش يجيب الطلبية لي .. لين تعرفت عليه وتعرف علي

وبدل ما اسميه باسمه بجوالي حفظت رقمه باسم ( بطني )

موكيش = هلا بابا اومر

عمر = هلا موكيش .. اليوم هات طلبيتي بدري .. الطلبية نفسها بس زيد عليها نفر ثاني

موكيش = حاضر بابا .. الحين يجيب ؟

عمر = ايه يكون احسن

موكيش = اوكي

سكرت عنه .. وفتحت انشاء رساله وكتبت

( رايد رجع )

وارسلتها رساله جماعية للشباب .. مشعل ومنصور وعبد الله ومصعب

شوي وجاني اتصال من منصور وبعده عبد الله

ومشعلوه الى الحين ماعنده رصيد ارسل علي كول مي .. اتصلت عليه وبعده كلمني مصعب

وكلهم نفس الاسئلة.. وين لقيته وكيف ومتى ووشلونه وووووو

منصور ومصعب قالوا بيجون بس طلبت منهم ينتظرون عشان نفسية رايد

سكرت عن اخر واحد و على طول تذكرت صلاتي .. وتنهدت متضايق من حالي معها .... ماصليت العصر ولا المغرب .. مدري ليه مااحافظ عليها مدام ماني مرتاح

قمت ورحت اصلي بالمجلس ورجعت للصاله ولقيت رايد جالس وعليه بنطلون جنز وتيشيرت ابيض باكمام قصيرة وسرحان

عمر بمرح = اكششششششخ ياولد

رفع رايد راسه لي متفاجئ مني طالعني شوي وبعدها ابتسم ابتسامة صغيرة وماعلق

جلست بجنبه وانا اضرب ظهره على خفيف

عمر = اكيد جوعان .. الحين يجي العشا

ساكت ومارد علي

تنهدت واخذت الريموت وقعدت اقلب بالقنوات ادور شي مسلي او أي مسلسل كوميدي .. ابي رايد يفهّي فيه

ومالقيت الا فيلم اكشن .. شوي شوي .. فهّيت فيه انا

قطع علي رنين جوالي

بطني يتصل بك

قمت وطلعت للباب عند موكيش واخذت الطلبية منه ورجعت لرايد .. وقعدنا نتعشى



وحنا نتعشى بصمت سألني رايد فجأة

رايد = عمر نايف وينه ؟

رفعت راسي وسكتت مدري وش ارد عليه ..

احم

عمر = آآآ .. مسكته الشرطة .. خلاص انسى موضوعه .. ماعليك منه

طالعني رايد شوي وبعدها نزل راسه يكمل اكله .. بدون مايعلق

اضطريت اكذب عليه .. اخاف يتركني بسببه مرة ثانية .. امي ورايد معطين نايف اكبر من حجمه





الثلاثاء .. العصر

جالس بالصاله وداخل على النت

رايد من امس بعد ماتعشى نام على الارض وعليها الى الحين .. حسيت حاله منهد

امس نام بدون مايدري عن نفسه .. لحفته ببطانية وحطيت تحت راسه مخده وخليته

واليوم تغديت كالعادة وحيد

طالعت رايد يوم حسيت بحركته وهو نايم وابتسمت .. اليوم ناوي اجمع الشباب بمناسبة رجوعه

امممم خلني اجهز من الحين .. سكرت الاب توب وطلعت من الصاله عشان ما ازعج رايد

وعزمت منصور ومشعل وعبد الله ومصعب واحمد ..

سكرت عن اخر واحد وسكتت افكر متردد اتصل على يوسف واعزمه والا لا ؟


امممم خلني اعزمه .. اتعرف عليه اكثر واعرفه على رايد

اتصلت عليه وعزمته يسهر الليلة معنا .. ووافق

اتصلت على بطني وطلبت منه يجهز طلبيه وعلمته بعدد الشباب



رجعت للصاله ولقيت رايد الى الحين نايم

نظفت الصاله من بقايا عشانا امس وغداي اليوم وطلعت للسوبرماكت اجهز لسهرتنا

على اذان المغرب رجعت للبيت ودخلت الصاله ومعي الاكياس

ولقيت رايد جالس بالصاله يقلب بالقنوات وحاط بطانيته ومخدته على احد الكنبات

رفعت الاكياس قدامه

عمر = الشباب بيجون يسهرون عندنا ..

قطب رايد حواجبه مستغرب

رايد = الشباب ؟

نزلت الاكياس على الطاولة الصغيرة وجلست بجنبه

عمر = ايه الشباب .. لا يكون نسيتهم .. منصور وعبد الله ومشعل ومصعب واتصلت على جارنا احمد ووووو ( وسكتت شوي ) واتصلت على يوسف

طير رايد عيونه فيني منصدم


رايد = ليه اتصلت عليه .. وين اودي وجهي منه ؟

حطيت يدي على فخذه

عمر = خلنا نتعرف عليه وش خايف منه انت .. هو تراه سامحك .. انت بس لا تكبر الموضوع

لف رايد وجهه عني متضايق

لفيت يدي على اكتافه وقربته مني

عمر = فرفش معنا وانسى همك وعيش حياتك.. ترا كلنا لنا هموم.. والله يحلها من عنده

الجــزء الثانــي والعشــرون *













رايد = ليه اتصلت عليه .. وين اودي وجهي منه ؟

حطيت يدي على فخذه

عمر = خلنا نتعرف عليه وش خايف منه انت .. هو تراه سامحك .. انت بس لا تكبر الموضوع

لف رايد وجهه عني متضايق

لفيت يدي على اكتافه وقربته مني

عمر = فرفش معنا وانسى همك وعيش حياتك.. ترا كلنا لنا هموم.. والله يحلها من عنده

قبل صلاة العشاء بفترة جو منصور وعبدالله بسيارة وحدة .. طلعت للحوش افتح لهم الباب واول ماشفت خششهم مسكتهم على جنب وحنا بالحوش قبل ندخل على رايد

عمر = شباب ابيكم تطلعون رايد من نفسيته من امس وهو بس ساكت

التفتوا منصور وعبد الله لبعض ورجعوا يطالعوني

منصور وهو يضرب صدره = خله علي .. ان ماخليته يناقز مثل المجانين ماكون منصور

ضحكت وانا امشي قدامهم

عمر = هههههه نشوف

ودخلوا منصور و عبد الله الصاله على رايد وانا رحت للمطبخ .. اللي يشوفني يقول ربة بيت ... المغرب كله وانا بس بالمطبخ .. انظف الحوسة اللي فيه واجهز القهاوي للشباب .. مع انها كلها قهاوي جاهزة ( كبتشينو وطقته ) عاجز اسوي لهم قهوتنا العادية اصلا ماعرف لها زين .. قلت ارقعها بالقهاوي الثانية وجهزت كم دونات جاهزة لهم واخذت صحني وصحن منصور وعبد الله ورايد وطلعت من المطبخ

ولقيت منصور وعبد الله يخففون دمهم لرايد

منصور جالس على كنبة منفردة و عبد الله جالس على الكنبة بجنب رايد ويعلقون على بعض

اول مادخلت عليهم بالصينية صاح فيني عبد الله

عبد الله = والله لو اني داري كان ماتعبت نفسي فرفرة بهالاستراحات

قطبت حواجبي مستغرب منه .. وجه العنز قايل له يطلع رايد من نفسيته مو يحسسه انه كان ثقيل علينا وحنا ندور عليه بالاستراحات

نزلت الصينية على الطاولة الصغيرة والتفتت لعبدالله متضايق منه بس ماقدرت اعلق قدام رايد وقعدت اطالعه وانا واقف

كمل عبد الله كلامه

عبد الله = ياخي بيتك موجود وش لنا بهالاستراحات وغثا اصحابها .. كل واحد يطلع علينا عذر .. قهر مايأجرون لنا لاننا شباااااااب .. كل شي عوايل عوايل عوايل

ابتسمت بعد ماستوعبت وبعدها ضحكت عليه او بالاصح على نفسي .. فهمت عليه خطأ .. اخذت صحنه ومديته عليه وانا اعلق

عمر = وش قصدك تبي بيتي مرتع لك ولاشكالك

تدخل منصور بسرعة يرد علي

منصور = وشكلك .. تراك منا .. وعبد الله صادق نبي نسهر ببيتك دايم بدل الاستراحات .. تعب عبد الله وهو يدور على استراحة مناسبة يأجرونلنا بالشهر

اخذت صحن الثاني اسد فمه

عمر = اقول خذ وانت ساكت .. تبون اجمع الشباب كلهم ببيتي يسهرون للفجر .. صاحين انتم .. اصلا بيتي مكتوم مو مثل الاستراحات .. بيتي صغير ومافيه مسبح ياخي حتى حوشه صغير .. ابد مايناسب

ضحك عبد الله يعلق

عبد الله = البلاش ربحه بين ههههههههههههههه

عمر = اهااا بس ( واخذت صحن رايد ومديته عليه ولقيته يطالع الارض وساكت ومانتبه لي ) رايد

رفع رايد راسه لي وبعد ما استوعب اشر بيده يعني ما ابي

عمر = خذ يارجال انت حتى ماتغديت

تنهد رايد واخذ الصحن مني بصمت

اعتدلت واقف والتفتت للشباب بصمت اطالعهم واحد واحد كأني اقولهم شفتوا هذا حاله من يوم رجع .. بادلوني النظرات بصمت وبعدها قطع علينا عبد الله وهو يطلع سجارته

عبد الله = اكيد مانت قايل لا

هزيت راسي بايه

عمر = خذ راحتك ( واخذت صحني وجلست على احد الكنبات ) وين مشعل ؟

بس رد علي منصور وهو ياخذ الريموت

منصور = نبي اغاني ماعندك اغاااااااني ( وقعد يبدل بالقنوات يدور )

سكتت مادري ليه تذكرت كلام سعد .. فعلا جونا مايساعد على الثبات .. كل الشباب وفوقهم انا نسمع للاغاني ونترك الصلوات وغيره من هالمعاصي ولا واحد ينصح الثاني .. كلنا فالينها وماهمنا شي

طلعني من تفكيري صوت التلفزيون وهو يصدح باغنية بصوت عالي

شوي شوي وبدت الصاله تمتلي بدخان سجارة عبد الله وبدينا ندخل جو مع الاغنية ونضحك ونعلق على اللي يتمايلون بالتلفزيون

وماقطع علينا الا مشعل وهو داخل علينا الصاله

اعتدلت بجلستي متفاجئ

عمر = مشعل !!

رفع مشعل صوته يكلمني

مشعل بصوت عالي = وانا اقووووووووول .. من اليوم اطق الباب ماحد يرد علي ... بعذركم مع هالازعاج منين تسمعوون ( وتقدم لرايد يسلم عليه ) راااايد عاش من شافك

اخذت الريموت من منصور وخفضته على صوت معتدل وقمت وطلعت من الصاله ورحت للحوش وسكرت باب الشارع عشان اذا جا مصعب و احمد اقولهم نفس اللي قلته لمنصور وعبد الله .. مايفاجئوني مثل مشعل

دخلت و رحت للمطبخ اضيف مشعلوه

رجعت للصاله وضحكت على مشعل .. ماخذ راحته على الاخر .. منزل ثوبه وجالس وعليه ملابسه الداخليه ويدخن

مديت عليه صحنه وهو يسأل رايد

مشعل = تعرف الهنود اللي كنت معهم ؟

رايد بهدوء = لا .. ماكنت اعرف احد

جلست بجنب مشعل وملت عليه وقربت راسي من راسه وقلتله بصوت خفيف بيني وبينه

عمر = انا جمعتكم ابيكم تطلعون رايد من همه خاصة اني علمتكم بكل شي ماله داعي تسألونه مرة ثانية ..

سكت مشعل بعد ماهمست له والتفت لي يطالعني ووجه قريب من وجهي .. ابتسم وسحب نفس من سجارته ونفثه علي

مشعل = طيب بشرط

رفعت حواجبي

عمر مستغرب = شرط ؟ وش ؟

مد مشعل سجارته لي

مشعل = دخّن

ابعدت يده عني

عمر = تبي جدي يذبحني

مشعل = ياهو انت ومنصور خوافين

سكتت وماعلقت وبدينا نسولف ونضحك و نتمايل مع هالاغاني ورايد يطالعنا وساكت

ربع ساعة واتصل علي مصعب يعلمني انه عند الباب

قمت وطلعت افتحله وتفاجأت بمعاذ وسعود معه

سعود حلو يجي .. عمره بعمر رايد ويمكن يطقها صداقه معه بس وجه النحس هذا وش جابه

التفتت لمصعب بعصبية وانا اشر على معاذ

عمر = هذا وش جابه الحين ..اظني ماعزمته ( والتفتت له ) وشوله راز وجهك وجاي

ابتسم معاذ ابتسامة جانبية

معاذ بغرور = والله قلت فرصة اجي اشوف ولد العم كيف عايش لحاله واتدبر نعم الله علي واشكره

جابها على الجرح .. ادري ان معاذ فاهم و يعرف زين عن معاناتي ووحدتي .. اخذت نفس امسك اعصابي .. ما ابي ابين له انه جرحني

التفتت لمصعب واخذته على جنب اقوله اللي قلته للشباب

عمر بعصبية = شكلي ابتحسف اني عزمتك

طير مصعب عيونه فيني

مصعب = والله انا فرحت بعزيمتك لي .. ليه تقول كذا وش سويت ؟

عمر = هالتيس وش جابه ؟

التفت مصعب لمعاذ ورجع التفت لي بخيبة امل

مصعب = قال ابروح معك وماقلت شي .. وش تبيني اقول يعني وبعدين هو رايح لولد عمه ماهو غريب

ودي اعطيه كف يطير وجهه هو واخوه

عمر = المهم اسمع ... رايد نفسيته تعبانة .. مابيك تسأله عن اللي فات ( والتفتت لسعود وهو واقف بجنب معاذ ويطالعونا ) احسن شي سويته انك جبت سعود

تنهد مصعب وهمس

مصعب = التعامل معك صعب

دخلنا الصاله ووقف الجميع يسلمون على عيال عمي

تقدم اول شي مصعب وبعده سعود اما انا ومعاذ الى الحين واقفين عند مدخل الصاله

مسك معاذ خشمه وهو واقف بجنبي ويسمّعني

معاذ بقرف = اففففف وش هالريحة ( والتفت لي ) كتمه كله ريحة دخان

طالعته وردت عليه

عمر = اذا مو عاجبك ارجع

طنشني معاذ والتفت لرايد

معاذ = امممم هذا الحرامي ؟

شهقت والتفتت لرايد وحمدت الله انه مانتبه .. واقف ويتكلم مع مصعب

اخر شي توقعته مصعب يعلم معاذوه بكل شي .. التفتت لوجه العنز بعصبية ومسكت ياقة ثوبه وجريته وقربت وجهه من وجهي اهدده بهمس

عمر = ان فتحت فمك بكلمه وريتك شغلك ( ودفعته على ورا )

معاذ وهو يعدل ثوبه = بسم الله وش قلت انا الحين

ودخل يسلم على الشباب واحد واحد .. وشكل تهديدي خوفه سلم على رايد بسلام وجلس

رحت للمطبخ اضيفهم .. والله لولا الشباب ماضبفت معاذوه بس عاد عشان شكلي قدامهم لازم اضيفه .. خاصة ان مشعل دايم يحط اللوم علي بعلاقتي مع عيال عمي

= خلني اساعدك

التفتت لمصدر الصوت ولقيت مصعب واقف عند باب المطبخ .. قال كلمته ودخل ووقف بجنبي واخذ اللي بيدي

مصعب = وش اسوي ؟

عمر = ما احتاج مساعدة

طنشني مصعب وهو يطالع الاغراض اللي قدامه لين عرف وش ابي اسوي بمجرد ماشافه وبدا يوزع القهوة باكواب

تنهدت وخليته يكمل شغله

عمر = ليه علمت معاذ عن رايد وسواياه

مصعب بدون مايلتفت لي = انا ومعاذ مانخبي عن بعض شي

ضيقت عيوني من ألم الكلمة على صدري .. فرق بيني وبينهم فرق .. ياحظه عنده اخو يفضفضله ويقوله اسراره ويعطيه اخباره

عكسي تماما من صغري وانا اسراري موزعه على خوياي .. عنده اخو ساكن معه ولا يفارقه لاتفه سبب .. مو مثلي اسبوعين وانا بهالبيت لحالي .. واللي زاد الطين بله مالقى عبد الله استراحة اروح لها واغير جو فيها وافلها مع الشباب .. اسبوعين يمر علي الساعة والساعتين ما اتكلم مع احد وفــ

= هه خلصت

انتبهت على مصعب وتنهدت

فجأة رن جوالي .. طلعته من جيب بنطلوني

احمد بتصل بك

رفعت راسي لمصعب

عمر = صب لاحمد ووده وانا ابروح افتح الباب

طلعت للحوش ولقيت احمد واقف بنص الحوش ويتلفت مستغرب

عمر = حياك حياك

التفت احمد لي ووقف قدامي

احمد مستغرب = لقيت الباب مفتوح بس استغربت مجلسكم طافي

عمر بابتسامة = داخل داخل مايحتاج مجلس حياك كلنا داخل ( وكملت اتطنز على نفسي ) تعرف بيتي مافيه خصوصيه

احمد = اهاا

عمر = احمد رايد نفسيته تعبانة شويتين ياليت ماتسأله عن الهنود اللي كان ساكن معهم ولا عن السيارة اللي سرقها

هز احمد راسه متفهم

عمر = اممم وش رايك تقول لاخوك محمد يجي ؟

طالعني احمد مستغرب

احمد = ليه ؟

عمر بابتسامة = هو بثالث متوسط صح ؟

احمد = ايه

عمر = رايد وولد عمي سعود كبره وهم موجودين الحين .. سعود بثالث متوسط ورايد متخرج من المتوسط .. خله يجي

احمد بابتسامة = طيب ( وطلع جواله من جيب ثوبه وقعد يضغط شوي وجاه رد ) محمد تعال لبيت عمر ... ايه يله تعال ( وسكر عنه والتفت لي ) الحين يجي

هزيت راسي بايه ودخلنا الصاله وجلست بجنب سعود .. واحمد يسلم على الموجودين

شوي وجا محمد اخو احمد وانضم معنا

ربع ساعة وجاني اتصال من يوسف

عمر = هلا يوسف ؟

يوسف = السلام عليكم

عمر = وعليكم السلام ياهلا

يوسف = عمر مادليت بيتك

وصفت له شوي وبعدها سكرت عنه .. وتوني انتبه ان الشباب ساكتين وقاطين اذانهم عندي

مشعل مستغرب = يوسف بيجي ؟

عمر = ايه ( والتفتت لرايد ولقيته واضح من ملامحه متضايق )

منصور = تقول هو معنا بنفس الجامعة ؟

عمر = ايه .. ( والتفتت لمشعل اتطنز عليه ) هيه انت البس ثوبك لا تفشلنا عند الرجال .. خله لين ياخذ علينا شوي وبعدين سو اللي تبي

ضحكوا الشباب عليه وهو يلبس ثوبه بسرعة

ابتسمت وكملت

عمر = انا ابروح اوقفله عند الشارع .. الرجال مايدل البيت زين

وقمت وطلعت للشارع احتريه

عشر دقايق وجا يوسف وبعد السلام والكلام

يوسف = والله انا جاي عشانك بس .. نكته لو احد يدري اني جاي عشان سارق السيارات

مسكت ذراعه

عمر = يارجال والله انك ظالمه انت الحين ماتعرفه .. اذا عرفته بتعذره

سكت وماعلق .. دخلنا الصاله وقاموا الشباب يسلمون على يوسف

تفاجأت يوم ماشفت رايد بين الموجودين وسألتهم مستغرب

عمر = وين رايد ؟

التفت محمد لي

محمد = طلع فوق

هزيت راسي بايه والتفتت ليوسف اللي اخذ مكانه بعد ماسلم على الشباب

عمر = حياك يوسف حياك .. البيت بيتك

وطلعت من الصاله ورحت فوق ادور رايد ولقيت الاخ بغرفتي .. جالس على سريري ومنزل راسه بين يديه بحزن

تنهدت من حاله .. رايد يحب العزلة .. اذكر يوم كنا بالاستراحة كان مايجلس معنا الا نادرا

عمر بتنهيدة = رايد

رفع راسه يطالعني وواضح من وجه اني متضايق مرة

عمر = ليه جالس هنا لحالك ؟

رايد بحزن = ليه عزمته ؟

عقدت يدي قدام صدري و تساندت على حافة الباب

عمر = وانت وش خايف منه .. يوسف الحين مايطلبنا شي .. سيارته وابصلحها له وش يبي بعد

لف رايد وجهه عني بضيق

دخلت الغرفة وجلست على سريري بجنبه ولفيت يدي على اكتافه

عمر = خلاص رايد هو نسى انت انسى

كذبت عليه ادري ان حتى يوسف شايل بخاطره منه .. بس عسى وربما يتصافون وينسى رايد هالهم

منزل راسه وساكت

عمر = يله خلنا ننزل الشباب كلهم تحت

رايد بحزن = طيب ( سكت شوي وبعدها التفت لي بملامح حزينة ) عمر الكرت معك .. ابي الحين ادور على وظيفة .. ابشتغل أي شي أي شي

سكتت شوي وانا اطالعه .. نزلت يدي عن اكتافه ... صح رايد لازم يدور من بكرة على وظيفة قبل ياخذ عمه الكرت .. وشهقت ... صح ماعمري شفت له شهادة ابد ابد .. حتى مااذكر جاب سيرتها قدامي .. لا تكون شهادته عند عمه .. والله مصيبة

عمر = شهادتك وين .. لا يكـ

وقاطعني

رايد = بالرياض

قطبت حواجبي مستغرب

عمر = بالرياض ؟

نزل رايد راسه بخيبة امل

رايد = يعني لازم شهادة بعد ( والتفت لي ) قبل كل شي يبي الاثبات والحين الشهادة .. كل شوي يجيبون طلب ( وحط يده على فخذي يترجاني ) عمر شهادتي بالرياض تكفى ابي اجرة لموزين واروح .. بس ابي فلوس الاجرة ... ادري اني مثقل عليك .. والله مالي بالدنيا الا انت وماعرف الا انت .. حاولت اعتمد على نفسي واريحك مني ( وضغط على فخذي يترجاني ) تكفى عمر بس فلوس الاجرة

سكتت وانا اطالعه ووجهه قريب من وجهي

عمر = يعني شهادتك موجودة بمدرستك المتوسطة ؟

رايد بحزن = ايه

زين ان شهادته بالرياض ولا هي عند عمه .. ابتسمت ياحليله كل هالترجي عشان فلوس اجرة لموزين .. انا اروح معه بسيارتي ماوراي شي .. لا جامعة ولا غيره .. وشوله لموزين اصلا

حطيت يدي فوق يده على فخذي

عمر بابتسامة = مايحتاج لموزين .. انا وانت نروح للرياض تاخذ شهادتك ومنها نتمشى

شهق رايد وهو يطالعني يستوعب وبعدها ارتمى علي بفرح

رايد = عوووووومررررر

سندت يدي على السرير ويدي الثانية على ظهر رايد .. الجرح ببطني مايتحمل ثقله .. لاف يديه حول رقبتي وراسه على كتفي ويشكرني

رايد = مشكوووووور .. والله مادري وش اقولك تصلح سيارة يوسف وانت مالك ذنب والحين ( وسكت وهو يغطي وجهه بكتفي )

ضربت ظهره على خفيف

عمر = رايد مابيننا شي لا تصير حساس ورسمي بزيادة

ابتعد رايد راسه عن كتفي وطالعني وتفاجأت بدموعه مالية عيونه تبي تنزل

رايد بصوت باكي = عمي وهو عمي ماسوا اللي سويته لي (وسلم على راسي باحترام ورجع يطالعني ووجهه قريب من وجهي ) مـ .. مدري وش اقول

اعتدلت جالس وابعدته عني

عمر = لا تقول شي وخلنا ننزل .. مو حلوة اخلي الشباب تحت خاصة ان فيه ضيوف اول مرة يدخلون بيتي

وقمت واقف ومديت يدي على رايد

عمر = يله قم

مسح رايد وجهه بيديه وقام وطلعنا من الغرفة ونزلنا تحت .. دخلنا الصاله ونزل رايد راسه وتوجه ليوسف يسلم عليه منحرج

عقدت يدي قدام صدري وانا الى الحين واقف عند مدخل الصاله و احتري ردة فعل يوسف

قام يوسف وانحنى يسلم على رايد ورجع يجلس .. ورايد تراجع على ورا وجلس بالمكان الوحيد الفاضي بجنب سعود

سلموا على بعض سلام صامت .. احسن بعد .. افزع لهوشه ايه اما افزع اصالح ثنين مع بعض ابد ماعرف

انتبهت ان يوسف مضيفه احد .. ابتسمت نسيت اضيفه اصلا .. اكيد مصعب هو اللي اهتم بالموضوع

دورت بالصاله مكان فاضي بس مالقيت .. الصاله صغيرة وضيقه والكنبات ماخذة مساحات كبيرة منها

جلست على يد الكنبة بجنب مشعل وجالس بعده مصعب ويسولفون

حطيت يدي على بطني يوم حسيت بالعوار يرجعلي ... الجرح مكان الخياطة التئم بس أي ثقل او حركة مفاجئة يعورني ورايد ماهو مقصر من هالناحية

= وش فيك عمر

انتبهت على مصعب مستغرب

عمر = وش فيني ؟

مصعب = لا يكون يعورك بطنك ؟

تنهدت وابعدت يدي عن مكان الجرح .. مصعب دايم يلاحظ علي أي حركة اسويها

عمر = لا ابد مايعورني شي

شوي شوي وكل واحد دخل جو مع الثاني او بالاصح مع اللي بجنبه

يوسف ومعاذ .. مصعب ومشعل .. عبد الله واحمد ومنصور .. والشباب الصغار رايد وسعود وجالس قدامهم محمد على الارض .. قايم عن مكانه وجلس قدام رايد وسعود يقط وجهه معهم

انتبهت على الثلاثي .. سعود و محمد مطلعين جوالاتهم وكل واحد يوري الثاني مقاطعه ويعطون رايد يشوف معهم .. ويرد عليهم بكلمة كلمتين ويسكت

صح .. على طاري الجوال ليه ماطلع لرايد واحد .. ابتسمت بس يحتاج انتظر الشهر الجاي الحين مطفر


= له له له .. تمزح ؟ مو باين عليك

انتبهت على منصور يكلم يوسف بصوت عالي

يوسف = هههههههههه والله ما امزح .. وش فيك محسسني كاني ماني كفو

التفت منصور لاخر الصاله بالنسبة له او بالاصح لي ولمشعل ومصعب

منصور = شبااااااب بيننا واحد متزوج ( واشر على يوسف )

طيرت عيوني بصدمة والتفتت ليوسف اتأكد

عمر بصدمة = معقول انت متزوج ؟

كل اللي بالصاله منتبهين ليوسف

يوسف بابتسامة = ايه متزوج مالي الا شهرين .. توني معرس جديد

معاذ = ههههههههه وش تبي جاي .. كلنا عزابية

ضرب منصور كتف معاذ بمزح

منصور = خله يعطينا دروووووس

سكتت وانا اطالع يوسف .. متزوج وهو يدرس .. كيف يصرف عليها .. انا نفسي اتزوج بس متخوف وشايل هم المصروف ..

عمر = يوسف انت تشتغل ؟

التفت يوسف لي وهو مبتسم على صدمة الشباب فيه

يوسف = قبل اتزوج كنت اشتغل لين جمعت المهر وبعدين تركته وتفرغت لدراستي

قطبت حواجبي .. ماشفى غليلي وجاوب على تساؤلاتي .. كيف يصرف عليها اجل

بس لحسن حظي سأله احمد بجدية

احمد = والمدام كيف تصرف عليها وانت ماتشتغل ؟

التفت يوسف لاحمد

يوسف = هي تدرس بعد ومكافأتها ومكافأتي .. الحمد الله الحال مستور

مشعل = امششششش ياولد

عبد الله = لو اني بمكانك والله ماتشوفون وجهي ههههههههههههه

ضحك يوسف على خبالهم وماعلق

احمد بجدية = ويكفيكم مكافأتك ومكافأتها .. يعني تقريبا عايشين على الفين

التفت يوسف لاحمد

يوسف = الحمد الله الوالد ماهو مقصر وبعدين تونا مالنا الا شهرين .. و تبي الصراحة اذا كانت زوجتك والله ماهي مبذرة يكفيكم حتى لو الف ريال .. اما اذا كانت مبذرة والله لو راتبك عشر الاف مايسدها ... كل شي على الزوجة اختارها صح وترتاح

تنهد معاذ من قلب

معاذ = ويييييييييين خلها على الله .. الله يرزقنا بس

سكتت وانا اطالع يوسف ... ماشاء الله عليه فكر وقرر ونفذ .. مو مثلي افكر من زمان بالزواج بس متردد .. وابتسمت شجعني يوسف وهو مايدري .. والتفتت لرايد ولقيته يطالع محمد وسعود وداخلين جو بسوالفهم ومنطشين نقاشنا

التفتت ليوسف وسألت بطريقة مزح وبيني وبين نفسي جاد

عمر = اجل تنصحنا نخربها ؟

يوسف = خربها وماجاك علي هههههههههههههههه

تنهدت وماعلقت

ربع ساعة واتصل علي موكيش جايب العشا وكملنا سهرتنا

وعلى الساعة 1 استاذن يوسف وطلع وحنا نعلق عليه اشتاق لزوجته وماصبر ومن هالكلام

= عمر شوي ابيك

التفتت لمصعب .. قال كلمته و قام وقمت وراه وطلعنا من الصاله ودخلنا الغرفة اللي بجنب الصاله

مسك يدي وهمس بصوت خفيف

مصعب بهمس = عمر مها انخطبت

شهقت وطيرت عيوني فيه ماني مصدق

عمر = عمتي مها ؟

هز مصعب راسه بايه ووجهه لا تعليق .. ابتسمت وانا اتذكر مها وبعدها ضحكت

عمر = ههههههههههههههه مها ماني مصدق ..

وسكتت وانا اطالع مصعب وقطبت حواجبي مستغرب وش فيه كذا كانه مو فرحان

عمر = وش فيك ؟

مصعب بتنهيدة = اللي خطبها .. آآآ ( وترك يدي وسكت )

عمر = وش فيه ... ومنهو اصلا ؟

مصعب = اللي خطبها .. آآآ ... مايتكلم الا بالاشارات ( ولف وجهه عني ) اطرم

طيرت عيوني بصدمة

عمر = ووووشششش

مارد علي مصعب وهو الحين لاف وجهه عني بضيق

عمر = صاحين انتم .. عمتي طبعها ثرثاره وملسونة .. كيف تبونها تعيش طوال حياتها مع واحد اطرم ومايتكلم .. شهر وبيطق فيها عرق

التفت مصعب لي

مصعب = ابوي وجدي محتارين ... عمــ

وقاطعته قبل يكمل

عمر بعصبية = وبعدين تعال .. عمتي تنخطب وانا اخر من يعلم

مصعب بضيق = ماصار الا امس .. تو ماردينا عليهم .. وبعدين اكيد اخر من يعلم انت .. كلنا كنا موجودين الا انت

سكتت متضايق .. من ذوي الاحتياجات الخاصة .. مها تتزوج واحد مايفهم الا بالاشارات .. كيف بتتعامل معه طول حياتها

عمر = ومها وش رايها .. جدي وجدتي وش رايهم

مصعب = محتارين ( وتنهد ) لا تنسى ان مها عانس عمرها 33 سنة .. صعب يرفضونه

سكتت

مصعب = هو ولد جارنا .. اعرفه بس مالي علاقة معه عمره تقريبا 33 او 34 او يمكن اصغر منها .. مادري بالضبط .. الرجال ماعليه كلام بس عيبه اطرم

عمر = ومها وش رايها ؟

مصعب = ماشفتها .. اقولك ماصار الا امس

نزلت راسي افكر بعمتي وسألت مصعب

عمر = وش اسمه ؟

و سمعت رده

مصعب = ياسر

سكتت وماعلقت

مصعب = بتجي عندنا بكرة ؟

رفعت راسي لمصعب .. لازم نروح للرياض انا ورايد ونجيب شهادته باسرع وقت أي تأخير ماهو بصالحه .. والمشكلة بكرة الاربعاء اخر يوم بالاسبوع .. واخاف عمه ياخذ الكرت وهو الى الحين ماحصل وظيفة .. وش يطلع الكرت من حلقه اذا اخذه .. لازم اليوم الفجر نمشي والصباح نكون بمدرسته .. والسبت يبدا رايد يدور وظايف

عمر = لا .. بكرة مشغول

مصعب مستغرب = مشغول !! وش وراك يعني

عمر = مشغول وخلاص

رفع مصعب يديه قدامه يهديني

مصعب = خلاص خلاص ... طيب متى بترجع للجامعة ؟

عمر = الاسبوع الجاي

مصعب = اهاا طيب .. يله حنا بنمشي الحين

هزيت راسي بايه بصمت

وطلعنا من الغرفة ودخلنا الصاله وانا افكر بعمتي .. ودي اشوفها واشوف رايها بس بكرة مشغول

شوي وطلع مصعب واخوانه

ومابقي الا عبد الله ومشعل ومنصور ... شوي شوي طلعوني الشباب من افكاري باهبالهم ورقصهم .. ورايد كأنه طلع من صمته شوي


ولأني امون عليهم ماطلعوا من عندي الا بعد ماطردتهم على الساعة 4 ولو ابعطيهم وجه يمكن يجلسون عندي للفجر

طردت اخر واحد فيهم برا البيت وسكرت الباب و رجعت الصاله وانسدحت على اقرب كنبة بتعب .. التفتت لرايد ولقيته منسدح هو الثاني ويطالعني

عمر = لازم الفجر نمشي للرياض ؟

ابتسم رايد وجلس

رايد = صدق ؟

عمر = ايه بكرة الاربعاء اخر يوم دوام ( وفركت عيني بتعب ونعاس ) تعبان قومني الفجر ( وانقلبت على جنبي معطيه ظهري وكملت ) طف اللمبات

شوي وحسيت برايد يلحفني وبعدها طف الانوار



الاربعاء .. الفجر

= عوووووووووومررررررر قمممممممم

انقلبت على ظهري بكسل وشفت رايد واقف فوق راسي وانا دايخ من النعاس

رايد = قم عمر .. يله الساعة 5 ونص الحين .. متى يمدينا نوصل للريااااااض

طالعته شوي بس غصب عني سكرت عيوني

حسيت بيدين رايد على صدري ويهزني بقوة

رايد = عوووووووووووووومرررررررررررر

وبعد محاولات وازعاج قمت وطلعت من الصاله اترنح من النعاس

ربع ساعة وركبنا السيارة وانا احس جفوني ثقيلة من النعاس

رايد = تبيني اسوق عنك .. انت نعسان مرة

التفتت له بنص عين مفتوحة

عمر = انت مانمت ابد ؟

رايد = ايه .. ماجاني نوم وقلت اكمل اسهر عشان اقومك

هزيت راسي بايه ونزلت وتبادلنا الاماكن وعلى طول نوووووم





حسيت برايد يهزني وفتحت عيوني .. شوي واستوعبت اني الى الحين بالسيارة

اعتدلت جالس اشوف الطريق حولي احاول استوعب وين وصلنا .. وشفت معالم الرياض واضحة قدامي .. جاني صوت رايد وهو يسوق

رايد = هههه ازعجتني بشخيرك طوال الطريق ..

ابتسمت بكسل وطلعت جوالي من جيب بنطلوني اشوف الساعة

8

عمر = زين الساعة 8 الحين ( والتفتت لرايد ) تدل مدرستك ؟

سكت رايد شوي وتنهد

رايد = ايه .. اذكر الحي .. حينا وبيتنا ( وسكت شوي وهو يطالع قدام وكمل بحزن ) وامي وابوي

اوووووه لا يقلبها علي مناحة الحين

عمر = اصفط على جنب انا ابسوق

نفذ رايد كلامي وتبادلنا الاماكن وانا احس جوعان .. مرينا مطعم وافطرنا وكملنا الطريق لحارة رايد ووقفنا عند مدرسة يقول انها مدرسته

عمر مستغرب = هذي مدرستك ؟

ابتسم رايد والتفت لي

رايد = اييييه .. ماتغيرت ( ورجع يطالعها )

عمر = طيب وش تحتري يله انزل وهات ملفك ( وطلعت بوكي من جيب بنطلوني وطلعت اثباته )

اخذه رايد مني ونزل ودخل مدرسته وانا جلست بالسيارة انتظر

نص ساعة وطلع رايد ومعاه ملف وواضح عليه فرحان

فتح باب الراكب بفرح وركب

رايد بفرح = عمر شف .. هذا ملفي اخيييييرا .. الحين خلاص اثباتي وملفي عندي

ابتسمت وهزيت براسي بايه .. وسألته باستهبال

عمر = هاه بشر ناجح ؟

ضحك رايد

رايد = الناس لها سنة تدرس وانا توني اخذ ملفي ههههههههههه

ابتسمت وحركنا السيارة وقبل نطلع من الحارة سألت رايد بفضول وحذر

عمر = وين بيتكم ؟

سكت رايد وهو يطالع قدام وهمس بحزن

رايد = تعديناه

التفتت له وانا اسوق

عمر = صدق ( والتفتت ورا ورجعت التفت لطريقي ) ايهم

نزل رايد راسه وسكت

عمر = خلنا نرجع له ونشوف

رايد بقهر = مابي اشوفه

استغربت

عمر = ليه .. آآآآ .. ماورانا شي

تنهد رايد

رايد = طيب عشانك

وبدا يدلني ..

رايد = هذا

وقفت عند البيت اللي اشر عليه رايد وقعدت اطالعه

بيت دورين .. حديث شوي ..

وطيرت عيوني وانا اشوف سيارة جيب واقفة قدام البيت

والتفتت لرايد

عمر = السيارة هذي شكلها سيارة اللي شرا البيت من عمك ؟

يتأمل البيت بنظرات حزينة

رايد بحزن = عشان كذا اقولك مابي اشوفه .. شفت السيارة قبل شوي ( وتغير صوته ) ضاع كل شي بعد امي وابوي ( ومسح بيده دمعته الوحيدة اللي نزلت غصب عنه ) خلنا نروح احس مختنق

حركت السيارة وطلعنا من الحارة ... فجأة جاني صوت رايد بعد ماهدا شوي

رايد = عمر ابي اجيب ملف اختي بس ما اذكر وين مدرستها

عمر = امممم طيب اتصل عليها ( وكأني تذكرت شي والتفتت له ) صح على الطاري .. انت مامريت اخواتك طوال الاسبوعين اللي راحوا ؟

رايد بتنهيدة = الا مريت حارة عمي بس ماشفت دانة بالشارع ولا قدرت ادخل البيت

عمر = متى ؟

رايد = مدري بالضبط .. اظن بعد اسبوع من دخولك المستشفى

سكتت وماعلقت وكمل رايد كلامه

رايد = مااقدر اتصل عليها .. خلاص مب لازم

سكتت وماعلقت

اخذنا ربع ساعة وحنا نفرر بشوارع الرياض بدون هدف

ورايد كل ماشاف شي .. شهق بشوق وقعد يكلمني عنه

فجأة سألني متردد

رايد = عمر .. وش رايك ازور خوالي ؟

كتمت انفاسي وانا اسوق و بدون مالتفت له .... يزور خواله .. اخاف ( من شاف احبابه نسى اصحابه يارايد) اخاف يزورهم وبعدها يقنعونه يجلس عندهم ويتركني ... ورايد اتفه سبب ممكن يتركني مثل ماتركني قبل .. الصراحة مابي يزورهم ..

رديت عليه بدون نفس .. مابي ابين له موقفي

عمر = كيفك

* الجــزء الثالـــث والعشــرون *















اخذنا ربع ساعة وحنا نفرر بشوارع الرياض بدون هدف

ورايد كل ماشاف شي .. شهق بشوق وقعد يكلمني عنه

فجأة سألني متردد

رايد = عمر .. وش رايك ازور خوالي ؟

كتمت انفاسي وانا اسوق و بدون مالتفت له .... يزور خواله .. اخاف ( من شاف احبابه نسى اصحابه يارايد) اخاف يزورهم وبعدها يقنعونه يجلس عندهم ويتركني ... ورايد اتفه سبب ممكن يتركني مثل ماتركني قبل .. الصراحة مابي يزورهم ..

رديت عليه بدون نفس .. مابي ابين له موقفي

عمر = كيفك

رايد بألم = بس انا شايل بخاطري منهم

قطبت حواجبي مستغرب والتفتت له

عمر = ليه ؟

رايد وهو يطالع قدام = ماهتموا فينا .. ماحاولوا ياخذونا من عمي .. على الاقل اخواتي .. انا مابيهم اصلا .. بس اخواتي ( وتنهد وسكت)

عمر = عمك وليهن والحق بهذا مع عمك مو مع خوالك ..

رايد بألم = امحق ولي .. اختي تقول ان خالي جا يدور علي بس انا مابيه ياخذني ويخلي اخواتي مابي اصير بديرة واخواتي بديرة .. ( والتفت لي ) انت مالك اخوان يمكن ماتفهم علي

كللللللللل تبن .. مالك عليك حتى هالمفعوص هذا يعايرني ان ما عندي اخوان .. رديت عليه بغيرة واصحح له معلوماته .. هذا قبل ماعندي اخوان الحين عندي ندوري حبيبي

عمر = هيه يالحبيب .. صحح معلوماتك قريب بيصير عندي اخو

رفع رايد حواجبه مستغرب

رايد = هاه ( وابتسم بفرح ) صدق ؟( وكأنه تذكر ) اييييه صح امك متزوجة عمك .. ماشاء الله الحين صار عندك اخو ؟ .. طيب وينه ماعمري شفته ؟

رفعت صدري بفخر

عمر = توه ماشرف ..

ضحك رايد وهو يطالعني

رايد = هههههههه بعد ؟ اول مرة ادري ان بيصير لك اخو .. كم عمرك.. ابشوف كم بينك وبينه ؟

عمر = 21 ... بس اذا جا ان شاء الله بالسلامة بدخل على 22

ضحك رايد يتطنز علي

رايد = شاااااااايب عنده هههههههههههههههههه

طالعته وانا ابتسم

عمر = انت تشوف ؟ اللي بعمري يفرحون بعيالهم وانا توني افرح باخوي ههههههههه

ضحك رايد

التفتت اشوف الطريق

ما احس فرحان فيه .. احسه اخو بالاسم بس والا هو ببيت وانا ببيت .. وضيقت عيوني بألم ( لا .. حتى بالاسم ماهو اخوي )

رفعت صوتي افضفض لرايد

عمر بحزن = بالاوراق الرسمية يعتبر ولد عمي ماهو اخوي .. ما احس فرحان فيه ( وتنهدت ) الله يرحمك يبه

رايد = امك متزوجة عمك ابو مصعب نفسه والا متزوجة عم لك ثاني ؟

عمر = لا .. عمي ابو مصعب

رايد = يعني بيصير اخو مصعب من الاب وانت اخوه من الام .. طيب عادي حلو لما يصير اخوك وولد عمك بنفس الوقت ( وكمل بمزح ) 2 في واحد ههههههههه


ابتسمت بدون نفس .. ماحد فاهم علي ... انا ودي اخوان يعيشون معي بنفس البيت .. ودي احس ولو مرة بجو الاسرة .. بيت جدي ما احسه يعطيني اللي ابيه واتمناه .. اتمنى اخوان واخوات مجموعة مثل مشعل اخوانه تسع ماشاء الله وهو العاشر ابي مثل مصعب اخوانه اربعه وهو الخامس والحين ندوري انظم معهم مو معي .. ابي مثل منصور وعبد الله وغيره وغيره

ليش انا لحالي من يوم طلعت على الدنيا

= هاه عمر ماقلتلي .. وش رايك

انتبهت على رايد والتفتت له مستغرب

عمر مستغرب = هاه .. رايي بأيش ؟

رايد = ازور خوالي ؟

اذّانا هذا بخواله... طالعت قدام وابتسمت ابتسامة سخرية على حالي

اضحك على نفسي ... ياناااااااس مافيه مثل الاخوان بسقف واحد .. مايتركونك .. واذا طلعوا تصير متأكد انهم راح يرجعون لك .. اضحك على نفسي و احاول اعوض الحرمان اللي احس فيه بواحد ممكن يبيعني برخيص

رايد مصيره يرجع لاهله ... ليه متمسك فيه .. لا نادر ولا رايد راح يعاملوني اخو لهم

مالي الا عيالي ... الاخوان خلاص غاسل يدي منهم

رايد = عمر وش فيك ؟

انتبهت عليه.. وشفته بطرف عيني .. يميل وجهه قدام و يطالعني مستغرب

رايد = وش فيك عمر ؟ اسألك ولا ترد

رديت عليه بعصبية وانا اطالع قدام واسوق

عمر = رح لخوالك وش تبيني اسويلك يعني .. ارقص ؟

ماسمعت رد منه وماني ملتفت له .. يزعل والا يرضى

سمعت المساجد اللي نمر من عندها تأذن لصلاة الظهر

رايد = وش فيك عصبت .. ( وكأنه زعل ) آآآآ .. ادري اني مثقل عليك .. ومانت ملزوم توصلني لخوالي ولا غيرهم .. آآآآ ... كثر خيرك انك وديتني الرياض اجيب شهادتي وهذا اهم شي .. خلاص مب لازم ازورهم

عمر بألم = ماني بحاجتك لا انت ولا نادر ..

رايد مستغرب = نادر !!! مين نادر ؟

ابتسمت بسخرية

عمر = خيال

التفتت لرايد وانا احس منتفخ .. شوي وتطلع دموعي منقهر من نفسي ومن غبائي .. اضحك على نفسي ..

عمر بعصبية = رح لخوالك ... تبيني اوصلك وصلتك .. عطني عنوانهم بس ؟

فاتح فمه ويطالعني مستغرب

رايد = وش فيك عمر ومين نادر هذا اول مرة اسمع اسمه

التفتت اطالع الطريق وصارخت فيه

عمر = خيااااااااااااال اقولك خياااااال مثلك

رايد مستغرب = خيال مثلي ( وشفته بطرف عيني يطالع الدريشة بجنبه ويرجع يطالعني منهبل وهو يشر على نفسه ) انا خيال ؟

سكتت وسكت رايد وهو يعقد يديه قدام صدره ويطالع قدام بصمت


* رايد *


انا خيال .. قدامه ويقول عني خيال .. وبعدين وش نادر هذا .. لا يكون خيال ثاني معنا بالسيارة

وش فيه تغير وجهه .. وليه يصارخ علي .. ادري اني عاله عليه .. بس وش اسوي مالي غيره .. ثلاث اسابيع حاولت اعتمد على نفسي بس ذقت المر ذقت الجوع ذقت الخوف ذقت الاهانة .. كله عشان ماثقل عليه يكفيه اللي جاه بسببي وفوق هذا شرالي ملابس جديدة ووصلني الرياض بس شكلي مسختها معه .. كان المفروض احترم نفسي من البداية وابلع لساني .. هو ماهو ملزوم بي .. كثر خيره انه ضفني من الشارع بس شكلي شفت طيبه معي وتماديت
بس والله ماقصدت شي .. أبي ازور خوالي واقولهم عن مريم يشوفون حل لها ... انا اكتشفت ان مافيني خير

شهور وانا بعيد عن اخواتي يقالي ابعتمد على نفسي وارجعلهم .. ابي خوالي يشوفون حل بس وشلون اروح لهم .. اخذت نفس اهدي نفسي احس عيوني تتحارق احس تبي تنزل دموعي الا شوي .. مابي ابكي قدام عمر ويحسب اني زعلان انه عيا يوديني

هو له حق يعيي .. انا اللي مالي حق اطلب

قعدت اطالع المباني واللوحات واتلفت وكل شوي اخذ نفس احاول دموعي ماتنزل .. لين اخيرا قدرت اسيطر عليها

سمعت عمر يتنهد .. وبعدها مسح شعره بيده بضيق

فجأة سمعته يسألني بهمس

عمر = وين عنوان .. خوالك ؟

التفتت للدريشة اللي بجنبي وهمست

رايد = خلاص مابي اروح

فجأة ما حسيت الا بعمر يضربني على راسي من ورا بمزح

عمر = لا يكون زعلت بس .. ما اسمع الا شهاقك ..

التفتت له بسرعة ادافع عن نفسي

رايد = مابكيت

طالع عمر الطريق شوي وبعدها التفت لي مبتسم

عمر = الله اعلم .. انت مايمر يوم الا تصيح .. ابي اعرف انت ليه ماتقوي قلبك .. خلك رجال

انقهرت منه وطالعت قدام بصمت ... ظروفي اقوى مني ..

عمر = وش رايك نرجع لبريدة ؟

ابي خوالي شوي بس ما اقدر اقول له الا

رايد = طيب

المشكلة تلفونهم ماعرفه .. مالي الا اشوف مريم واخذ الرقم منها .. وان شاء الله اقدر اشوفها ..

ذاك اليوم .. يوم كان عمر بالمستشفى حاولت ازورها بس ماقدرت .. ابد ماقدرت .. حتى دانه ماشفتها

تغدينا باحد المطالعم وبعدها طلعنا من الرياض

وانا ساكت طوال الوقت افكر باخواتي .. ماطرا علي الحل اني اكلم خوالي عشان مريم الا يوم دخلت الرياض .. حسيت بأمل يوم شفت ديرتي .. اشتقت لها .. اشتقت لها مرة ... بالرياض ماكان عندي هموم .. ماتفرقنا مثل الحين

ودي نرجع للرياض ونعيش حياتنا براحة وبكرامة

التفتت لعمر ولقيته يسوق وهو سرحان .. تنهدت ومديت يدي وطفيت عن الاغنية اللي مشغلها عمر طوال الطريق .. ابي اكلمه يمكن يلقالي حل

انتبه عمر من سرحانه على سكوت الاغنية والتفتت لي مستغرب

عمر = ليش طفيته ؟

جلست على جنب ملتفت باتجاهه

رايد = عمر ... آآآ .. تتوقع لو اطلب من خوالي ياخذون اخواتي عندهم يوافق عمي ؟

شهق عمر وطير عيونه فيني

عمر = انت تبي تزور خوالك عشان هالغرض

نزلت راسي بحزن

رايد = ماطرا علي اكلمهم عشان اخواتي الا يوم دخلت الرياض ( ورفعت راسي له ) بس خلاص اكلمهم بالتلفون

ابتسم عمر ابتسامة جانبية وعيونه على الطريق وهمس

عمر = هه حسبتك بتروح تزورهم وقلت يمكن .. آآآآ ( وتنهد ) .. ماكنت ادري انك تبي شي منهم ( والتفت لي ) المهم حتى لو كلمتهم عشان خواتك وش تبيهم يسوون مثلا ؟

طالعته مستغرب

رايد = ياخذونهم عندهم بالرياض

عمر = اخواتك بنات لا شرعا ولا قانونا يسمح لهم

تألمت

رايد = ليه ؟

عمر = عمك هو الوصي عليهن بعد ابوك مب خوالك

طالعت قدام متحطم وتنهدت بيأس

رايد = عمي ماكان كذا معنا .. وادري ان خوالي مثله .. كم شهر طيبين وبعدين ينقلبون علينا مثل عمي ... ادري

مد عمر يده ومسك يدي وبيده الثانية ماسك الدركسون ويسوق

عمر = اختك الكبيرة بتتزوج بس المشكلة دانة

التفتت لعمر بقهر

رايد = انت تقهرني الحين

عمر بابتسامة = انا ابيك تعتمد على نفسك بلا خوال بلا هم .. ابيك من الحين تدور على وظيفة وتوقف على رجلك .. ابيك تصير رجال .. مابيك تصيح على كل شي اذا مو عشانك عشان دانة ( ورفع يده ومسح على شعري) انا معك وبجنبك ... خل خوالك على جنب وش تبي فيهم .. ( وابعد يده عن راسي ) اذا رجعنا البيت ادخل مواقع الشركات وسجل .. انا ابعلمك كل شي .. وابخلي الشباب يدورون لك وظيفة بطريقتهم .. وش تبي بعد ( وابتسم )

طالعته ساكت وفضفضت له بحزن

رايد بحزن = بس آآآ ... بس انا من زمان ماشفت اخواتي .. ثلاث اسابيع او اكثر ماشفتهم ( وسكتت شوي اهدي نفسي عن اصيح ) عمر ابي نطلع انا واخواتي بسيارتك مثل ذيك المرة ( ونزلت راسي ) هو صح ضربها وضربني بس والله ماني قادر اصبر

ويوم ماسمعت من عمر رد رفعت راسي اطالعه ولقيته يفكر وهو يطالع قدام ويده على ذقنه .. استغربت بس فوق هذا سألته استاذنه

رايد مستغرب = عمر .. ابي سيارتك اذا رجعنا بريدة ... اذا ماعندك مانع يعني ؟

التفت لي بملامح جادة

عمر = ريّود طلعت مشكلة ثانية

شهقت بخوف .. مشكلة .. انا ناقص مشاكل

رايد بخوف = وش ؟

عمر = لا تروح لاخواتك .. الحارة كلها بكبرها لا تطبها

طيرت عيوني بصدمة

رايد = لييييييييه .. وشلون اشوف اخواتي اجل ؟

عمر = اسمع ... اذا شافك عمك بياخذ الاثبات منك .. تصدق انه مطلع ريحة جدي على هالكرت .. من يوم اخذناه منه وهو بس ناشب بحلق جدي .. هاه وين الكرت .. رايد لقى وظيفة .. تراني ماعرف الا ولد ولدك اذا ضاع الكرت ومن هالكلام .. وانت عاد ماقصرت ضيعت على نفسك ثلاث اسابيع على الفاضي .. لو ماختفيت عنا كان يمديك متوظف الحين ومرجعين الكرت لعمك الخايس

رايد بألم = وهو وش يبي فيه .. ليه مايخليه معي ؟

عمر بسخرية = مستفيد طبعا .. كل شوي اهدي جدي اذا جا معصب منه .. انا مخلي جدي يكذب على عمك ويقوله ان الكرت معك وهو اصلا معي وجدي يعرف انه معي بس بعض الاحيان جدي يعصب علي طفشان من عمك .. فكنا منه ولا تروح للحارة اخاف يشوفك عمك هناك

انحنيت و نزلت راسي بين يدي بقهر

ابي اشوف مريم .. واتطمن ...

حسيت بيد عمر يمسح على ظهري

عمر = دانه اقدر اجيبها لك .. عادتها تلعب بالشارع المغرب وملاحظ لو تغيب ساعات ماحد سأل عنها ..

سكت ومارديت .. ومريم .. كيف اشوفها .. اذكرها تعبانه .. ويشغلونها .. واكيد بالها مشغول علي .. طلعت دموعي غصب عني من القهر .. ودي افجر بعمي ودي افجر بالناس كلهم

كلهم

الا عمر



دخلنا بريدة العصر وانا وعمر كل واحد ساكت وسرحان بافكاره .. مافيه الا صوت الاغنية العالي

التفتت لعمر لما تذكرت اننا ماصلينا الظهر والعصر انا ناويها جمع تقصير لاننا مسافرين .. هذا اللي تعلمته من امي وابوي اذا كنا مسافرين

رايد = عمر ماصلينا

قطبت عمر حواجبه وهمس

عمر بضيق = اصلا نسيتها

رايد = لا انا مانسيتها بس لاننا مسافرين قلت اصلي الظهر مع العصر ( والتفتت قدام اطالع الطريق )

وفاجأني عمر بطلبه

عمر بهمس = رايد ادع لي بالهداية .. على الاقل ادعلي احافظ على صلاتي .. دايم انساها وبعض الاحيان ما انساها بس مااهتم لها .. مدري كأن احد يمسكني

طالعته بصمت .. ايه اشوفه عمر من يوم عرفته اذا قومته للصلاة يعصب علي واضطر اخليه لين يروح وقتها .. واحيان حتى لو ماهو نايم اروح انا للمسجد وهو الى الحين جالس .. مو بس هو حتى خوياه عبد الله ومشعل ومنصور نفس الطينة .. من يوم كنت عندهم بالاستراحة شفت كل انواع المعاصي

نزلت راسي لما تذكرت امي وابوي ... كانوا محافظين .. الاغنية مااسمعها ببيتنا .. ابوي دايم مايطلع للمسجد الا وانا وريان قدامه .. واذا كنا مسافرين مانبدأ سفرنا الا بعمرة وطوال الطريق مانسمع الا احاديث واناشيد

الحين لا .. حفظت الاغاني من كثر ما اسمعها ببيت عمر وسيارته ومع الشباب بالاستراحة .. الدخان تعودت على ريحته .. عرفت كيف يغازلون وكيف يجيبون ارقام البنات .. الكلام الوسخ تعلمته منهم

علموني اللي امي وابوي جاهدوا عشان يبعدوني عنه

التفتت لعمر

رايد = تبي تحافظ على صلاتك عمر .. طف عن الاغاني ( واشرت على مسجل السيارة ) الاغاني حرام

تنهد عمر ومد يده وطفى المسجل وهمس

عمر = اصلا وصلنا

التفتت وشفت اننا ندخل حارة عمر ورجعت التفتت له

رايد = انتم عودتوني على اشياء امي وابوي ابعدوني عنها

وسكتت انتظر رده بس مارد .. يسوق وساكت

رايد = والله انا ماكنت اعرف الاغاني .. عمر يمكن انت تنسى الصلاة لانك داااااايم تسمع اغاني .. مرة قالت لي امي ان الاغاني تميت القلب .. ( والتفتت اطالع الطريق لما حسيت عمر وقف السيارة قدام بيته ورجعت التفت له اكمل كلامي ) قبل انا ما اعرف وش معنى كلام امي وماهتميت لاني اصلا ما اسمع اغاني .. كنت اقول بيني وبين نفسي تميته والا تحييه وش علي انا .. بس يوم عرفتكم وحفظت الاغاني من كثر ماسمعها عندكم احس انا بعد مثلك بديت اهمل صلاتي

التفت عمر لي مقطب حواجبه وساكت

رايد = امي وابوي كانوا ملتزمين .. اذكر ابوي كان بعض الاحيان يأم المصلين بمسجدنا ... وامي بعد اذكرها كانت دايم تعلمني وتعلم اخواني لما كنا صغار ( وحسيت بحرارة بعيوني وسكتت اهد نفسي ) كانت تبعدنا عن كل شي حرام ...

نزلت راسي وسكتت .. بعدك يمه كل اللي ابعدتيني عنه عرفته .. عرفت كل انواع الحرام .. اخذت ملفي و نزلت من السيارة وانا اجاهد دمعتي على ذكرى امي ووقفت احتري عمر يفتح باب بيته

نزل عمر وجا عندي عند الباب .. طلع المفتاح من جيب بنطلونه وهمس لي بدون مايطالعني

عمر = الله يرحم امك وابوك .. محظوظ يارايد انك تتذكر كلام ابوك ( وفتح الباب والتفت لي ) انا ما اعرف ابوي وماعمري شفته ولقرادة حظي ماله صورة عندي


دخلنا البيت وعلى طول دخلت الصاله ولقيتها حوسه .. على حوستها يوم الشباب موجودين .. الاكواب والاكياس وعلب البباسي وغيره

دخل عمر بعدي وشاف الوضع وتأفف متضايق

عمر بضيق = اففففففف مالي نفس انظف هالحوسة ( وتمدد على الكنبة الطويلة بتعب )

التفتت لعمر وملفي بيدي

رايد = ماعليك انا ابنظفه .. بس عمر وين احط ملفي

عمر = رح حطه بغرفتي فوق

رايد = اهاا طيب يله قم ترانا ماصلينا لا الظهر ولا العصر

وطلعت من الصاله .. حطيت ملفي بغرفة عمر ونزلت اصلي بالمجلس

وبعد ماخلصت وانا جالس جا عمر وبدا يصلي



المغرب

جالس بالصاله وكل شوي انعس وانا جالس وعمر يكلم مشعل بالجوال واسمعه يسأله عن جامعته والدكاترة وخرابيطهم



= نايم ؟

رفعت راسي بعد ماغفيت بدون ما احس والتفتت لعمر ببلاهه

رايد = هاه .. لا

عمر = طيب وش رايك نروح لحارة عمك .. يمدي اختك دانه تلعب بالشارع الحين


تنهدت على حظي وحظ اخواتي النحس .. انا ودي اشوف مريم

رايد بحزن = يعني بتجيب دانه هنا

عمر = لا ويييين .. نص ساعة من هنا لهناك .. ابيك انت توقف عند الشارع العام وانا اسرق دانه واطلعها من الحارة واجيبها لك عن عيون عمك

هزيت راسي بايه وقمنا وطلعنا من البيت


نص ساعة ووصلنا قريب الحارة .. وقف عمر السيارة على الشارع العام .. وصار بيننا وبين بداية الحارة شارع تمشي فيه السيارات

عمر = خلك هنا .. الحين اجي

ونزل .. قطع الشارع ودخل الحارة

تنهدت بحزن .. الى متى اشوفهم بالدس .. متى اتوظف واعتمد على نفسي وارجع لاخواتي .. ابي نرجع مثل قبل ..

اخذت عشر دقايق افكر بحالي و احس بيأس واحباط

شفت عمر يطلع من الحارة وابتسمت لما شفت دانه معه .. لافه رجليها حولين خصر عمر ويديها حولين رقبته و اشوف عمر يتكلم معها

قطعوا الشارع و قربوا عند السيارة .. نزلت بسرعة ووقفت قدام عمر قبل تنتبه لي دانه ..

عمر بابتسامة = هاه شوفي من فيه

حطيت يدي على ظهرها وانا الى الحين احس بقهر من عمايل عمي ... حسبي الله عليه

التفتت دانة لي وشهقت بقوة و بشوق وصاحت

دانة = لااااايد

وتركت عمر وارتمت علي .. شلتها وضميتها بقوة وانا اجاهد دموعي

رايد بصوت باكي = دانة

لفت رجليها على خصري ويديها على رقبتي وهي تضمني بقوة وتسألني وينك .. مدري ليه احسها تلومني

خذلتها وخذلت مريم ... شهوووووور شهور وانا الى الحين على حالي

غطيت وجهي برقبتها اغطي دموعي عن عمر وراس دانة الصغير على كتفي

حسيت بيد عمر على ظهري ويده الثانية يمسح على ظهر دانه

عمر = اركبوا السيارة احسن

ركبت السيارة بمكان الراكب ودانة بحظني .. وكل ماحبيتها على خدها تسوي مثلي وتحبني على خدي

وعمر مدخل راسه مع دريشة السواق ويطالعنا مبتسم

طالعت دااانه بقهر

رايد = دانة وشلونك ؟

بس دانة تعلمني متحمسة وش سوت ووش لعبت وما اسمع الا اسم ليان على لسانها

تأملتها وانا مااقدر اشوفها بوضوح من الدموع المتجمعه بعيوني .. مابي ابكي .. بس ما اقدر امسك اعصابي .. منقهر .. مغبوووون ...

حسيت دانة تتكلم بسرعة كأنها تبي تسرد لي سوالفها سريع سريع قبل اروح

انتبهت على بنطلونها وهالمرة مو البني .. كأنه لبس جديد اول مرة اشوفه عليها

صح ليه ما ارسل رساله لمريم اطمنها علي .. مسحت عيوني بذراعي بقوة والتفتت لعمر ..

تنحنحت اعدل صوتي

رايد بحزن = احم .. عمر عندك ورقة وقلم ابكتب رساله لاختي الكبيرة وارسله من دانة

طالعني عمر شوي وبعدها رد علي وهو يشر بعيونه على المرتبة اللي ورا

عمر = على خبري فيه دفتر ورا ... مدري عنه .. لي شهر مارحت الجامعة .. ومادري الدفتر باقي حي والا لا

وطلع راسه واعتدل واقف وفتح الباب الخلفي

التفتت ورا بس دانه مسكت وجهي بيديها الثنتين تبيني اعطيها وجه وانتبهلها

وعيت تسكت بعض كلامها فهمته وبعضه ما افهمه

عطاني عمر دفتره وقلم

عمر = رايد .. آآآ .. يوم كنت مختفي .. آآآآ .. عمتي قالت لاختك اننا ندور عليك

طالعته مستغرب

عمر = آآآ .. اقصد يعني لو تذكر لها انك رجعت لبيتي .. لان عمتي قالت ان اختك شالت همك وخايفة عليك .( وطلع جواله من جيب بنطلونه وكمل ) انا ابروح اكلم شوي

وراح قدام السيارة وجللس على الكبوت وهو يضغط جواله

تنهدت و التفتت لدانة اعلمها

رايد = دانة ابعطيك ورقة تعطينها مريم .. عطيها مريم بس .. لا تعطينها احد ثاني .. خلاص

دانة = ايه حلاث .. ليان لاحت .....

وقعدت تبربر تكمل سوالفها

جلست دانة بين المرتبين وهي كأنها بالعه مسجل عيت تسكت

وقعدت اكتب

( مريم انا رايد انا عند بيت خويي عمر اللي قلت لك عليه قبل
مريم ابشرك جبت ملفي من مدرستي بالرياض ادري اني تأخرت بس ماكان عندي كرت العايلة .. ماوصلني كرت العايلة الا من يومين بس
ملفك ماقدرت اجيبه .. مريم تكفين انا ماقدر اجي بيت عمي عشان عمي ماياخذ مني الكرت .. ابيك تتصلين على الرقم هذا ( وكتبت رقم بيت عمر ) اتصلي الساعة 2 او 3 اخر الليل .. اظنه وقت مناسب لك ومناسب لي انا بعد
تكفين حاولي تتصلين ابي اكلمك واخذ اخبارك حاولي تتصلين اليوم )

قريت الورقة عدة مرات احاول اشوف لا يكون شي ناسيه ماذكرته .. ثنيت الورقة عدة ثنيات وحشرتها بجيب بنطلون دانة وسديت فمها بيدي اسكتها عشان تسمعني

رايد = دانة الورقة عطيها مريم .. على طول تدخلين البيت وتعطينها مريم .. خلاص

ردت علي ويدي على فمها

دانة = حلاث

ابعدت يدي عن فمها وضميتها .. الله اعلم متى اشوفها مرة ثانية ... احس بيأس واحباط .. اخاف مالقى وظيفة .. قهر .. طردني من البيت وحرمني من اخواتي وسكتت والحين حتى الحارة ما اقدر ادخلها .. كله خوف ياخذ الكرت مني ... الى متى ابخاف منه

انا خواف .. مادافعت عن مريم لما كان عمي يضربها قدامي واكيد ما راح اخذ الكرت منه مرة ثانية اذا سحبه مني .. عمر معه حق .. عمر يعرف اني خواف .. ياليتني مت بدل ريان .. يمكن ريان يصير احسن مني

نزلت من السيارة وانا شايل دانة ورحت لعمر اللي جالس على الكبوت ويتفرج على السيارات

وقفت قدامه

عمر باستهبال = انتهت الزيارة ؟ ( ونزل عن الكبوت )

عطيته دانه وانا كاره نفسي .. ودي افجر بالعالم كلها

تشبثت دانه بطريقتها المعروفة على عمر .. وكل ماحبها رجعت له الحبه على خده

قطع عمر الشارع وهو يكلم دانة ودخل الحارة وعيني عليهم لين اختفوا عن نظري

قهر الغريب يجيب لك اختك يارايد ... فوق ما انت مطرود تخاف منه

هين ياعمي هين .. خلني اتوظف واوقف على رجلي .. ان ماحرقت قلبك مثل ماحرت قلبي ما اكون رايد

ركبت السيارة وبكيت افرغ شوي من القهر اللي احس فيه قبل يجي عمر ويهاوشني

عمر مو فاهم علي .. مو حاس فيني .. انا مقهور مقهور