M i r a i ™ مِيـرآي

من منبري هذا احب اشكر اكلة المسخن الفلسطيني انها موجودة في حياتنا و حقيقي انا كيفت عليها قطمة قطمة وان شاء الله مش اول ولا اخر تعامل بيننا .. كل الحب

كل مرة بلاقي فيها الدنيا بتضيق علينا هنا في مصر من كل ناحية بفتكر اللي حصل يوم 14 أغسطس 2013 و بلاقي اننا بنسد دين كبير اوي اوي علينا ، يا عالم هيخلص امتا؟!.
رحمتك و لُطفك علي عبادك الضعفاء الجاهلين يارب.

امبارح المغرب صادفني فديو في الفيسبوك لعجوز عمره 80 سنة وحولين منه 4 اشخاص 2 ستات و 2 رجاله أعمارهم غالباً فوق ال40 قبل ما اقراء عنوان الفديو او ياجيني فضول افتح الصوت لقيت واحد من الإثنين رجاله بيضربوا العجوز و بيزيحه بيده ومعاه الثاني ، العجوز يبقا اب الأربعة دول .. يب أبوهم.
صاحب الفديو كاتب العنوان انه استغاثة من جيران العجوز اللي أولاده بيضربوه و مبهدلينه وخلال الفديو كانت الستات بتضربه بس أقل من الإثنين الثانيين ولما فتحت الصوت لقيت كمية مسبات لا توصف موجهه للعجوز ، الفديو صعب جداً جداً مش علشان انه 4 أشخاص حولين عجوز ضعيف ، صعب في تخيل كمية الكراهية و الحقد و الغل اللي غرسها العجوز دا في أولاده.
صعب في تخيل الأمور و المشاكل و الطريقة الغلط اللي تربو عليها انها تطلع 4 مش واحد ولا اثنين وإنما 4 مجتمعين على كم المشاعر اللي متعششه كره و غضب بالشكل ده.
صعب اوي في انك متأكد انه نفس الاربعة دول هيحصل فيهم نفس اللي عملوه بالظبط و اي كان السبب هتلف الساقيه وتختارهم.
صعب في انك تحكم اي من الطرفين على حق ، لا انت عارف الأب دا عمل ايه في حياته و لا انت عارف الناس دي شافت ايه في حياتها علشان يوم ما تقسى يكون أول من يقسو عليه هو اللي خلفهم.

نفس اليوم و بعدها بكم ساعه بس شفت فديو لبرنامج فيه مداخله لإبن الفنان المصري احمد فهمي ، فالفكره انه يشوف والده ووالدته علي البرنامج اللي بيكبر العمر و يقول هما اتغيرو ولا لا.
ولأن مش هعرف أوصف لكم كم المشاعر اللي كانت في الولد جبت الفديو هنا

الفديو دا كل شخص شافه نظرته بتختلف من شخص للثاني ولكن شخصياً شفته 3 مرات وفي كل مره عيطت بشكل تلقائي و معرفتش اتحكم في دموعي.
فكرة انه اب وام يغرسو كل الحب دا في طفل ويكبر لحد سن 18 سنه و هو بيعبر بمنتهى الحنان و الإحساس الرهيب دا، دا دليل قوي اوي انه نكون اب او ام مش سهل بتاتاً.
فكرة انه لسه في أهل بيعرفو يطلعو شخصيات سويه نفسياً خلال المجتمع اللي احنا فيه دا يعتبر إنجاز لا يمر مرور الكرام.
المذيعه لما بتسأل الولد وتقوله ايه احلا حاجه في بابا؟!
فيقولها بدون تفكير هو كله حلو و مفيهوش حاجه وحشة ، معنى كدا انه قدامنا اب عارف ازاي يتعامل جوا بيته و يكون معني اب.

مشفتش الفديو بنظره انه ممثل بتاتاً كد ما شفت قدامي بيت مكون من ام واب عرفو يربو ابنهم بطريقة وقت ما يتكلم عنهم يحسس اللي قدامه انهم اعظم انتصاراتة.


للأمانة بين الفديو الأول والثاني فرق رهيب لا يوصف خلاني شخصياً أعيد النظر للمره المليون في اختيارات حياتي الشخصية المنهارة في عالم الواقع.
على فكرة الأب والأم مش مجرد علاقات هم كل الحياة .. سوا كانو في حياتهم او بعدها ، هم الشخصين الوحيدين اللي يقدرو يبنوا حياتك او يهدموها بالمعنى الحرفي و كله يرجع لاسلوبهم لأنه اسلوبهم هيتورث لك وانت هتورثه لأولادك.

اظن الحروف صعب تعبر اللي افكر فيه وكم الاسئلة الرهيبة اللي عندي فخلينا نحط نقطة وننهي الكلام.