••
العودة   منتدى وندر لاند > القصص والروايات > روايات عامية


يمسح الدمع بشكوى *مكتملة*

روايات عامية


إضافة رد
 
أدوات الموضوع انواع عرض الموضوع
قديم 08-13-2020, 03:28 PM   #11
JAN
مِرأة وٓاحدة … إنعِكاسات شٓتى !

الصورة الرمزية JAN
JAN غير متواجد حالياً

بيانات اضافيه [ + ]
 رقم العضوية : 115
 تاريخ التسجيل :  Mar 2020
 العمر : 23
 المشاركات : 9,849 [ + ]
 التقييم :  23316
لوني المفضل : Black
شكراً: 0
تم شكره 6 مرة في 6 مشاركة

مشاهدة أوسمتي





* الجـــزء الثامن *






















* عمر *



الاحد .. في الجامعة



دخلت الكفتريا وانا متضايق من امتحاني اليوم ... مدري وش فيني امتحاناتي كل يوم خايسة



جلست على الطاولة من دون مااطلب وحطيت يدي على خدي ... البارح طوال الليل احاول اذاكر بس التفكير برايد وحالته اشغلتني



يقول عمه باع بيتهم ... واخذ راتب ابوهم ... وفوق هذا مانعه من الدراسة ... ليش عمه مانعه من الدراسة عشان المصروف والا فيه سبب ثاني ...



والمشكلة الحين يبي وظيفة ... هو صح محتاج للوظيفة بس مين بيوظف بزر بالله ...



انتبهت لنفسي .. انا ليش افكر فيه ومشغل بالي ... كيفه يدبر عمره ... قمت وطلبت قهوة وجلست على الطاولة انتظر مشعل



ربع ساعة وجا مشعل ومنصور عندي بالكفتريا ... وبعد السلام والسؤال ... التفت منصور لي



منصور = وينك امس اختفيت ؟



عمر = رحت للبيت اذاكر ... لو اذاكر عندكم بالاستراحة عز الله ما ذاكرت شي



مشعل باستهزاء = عاد يقالك حليت زين بالامتحان ؟



عمر = ههههههههههه لا تبي الصدق ماحليت هههههههههههههههه



مشعل = ايه انا ادري هههههههههه



منصور = امس طوال الوقت اتصل عليك ... ليه ماترد علي



التفتت لمنصور



عمر = اشوفك تتصل بس مالي نفس ارد ( وتنهدت بحزن ) بيتي كئيب ... تتعب نفسيتي اذا دخلت البيت ... موحش ماني قادر اصبر



منصور = الله يعينك ...



طالعت منصور



عمر = ليه وش كنت تبي امس متصل ؟



منصور = رايد



قطبت حواجبي مستغرب



عمر = وش فيه ؟



منصور = البارح جاني رايد يبي سيارتي معطيه نايف 200 ريال عشان يجيب لهم الهبال اللي يشربونه ...



طيرت عيوني



عمر مصدوم = صاحي هذا والا مجنون ... ياخي نايف وسعد بينكبوننا ... الهيئة شاكه باستراحتنا .. بدل مايخففون الشراب يرسل بزر محتاج .. ياخي ودي اطرد نايف وسعد عنا قبل نتورط معهم



مشعل = عمر نبيك تنتبه لرايد



التفتت لمشعل مستغرب



عمر = كيف يعني انتبهله ؟



مشعل = انت معه اربع وعشرين ساعة ... ونخاف يجونه نايف وسعد من ورانا ويرسلونه يجيب لهم



عمر = وليه ماتنتبهله انت ... مين اللي جابه للاستراحة انا والا انت



مشعل = انا ... بس انت معه بالاستراحة طوال اليوم ... انا عندي اهلي اروح لهم



عصبت على مشعل



عمر بعصبية = وش قصدك ... تقصد انا مالي اهل ... شكلك شايف نفسك علينا



طالعوا بعض منصور ومشعل مستغربين والتفتوا لي مرة ثانية



مشعل مستغرب = وش فيك عمر ... ماهو هذا قصدي ... انا اقصد انك قليل تروح لبيتكم



التفتت عنه متضايق مدري وش فيني عصبت عليه ... حسيت بغيرة شوي يوم قال اهلي ...



منصور = وش فيك عمر شبيت على مشعل ...



نزلت راسي وهمست



عمر بحزن = مافيني شي ( ورفعت راسي اغير الموضوع ) المهم مافيه وظيفة تصلح لرايد ... الولد يبي يتوظف ويعتمد على نفسه



منصور = ومن بيوظف واحد توه تخرج من المتوسط ... لعب بزارين هو



عمر = قلتله ... بس الولد مثل مانت شايف محتاج وماعنده حتى ريال واحد .. ماتعرفون واسطة شي ؟



سكتنا شوي نفكر وبعدها رد مشعل علي بحماس



مشعل بفرح = صح تعااااالوا .. خله يقدم على الضمان الاجتماعي ... يصرفون له راتب وبالراحة بعد



عمر مستغرب = الضماان الاجتماعي ؟



منصور بفرح = صح جبتها ... من شروط الضمان الاجتماعي يصرفون للولد لين يجي عمره 18 وللبنت لين تتزوج ( والتفت لي ) خله يجيب اوراقه الثبوتيه



ابتسمت



عمر بابتسامة = يعني رايد واخواته كل واحد يصير له راتب ... اجل رايد بيصير اغنى منا ههههههههههه ... ( والتفتت لمشعل ) انت بنفس حارتهم علمني وش كبر اخواته عشان اخذ رايد للضمان الاجتماعي يقدم عليهم



مشعل وهو يفكر = اممممم شفت اخته دانه صغيره عمرها 4 او 5 سنين .. واخته الكبيرة مادري كم عمرها بالضبط بس ماهي متزوجة ... كلهم ينطبق عليهم شروط الضمان



منصور = خله يجيب اوراقه الثبوتيه وشهادة وفاة ابوه وامه على ما اعتقد



جلسنا شوي نسولف وبعدها كل واحد راح لمحاظراته







الساعة 12 الظهر



طلعت من الجامعة ورحت لبيتي عشان ابدل



وصلت عند بيتي ولقيت سيارة عمي واقفة قدام البيت ... ابتسمت امي وعمي هنا



دخلت وفعلا لقيت البيت فيه حركة ولمباته والعه وريحة امي اللي اميزها داعبة انفي



سكرت الباب بصوت عالي عشان امي وعمي يعرفون اني جيت



ومثل ماتوقعت طلعت امي من المطبخ اول ماسمعت صوت الباب



امي = هلا بوليدي عمر ... جيت ؟



عمر = هلا فيك ( وقربت عندها وسلمت على راسها ) يمه مايحتاج تتعبين نفسك البيت والله نظيف ... اصلا مافيه احد يوسخه



امي = البيت اتركه اسبوعين ارجع القاه على حاله بس مغبر ... وسريرك على ترتيبي له ... ماتعلمني انت وين تنام ؟



عمر = انام باستراحة الشـ ( وسكتت شوي يوم شفت اللي طلع من المطبخ والتفتت لامي ماسك اعصابي ) هذا وش جابه هنا ( واشرت على معاذ اللي طلع من المطبخ ومعه موزة ياكلها )



التفتت لمعاذ وصارخت عليه



عمر معصب = هييييه انت وش دخلك هنا



رفع معاذ يده يغيضني



معاذ = هاااااي ( وراح للصاله متجاهل كلامي )



مسكت امي ذراعي



امي = معاذ هو اللي جايبني



التفتت لامي معصب



عمر بعصبية = ومالقيتي الا هذا يوصلك



ورحت للصاله وشفت معاذوووه جالس على الكنب و معه الريموت ويغير بالقنوات



عمر = هييييه انت تحسب نفسك ببيتكم ... مكانك مجلس الرجال وماتتعداه



معاذ وهو ياكل = لا يكون لك اخوات بالبيت وانا مدري ...



عضيت على شفايفي منقهر ... فعلا مالي اخوات ولا زوجة يخلون هالاشكال تحترم نفسها وماتدخل بيوت الناس



عمر بصراخ = خلاص وصلت امي اقعد بالمجلس لين تخلص والا رح لبيت جدي ياخي ... لا تقعد تتمشى ببيتي من غرفة لغرفة



ضحك معاذ يغيضني



معاذ = ههههههههاااي حلوووووة بس لا تعيدها



عصبت اكثر وهجمت عليه وعطيته بوكس بردت كبدي شوي ... مسك معاذ يديني الثنتين وجلسني على الكنبه غصب وجلس علي وردلي البوكس



جت امي وهي تصارخ علينا باسامينا



لفيت يديني حولين خصر معاذ ودفعته عني وطرحته بالارض وطحت معه على الارض فوقه ... اعتدلت جالس على بطنه بس سمعت صرخت امي علي



امي بصراخ = عممممممممممممر بس خلااااص قم عنه ( وحسيت بضربة امي الخفيفة على ظهري ) قم عنه ( ومسكتت ذراعي تجرني ) بس انت واياه مالي حيل افرقكم



قمت عن معاذ عشان امي بس



عمر = والله لولا امي لوريتك شي ماشفته



قام معاذ وجا بيرد علي بس صارخت علينا امي مرة ثانية



امي معصبه = ماكأنكم عيال عم ... خلني اسمع صوت واحد منكم



وراحت للمطبخ معصبة



طالعنا انا ومعاذ بعض بحقد .. وجلس كل واحد على الكنب بعيد عن الثاني



حطيت يدي على فمي لما حسيت بدم ببرطمي .. فجأة حذف معاذ علي قرشت الموزة اللي كان ياكلها وطاحت بحظني ... اخذتها وحذفتها عليه .. رجع معاذ وحذفها علي



فجأة دخلت علينا امي واخذت قرشت الموزة من يدي



امي = اللي بالابتدائي اعقل منكم



وراحت وهي الى الحين معصبة ... طالعت امي وشفتها متوجهه للدور الفوقي قمت واخذت شماغي الطايح بالارض بسبب الهوشة بس انتبهت ان الشماغ لمعاذوه رميت الشماغ بعيد ورحت للشماغ الثاني الطايح بالارض ورحت ورا امي فوق



عمر = يمه ...



التفتت لي امي ووقفت



عمر = يمه ابروح لجدي تروحين معي احتريك ؟



امي = لا ... ابروح الحين لبيتي ... عمك مسافر وبكرة عندي موعد بالمستشفى وابي ارتاح شوي قبل اروح للموعد



عمر = ليه يمه سلامات



ابتسمت امي وسكتت شوي وبعدها ردت



امي بابتسامة = مواعيد عادية وانا امك ...



وراحت ... وقفت مستغرب اطالعها وهي رايحة ... مافهمت كيف يعني مواعيد عادية



ربع ساعة وطلعت امي والزفت اللي وصلها رايحين لعنيزة



رحت للمطبخ واخذت كيسه كبيرة وحطيت كالعادة كل الاغراض اللي بالثلاجة اللي تجيبهم امي معها عشاني



من يوم دخل رايد الاستراحة قضى على كل اللي بالثلاجة خلال يومين بس



ياكل واجد وفوق هذا ماهو مبين عليه ... عصاليك شوي ويختفي



دخلت الاستراحة وانا احط يدي على جبهتي ... مدري وش فيني اليوم احس حرارتي مرتفعه



دخلت المطبخ ولقيت رايد فاتح الثلاجة وماسك بطنه



واول ماشافني فرح .. او بالاصح اول ماشاف اللي بيدي فرح



جا واخذ الكيس مني وفتحه



رايد = جوعااااااااااااااااااااان مرة



عمر = وانت اصلا متى قلت ماني جوعان ... من يوم عرفتك وهذي كلمتك



وطلعت من المطبخ ورحت لغرفة التلفزيون وجلست على الكنبه تعبان



تبعني رايد ومعه الكيس وجلس على الارض وبدا ياكل من الفواكه



عمر = هيييييييييييييه انت ود الكيس للثلاجة وخذ منها اللي تبي ... مو تجيب الكيسه كلها هنا



رايد = مافيه غدا جوعان .. اليوم مافطرت ولا تغديت



عمر = تعشيت امس مع الشباب ؟



رايد = ايه



عمر = خلاص يكفي اجل .. المهم رايد انت تقول تبي وظيفة صح ؟



التفت لي رايد بلهفة



رايد = ايه ابي



عمر = يقولون الضمان الاجتماعي يصرف لك راتب لين يوصل عمرك 18 سنة ولاخواتك لين يتزوجن



قام رايد فرحان وجا عندي



رايد بفرح = والله ... يعني بيصير لي راتب بدون ما اشتغل



عمر = ايه بس لازم كرت العايلة ... وانت ماجبته لي يوم طلبته منك



ارتبك رايد شوي ونزل راسه وسكت



عمر مستغرب = وش فيك ...



رفع رايد راسه والتفت لي



رايد بزعل = عمي يمكن يعيي يعطيني كرت العايلة حقنا



رفعت حاجب واحد



عمر = الحمد الله والشكر مب على كيفه ( وقمت واقف ) انا ابروح لجدي الحين قم معي اوصلك لبيتكم تاخذ اوراقك ... قم يله تأخرت عن جدي يحتروني





طلعنا من الاستراحة ورحنا لحارة جدي ... وطوال الطريق وانا افكر كيف اكلم جدي عن موضوع الزواج ... اخاف يعيي علي لين اتخرج ... باقي لي ثلاث سنين على التخرج ماني قادر اتحمل الوحدة ثلاث سنين



دخلت الحارة بالسيارة وانا افكر اقول لعمتي مها تكلم جدي والا اكلم جدتي احسن ... والا اكلم امي اشوف رايها اول وبعدين اكلم جدتي



= هذي دانه



انتبهت من سرحاني على كلمة رايد والتفتت له مستغرب



لقيته يفتح الدريشة وطلع راسه وصاح



رايد = دااااااااااااااااااانه ( والتفت لي ) وقف وقف ابنزل



وقفت بسرعة بنص الحارة ونزل الاخ على طول



عمر = هييييه وش فيك



بس مارد علي .. ركض متوجه لبنت صغيرة تبكي



عمر بهمس = وش فيه هذا انجن



مشيت بالسيارة ووقفتها قدام بيت جدي ... نزلت وتوجهت لرايد والبنت الصغيرة اللي شايلها وقربت عندهم



عمر = مين هذي ... اختك ؟



رايد = ايه هذي اختي دانه ( والتفت لها ) وش مطلعك الظهر وليش تبكين



تكلمت دانه وهي تبكي بس ماميزت من كلامها شي



عمر = وش تقول ... وش فيها ؟



رايد بقهر = تدور فلوس ضاعت منها .. تقول عمتي مرسلتها للدكان بس ضيعت الفلوس بالشارع



دانه وهي تبكي = انا خايفة تضربني ( وغطت وجهها برقبة اخوها تبكي )



راح رايد يتلفت ويدور الفلوس تحت السيارات وهو شايل دانه



حطيت يدي على جبهتي دايخ من حرارة الشمس ... مدري وش فيني اليوم تعبان



رحت لرايد بملل



عمر = وعمتكم مالقت احد ترسله الا اختك



التفت رايد لي



رايد بحزن = ماشفت شي



عمر = قلها وش تبي عمتكم من الدكان ؟



سألها رايد نفس سؤالي



دانه وهي تبكي = حليب



طلعت من جيبي قيمة الحليب ومديته على رايد



عمر = رح هات من الدكان حليب وعطني دانه لين تجي



اخذ رايد الفلوس وعطاني دانه وراح يركض للدكان



شلت دانه بين يدي ... وابتسمت هذي اول مرة اشيل بنت صغيرة ... حبيتها على خدها ... كم قالوا عمرها ... صح تذكرت اربع سنين .. تأملتها وانا ابتسم .. شعرها قصير وناعم بس واضح انه مبهذل شوي



رحت لسيارتي وركبتها ودانه معي



عمر بابتسامة = خلاص لا تبكين الحين يجي رايد ومعه حليب تعطينها عمتك



طالعتني دانة بعيون دامعه وساكته .. تشبه رايد شوي ومعصلكه مثله ... تحسست اكتافها وظهرها بيدي ... ياربي وش هذا .. البنت عظام .. احس بمفاصل عظامها شوي وتتقطع .. مثل اخوها بالضبط .. رايد احس بعظامه اذا لمسته



عمر = وانتي تبين شي من الدكان ؟



دانة = انا جوعانه



رفعت حواجبي ... وش قصتهم هذولي مع الجوع



عمر مستغرب = ليش ماكلتي شي ؟



دانه = اكلت شوي بس ( واشرت بيدها ) بندر شرالي من المدرسة



عمر = مين بندر ؟



سكتت دانه وماردت علي



رفعت راسي وطالعت بيت عم رايد ... جيران جدي ما اعرفهم زين ... بس كأني مرة سمعت جدي وهو يتكلم عن احد جيرانه وكأني سمعته يقول ابو بندر بس وقتها ماهتميت



فجأة فتح رايد الباب علينا



رايد = يله دانه روحي للبيت ... ولا تطلعين مرة ثانية لحالك عشان ماتضيعين



نزّلت دانه من الباب اللي عندي وراحت لرايد واخذت الكيس منه وتوجهت لبيتهم



نزلت وقربت عند رايد



عمر = عمك وش يقاله ابو من ؟



رايد = ابو بندر .؟



عمر = ووش كبره بندر ؟



رايد = برابع ابتدائي



عمر = طيب يله رح هات كرت العايلة حقكم عشان نروح للضمان الاجتماعي تقدم عندهم .. وانا ابروح لجدي الحين



ورحت متوجه لبيت جدي ... التفتت على رايد قبل ادخل البيت ولقيته يتسلق جدار بيتهم



معقول عمهم حارمهم حتى من الاكل .. ياخذ فلوسهم ويبيع بيتهم نقول تحصل كثير اما يمنعهم من الاكل مو معقول مايدخل العقل ابد ... ودي اسأل عمتي مها وش قصة هالعايلة



دخلت بيت جدي ولقيتهم يحتروني على الغدا



مها = اخيييييييييييييرا شرفت ... ليش تأخرت



رحت وسلمت على جدي وجدتي وانا احس براسي يعورني وجلست بتعب



عمر = مريت بيتي شوي وجيت





بعد الغدا كل واحد راح لغرفته يقيل ... رحت فوق لغرفة مها وفتحت الباب عليها على طول ولقيتها جالسة على سريرها و تطقطق بالاب توب



عمر = مها ( وجلست بجنبها على سريرها ) وانا داخل الحارة شفت بنت صغيرة تبكي اسمها دانه تعرفينها ؟



التفتت مها لي



مها مستغربة = دانه ! ... ايه هذي ياعمري عليها ساكنها مع عمها الكلب ... بس ليش تبكي ؟ وهي بعدها بالشارع ؟



عمر = لا دخلت بيتهم



مها مستغربة = ليه تبكي ؟



عمر = مدري بالضبط بس تقول مضيعة فلوس عطتها عمتها تجيب لها اغراض من الدكان ... مها انتي تعرفينها بالضبط



مها = دانه واخوانها يكسرون خاطري انقهر لما اسمع حالتهم ... هذا الله يسلمك بنتين وولد جوا عند عمهم بعد ماتوفى ابوهم وامهم ... بس الله لا يوفقه عمهم بخيل عليهم وعمتهم بعد قشرا معهم ... هذي البنت الكبيرة صايرة خدامه عندهم ودانه مهملينها حسبي الله عليهم والولد اسمه رايد ... ابوي امس جا معصب على ابو بندر حسبي الله عليه



عمر مستغرب = ليه ؟



مها = ابوي يقول الولد ضايع مايدرون وينه



رفعت حواجبي



عمر = كيف يعني ضايع



مها = مدري بالضبط بس ابوي يقول عمه طارده والحين الولد له اسبوعين مارجع البيت



سكتت افكر اقول لجدي ان رايد معنا بالاستراحة والا اسكت



عمر = طيب انا قبل شوي كلمت البنت هذي اللي قلتلك عليها اللي اسمها دانه ... تقول انها جوعانه وش قـ



فجأة صارخت مها علي ووقفت



مها = البنت جوعانه وانت جالس عندي تسولف



عمر = وش تبيني اسوي اجل



مها معصبة = كان جبتها عندنا شوي نعطيها ... تجوز عليها الصدقة هذي ... وينهي بالشارع هي الحين ؟



مسكت يد مها وجلستها



عمر = البنت دخلت البيت خلاص ..



مها بحزن = حسبي الله على مرة عمهم قشرا معهم ... اسمع جاراتنا اذا كانوا عندنا يعلمن امي يقولن ان مرة عمهم مبهذلتهم ... بس المشكلة ماحد يقدر يتدخل



هزيت راسي باية وقمت وطلعت من البيت



لقيت رايد واقف يحتريني عند سيارتي ... فتحت السيارة وركبتها وركب رايد وهو يشاهق



سألته من دون مالتفت له لاني عارف من مشاهقته انه يبكي



عمر = وش فيك بعد ؟



رايد وهو يبكي = اختي تقول عمي عيا يعطيها كرت العايلة حقنا .. قالت له اني احتاجه قام وعطاها صورة من الكرت ( ومد لي ورقة )



اخذت الورقة ولقيتها صورة من بطاقة عايلة



تحت اسم عزام فايز



وبالجدول مكتوب بالترتيب

مريم

رايد

دانه



عمر = اسم ابوك عزام فايز



رايد بصوت باكي = ايه ... وشلون الحين ... عادي يعطوني راتب بالصورة هذي



عمر = مارحت لعمك تطلب الاصل منه



رايد = لا مابيه يشوفني ... خايف منه



عمر = طيب هو ليه معيي يعطيكم كرت العايلة حقكم



رايد = سألت اختي بس تقول ماتدري



التفتت له ومديت الورقة عليه



عمر = الصورة ماتنفعنا بشي ... الدوائر الحكومية ماتعترف بالصورة بدون الاصل



زاد بكاه وسكتت عنه ومشينا متوجهين للاستراحة ورايد طوال اليوم وهو يبكي ويمسح دموعه بيده



هالعم هذا لازم يوقف عند حده ... بس وشلون نتدخل بينهم ... مافيه الا رايد يقدر يوقفه عند حده س مشكلته بزر ويخاف منه



اخته الكبيرة نسيت اشوف بالورقة تاريخ ميلادها واشوف وش كبرها .. بس مرة قالي رايد انها مجنونة او حاجة زي كذا



شكل مافيه الا رايد يقدر ياخذ حقه بيده



بس لحظة ليه عمهم معيي يعطيهم كرت العايلة اكيد فيه إن ...



شهقت ... صح لا يكون ... آآآآ



التفتت لرايد وطلبت من الورقة وعطانياها



رايد بصوت باكي = وش تبي فيها الحين ... ما اقدر اسوي شي ومعي الصورة بس



سكتت عنه و حطيت الورقة بدرج السيارة



ابي اتأكد من شي وارد عليه بعدين







بالليل قمت من النوم منزعج من ازعاج الشباب واغانيهم .. طلعت جوالي اشوف الساعة



11 بالليل .... اففففف نمت الظهر وماصحيت الا الحين



جلست وانا احس بتعب وحرارتي مرتفعه .. و بصعوبة قمت وطلعت من غرفة التلفزيون ولقيت مجموعة من الشباب بالحوش مسوين حلقة و يغنون



تلفتت ادور رايد ... الغبي ماقومني وهو يشوفني طولت بالنوم .. مالقيت رايد بالحوش ورحت للطبخ .. متأكد اني راح القاه هناك



دخلت المطبخ ولقيت منصور



منصور = صح النوم ..



مشيت وجلست على كرسي بالمطبخ



عمر بتعب = منصور عندك بندول ... مصدع



منصور = وش فيك ( وحط يده على جبهتي ) حرارتك مرتفعة



هزيت راسي بايه ورحت اصلي الصلوات اللي فاتتني وبعدها توجهت لغرفة التلفزيون وكملت نومي بدون ما اتعشى وبدون ما اخذ مسكن ولا شي ابي انام وبس





الساعة 5 الصباح قمت بعد ماخذت كفايتي من النوم ... بس احس حرارتي ارتفعت اكثر ... افففففف مالي نفس اروح الجامعة ... ودي اغيب وافتك بس خايف من الحرمان والدكاترة يبونها من الله



قمت بكسل والتفتت لكنبة رايد ومالقيته ... قطبت حواجبي مستغرب معقول مانام هذا



الحين الساعة 5 الصباح اكيد كل الشباب راحوا



طلعت من غرفة التلفزيون ومالقيته بالحوش ... رحت للمطبخ ولا لقيته ... اففففففف رحت للمسبح ونفس الشي مالقيته



رحت للملعب ومالقيته ... طلعت للشارع وشفت سيارة سعد ونايف واقفة قدام بوابة الاستراحة ... طيرت عيوني .. سعد ونايف هنا ... ليه مارجعوا هذولي لبيوتهم



رجعت مسرع للاستراحة ادور رايد ... درت عل الحمامات كلها ومالقيته ... رحت لغرفة مخصصة كمجلس ومالقيته



وقفت بنص الحوش مستغرب .. وينهم ... لا رايد ولا نايف ولا سعد بالاستراحة ... اجل وين راحوا ...



رحت لغرفة الشبّه ومالقيته ... رجعت لغرفة التلفزيون



= عممممممممر



التفتت لمصدر الصوت ولقيت رايد يركض متوجه لي ويناديني



عمر = وين رحت انت ؟



رايد بترجي = عمر تكفى عطني سيارتك شوي ... تكفى عمر تكفى ابرجع قبل تروح لجامعتك



عمر مستغرب = ليه تبي سيارتي ؟



رايد بترجي =- تكفى قبل الساعة 7 وانا عندك ... والساعة الحين بعدها 5 ... ماني مطول على طول ابجي



عمر بعصبية = علمني وين بتروح ( ورفعت راسي لما شفت سعد ونايف يدخلون الاستراحة ونزلت نظري لرايد ) وش يبون منك هذولي ( واشرت عليهم )



التفت رايد لهم وبعدها التفت لي



رايد = عطوني الفين عشان اروح لعامل يبون منه شي ...



عمر بصراخ = تدري وش العامل هذا اللي تبي تروحله ؟



رايد = ادري بس انا ماعلي منهم يشربون والا يموتون ان شاء الله ... انا ابي الالفين وبس



مديت يدي وعطيت رايد كف طرحه بالارض



ورفعت راسي وشفت سعد ونايف يركضون متوجهين لنا يوم شافوني ضربت رايد



ونزلت نظري للبزر اللي عندي



عمر بصراخ = يابقرة الهيئة بيقضبون عليك



التفت لي رايد وهو جالس وحط يده على خده



رايد = عمي عيا يعطيني حقي ووظيفة ماحد بيوطفني وانت بعد بخيل معي لا تعطيني لا غدا ولا عشا ... ابي الالفين مالك دخل فيني ( وبكى )



= هيه انت وش فيك على رايد ... ليه تضربه ؟



رفعت راسي لنايف



عمر بعصبية = وش تبون منه معطينه الفين ؟



سعد = مالك دخل فيه ... هو موافق وهو حر



نايف يكلم رايد



نايف = رح رايد رح بسرعة قبل يروح الرجال لعمله



عصبت وهجمت على نايف










 

رد مع اقتباس
قديم 08-14-2020, 11:27 AM   #12
JAN
مِرأة وٓاحدة … إنعِكاسات شٓتى !

الصورة الرمزية JAN
JAN غير متواجد حالياً

بيانات اضافيه [ + ]
 رقم العضوية : 115
 تاريخ التسجيل :  Mar 2020
 العمر : 23
 المشاركات : 9,849 [ + ]
 التقييم :  23316
لوني المفضل : Black
شكراً: 0
تم شكره 6 مرة في 6 مشاركة

مشاهدة أوسمتي






* الجـزء التـاسع *










































* رايد *





نايف = رح رايد رح بسرعة قبل يروح الرجال لعمله



فجأة هجم عمر على نايف وطرحه بالارض وجلس على بطنه



شوي وهجم سعد على عمر .. وصاروا الثلاثة فوق بعض يتهاوشون



شهقت وابعدت عنهم .. هم اجسامهم اكبر مني وما اقدر افرق بينهم



شفت سعد يضرب عمر مع ظهره بقوة وبعدها طرحه بالارض بجنب نايف



جلس نايف معصب وهجم على عمر وركب فوقه



نايف بصراخ = وش دخلك انت ... متى مارسلناك تكلم ( ورفع يده وعطى عمر بكس )



التفت سعد لي وقام وقرب عندي



سعد = يله يارايد رح



طالعته بخوف ... اخاف اذا قلت لا يهجمون علي مثل ماهجموا على عمر



رايد بخوف = مـ .. مـ .. ماعندي سيارة



سعد معصب = اوهوووووه ياذا السيارة البلشة ... ياخي رح على رجليك



التفتت لعمر ولقيته يحاول يطرح نايف على الارض



رجعت وطالعت سعد بخوف



رايد = طيب انت ونايف معيين تعطوني سياراتكم



سعد = ياخبل افهم ... كم مرة اقولك سيارتي وسيارة نايف انساها ... دبر لك سيارة والا رح على اللموزين ... معطينك الفين ريال ... دبر عمرك .. بسررررعة رح



وراح لنايف يساعده على عمر



نزلت راسي .. ياربي وش هالورطة ... ودي اخذ الالفين بس خايف من عمر ومنصور و الهيئة كلهم يهاوشوني والصراحة اخاف اذا عصيتهم و رحت يطردوني من الاستراحة .. واذا مارحت اخاف من سعد ونايف يهجمون علي مثل ماهجموا على عمر



يعني رحت والا مارحت راح انضرب



رفعت راسي ولقيت سعد ونايف واقفين ويطالعون عمر المتمدد على الارض



التفت نايف لسعد



نايف معصب = ما حد يسلم منه حتى وهو مسخّن ( وانحنى على عمر ومسك فنيلته ) قسم بالله ياعمر اذا تدخلت بيننا وبين رايد اخليك تعرف من هو نايف



سعد = مسويلي فيها ( والتفت لي ) انت لهالحين هنا



خلاص ماني رايح ... ودي اعطيهم الالفين وافتك من هالسالفة .. بس خايف وشلون اقولهم مب رايح



نزلت نظري لعمر ولقيته متمدد وصدره يرتفع وينزل ... توني انتبه انه ماعليه الا ملابسه الداخليه ( سروال وفنيلة )



شهقت ... صح امس عمر طوال اليوم وهو نايم وحرارته مرتفعة ... حتى ماسهر مع الشباب كالعادة



انتبهت على نايف يمسك ذراعي ويجرني



نايف = رح خلصنا .. فاضيلك حنا .. ورانا جامعة



سحبت ذراعي من نايف ورفعت نظري له



رايد بخوف = خلاص مب رايح ... آآآ .. ماعندي سيارة ( وطلعت الالفين من جيبي الامامي ومديتها عليه )



التفت نايف لسعد شوي وبعدها التفت لي معصب وعطاني كف خلاني الف حول نفسي وطاحت الالفين من يدي



نايف بصراخ = مالك كلمة انت .. احيان تقول ابروح واحيان تقول مب رايح .. شايفنا لعبة عندك



مسكت خذي بألم وانا امسك دموعي ماتنزل ... كلهم يعطوني من هالكفوف .. اول عمر والحين نايف ... اذا قلت ابروح عطوني كف واذا قلت مب رايح عطوني كف ثاني .



رديت عليه وانا اجاهد دمعتي



رايد = لا تضرب ... ماني خدام عندك



سعد وعيونه علي = امش نايف امش ... لا تضيع وقتنا مع واحد ماله كلمه ( وانحنى واخذ الالفين من الارض )



نايف بصراخ = كااااان موااافق ... كله من عمر ( وراح لعمر المتمدد وهجم عليه مرة ثانية وجلس على بطنه ) ياكلب خربت الولد علينا ...



عمر بتعب = آآآ ... قم عن بطني ( ومسك يدين نايف يدافع عن نفسه )



جا سعد وابعدهم عن بعض



سعد = امش نايف ... خلنا ندور واحد من الشباب غير هالبزر .. لي يومين عنه وراسي مصدع ... قم خلصنا انت الثاني قم



قام نايف وراح وهو يتوعد عمر ويهدد



وراحوا اخيرا



التفتت لعمر ولقيته على وضعه متمدد ... وصدره يرتفع وينزل من الحمى ويئن



قربت عنده ونزلت نظري اطالعه وانا واقف



انتبهت ان رقبته عليها دم .. عرفت ان واحد منهم خانقه وقت الهوشة .. وبرطمه الفوقي ينزف دم



جلست وحطيت يدي على جبهته ... حرارته مرتفعه مرة



رايد = عمر



فتح عيونه وطالعني شوي وبعدها تلفت يدور نايف وسعد



رايد = راحوا



طالعني عمر وبعدها غمض عيونه مرة ثانية



رايد = عمر ( وحطيت يدي على صدره اهزه ) عمر خلاص انا ماني رايح



عمر وهو مغمض عيونه = الشرهه على اللي يجيب بزر عنده ( وفتح عيونه ) رح هات جوالي



سكتت بزعل ... ماني بزر .. انا رجال .. ويوم من الايام راح اثبت لكم هالشي



قمت ودخلت غرفة التلفزيون ورحت لثوب عمر المعلق بس مالقيت الجوال بجيوب الثوب ... تلفتت ادوره ولقيته على الطاولة الصغيرة اللي بجنب الكنبة اللي ينام عليها عمر



اخذت الجوال وطالعت الساعة



6 الصباح



رجعت لعمر ولقيته على وضعه ماتحرك



عطيته الجوال ... ضغّط فيه شوي وبعدها حطه عند اذنه



عمر بتعب = الووووه .. مشعل تكفى خذلي عذر من الدكتور محمد ... اليوم هو عندنا وهذي اخر محاضرة لي اذا غبتها حرمان على طول ... تكفى رحله وخذ عذر منه ضروري ......... لا مشعل تعبان ماقدر اجي ....... ايه الحرارة مانزلت ... احتريك مشعل اتصل علي اذا كلمت الدكتور محمد ... طيب مع السلامة ( وسكر الجوال ومدد يده بتعب )



رايد = قم رح للحجرة



مد عمر يده لي عشان اقومه



قومته وراح يترنح لغرفة التلفزيون ورحت وراه



انسدح عمر على كنبته وانكمش على نفسه بردان



عمر = لحفني رايد برررد



تلفتت ادور لحاف ... انا وعمر بالعادة ننام بدون لحاف اصلا الجو حار ومانحتاجها



لقيت ثلاث مناشف للشباب فارشينها على ظهر احد الكنبات ... اخذتها ولحفت عمر فيهن



انتبه عمر عى المناشف



عمر بتعب = جايبلي مناشف حق سباحة تلحفني فيها ..



رايد = مافيه لحاف



مارد علي .. غمض عيونه وسكت



رحت وجلست على الكنبة بحزن ... وحطيت يدي على خدي ... الكل يضربني .. لأنهم عارفين اني يتيم ومستقوين علي ... ودي اعتمد على نفسي ... ودي اتوظف



اخذت اكثر من ساعتين وانا مهموم وافكر بحالي فجأة قطع علي رنين جوال عمر



قعد يرن الجوال ويرن و عمر مايرد .. شكله نايم .. قمت والقيت نظره على الجوال



مشعل يتصل بك



رايد = عمر جوالك يرن ... عمر قم



سكت الجوال ورجع يرن مرة ثانية ( مشعل يتصل بك )



احم ... بما انه مشعل انا ابرد عليه



رايد = الووو



مشعل = عمر الدكتور محمد



قاطعته يوم شفت مشعل مانتبه اني رايد



رايد = انا رايد



سكت مشعل شوي



مشعل = رايد ! وين عمر ؟



رايد = نايم



مشعل = هو الى الحين تعبان ؟



رايد = ايه



مشعل بتنهيده = عنده محاضرة مايقدر يغيب عنها ... قومه رايد وقله مشعل يقول لك الدكتور محمد عيا يعطيك عذر يقول اذا غبت عن هالمحاضرة راح يحرمك من الامتحان



رايد = اقومه الحين يعني ؟



مشعل = محاضرته الساعة 11



ابعدت الجوال عن اذني اشوف الساعة ورجعت احط الجوال عند اذني



رايد = بس الساعة الحين 8



مشعل = امممم قومه الساعة 9 ونص وعطه بندول يخفف عنه شوي وعلى بال مايصحصح ومسافة الطريق تكون الساعة وصلت 11



رايد = فيه بندول بالاستراحة ؟



مشعل = لا طبعا مافيه ... رح للصيدليه وجيبله



رايد = ماعندي فلوس ولا سيارة عشان اروح



مشعل بملل = الحين ماعندك الا عمر ... خذ من بوكه ومفتاح سيارته ورح .. يله عندي محاضرة الحين مستعجل مع السلامة



وسكر بوجهي



التفتت لعمر ولقيته الى الحين نايم ويئن من الحرارة



طلعت ورحت عند المسبح .. ابنتظر لين الساعة 9 ونص واروح للصيدلية وبعدها اقوم عمر















* عمر *





انزعجت من رايد وهو يقومني وفتحت عيني ولقيته واقف قدامي ومعه كيسه وكوب ماء



انسدحت على ظهري بتعب وطالعت رايد



عمر = وش تبي خلني انام



مد رايد علي كيسه وكوب الماء



واضح من الكيسة انها من صيدلية ورفعت نظري له



عمر = وش هذا ؟



رايد = جبت لك من الصيدلية بندول .. اتصل مشعل على جوالك يقول الدكتور محمد عيا يعطيك عذر وانه راح يحرمك من الامتحان اذا ماجيت



تأففت من هالدكتور ... مابقلبه رحمه اعوذ بالله



جلست بتعب.. مديت يدي واخذت الكيسه من رايد واكلت البندول



جلس رايد بجنبي على الكنبة وهو ساكت



فجأة مد علي بوك ومفتاح



طالعتهم مستغرب واخذت شوي عشان استوعب وطالعت رايد



عمر = هذا بوكي ومفتاح سيارتي ؟



هز رايد راسه باية



التفتت للبندول وبعدها التفتت لبوكي اللي بيد رايد وبعدها طالعته وعصبت بس مالي حيل اصارخ عليه



عمر = ليه تاخذ من بوكي بدون ماتستاذن



رايد = مشعل قاللي خذ من بوك عمر واشتر بندول



سكتت لان مالي حيل ارادده



عمر = مافيه وقت لازم اروح للمحاضرة الحين



قمت بصعوبة ولبست ثوبي واخذت اغراضي وطلعت بتعب وانا اتأفف من هالدكتور الزفت







الساعة 12 ونص الظهر



طلعت من الجامعة بعد مارتحت شوي بالكفتريا



ركبت سيارتي وشغلتها بس شفت منصور يمشي طالع من البوابة



ضربت البوري عليه عشان ينتبهلي وفعلا انتبه لي وجاني بس لاحظت براس ثاني التفت لي.. وندمت وقتها اني ضربت البوري يوم شفت معاذ وقف و يطالعنا



منصور بابتسامة = هلا والله عمير ... وشلونك مع الحرارة



فتحت الدرج واخذت صورة كرت العايلة الخاص لاهل رايد و نزلت من السيارة



عمر = الحمد الله طيب .. اخذت بندول قبل اجي للجامعة واحس احسن الحين ..( التفتت لمعاذ ومن وقفته شكله يحتريني اخلص من منصور .. اففف ياليتني ماضربت البوري .. مالي خلق لمعاذوه الحين .. التفتت لمنصور مرة ثانية ) آآآ .. منصور ممكن خدمة



منصور مستغرب = آمر



مديت عليه الورقة



عمر = اليوم مالي حيل اروح و ابيك تروح عني للضمان الاجتماعي وتسأل الموظف الاسماء اللي هنا مسجلين بالضمان والا لا ؟



اخذ منصور الورقة مني وفتحها



منصور = هذا كرت عايلة رايد اللي معنا بالاستراحة ؟



هزيت راسي بأية وركبت السيارة يوم حسيت بتعب الوقوف



سكتت منصور وهو يقرا الورقة



منصور = اهاا طيب ... ابروح العصر .. الحين يمديهم سكروا



طالعت معاذ ولقيته الى الحين واقف



عمر = اوكي .. مشكور



راح منصور وشفت معاذ يمشي متوجه لي يوم شاف منصور راح



ريوست بالسيارة قبل يوصل معاذ مالي خلق له بس لسوء حظي وصل قبل ابتعد



معاذ = وقف وقف



وقفت وانا اتأفف



عمر بضيق = افففففففففف وش تبي



دخل معاذ راسه بدريشتي وسكت يوم انتبه للخدوش اللي بوجهي



عمر معصب = وش تطالع ... اخلص علي ابروح



ابتسم معاذ بسخرية = شكلك متهاوش مع احد ... شري ياولد العم مايسلم منك احد



التفتت عنه متضايق



عمر = مالك دخل ( التفتت له و دفعته عن دريشتي ) وخر



حركت السيارة وطلعت من المواقف وعند الاشارة القريبة من الجامعة وقف بجنبي معاذ بسيارته ... عرفت وقتها انه بيروح لبيت جدي



حطيت نفسي اني مانتبهتله ...



صح على طاري جدي مب رايح عندهم اليوم وانا حرارتي مرتفعه وش يفكني من جدتي بعدين



ولعت الاشارة خضراء وحركت ومعاذ يمشي بمحاذاتي ويقرب سيارته لي يعاندي



اذا قللت سرعتي قلل سرعته واذا اسرعت اسرع



قربنا عند المنعطف اللي بعدها هو يلف يمين لبيت جدي وانا اروح سيده لبيتي



اسرعت عشان معاذ يسرع ويلف وافتك من وجهه..



فجأة لف معاذ بسيارته كأنه بيصدمني



انا من الفزعة و المفاجأة .. لفيت الدركسون بقوة ومع السرعة انقلبت سيارتي



حطيت ذراعي على وجهي يوم شفت القزاز الامامي تكسر وصارخت باعلى صوتي يوم حسيت بشي دخل فخذي



مسكت الدركسون بقوة بيديني الثنتين اثبت نفسي على المرتبه .. و حنيت راسي على الدركسون احاول اغطي وجهي يوم شفت قزازة دريشة الراكب تكسرت ... حمدت الله ان دريشتي وقتها كانت مفتوحه























= عمر ... رد علي ... عمر انت بخير ... عمر تكفى رد .. ماكنت اقصد



انتبهت على صوت معاذ يكلمني ويهزني ... رفعت راسي عن الدركسون ... وتلفتت احاول استوعب



لقيت سيارتي واقفة فوق الرصيف الجانبي .. والتفتت لمعاذ وانا الى الحين مفزوع



وقلبي يضرب بقوة ...



معاذ بخوف = عمر .. الحمد الله على سلامتك .. وشفيك ياخي كنت امزح معك



نزلت نظري اطالع صدري وبطني احاول استوعب انا الى الحين حي والا مت



تجمعوا بعض المارة .. واسمع اصواتهم .. طلعوه طلعوه



رفعت راسي للمتجمعين وانا الى الحين مفهي



فتح معاذ الباب بصعوبة بمساعدة واحد ثاني ...



معاذ = اطلع عمر ... ثوبك مليان دم ... تكفى والله ماقصدت



شفت حظني مليان قزاز وثوبي من عند فخذي مليان دم



نزلت بصعوبة من السيارة وانا ماسك فخذي اللي تعورني



عمر بألم = رجلي رجلي ( وجلست بالارض على الرصيف )



جلس معاذ عندي



معاذ = عمر شكلها دخلت فيها قزازة



رفعت راسي اشوف المسافة بين اول مانقلبت الى وقوف السيارة في الرصيف



مسافة قصيرة ... شكل السيارة انقلبت مرة وحدة واعتدلت فوق الرصيف ..



تنهدت احاول اهدي نفسي ... الحمد الله على سلامتي



سمعت احد المتجمعين



= ابتصل على الاسعاف



نط معاذ فازع ورد عليه بخوف



معاذ = لا لا مـ .. مـ .. ماله داعي ... اسعاف ... آآآ .. انا ابوديه للمستشفى



طالعت معاذ وانا ساكت



جلس واحد بجنبي من الجهه الثانية



= الحمد الله على سلامتك ... كنت وراك وشفتك يوم تنقلب ... الحمد الله جت سليمة .. خلني اشوف رجلك ونعالجها لين يجي الاسعاف



التفتت للرجال



عمر = لا مشكور ... ابحتري الشرطة ( والتفتت لمعاذ وكملت ) نتحاسب



معاذ بخوف = عمر .. ماله داعي تكبر السالفة .. خلنا نحلها بيننا ... اذا تدخلت الشرطة تدخلوا ابوي وجدي



ابتسمت كنت عارف انه خايف من ابوه ... ملاحظها على معاذ من زمان وتوني تأكدت



عمر = بس انا كذا والا كذا ابعلّم عمي ( ومسكت فخذي بألم ) آآآخخخ



شفت معاذ رافع جواله لاذنه شوي وجاه رد



معاذ = مصعب تعال تكفى عند الطريق العام للجامعة .......... انت تعال وتعرف بعدين ...



قام معاذ وشكر المتجمعين وطلب منهم كل يروح بطريقه



راحوا وبقى انا ومعاذ جالسين على الرصيف



معاذ = قم عمر اوديك للمستشفى



التفتت لمعاذ احاول اذله



عمر = هات شماغك عشان اوقف النزيف



معاذ = وشماغك وينه ؟



عمر = مدري يمكن بالسيارة بس مابيه يمديه مليان قزاز .. ابي شماغك



ناظرني معاذ شوي وبعدها نزل شماغه وعطانياه ... حطيت شماغ معاذ على فخذي



ما اقدر اضغط على الجرح اكيد داخله قزازة



معاذ = الحين وش قاعد تحتري انت ... قم اوديك للمستشفى



عمر = احتري الشرطة



معاذ بترجي = تكفى عمر خلنا نحلها بيننا



سكتت ومارديت عليه



عشر دقايق وجا مصعب مفزوع يوم شاف سيارتي على الرصيف متكسرة ونزل من سيارته يركض متوجه لنا



مصعب = عمر انت طيب ؟



عمر = اسأل اخوك ... مدري وش كان يقصد يوم لف علي



معاذ = والله ماكنت اقصد شي ... كنت ابي اخوفك بس



جا مصعب وجلس قدامي



مصعب = الحمد الله على سلامتك ... طار قلبي يوم شفت السيارة من بعيد



معاذ = قم عمر خلنا نوديك المستشفى ... قبل تمر شرطة والا شي ... وسيارتك خلها علي انا انقلها بالسطحه



التفتت لمعاذ مستمتع باهانته



عمر = بس انا ابي الشرطة تتدخل وتقيم الخساير



معاذ = سيارتك ماهي متضررة مرة ... تصليح القزاز والسقف شوي متهشم واشياء ثانية بسيطة .. ماله داعي الشرطة



سكتت شوي افكر بطريقة استغله هو واخوه



عمر = طيب اباخذ سيارتك لين تخلص سيارتي



معاذ = طيب مثل ماتبي بس قم



عمر = اممممم طيب وتصليح سيارتي من يدفع خسايرها



معاذ = انا ابحاول اخذ من ابوي واصلحها لك ... تقريبا يبيلها 3000 ريال



التفتت له ...



عمر = وش 3000 ... تصليحها يكلف اكثر واذا كنت مانت مقتنع خلنا نجيب الشرطة تقرر



معاذ = لا لا لا .. ماله داعي الشرطة ( وتنهد ) عمر ماعندي الا مكافأتي... وابوي وجدي الصراحة مابيهم يتدخلون ... عمر تكفى خلنا ندخل سيارتك الورشة ونصلحها على شوي شوي



عمر = ياسلام ... لا سيارتي ابيها تطلع بسرعة ( وسكتت شوي افكر ) طيب شف ... انا عندي اللي يصلح سيارتي واقدر ادخلها الحين وتطلع بوقتها وماراح اقول لعمي وجدي بس بشرط



معاذ = وش



عمر بابتسامة = تعطيني مكافأتك ومكأفاة مصعب كاملة كل شهر ... لين تخلصون اللي عليكم



طير مصعب عيونه فيني



مصعب = وانا وش علي تاخذ مكافأتي ... قسم بالله توني جاي ... ما أذيت احد



معاذ = وكم اللي علينا



عمر = اللي عليكم قيمة تصليح سيارتي ... نوديها الورشة ونشوف كم تكلف طبعا مع الصبغ وقطع الغيار والقزاز وكللللللل شي



معاذ بترجي = طيب خذ نص المكافاة ... ماهي حلوة امد يدي لبوي يصرف علي وعلى سيارتي



عمر بعناد = كل المكافأة ... حقتك وحق مصعب



سكت معاذ وهو منقهر



الفتتت له وابتسمت اغيضه



عمر = وابي سيارتك لين تطلع سيارتي .. صح على فكرة عطني 100 ريال الحين عشان السطحة تاخذ سيارتي للورشة



معاذ معصب = ماني معطيك شي الحين .. انا ابتصل على السطحة



عمر بابتسامة = لا حبيبي لازم انا اشرف على تصليحها بنفسي واشوف كم تكلف



معاذ معصب = بسيطة ياعمر ... قسم بالله لاردها لك ( وقام )



رفعت راسي له



عمر = لك وجه تهدد .. مدري من اللي غلط علي قبل شوي



مارد علي معاذ وراح لسيارته وجاب المفتاح وحذفه بحظني



معاذ منقهر = يله مصعب مشينا



عمر = وين المية



دخل معاذ يده بجيبه وهو معصب وطلع بوكه .. حذف علي المية



والتفت لمصعب



معاذ = يله انت امش



التفت مصعب لاخوه وبعدها التفت لي



مصعب = قم عمر اوديك المستشفى



صارخ معاذ عليه



معاذ بصراخ = خله يذلف... يكفي اللي اخذه



طالعني مصعب شوي وقام متوجه لاخوه وراحوا



قمت بصعوبة واخذت الاغراض المهمة من سيارتي و ركبت سيارة معاذ ورحت للمستشفى















 

رد مع اقتباس
قديم 08-14-2020, 11:28 AM   #13
JAN
مِرأة وٓاحدة … إنعِكاسات شٓتى !

الصورة الرمزية JAN
JAN غير متواجد حالياً

بيانات اضافيه [ + ]
 رقم العضوية : 115
 تاريخ التسجيل :  Mar 2020
 العمر : 23
 المشاركات : 9,849 [ + ]
 التقييم :  23316
لوني المفضل : Black
شكراً: 0
تم شكره 6 مرة في 6 مشاركة

مشاهدة أوسمتي






* الجـزء العاشـر *
























قمت بصعوبة واخذت الاغراض المهمة من سيارتي و ركبت سيارة معاذ ورحت للمستشفى







الساعة 5 ونص العصر



طلعت من المستشفى وانا اتأفف من العكاز اللي عطوني اياه



كأني شايب ... معطيني عكاز شيبان ... عكاز اللي نوعه حديدي وتدخل يدك فيه



اكثر شي اشوفه مع الشيبان



سوو خياطه لفخذي ... وكل ماعورتني دعيت على معاذ



والحين ماقدر اوطى عليها ... احس شوي وتنفك الخياطة .. والمشكلة متفشل من عكاز الشيبان هذا



ركبت السيارة وتوجهت للاستراحة



وصلت عند الاستراحة ورميت العكاز ورا الزبالة الكبيرة الموجودة برا ودخلت الاستراحة اعرج



توجهت لغرفة التلفزيون ابي انام ... تعبان ..



بس الصراحة احلى مافي الحادث ان حرارتي خفت شكله من الخوف والفزعة اللي صارت نزلت الحرارة

و المستشفى عطوني مغذي وهم يخاطوا الجرح وهذا ساعدني شوي



اول ماوصلت باب الغرفة طلع بوجهي رايد ماسك بطنه



واول ماشافني شهق



رايد بصدمه = عمر .. وش فيك ؟



قطبت حواجبي مستغرب ... بسم الله مسرع يعرف وانا متأكد انه ماشافني وانا اعرج لاني اول ماشفته بوجهي وقفت



رايد بصدمه = صاير عليك حادث ( واشر على ثوبي )



نزلت نظري للمكان اللي يشر عليه



صح ... نسيت ان ثوبي عليه دم ... المفروض ارجع للبيت وابدل ملابسي بس نسيت



عمر = حادث بسيط ماعليك ... ( ورحت اعرج للكنبة ونزلت ثوبي ورميته بإهمال على الارض وانسدحت على الكنبة بتعب ) رايد ابي انام تعبان ... اذا جوا الشباب قومني .. لا تنسى مثل عادتك



رايد مستغرب = والصلاة ماقومك



سكتت نسيت الصلاة اصلا ... ياربي مدري متى احافظ عليها



عمر = آآآ .. الا طبعا قومني ( وانتبهت على رايد ماسك بطنه ) وش عندك ماسك بطنك



رايد = جوعااااااااااان



عمر = اوووه هذي عادتك يارايد جوعان جوعان .. المهم بس خلني انام



فجأة رن جوالي .. اففففف هذا وقته .. المشكلة جوالي الحين بجيب الثوب ونسيت اطلعه وعاجز اجيبه الحين ... التفتت لرايد اللي واقف



عمر = رايد انت واقف هات ثوبي



مشى رايد وانحنى وطلع الجوال من ثوبي ومده علي



القيت نظره عليه ( الراس الكبير يتصل بك )



استغربت جدي متصل علي الحين



عمر = هلا جدي



جدي = هلا فيك .. عمر وانا جدك المغرب بيجيون رجال عندي تعال ابيك تضيفهم



تلعثمت هذا وقته .. انا اعرج كيف بالله اضيفهم هذولي .. وبعدين تعبان ابي انام



عمر بارتباك = جدي قل لمعاذ والا مصعب يجون يصبون القهوة عنك



جدي = اروح للي بعيد ومسافة 20 كيلو وانت عندي



تأففت وش السوات الحين .. ماقدر اضيفهم وانا اعرج .. والخياطة الى الحين تعورني وماتعودت عليها



جدي = يله تعال ( وسكر بوجهي )



جلس رايد عند رجولي



رايد = وش فيك ؟



عمر متضايق = جدي بيجه رجال ومافيه احد يصب القهوة لهم غيري



قمت متضايق ولبست ثوبي



رايد = وصلني للحارة معك ابي اشوف اخواتي



التفتت لرايد مستغرب



عمر = تقدر تشوفهم الحين ... يمكن يشوفك عمك



رايد = ابنط الجدار اذا راح عمي للمسجد



هزيت راسي بايه وطلعنا



مريت بيتي وبدلت وطلعت لرايد اللي يحتريني بالسيارة



رايد = هذا بيتكم ؟



التفتت لرايد



عمر = بيتكم ؟ اللي يسمعك يقول عشرة حنا .. هو بيتي انا لحالي مامعي احد



التفت رايد لي مستغرب



رايد = مالك احد ابد ؟ ... لا اخوان ولا اخوات ولا احد ابد



عمر = وانت وش رايك ... ماتشوفني 24 ساعة معك بالاستراحة



رايد = بس انا سمعت ان لك ام ... و مرة سمعتك تكلمها بعد



تنهدت وسكتت عنه ... هو كل الوحدة اللي احس فيها بسبب امي ... قبل تتزوج امي كنت احس بالوحدة بس ارحم من الحين ... ارحم بوااااجد



قبل اذا دخلت البيت القى امي واعرف ان فيه احد يحتريني .. وفيه من يرد لي الصوت ... الحين احس اني مقطوع من شجرة ... كل مادخلته احس فيه جنون من كثر ماهو خالي



وصلنا الحارة ونزل رايد ونزلت ... شفت رايد يوقف ورا احدى السيارات



استغربت وش عنده هذا



صارخت بصوت عالي عشان يسمعني



عمر = وش تسوي ؟



رايد = سيارة عمي هنا ... ابحتريه يذن واذا طلع عمي ادخل البيت



هزيت راسي من حال هالولد ... يكسر خاطري بعض الاحيان .. ليه مايروح لخواله ويفك عمره



دخلت البيت وانا اعرج وسلمت على عمتي وجدتي وجدي



واستلموني تحقيق على عرجتي ... كيف ومتى ولماذا وربما



الصراحة احترت وش اقول .. مابي اقول حادث لان الحادث لازم فيها مرور وتأمين ومدري ايش وانا مابلغت واخاف جدي يروح للمرور من وراي واذا ما شاف بلاغ هناك يجيني يحقق معي مرة ثانية وبعدها عاد يعرف انه معاذ



ومابي اخسر مكافأت معاذ ومصعب



بصعوبة تهربت من اسألتهم بكذبة وقلت لهم وانا العب كورة طحت



صح مها استلمتني ضحك وتطنز بس ارحم من اني اخسر مكافأت معاذ ومصعب





المغرب



وانا طالع من المسجد اتصل علي منصور



عمر = هلا منصور



منصور = هلا فيك ... تراني رحت للمشوار اللي قلتلي



صح نسيت اني ارسلته للضمان الاجتماعي



شكلي نسيت كل شي بسبب الخوف و الفزعة والتقلب بالسيارة



عمر = هااااه ووش صار معك



منصور = يارجال قسم بالله لو هذا عمي كان مت قهر



سكتت ... كأني فهمت



منصور = عم رايد ياخذ فلوسهم من وراهم



عمر بتنهيدة = مثل ماكنت متوقع .. عشان كذا عمه معيي يعطي رايد كرتهم العايلي



منصور بعصبية = ياخي وش هالعم ...



عمر = اعلم رايد ؟



منصور = ياخي انا يوم علمني الموظف شوي ويطق فيني عرق ... وش بيسوي رايد لو يدري ... بيموت على طول



سكرت عن منصور وانا محتار اقول لرايد والا لا



دخلت الحارة ودورت بعيوني على رايد وماشفته ... حتى يوم طلعت من البيت ماشفته .. اعلمه ان عمه ياخذ راتب الضمان حقهم



لا لا ماراح اعلمه ... اقهره بس كذا ... اصلا مايقدر يسوي شي وهو توه ماوصل السن القانوني وعمه وليه والقانون مع عمه ..



مرت فترة و تجمعوا الرجال بمجلس جدي وانا بصعوبة اصب لهذا واضيف هذا



وكل ماعورتني فخذي تحسبت على معاذوه التيس ... هين يامعاذ ان ماشفطت فلوسك كلها انت واخوك ما اكون عمر ... سيارتي الى الحين مارحت لها ... بس راح اغير فيها كل شي عشان يكثر تكاليف وكلها على ظهرك يامعاذ



= وين ولد اخوك يابو بندر له شهر او اكثر ماشفناه ؟



انتبهت على سؤال جدي ... ابو بندر ... ابو بندر عم رايد ماغيره ؟



التفتت اراقب الوجوه الموجودة احتري ابو بندر هذا يتكلم ... ابي اعرف شكله



فجأة تكلم احد الموجودين



= آآآآ ... وش تبيني اسوي بهالولد ... صايع .. والا بيتي مفتوح له يروح ويجي على كيفه يابو فهد



طيرت عيوني على هالشايب الكذاب ... اجل بيتك مفتوح له والولد كل ظهر يتسلق الجدران عشان بس يشوف اخواته وفوق هذا انت ماكل حلالهم



الصراحة ودي افرغ هالدله اللي بيدي على راسه



جدي = طيب دورته انت ... تعرف وينه ... الولد لا يضيع تراه الى الحين بسن المراهقة وينخاف عليه



صح انا ماعلمت جدي ان رايد معنا بالاستراحة ... والصراحة متخوف من ردة فعل جدي ...



جدي مايحب شلتي اللي اسهر معهم ... كيف عاد اذا عرف ان هالبزر عندنا ... واخاف جدي اذا سمع عن رايد شي يتهمنا اننا ضيعنا ... اسكت احسن اجل .. مب لازم يدري جدي انه عندنا



ابو بندر = وين تبيني ادوره ... الديرة عريضة كبيرة



طالعت ابو بندر هذا بكره ... قل مانت مهتم اصلا عشان تدوره



جدي = الله يرده ويحفظه ان شاء الله من عيال الحرام ... انتبهله يابو بندر تراه يتيم



ابو بندر = ان شاء الله خير ...



ودي اتدخل بالكلام واحرجه بس اخاف اقول عن فلوس الظمان يقولون وش عرفك واخاف اقول ليش تبيع بيتهم ونفس الشي بيقولون وش عرفك



















* رايد *



التفتت لمريم متفاجئ



رايد متفاجئ = خالي جا هنا



مريم = ايه وتهاوش من عمي والحين خالي يدورك



رايد بصراخ = يدورني وش يبي فيني ... ماعندي شي ياخذه



قامت مريم وراحت لباب الملحق وفتحته بشويش وسكرته مرة ثانية



مريم بخوف = آآآ اششش رايد ... آآآ لا يسمعك احد ... وقتك مو مناسب ابد



جت عندي ومسكت يدي



مريم = تكفى رايد رح لخوالي وعيش عندهم



سحبت يدي منها معصب وقمت واقف



رايد معصب = ماني برايح ... مابي اصير بديرة وانتي ودانه بديرة اصلا خالي مثل عمي كلهم طمااعين



مريم = اقصر صوتك ( وكملت تترجاني ) رايد انا تعبانه ... ودانه خلاص ماقدر اتابعها ... رح عند خالي يمكن يقدر يدبرك وتتوظف وترجع تاخذنا ... انا خلاص مالي حيل



قطبت حواجبي مستغرب من كلامها



رايد = ليه وش فيك .؟



حطت مريم يدها على ظهرها وهي تجاهد الدمعة



مريم = لي اسبوعين وظهري يعورني



رايد = رحتي للمستشفى ؟



مريم = وداني عمي للمستشفى بس عطوني موعد ... بس عمي ماوداني للموعد ... عمي اذا وداني مرة مايويني مرة ثانية



رايد = موعدك راح والا باقي ... اقدر ادبر سيارة



رفعت مريم راسي لي وابتسمت



مريم = الله يخليك لي ... لا خلاص فات موعدي ... بس رايد رح اسكن مع خالي



رايد = قلتلك ماني رايح ... خالك وعمك واحد ... وانا ابي اعتمد على نفسي ... انا خلاص كبير وبتشوفين



مريم = وش اشوف ... لك شهرين وانا مدري وين تسكن والا وين تروح ...



رايد معصب = لا تعلمين خالي انك شفتيني ... مابي اشوف احد منهم صدقيني هم مايوبننا هم يبون فلوسنا وبس



مريم = وهي بقت فيها فلوس .. خلاص مالنا شي عشان يطمعون فينا ... رح لخالي



رايد = قلتلك مب رايح ماتفهمين ... خالي يبي يتحكم فيني وعمي يبي يتحكم فيكم



سكتت مريم يوم تعبت من اقناعي



رايد = لا تحاولين .. خلاص انا تعلمت ... عرفت ان ماحد يحبنا ويهتم فينا ... اذا ماعتمدتي انتي على نفسك لا تعتمدين على احد



سكتت مريم وماردت علي وحطت يدها على ظهرها



جلست بجنبها على سريري بالمحلق اللي صار مغبر



رايد = وش فيك مريم ... اشوفك تغيرتي مرة



مريم بحزن = تعبانة نفسيتي تعبانة ... انت مدري وش يصير عليك ودانه مهملتها بسبب هالشغل اللي فوق راسي .. وظهري كل يوم يعورني ... اخاف تضيعون مني انت ودانه



رايد = طيب اذا دبرت سيارة تقدرين تطلعين من البيت وتروحين للمستشفى



التفت مريم لي



مريم بخوف = لا اخاف من عمي



رايد = قوليلهم انك رحتي معي ... ماعلينا منهم



طالعتني مريم وهي تفكر وبعدها هزت راسها بخوف



مريم = لا لا ... انت ماراح يجيك شي بس انا بيضربني عمي اذا رجعت



سكتت منقهر ...



صح اذا رجعت بيضربها عمي... آآآآه يالقهر اخواتي محتاجيني ولاني قادر اسوي شي



قمت وطلعت من البيت وانا مختنق



شفت بندر يلعب بالشارع واندسيت ورا السيارات عشان مايشوفني



وقعدت اطالعه بحقد ... ان ماذوقتك اللي ذقته يابندر



طلعت دموعي غصب عني من القهر ... تلثمت بشماغي واخذت نفس احاول اهدي نفسي ... شبعت دموع ... لو بتنفعني دموعي كان نفعتني من زمان



رحت لسيارة عمر وجلست على الكبوت احتريه .. اجل خالي يدورني .. هه .. بسيطة راح اعلمهم منهو رايد .. ماني محتاج لكم



واحد يبي يتحكم باخواتي والثاني يبي يتحكم فيني ... ماني محتاجكم ... راح اعلمكم منهو رايد



سمعت يذن لصلاة العشاء



دقايق وشفت رجال طالعين من بيت جد عمر ... طيرت عيوني لما شفت عمي من بينهم



نزلت بسرعة من الكبوت ورحت ورا السيارة وانا متلثم



ياليت سيارة عمر مفتوحه كان شغلتها وخليت عمي تحت كفراتها .. اخ يالقهر



شفت بندر ترك البزارين اللي يلعب معهم وركض متوجه لابوه عشان يروح معه للمسجد



بسيطة ياعمي ... احترني راجعلك ..



رجعت وجلست على الكبوت لما شفت الرجال بعدوا



ااااااه مريم حالتها ماهي عاجبتني ... واضح انها تعبانه وتقول عندها موعد فايت



مستعد اوديها بس المشكلة وشلون تطلع من البيت ...



ودي نصير انا ومريم ودانه ببيت لحالنا ونعيش حياتنا بحرية



بس وشلون وانا ماني قادر ادبر نفسي ... انا على عشاي امس مع الشباب ... يومي هذا كله ماكلت شي ..وشلون ابخلّص اخواتي من بيت عمي وانا مامعي حتى ريال واحد



مريم شكلها تغير



شفت عمر يطلع من بيت جده وهو ماسك فخذه ويعرج ... نزلت بصمت ووقفت عند باب الراكب احتري عمر يفتح لي الباب



ركبنا السيارة وعمر يشتكي من عوار رجله



عمر بألم = اخخخخ رجلي تعورني ... حسبي الله عليك يامعاذ ...



التفتت اطالع الشارع من الدريشة اللي عندي وانا متضايق ومابي اكلم احد ... احس ابنفجر



سمعت عمر يكلمني



عمر = شفت عمك كان عندنا ؟



مارديت عليه



عمر = اهاا واضح من اللطمه انك شفته ... صح ؟



هزيت راسي بايه عشان يسكت عني









* عمر *



طالعت رايد مستغرب ... وشفيه هذا اليوم منتفخ و مايرد علي



شغلت السيارة وحركتها ... بس الصراحة معذور ... المشكلة وش بيصير فيه اذا عرف ان عمه ماخذ اسمه واسم اخواته ويستفيد من الضمان من وراهم



فجأة سألني رايد



رايد = عمر ممكن سيارتك بكرة ابي اخذها الصباح



عمر = بكرة الاثنين عندي جامعه ... ليه وش تبي فيها لا يكون نايف وسعد مرسلينك



ماسمعت رد من رايد والتفتت عليه وشفته سرحان وهو الى الحين متلثم



قطبت حواجبي مستغرب ... وشفيه رايد اليوم



طبعا لا يمكن اعطيه السيارة اكيد بيروح عشان شغل نايف وسعد



وصلنا الاستراحة ولقيت منصور ومشعل وبعض الشباب هناك



ومايحتاج الشباب استلموني تحقيق يوم شافوني اعرج ... وعلمتهم اني سويت حادث بس ماقلت انه معاذ لان كلهم يعرفون كرهي لعيال عمي .. واكثر الاحيان يصيرون بصف معاذ ومصعب ودايم يخلوني انا الغلطان وابو المشاكل خاصة مشعل اذا صارت سالفة فيها انا وعيال عمي يحط مشعل سبب المشكلة علي

هو صح يوقف معي وينفذ بعض العمليات معي بحكم اني صديقه بس دايما يلومني ويهاوشني اذا صرنا لحالنا



شفت رايد بعيد عنا وجالس على عشب الملعب لحاله



ملاحظ عليه كل ماراح يشوف اخواته رجع متضايق ... معقول حال اخواته سئ لهالدرجة ... تراهم ماكلين شاربين هناك وش يبي رايد بعد



قطع افكاري عبد الله احد الشباب معنا بالاستراحة



عبد الله = شبااااااااااب راعي الاستراحة معصب يبينا نطلع



قطبت حواجبي مستغرب ..



عبد الله هو المسؤول عن تجميع القطه ويعطيها راعي الاستراحة بس ليه يبينا نطلع



منصور مستغرب = معصب ؟ ليه وش سوينا ؟



احد الشباب = ماله حق يطلعنا تونا معطينه الاجار



عبد الله = الاجار هو مستعد يرجعه لنا بس يبينا نطلع حاولت فيه بس معيي



عمر مستغرب = طيب ليش ... كذا بس من الباب للطاقة



ضحك عبد الله



عبد الله = تدرون ليش ؟ عشان الهيئة مسكت سعد اما نايف سافر قبل يمسكونه



شهقت



عمر مستغرب = الهيئة مسكتهم ؟



عبد الله = مسكت سعد بس ... نايف يقولون اهله انه مسافر ..



عمر = لحظة وشلون مسافر وهو اليوم هو وسعد كانوا هنا الصباح وتهاوشت معهم انا قبل اروح للجامعة



رفع عبد الله يديه يعني هذا اللي عندي



عبد الله = مدري هذي الاخبار اللي جتني ..



سألني احد الشباب = متأكد ياعمر ان نايف كان موجود هنا الصباح



عمر = ايه وتهاوشت معه لانهم كانوا يبون رايد يروح للعامل يجيبلهم اللي هم يبون



مشعل = اووووه الحمد الله ... الله سلم رايد ... شكل الهيئة كانت حاطة كمين وشكل اللي راح سعد وانمسك هناك .... بس السؤال اللي يطرح نفسه نايف وينه ؟



عبد الله = ماعلينا منهم شباب ... يله فضوا الاستراحة خلونا نطلع



منصور = الحين عاد ... خلنا نسهر اليوم وبكرة سلمه المفتاح



عبد الله = لا لا ... لا تبلشني من راعي الاستراحة ... يقول شوهتوا سمعة استراحتي ومعصب علينا



قرب مشعل فمه من اذني وهمس



مشعل = عمر ... رايد ماله مكان يروحله



ابعدت وجهي عن مشعل و طالعته



عمر = انت اللي جبته ... دبر له مكان الحين



مشعل = وين تبيني اوديه ؟



عمر = ببيتك



مشعل = بيتي فيه اهلي ..اخواتي وحريم ابوي .. وين تبي احطه ببيتي صاحي انت؟



عمر = والله عاد دبره انت



تدخلوا الشباب يوم علت اصواتنا انا ومشعل



منصور = وش فيكم انتم ؟



مشعل = منصور ... رايد ماله مكان يروحله وين نوديه ؟



عمر = منصور خذه معك لبيتك ؟



منصور = اخذه لبيتي والى متى ان شاء الله ... هو بالاستراحة له شهرين ... بيتضايقون اهلي منه اذا طول عندنا



عبد الله = على الاقل لين نلقى استراحة نستاجرها



منصور = يعني الى متى ؟



عبد الله = اممممم ... مدري بس اظن مايطول ... اسبوعين ثلاثة لين نلقى اللى يأجرنا استراحته بالشهر





منصور = حنا بصعوبة لقينا الاستراحة هذي ... اكثر اهل الاستراحات مايوافقون يأجرون شباب بالشهر ( والتفت لي ) عمر خذه معك ... ولا تتعذر ندري ان بيتك مافيه احد



التفتوا الشباب كلهم يأيدون منصور



عبد الله = ايه والله صح ... انت بيتك فاضي



مشعل = ايه صح خذه معك



عمر = هيه هيه انت واياه ... عندي امي



مشعل = عميران بلا كذب ... كلنا ندري ان امك متزوجه



عمر معصب = صح متزوجة بس تجي للبيت كل اسبوعين



مط منصور كلمتي مستهزي



منصور = كللللل اسبوعيييييييين



التفتت لمنصور معصب



عمر بعصبية = ايه كل اسبوعين وش فيها



عبد الله = خلونا ننادي رايد ونشوف رايه يمكن يقدر يرجع لعمه ( وصاح باعلى صوته ينادي رايد )



جانا رايد ووقف عندنا يطالع عبد الله بصمت .. ومن نظراته كأنه يحتري عبد الله يقول اللي عنده



عبد الله = رايد راعي الاستراحة يبينا نطلع ... تقدر ترجع لبيت عمك ؟



طير رايد عيونه بعبد الله



سكتنا شوي نحتريه يتكلم بس هو طول ساكت



مشعل = رايد اذا كنت ماتبي ترجع لعمك بيت عمر موجود



التفتت لمشعل وجه العنز ..



عمر = هيه انت على كيفك تعزمه لبيتي ... شاورني اول



مشعل = شاورناك قبل شوي



عمر معصب = بس ماوافقت الى الحين



فجأة مشى رايد مسرع متوجه لبوابة الاستراحة



صحنا فيه ننادي عليه عشان يرجع بس هو مارد علينا وطلع من الاستراحة



احد الشباب = وين بيروح ؟



عبد الله = شكله زعل



قام مشعل وطلع ورا رايد يلحقه



منصور = عمر تكفى خذه معك للبيت والله هالولد يكسر خاطري ...



وقعدوا الشباب يلوموني .... خذه وخذه وحرام عليك ومادري ايش



اففففف والله بلشنا بهالبزر ... قبل قالوا لي انتبه له ياعمر والحين يقولون خذه للبيت ياعمر ... ما باقي الا يقولون رضعه ياعمر



صارخت فيهم عشان يسكتون



عمر = خلااااااص خلاص باخذه معي ... فكونا



قمنا انا ومنصور وطلعنا من الاستراحة ندور رايد



شفنا سيارة مشعل واقفة وتلفتنا ندوره ولقيناه واقف مع رايد بعيد شوي



قربنا لهم وانا اعرج من عوار رجلي



رايد ماسك شماغه بيده ومغطي عيونه بذراعه ويشاهق



رايد بصوت باكي = خلوني مالكم دخل فيني ...



مشعل = خلاص رايد انا ابقول لابوي تقعد عندنا لين يستاجر عبد الله استراحة ثانية



رفع رايد وجهه يطالع مشعل ودموعه على خده ...



رايد = مشكور مشعل بس خلاص انا ابي اعتمد على نفسي .. وبعدين انت بيتك بنفس حارة عمي .. مابي عمي يشوفني



منصور = طيب وين تبي تروح الحين ... صح على فكرة ليه ماتروح لخوالك



التفت رايد لمنصور معصب



رايد بصراخ = لا عمي ولا خالي ... مابي احد منهم ... خلاص خلوني بحالي مالكم دخل فيني ... كلهم بيشوفون منهو رايد ... ( وغطى عيونه بذراعه وبكى )



تلفتنا انا ومنصور ومشعل نطالع بعض



مشيت خطوة عشان اقرب لرايد اكثر ولفيت ذراعي على اكتافه وانحنيت عليه اطالع وجهه



عمر = خلاص رايد ... انا بيتي مافيه احد ... انت تعرف ماعندي لا اخوان ولا اخوات حتى امي متزوجه ...



رفع رايد راسه وابعد يدي عن اكتافه بعنف



رايد بصوت باكي = انا سمعتك تقول لمشعل مانت موافق .. ماني محتاج لكم لا انت ولا غيرك



ومشى يبي يروح بس مسكته قبل يتعداني



عمر = يابن الحلال اصبر .. ( وحطيت يدي على كتفه ) ياخي انا بس طريقة مشعل استفزتني شوي ... يتصرف كأن البيت بيته عشان كذا عصبت ( وطالعت مشعل وبعدها نزلت نظري لرايد اللي منزل راسه بحزن ويشاهق ) حياك الله ببيتي ... انا تراني وحيد لا اخوان ولا اخوات وابيك تسليني بالبيت .. والحين بعد مافيه استراحة اسهر فيها مع الشباب .. والله ابطفش بالبيت لحالي ... تعال تسليني واسليك .. البيت صاير كأنه مهجور وانت على الاقل احسن من هالجنون اللي مستفيده من بيتي



مشعل = افاااا يبي يكحلها عماها



منصور = هههههههه رح يارايد مع عمر تراه يقصد انه خايف من هالجنون ويبيك تجسره هههههههههه



رفع رايد نظره لي يطالعني وهو ساكت



عمر = وش فيك تطالعني ( ولفيت ذراعي على اكتافه وقربته مني ) خلاص موافق تسكن معي ؟ ... والله تراني لحالي بالبيت مامعي احد



فجأة لف رايد يدينه حوالين خصري وضمني وغطى وجهه بصدري وبكى اكثر



تفاجأت من حركته .. والصراحة انحرجت من مشعل ومنصور ... اول مرة احد يضمني كذا



متعود على البكوس والضرب والهواش مع الشباب اما واحد يبكي على صدري اول مرة ... تنهدت رايد مراهق الى الحين



سمعت رايد يتكلم وهو يبكي بس قدرت اميز كلامه



رايد بصوت باكي = ياليتني مت مع امي وابوي



لفيت يدي على رايد وضميته اكثر وابتسمت



عمر = يله مشينا









دخلنا انا ورايد بيتي ... ودخلنا الصاله عند التلفزيون



عمر = حياك رايد



منزل راسه وساكت مانطق بكلمة طوال ماحنا بالسيارة لين وصلنا البيت



جلس على كنب الصاله بصمت



ركبت الدرج بصعوبة ورحت لغرفة امي وقفلتها ... بعض الاحيان اذا كان علي مذاكرة انام بغرفة امي ..



صح على طاري امي يمكن تجي بكرة او بعده ... مر عليها اسبوعين ... لازم انبه عليها



اتصلت على امي وعلمتها ان احد الشباب عندي بالبيت ومايحتاج هي تجي



امي = بس ياوليدي المطبخ اخبره فاضي .. وماجبت لك شي وانا امك



عمر = مايحتاج يمه انا اشتري اللي احتاجه لا تتعبين نفسك .. اقدر ادبر نفسي



امي = وخويك الى متى بيقعد عندك بالبيت



عمر = مدري الصراحة



امك = طيب لا تقطعني ... انا اذا بغيت اشوفك غير اجيك بالبيت .. انت الله يصلحك لا تزورني ولا تسأل عني



عمر = وش اسوي نص اليوم جامعة والنص الثاني نوم ههههههه



امي = الله يهديك



سكرت عن امي ونزلت تحت ومريت المطبخ فعلا فاضي ... انا من يوم تزوجت امي ماطليت على المطبخ وما اهتميت وش ينقصه ... اللهم الثلاجة اشوف امي وش جابت اخذه واروح فيه للاستراحة ...



طلعت لرايد ولقيته جالس و سرحان



جلست بجنبه وسألته



عمر = وش فيك رايد ؟



هز رايد راسه بلا وهو ساكت



صح تذكرت ... سيارتي بالورشة لازم اروح لها الحين واشوف التكاليف عشان بكرة بالجامعة اخذ بطاقات معاذ ومصعب الخاصة للكلية



لا يمكن افوّت الفرصة علي .. ابغير فيها من الى بس عشان تاخذ تكاليف اكثر



قمت واقف والتفتت لرايد ...



عمر = معليش رايد ابروح لسيارتي بالورشة قبل يسكرون ... البيت بيتك خذ راحتك



ساكت وما يرد علي .. تنهدت وطلعت من البيت احاول اسرع بس من وين اقدر اسرع وانا اعرج .. ما اقول الا حسبي الله عليك يامعاذ ..
















وبسْسْ ..


 

رد مع اقتباس
قديم 08-14-2020, 11:29 AM   #14
JAN
مِرأة وٓاحدة … إنعِكاسات شٓتى !

الصورة الرمزية JAN
JAN غير متواجد حالياً

بيانات اضافيه [ + ]
 رقم العضوية : 115
 تاريخ التسجيل :  Mar 2020
 العمر : 23
 المشاركات : 9,849 [ + ]
 التقييم :  23316
لوني المفضل : Black
شكراً: 0
تم شكره 6 مرة في 6 مشاركة

مشاهدة أوسمتي







* الجــزء الحــادي عشر *
















* عمر *



طلعت من الورشة مستانس ... الحمد الله طلبت يعدلون فيها من الى ... طلبت يحطون زجاج من افضل الانواع ... وطلبت يغيرون كل الكفرات مع ان المتضررة كفرة وحدة بس .. نذاله بمعاذ غيرت الكفرات كلها وطلبت يعدلون الخدوش ويصبغون السيارة كامل ..



هذا غير قطع الغيار الثانية وما اطلب الا قطع الغيار الاصلية والغالية ... المهم مجموع التكاليف 15 الف ...



طالعت الفاتورة اللي اخذتها كدليل اعطيها معاذ عشان يصدقني ... ماش احس التكاليف شوي عليه ...



بكرة ان شاء الله راح اخذ بطاقته وبطاقه مصعب





دخلت البيت ولقيت رايد نايم على الكنبة بالصاله ... تنهدت يوم شفته



وش مصير هالولد ... احس اني نشبت فيه صدق .... صح يكسر خاطري بعض الاحيان بس عاد لازم يرجع لاهله ... الى متى بيظل متشرد كذا



رحت فوق وانا متضايق من رجلي ... تعورني مررررة



غيرت ملابسي ولبست ملابس رياضية ... الثوب يضايقني بالجرح اللي بفخذي وصعب امشي فيه وانا اعرج ... افففف حسبي الله عليك يامعاذ



اخذت الاب توب و نزلت تحت ناوي اطقطق شوي و انام بالصاله عند رايد ... تعودت اصلا النوم على الكنبة ...







الساعة 4 الفجر



تحركت وانا نايم منزعج من ريحة الطبخ و سمعت خرفشه بالمطبخ ..... فتحت عيوني وطالعت الكنبة اللي نام عليها رايد ولقيتها فاضية ... اكيد هو اللي يخرفش بالمطبخ ... عادته بالمطابخ مايخليها ...



فار مطبخ هذا



قمت ورحت للمطبخ اشوف رايد ... ولقيته حاط قدر صغير على الفرن ويحرك اللي فيه بملعقه صغيره



سألته وانا احك راسي مكسل



عمر = وش تسوي



التفت رايد لي



رايد = آآآ ... جوعان ومالقيت بالمطبخ شي اكله ... بس لقيت رز وقاعد اطبخه ( التفت لقدره وبعدها التقت لي ) عمر ماعرفت اضبطه ... كيف يسوون الرز



تقدمت للفرن وطالعت القدر ولقيته ماء يغلي وفيه شوي رز



انا ماعرف اطبخ بعد ... كثر خيري اعرف اسوي شاهي



عمر = امممم حطيت ملح ؟



رايد = ايه ... بس ذقته طلع ماهو حلو



حركت يدي متملل والتفتت ناوي اطلع من المطبخ



عمر = المهم شي يملي بطنك مب لازم يطلع حلو ... المهم بس نعسان ابي انام عندي جامعة بكرة



ورجعت انام









الساعة 10 الصباح في الجامعة



دقيت على معاذ يقابلي عند مدخل مبنى قسمهم



ربع ساعة وجا ... كان معصب وانا عكسه مستانس



معاذ معصب = ذليت ابونا ... اخلص وش تبي ؟



عمر بابتسامة اغيضه = ابي سلامتك حبيبي ( ومديت يدي ) بطاقتك وبطاقك اخوك يالحبيب





طير معاذ عيونه = ول ... امداهم يحددون التكاليف ... الحادث امس .. مسرعهم ؟



عمر = امس دخلت السيارة ووقفت فوق روسهم لين حددوا التكاليف ( وعشان اقهره بالبملغ مديت عليه الفاتوره ) وهذي الفاتورة ..



اخذ معاذ الفاتورة مني وقعدت يقرا وشهق ورفع راسه لي



معاذ = 15 الف صاااااحي انت .. ( ونزل نظره للورقه وبعدها رفع راسه لي مصدوم ) وبعدين وش قطع الغيار والخرابيط اللي انت طالبها ... ياخي قلنا تصلح سيارتك بالاشياء الاساسية بس



حركت اكتافي لا مبالاه



عمر = والله عاد سيارتي واسوي فيها اللي ابي ... بتدفع والا علمت عمي باللي صار امس ... ولا تنسى تراك انت المخطي .. ولا تحدني اوصل الموضوع للشرطة



دفعني معاذ على ورا بقوة منقهر



معاذ معصب = كنت امززززح ... امزح ... امزح ... ابي اخوفك بس ... ياكلب 15 الف من وين ادبرها ...



عضيت على شفايفي بألم ... دفعته لي خلتني اوطى على رجلي اللي تعورني.. حسيت بالخياطة انفكت



رفعت راسي له وحاولت اخفي ملامح وجهي عشان مايعرف انه عورني ويتشمت ... بسيطة يامعاذ ماشفت شي



عمر متضايق = ادفع وانت ساكت والا خليت الشرطة تصفي الحساب بينا



قعد يطالعني معاذ وهو ساكت ومن انفاسه واضح انه منقهر وبقوة



الصراحة خفت من نظراته وسكوته .. من نظراته كأنه يتعودني مع انه ساكت



احم



عمر = آآآ ... يله اخلص علينا .. فاضيلك انا ؟



طلع معاذ محفضته ومد علي بطاقة الصرافه حقته



معاذ = راح اكسر خشمك ياعمر



عمر = اهاا بس ( واخذت البطاقة منه ) وين بطاقة مصعب ؟



معاذ بصراخ = وش تبي بمصعب ... اظن اللي غلط عليك انا مب مصعب



عمر بغرور اغيضه = مكافأتك ماتكفي تجمع 15 الف وانا ابغى فلوسي بسرعة ... واحمد ربك اني وافقت تسدد اقساط .. المفروض يكون كاش عشان تعرف ان الله حق وماتمزح مرة ثانية ... واخلص علي عطني بطاقة مصعب وراي محاظرة



معاذ معصب = الله لا يوفقك



عمر = واياك



طلع جواله واتصل على اخوه وهو منقهر مني



وطلب من اخوه يجي عند مدخل مبنى قسم معاذ



وعرفت من كلام معاذ معه ان مصعب ماهو راضي يعطيني بطاقته



ابتسمت .. احب اشوفهم معصبين ومنقهرين وحالتهم حاله ..



سكر عن اخوه وهو ينافخ ووقف بعيد عني يحتري مصعب



احترينا عشر دقايق وشرف الزفت الثاني ووقف عند اخوه



قربت عندهم وانا ساكت



التفت مصعب لي وهو معصب



مصعب بقهر = انا وش علي ياعمر ... اللي غلط عليك معاذ مب انا .. وش ذنبي



عمر = ذنبك انه اخوك ... هات بطاقتك



مصعب بصراخ = اخذت بطاقه معاذ وتبي بطاقتي بعد ... وحنا من وين لنا .. خذ وحده وخل الثانية لنا .. ماني معطيك بطاقتي لو تلحس السماء



مسك معاذ يد مصعب يترجاه



معاذ = اتركه عنك .. تكفى مصعب نبي نسد فمه .. الكلب يبي يوصلها للشرطة عاد بعدها دبرها عند ابوي وجدي



التفت مصعب وصارخ بوجه اخوه



مصعب = ماكبر راسه علينا الا جدي ... ماني معطيه شي



التفتت لمعاذ احاول اسمع مصعبوه التيس



عمر = خلاص اجل شكلكم ماتبون نحلها بيننا ...



معاذ = كللللل تبن انت ( والتفت لمصعب ) تكفى مصعب تكفى .. انا الغلطان يقالي ابمزح معه ... مادريت انه بهالنذاله .. تكفى مصعب فكنا منه



سكت مصعب والتفت لي يحاول يهدي نفسه ... اخذ شوي وبعدها طلع محفظته



مصعب = خذ ... ( وحذف بطاقته علي وطاحة بالارض ) احاول اعزك واحترمك بس تصرفاتك تكرهني فيك



وراح بس وقف على بعد خطوات بسيطة والتفت لي



مصعب = اترك لنا فرصه نذكرك بخير بعد موتك ... ولو مرة بس ياعمر ولو مرة



وطالعني شوي يحتريني اتكلم .. لفيت وجهي عنه وانا ساكت



بعد ماشاف مني رد راح



معاذ = والله والله ماراح اسكت عنك .. وتشوف



وراح ورا اخوه



نزلت نظري لبطاقة مصعب اللي طاحت بالارض



اترك لنا فرصه نذكرك بخير بعد موتك



بعد موتي ... معقول مالي خير ابد يذكروني فيه



بعد موتي



حاولت اتذكر شي طيب سويته ... لا صلاة بوقتها .. واغاني .. وسهر ووو .. وكرهي لعيال عمي



بعد موتي ... وش بيقولون عني اذا عرفوا اني مت



عمر مات الله لا يرحمه كان شري و موذي .. شهقت



مصعب انا ماكرهكم ... انا ... آآآآ .. انا احسدكم



ايه انا احسدهم .. احسد عيال عمي



لهم اخوان ... لهم اب .. لهم اخوات .. لهم عايلة تحتريهم اذا غابوا ..



انا ماعندي ولا شي .. حتى امي اخذوها مني ... انا ما اكرهم .. احسدهم



انحنيت واخذت البطاقة ورحت اعرج بس ماتحملت عوار رجلي وجلست على اقرب كرسي تحت الشمس



انتبهت ان ثوبي من عند فخذي فيه بقع دم خفيفة بسبب الجرح ... رفعت راسي منحرج من بقع الدم لا يكون احد يشوفها بثوبي



حطيت يدي على فخذي بتفكير سارح .. لو الجرح هذا بمعاذ او مصعب ... بيلقون ام تداريهم .. بيلقون اب ينقلهم بنفسه للمستشفى .. بيلقون اخت تخاف عليهم



انا ماحد جاب خبري حتى يوم شافوني اعرج قدامهم ماحد اهتم .. وبسهولة مشت كذبه بسيطه عليهم .. لو معاذ او مصعب عند امهم و ابوهم بيكشفونها بسرعة .. بس انا لا . ماعندي اب ... ولا عند ام متفرغة



رفعت راسي يوم حسيت دموعي بتطلع .. وين بالجامعة .. فشيله اصيح



رحت اتلفت احاول انسى وقمت بصعوبة رايح لدورة المياة اغسل بقع الدم







الساعة 1 الظهر



طلعت من الجامعة وانا متعكر مزاجي وكلمة مصعب تزن باذني



اترك لنا فرصه نذكرك بخير بعد موتك



سمعت احد يناديني عند المواقف التفتت وكان منصور



منصور = زين اني لحقت عليك قبل تروح



عمر متضايق = وش عندك



منصور = عمر والله انه حجّر علي ماقدرت الا اقوله عن مكانه



قطبت حواجبي مستغرب



عمر = وش ؟



منصور بضيق = نايف



عمر = وش فيه .. انمسك ؟



منصور = ياليت ... بس قبل شوي كان واقف عند سيارتي يحتريني ولما شافني سألني عن رايد



طيرت عيوني



عمر =.. نايف بالجامعة هنا ... ليه مابلغت عليه تجي الهيئة تمسكه



منصور = تبي تنكبني معه ... الهيئة ماسكته ماسكته اذا بغت بس خلهم يحددون مكانه ... مابي ابتلش مع نايف



عمر بملل = طيب وش يبي منك ؟



منصور بضيق = اقولك يبي رايد



عمر = افففففف وش يبي منه بعد ؟



منصور = مدري ... بس اضطريت اقوله انه عندك ...



شهقت



عمر = ياخبل ليش تعلمه ؟



منصور = شسوي حجرلي عند سيارتي لين علمته وشكله معصب .. انتبه منه



التفتت عنه بضيق .. كمل منصور كلامه



منصور = مدري وش يبي من رايد بالضبط ... بس انا علمتك عشان تنتبه لرايد



حركت يدي بضيق



عمر = يصير خير



ورحت لسيارتي و توجهت للبيت وانا سرحان



ليه اخذت من مصعب بطاقته ... وش سوا لي ... معاذ هو اللي ضرني ... ليه أذي مصعب معه



احس بضيق ... افففف ونايف هذا بعد مدري من وين طلع .. وش يبي هذا.. ماخلصنا من سالفة نايف وش يبي من رايد بعد





دخلت البيت ولقيت رايد بالصاله نايم على الكنبة



جلست بتعب وسندت راسي ورا على الكنبة وانا مغمض عيوني بقوة من عوار رجلي



= عمر انت جيت



التفتت لرايد وشفت يعتدل جالس



رايد = مانتبهت عليك يوم دخلت ( وسكت شوي يطالعني ) وش فيك عمر شكلك تعبان



هزيت راسي بلا



عمر = مافيني شي ( وتذكرت شي كنت ناسيه ) صح ماجبت غدا .. كنت ناوي امر المطعم بس نسيت



قام رايد ووقف قدامي ..



رايد = عطني مفتاح السيارة انا ابروح



مديت يدي ومسكت يده وجريته بجنبي عشان يجلس



عمر = اجلس فيه شي ابقوله لك



رايد مستغرب = وش



عمر = تدري ليه حنا طلعنا من الاستراحة



رايد = لا



عمر = سعد مسكته الهيئة وهم يدورون نايف الحين .. شفت كانوا يبون يورطونك



شهق رايد متفاجئ وبعدها نزل راسه بصمت سرحان



عمر مستغرب = وش فيك ؟



رايد بحزن = ليتهم ورطوني معهم .. على الاقل بيصير لي غرفة انام فيها



رفعت حواجبي مستغرب



عمر = خبل انت



رايد = ايه خبل .. لا عندي وظيفة ولا دراسه ولا بيت .. حتى اخواتي يحتاجوني بس لاني بزر ماقدر اسوي لهم شي ( وسكت شوي ) لو القتل حلال كان ماقصرت مع عمي ... ( وسكت يحاول يمنع دموعه تنزل ) بيتنا اهم شي عندنا باعه .. شهرين او اكثر وانا على ثوبي هذا ماغيرته ... بغمضة عين صار ماعندي ولا شي



ومسح دموعه يشكوى



رايد = اذكر ابوي ماكان يردلي طلب ماعمره قهرني مثل مايسوي عمي ... حتى عمي ماكان كذا معنا بس مدري وش غيره علينا ... ابوي اللي ابيه يعطيني كان يعتمد علي بكل شي لاني اكبر عياله بس هو راح .. ليتني رحت معه يااااااااليت



مديت يدي متأثر ومسحت على شعره وضميت راسه على صدري



عمر = خلاص رايد .. انت رجال لازم تعتمد على نفسك ... ( لف رايد يديه على خصري ورص وجه على صدري يبكي ) انت احسن مني رايد .. انت شفت ابوك وتذكر شكله وهذا اهم شي .. صدقني ... حلو لما تذكر شكل ابوك وتذكر مواقفه وتذكر كلامه .. انا ماعمري شفت ابوي ولا اعرف شكله حتى ... ماعندي حتى صورة له ... وفوق هذا ماعندي اخوان ولا اخوات .. انت عندك هدف الحين .. اخواتك يحترونك ... انا ماعندي احد يحتريني .. ماعندي هدف .. حياتي ممله .. مااحس بقيمتي



رفع رايد راسه لي يطالعني ... ابتسمت ومسحت على شعره صار وجهه قريب من وجهي ودموعه على خده .. رايد على كل شي يبكي .. مراهق مابعد قوا قلبه



رايد = انا ادري اني مضايقك .. ادري ان امك ماتقدر تجي هنا عشاني



عمر = امي مالك دخل فيها ... امي متزوجة وعند زوجها تجي هنا وش تسوي ؟



ابتعد رايد عني وهو يهز راسه بلا



رايد = انت مانت فاهم علي



فاهمك بس وش بيدي اسويه



ما اقول الا حسبي الله على عمك اللي بهذلك وبهذلني معك





فجأة سمعت جرس الباب يطق .... شهقت لا يكون هذا نايف ...



التفت رايد لي يسألني



رايد = تحتري احد ؟



التفت رايد وحطيت يدي على فخذه



عمر = اسمع رايد .. نايف يدورك ... مافيه غيره بيجينا الحين ... ابطلع له الحين اصرّفه ... انت لا تطلع تفهم ؟



رايد وهو يمسح دموعه مستغرب = ليه يدورني .؟



عمر بضيق = مو وقتك الحين



وقمت بصعوبة وانا اجر رجلي ... انا متأكد انها انفكت الخياطة حسبي الله عليك يامعاذ



فتحت الباب وكان فعلا نايف متلثم ولما شافني وهو يفك اللثمة



فجأة دفعني على ورا ودخلني داخل البيت وسكر باب الشارع وراه



عضيت على شفايفي بألم ... وطيت على رجلي مرة ثانية .. حطيت يدي على فخذي بألم



طالعت نايف انا معصب منه



عمر = وش تبي ؟



نايف = نادلي رايد ابيه



استغربت واضح انه معصب ... غريب وش مسوي له رايد عشان يعصب هالكثر



عمر = رايد ببيت عمه وش يجيبه عندي ؟



مسكني نايف مع ياقة ثوبي ولصقني على الجدار



نايف = ادري انه عندك ... ( وصرخ بوجهي ) نااااااده لي الحيييين



مسكت يديه ودفعته عني



عمر مصعب = لا تخليني ابلغ الهيئة عليك تجي تقلعك ..



نايف = مو قبل ما اشوف رايد .. وادري ان بيتك مافيه حريم



وراح يركض لداخل البيت



شهقت ...



عمر بصراخ = هيييييه انت



حاولت الحقه وانا اعرج بس هو اسرع مني ودخل البيت وانا الى الحين بالحوش








 

رد مع اقتباس
قديم 08-14-2020, 11:32 AM   #15
JAN
مِرأة وٓاحدة … إنعِكاسات شٓتى !

الصورة الرمزية JAN
JAN غير متواجد حالياً

بيانات اضافيه [ + ]
 رقم العضوية : 115
 تاريخ التسجيل :  Mar 2020
 العمر : 23
 المشاركات : 9,849 [ + ]
 التقييم :  23316
لوني المفضل : Black
شكراً: 0
تم شكره 6 مرة في 6 مشاركة

مشاهدة أوسمتي




* الجزء الثــاني عشــر *
























































* رايد *





هييييه انت



رفعت راسي يوم سمعت صوت عمر ... غريب من اللي بيجي بهالوقت وليه صارخ عمر عليه ... لا يكون احد من اهله .. والله فشله .. احس اني مضايق عمر احس نفسي عاله عليه



فجأة انفتح الباب اللي يطلع للحوش ...



وشهقت وقمت واقف لما شفت نايف هو اللي فتح الباب



بسم الله الرحمن الرحيم .. وش مدخله هذا هنا



يوم شافني نايف بالصاله وهو يجي يركض متوجه لي



نايف = انت هنا ياااكلب



تراجعت على ورا خايف منه .. شكله معصب



رايد بخوف = نايف ؟



لوا نايف يدي ورا ظهري ومسكني مع رقبتي وخلاني اركع غصب



رايد بخوف = وش .. وش سويت .. آآآآ .. وش تبي



نايف بصراخ = قسم بالله ان ماشربت من دمك الحين ماكون نايف ... جاي تتمسكن عندنا وانت داهيه .. يافتااااااااااان



وصارخت باعلى صوتي يوم لوا يدي اكثر



نايف معصب = ليه تبلغ علينا ياحماااااااااااار



= نااااااااااااااااااااايف



خفف نايف يده عني يوم سمع صوت عمر يناديه



حررت نفسي من نايف وابتعدت عنه وخليت طاولة الصاله الصغيرة الزجاجية بيننا



رايد بخوف = وش فيك انت علي ... ياخي خلاص ماني رايح لاي مكان تبيه .. فكني عاااد



دخل عمر الصاله وهو يعرج ووجه كلامه لنايف



عمر = حتى لو بيتي مافيه حريم مايحق لك تدخل بهالطريقة ... وفارق اطلع برا



طنشه نايف وطالعني بعيون معصبة



نايف = لا تحط نفسك مسكين ... علمني وش سوينا لك عشان تبلغ الهيئة علي وعلى سعد



سكتت مستغرب .. حسبته جاي يبي يرسلني ... والله مابلغت الهيئة .. وش قاعد يقول هذا



رديت عليه مستغرب



رايد = مابلغت الهيئة



عصب نايف اكثر من كلمتي وجا عندي معصب ومسكني مع يدي ولواها ورا ظهري مرة ثانية



نايف بصراخ = ما انمسك سعد الا يوم جيت انت للاستراحة ( ولوا يدي اكثر وصارخت بقوة من عوار يدي .. شوي وابكي ) خل الهيئة تنفعك الحين ياكلب ... جاي تتمسكن عندنا وانت حية من تحت تبن





رايد بألم = والله مابلغت احد ... آآآآ .. ارقامهم ماعرفها وشلون ابلغ .. خلني عورتنييييييييي



جا عمر وحاول يحرر يدي من نايف .. نايف يسحب وعمر يسحب



عمر بصراخ = اترك الولد ... الهيئة من قبل يجي رايد للاستراحة وهي تراقبكم



نايف = العب غيرها حبيبي ... من زمان وانت والشباب تقولون الهيئة تراقب وتراقب وماشافنا سوت شي .. وش معنى يوم جا هالبزر للاستراحة وهي تمسك سعد ؟



عمر = عاد صدفة تحركت الهيئة وهو موجود



عوروني .. كل واحد يسحب يدي من الثاني ... وانا معطيهم ظهري بسبب مسكت نايف لي خلاني غصب اعطيهم ظهري



رايد بألم = والله مابلغت احد ... آآآآآه يدي يدييييييييييييي



عمر بصراخ = ياخي فكّه ( وسحب عمر يدي من نايف بقوة )



واول ماتحررت من نايف .. ركضت واندسيت ورا ظهر عمر



نايف بصراخ = انت لا تتدخل ياعمر



عمر بصراخ = ببيتي وتقول لا تتدخل



شديت ثوب عمر اكثر وغطيت وجهي بظهره بحزن ... ليه يصير معي كذا .. والله مابلغت احد ... بس لأني يتيم يستقوون علي



سمعت صوت نايف



نايف = هو الوحيد من الشباب اللي علمناه مكان البيع واسم العامل وكل شي .. مافيه غيره بلّغ



طليت من ورا عمر ارد عليه ( كلهم اكبر واطول واضخم مني )



رايد بحزن = قسم بالله ماعلمت احد عن مكانه .. وبعدين انا رجعت لك الفلوس يعني هذا دليل اني مارحت



نزل نايف نظره لي وهو ينافخ من العصبية



نايف = ايه ادري انك جاي عندنا تتمسكن والا انت مانت محتاج ولا شي ... ( وحاول يمسكني بس عمر منعه )



عمر = ياخي انت ماتفهم ... يقولك ماهو هو



انتبهت على عمر واقف على رجل وحدة ...



نايف = عمر ابعد ... لا تخليني اتعامل معك باسلوب ثاني ...



عمر بعصبية = وش بتسوي يعني ؟ ... نويفوه انقلع اشوف



نايف = ماراح انقلع الا وانا مبرد كبدي من هالفتّان اللي وراك



عمر = لا تحدني اسوي اللي انت خايف منه وابلّغ الهيئة صدق تجي تاخذك



طليت اناظر نايف مرة ثانية ولقيته يطالع عمر معصب وساكت



عمر = وش تحتري يله انقلع .. براااا



فجأة هجم نايف على عمر



شهقت بخوف وابتعدت عنهم



شفتهم متشبثين ببعض وكل واحد يحاول يطرح الثاني بالارض



تلفتت يمين يسار مدري وش اسوي .. ورجعت اطالعهم بخوف



مع محاولاتهم وشجارهم .. قدر نايف يطرح عمر على الارض ..



شهقت بقوة وحطيت يدي على راسي بصدمة يوم شفت عمر يضرب براسه على الطاولة الزجاجية يوم طرحه نايف وبعدها صار عمر متمدد على الارض بدون حركة



طيرت عيوني وتجمعت الدموع بعيوني باقل من الثانية وصرخت بألم



رايد بصوت باكي = عممممممر



مشيت وانا رجولي يالله تشيلني من الصدمة وجلست عند عمر خايف عليه



متمدد على بطنه .. حطيت يدي على ظهره وهزيته



رايد = عمر .. عمر رد علي صارلك شي



رفعت راسي لنايف ولقيته واقف و منصدم من طيحة عمر على الطاولة



اخذ نايف شوي لين استوعب



نايف بخوف = اوووووه عمر ماكنت اقصد



ابعد نايف الطاولة الصغيرة بسرعة وجلس بمكانها وقلب عمر على ظهره



شهقت لما شفت الدم على الارض .. وعمر مغمى عليه .. مايتحرك



سمعت نايف يهمس



نايف بهمس = ياربي انا وش سويت ( وحط يديه على صدر عمر يهزه ) عمر ماكنت اقصد اطرحك على الطاولة



عمر مغمى عليه .. مغمض عيونه وانفاسه هادية مو كأنه قبل شوي يصارخ ويعصب مع نايف .. مايل راسه ناحيتي وبدا الدم يغطي وجهه



سكتت وانا اشوف الدم يطلع من راس عمر



ريان .. اخوي ريان كانت الاصابة براسه يوم يصير الحادث علينا ... وقتها طلعت من السيارة بصعوبة احبي من الم رجولي ولقيت ريان اخوي متمدد على الارض قريب من سيارتنا .. حبيت على الارض لين وصلته ولقيته وجهه مغطى بالدم مثل عمر كذا ... ريان اخوي اللي اصغر مني بسنه ... اشتقت له



ريااااااان



انحنيت وركبت على عمر اضمه ... ودم عمر يذكرني بامي وابوي وريان واخواني والحادث



حسيت بنايف يجرني مع فنيلتي من ورا بعنف وقومني عن عمر وخلاني اوقف غصب عني



نايف بعصبية = انت السبب



وعطاني كف قوي



حطيت يدي على خدي وانا ساكت و صورة ريان مافارقتني .. صورة امي وابوي والسيارة والاسعاف



التفتت لعمر اشوفه بس فجأة لوا نايف يدي ورا ظهري



نايف = من يوم جيتنا ماشفنا الخير ... ( ولوا يدي اكثر بس الالم اللي بصدري اقوى من اني اصرخ )



دفعني نايف وطحت على الارض وركلني مع بطني



حطيت يدي على بطني وانا ابكي ودموعي على خدي ... انا ضعيف .. بزر متشرد .. ليتني رحت معك ياريان



سمعت نايف يكلمني



نايف = اسمع ياكلب اللي صار هذا كله بسببك وقسم بالله ماشفت مني شي يارايد ...



وراح عند عمر وجلس على الطاولة الصغيرة وهو مبتلش بعمر.. محتار ويفكر مايدري وش يسوي بالورطة



جلست بالارض بحزن وقعدت اطالع عمر



متمدد على ظهره بدون حركة ...



اخذنا ربع ساعة وحنا على حالنا



نايف يفكر وانا ساكت وخايف من كل شي ...



قام نايف و اخذ شماغ طايح بالارض ورماه على وجهي ..



نايف = خذ ... لف راسه نبي ننقله للمستشفى



ابعدت الشماغ عن وجهي وعرفت انه شماغ عمر



جا نايف وجلس قدامي ومسكني مع ذراعي بعنف وقرب وجهه من وجهي



نايف بهمس وبعصبية = نبي ننقله للمستشفى كأنه حادث عادي تعثر وطاح على الطاولة .. اذا قلت لاحد انه انا قسم بالله لتشوف مني شي ماشفته ... .. قل للمستشفى انه تعثر وطاح ... انت تفهم



سكتت ومارديت عليه



نايف = تراني اعرف وين حارة عمك واعرف اختك الصغيرة ... اذا بلغت علي باللي صار ما احد بياكلها الا اختك



شهقت و طيرت عيوني بنايف



رايد = اختي ؟



نايف = ايه اختك ... لا تحسب انك اذا بلغت علي خلاص انتهينا .. لا حبيبي اختك الحلوة عدة مرات اشوفها بالشارع بحارة مشعل وجد عمر وعارفها زين ... اعرف ان البنت العصله المنتفه هذيك هي اختك ... لا تلعب معي عشان ما العب معك .. تفهم ؟



وعطاني كف قوي وقام



حطيت يدي على خدي وانا انفاسي سريعة من الخوف ... دانه .. اذكرها دايم تلعب بالشارع ... لا ... دانه لا



نايف بصراخ = هااااه وش تقول للمستشفى اذا سألوا عن عمر ؟



رديت عليه وانا احس نفسي بتطلع من القهر والخوف



رايد = تـ ... تـ ... تعثر وطاح



نايف = ايه كذا .. وعلم عمر يقول هالكلام .. يله قم ولف راسه



اخذت الشماغ وقمت وتوجهت لعمر المتمدد وجلست على الارض عنده



المكان مليان دم ووجه عمر نصه مغطى بدمه .. مديت يدي ومسحت وجهه بالشماغ وبعدها لفيته على راسه



ناظرت فخذه اللي يعرج منها ولقيت ثوبه من عند الفخذ مليان دم



رفعت راسي لنايف واشرت على فخذ عمر



رايد = رجله مليانه دم بعد



نايف = هذا من الحادث اللي صار له مالنا دخل فيه



جلس نايف من الجهه الثانية من عمر وهو يسألني



نايف = وين مفتاح سيارته ؟



وما انتظر رد مني ... دخل يده بجيب ثوب عمر وطلع مفتاح سيارة عمر وحذف المفتاح علي



نايف = خذ شغل سيارة عمر .. نبي ننقله بسيارته



قمت وانا احس بضيق .. شغلت السيارة ورجعت للصاله



نايف = شفت احد يمشي برا ؟



رفعت راسي .. احاول اتذكر



رايد = آآآ.. مادري مانتبهت



تراجعت على ورا يوم شفت نايف يتقدم لي معصب



نايف بصراخ = اعمى انت ( وضربني كف ) ابروح اشوف واجي .. البس ثوبك خلصني



نزلت نظري اشوف نفسي ويدي على خدي .. صح نسيت اني ماعلي الا الملابس الداخليه .. من يوم دخلت بيت عمر وانا بس نايم او بالمطبخ .. ماطلعت لاي مكان



راح نايف يشوف الشارع .. لبست ثوبي .. وجلست عند عمر وحطيت يدي على صدره



رايد بحزن = عمر انا عاله عليك .. ادري اني سببت لك مشاكل ... منعت امك تجي للبيت بسببي ووتهاوشت مع نايف وسعد بسببي والحين اغمى عليك بسببي



حطيت راسي على صدره بيأس .. ليش يصير معي كذا ... انا ابي اتوظف واعتمد على نفسي وبس ... والله ماقصدي اضر احد ... حتى دانة ماسلمت مني ... مابي اضر اختي ياعمر ... مابــ



= يله قم



رفعت راسي لما سمعت صوت نايف يصارخ علي



رفع نايف عمر مع صدره .. وانا رفعت عمر مع رجليه



وطلعنا من الصاله



سمعت نايف يكلمني



نايف = الحين جاي تصيح ؟ ... انت اللي بديت وبلغت علينا يارايد ... والى الحين ماشفيت غليلي منك ...



سكتت عنه ومارديت ...



ركبنا عمر بالسيارة ومددناه على المرتبة الخلفية



نايف = يالله رح وده للمستشفى ..



رفعت راسه له مستغرب .. لا يكون بيجلس ببيت عمر ياخذ راحته



مشيت بسرعة وسكرت باب بيت عمر عشان نايف مايدخل والتفتت له بصمت



نايف معصب = وش تحتري .



وجا وسحبني بعنف وركبني بسيارة عمر بمكان السواق



مديت يدي ابي اسكر باب السيارة بس فجأة نايف مسك شعري وسحبني ناحيته



و قرب وجهه من وجهي وهمس وهو معصب ويهدد



نايف بعصبية = مثل ماقلتلك .. قلهم عمر تعثر وطاح ... ان علمتهم عني قسم بالله اخليك تصيح على اختك المنتفة ... تراني اعرف شكلها



و دفعني وسكر الباب بقوة



حركت السيارة بسرعة عشان ابعد عنه ...



قسم بالله اخليك تصيح على اختك المنتفة

قسم بالله اخليك تصيح على اختك المنتفة





انتبهت لنفسي ان ابكي بصوت مسموع .. وقفت السيارة بجانب الطريق ونزلت راسي على الدركسون وبكيت اكثر



تعبت .. ابي ارتااااااح



اخذت خمس دقايق وانا على وضعي .. كاره نفسي



رفعت راسي يوم تذكرت عمر .. التفتت ورا ولقيته مغمى عليه وانفاسه هادية



اسف ياعمر .. بس دانة اهم منك ... ماراح اسمح لك تبلغ عن نايف



حركت السيارة ورحت على المستشفى ودخلوا عمر داخل وانا جلست انتظره



ربع ساعة وجاني دكتور مصري



الدكتور = انتا اللي جبت المريض عمر للمستشفى



رايد بحزن = ايه



الدكتور = مين اللي عمل بعمر كده ؟



سكتت شوي لما تذكرت كلام نايف



رايد = تعثر و.. و .. وطاح



الدكتور = اه يعني تعثر من ايه ؟



شوي وابكي .. رفعت راسي للدكتور وسألته



رايد = عمر قام .؟



الدكتور = لأه .. لساتو مغشى عليه .. ماقلتليش تعثر من ايه ؟



نزلت راسي



رايد بحزن = مدري .. كان مستعجل وتعثر بـ .. بـ .. بسلك التلفزيون وطاح على الطاولة .. بس



الدكتور = هوا كده الشباب دائما مستعجل .. خلاص تقدر تروح على بيتك ... عمر بخير



مالي بيت



رفعت راسي للدكتور



رايد = ابي اشوفه



الدكتور = ماينفعش ... خلاص انتا روح ولما يصحى عمر هنده عليك



حركت راسي بلا



رايد = ضروري ابي اشوفه



الدكتور = قلتلك لساتو مغشى عليه .. لما يصحى حتشوفه



وراح



طلعت من المستشفى وانا مدري وين اروح .. مالي بيت .. ولا اهل .. ولا ام ولا اب ... وليت فوق هذا اخواتي يسلمون من شري



رفعت راسي للسماء ... الجو حار ... وتونا بوقت الظهر والشمس حارة



وين اروح ... مافيه استراحة اجلس فيها .. وبيت عمر مابي اروح له .. يكفي عمر اللي جاه بسببي ... هو ماهو اخوي ولا هو قريبي ومابي اصير عاله عليه اكثر من كذا



تلفتت بالسيارات ... الكل متوجه رايح لبيته .. الا انا افكر وين اروح



ياحياة الشقا .. ياحياة الشقا



رجعت للمستشفى وجلست بغرفة الانتظار هارب من حرارة الشمس













قرب يذن المغرب وعمر ماقام



توني سائل عنه ... هم طمنوني بس ليه ماقام الى الحين ؟



اخاف يقوم ويعلمهم عن نايف



اخذت ربع ساعة ورجعت اسال عنه ونفس الشي ماصحى



وهذا حالي رايح جاي رايح جاي لين اذن المغرب



صليت ورحت اسأل عنه واخيرا قالوا لي قام



دخلت عليه وانا فرحان ونفس الشي ابي انبهه واحذره مايعلم عن نايف



وقفت عند سريره واستغربت ... لقيته الى الحين مغمض عيونه وكأنه نايم



ليه يكذبون علي ويقولون قام



رفعت راسي للممرض وسألته



رايد مستغرب = وش فيه .. مو تقولون عمر قام .. اشوفه الى الحين مغمى عليه



رد الممرض علي وهو مشغول بالمغذي



الممرض = مافيه مغمى عليه .. هذا مريض نوم .. الحين هوا فيه يقوم



اخذ الممرض شوي وطلع



نزلت راسي اشوف عمر .. ملفوف راسه بشاش ومكشوف عن صدره العاري



انا السبب ... لو ماجيت عنده في بيته كان ماتهاوش مع نايف .. صح عمر اقشر معي ويضربني ويستحقرني ... بس احسه طيب ... وطوال الشهرين اللي قضيتهم مع عمر بالاستراحة عرفت انه يكره عيال عمه .. يعني هو ماهو اقشر معي انا بس .. يمكن هذا طبعه شري



ليتني شري مثله واخذ حقي بيدي



جلست على سرير عمر لما تذكرت عمي واللي سواه فيني وفي اخواتي



لو ماسكتت له يوم كان يضربني كان ماتمادى معي ... لو صارخت بوجهه وقلت انا رجال اباخذ حقي غصب عنك كان ماباع بيتنا ... ( طلعت دموعي غصب عني ) انا بزر ... انا خواف .. مالي احد اشكيله



مسحت دموعي بيدي وطالعت عمر النايم



حتى عمر ماخليته بحاله .. جلست عنده شهرين وجاه اللي جاه بسببي ..



لاني خواف .. ضعيف



انحنيت على عمر وضميته



رايد بصوت باكي = انا ضعيف ياعمر .. علمني كيف اصير قاسي .. ابي ارتاح من حياتي .. تعبت



وبكيت اكثر مقهوووور



















* عمر *





اخخخ راسي ... راسي بينفجر



حسيت بشي ثقيل على صدري ... حاولت اسحب نفس ..



فتحت عيوني وانا مصدع ... اخخخ راسي ..



حاولت استوعب المكان اللي انا فيه ... كل شي ابيض ... سكتت وانا اسمع صوت شخص يشاهق ... تلفتت بعيوني على المكان احاول استوعب



هذا المستشفى ... وش جابني هنا



سحبت نفس متضايق من الشي الثقيل اللي على صدري وانا الى الحين اسمع اللي يشاهق



حركت راسي ابي التفت لمصدر الصوت بس فجأة صدم خدي براس



قطبت حواجبي مستغرب ... رايد .. هذي شوشة رايد ...



صح هالصوت نفس صوته اذا كان يشاهق... حافظها من كثر مايبكي



بس لحظة ليه يبكي ... نايف .. صح وش صار



نايف .. نايف .. طحت على الطاولة بس بعدها وش صار



نايف ...



مديت يدي بضعف وحطيتها على ظهر رايد وهزيته عشان يقوم عني



مصدع .. راسي بنفجر



عمر بتعب = رايد



سكت رايد فجأة يوم سمع صوتي وقام بسرعة يطالعني



رايد بفرح = عمممممممر



وانحنى علي وسلم على خدي وخدي الثاني وطالعني ووجه قريب مني



رايد بفرح = الحمد الله على سلامتك .. انت طحت على الطاولة اللي بالصاله واغمى عليك .. انا اسف عمر .. انا السبب



طالعت رايد مستغرب .. وجهه حزين .. كأن هموم الدنيا على راسه ودموعه على خده .. وش سوا نايف معه عشان يبكي



عمر بتعب = وش صار .؟ ونايف وينه ؟



اعتدل رايد وجلس وحط يده على صدري



رايد = انت طحت على الطاولة



عمر = اقصد اللي بعدها وش صار ؟ ليش تبكي انت الحين ؟



مسح رايد دموعه بحزن ونزل راسه



رايد = انت تهاوشت مع نايف بسببي لو ماكنت ببيتك كان ماصار اللي صار ( والتفت لي يطالعني ) هذي ثاني مرة تتهاوش مع نايف بسببي ... وامك ماتجي بيتها بعد بسببي ... انا اسف عمر ... ادري اني عاله عليك



سكتت مستغرب ... دموعه الحين اربع اربع عشاني ...



سألته اتأكد



عمر مستغرب = عادي رايد ... انا متعود على الهواش مع الشباب كان بسببك والا بدون



سكت ومارد علي ..



غمض عيوني بقوة لما حسيت راسي زادني ألم



فتحت عيوني وطالعت رايد لقيته منزل رايد وسرحان



عمر = وينه الكلب الحين ؟



التفت رايد لي بخوف



رايد = خلاص راح .. ماعليك منه



عمر = وشلون ماعلي منه .. والله لأبلغ عليه .. شايف الدنـ



وقاطعني رايد وحط يده على صدري يترجاني



رايد بترجي = تكفى عمر لا تبلغ عليه .. تكفى طلبتك



طيرت عيوني مستغرب من رايد



عمر = ليه ؟



رايد بصوت باكي = قل لهم انك تعثرت وطحت بس لا تقولهم عن نايف ( وحب راسي بترجي ) الله يخليك عمر



سكتت مستغرب



كمل رايد كلامه يوم شاف شكلي مستغرب



رايد = نايف هددني باختي دانه .. يقول اذا علمتوا علي ماحد بياكلها الا دانه .. تكفى تكفى عمر لا تبلغ عليه .. خايف على دجانه منه ... تكفى عمر تكفى



وحط راسه على صدري وبكى



رايد = انا تعبت ... كل شي ضدي ... انا طلعت من بيت عمي ابي اشتغل واخذ دانه مو اطلع من بيت عمي واضر دانه ... لو ريان حي كان تصرف احسن مني ... بس انا بزر وضعيف وخواف



مديت يدي وحطيتها على راس رايد ومسحت على شعره



عرفت تسكتنا يانايف .. تسويها مافيه شي بعيد عنك يانايف



رفع رايد راسه يطالعني



رايد = تكفى لا تبلغ عنه ... قل انك تعثرت وطحت .. الله يخليك



هزيت راسي بأيه وانا منقهر من نايف ..



ابتسم رايد بفرح وضمني مرة ثانية



رايد = مشكووووور عمر



كذا راح يدمادى .. يدخل بيتي ويعتدي علي وما اقدر اقول له شي عشان من ؟.. عشان .. عشان دانه





ربع ساعة و جا الدكتور يفحصني



الدكتور = لا ماشاء الله دانتا كويس اوي



عمر = اكتبلي خروج الحين دكتور .. ابي اطلع



دكتور = هوا انا حكتب لك خروج من غير ماتطلبش .. ( وكمل يمزح ) احنا مش عاوزينك



ابتسمت



عمر = هذي الساعة المباركة



دكتور = مرة تانية ماتستعجلش وانتا بتمشي .. مش عاوز اشوفك هنا تاني



التفتت على رايد ولقيته سرحان ورجعت التفت على الدكتور



عمر = ان شاء الله







طلعنا من المستشفى وانا اعرج ومعي عكاز لكن هالمرة عكاز عادي ماهو حق الشيبان



خاطوا الجرح اللي بفخذي مرة ثانية ...



والله حاله صار فيني خياطة براسي وفخذي



ينطبق علي كلمة مرقّع

















الاربعاء .. الساعة 2 الظهر



طلعت من الجامعة اول ماخلصت محاضراتي ... تعبان ... ومصدع



المشكلة ما اقدر اغيب عن الجامعة حتى لو كنت تعبان ... افففف دكاترة مايرحمون



منصور ومشعل وعبد الله عرفوا باللي صار امس مع نايف



اتصلت علي عمتي مها عشان اجي اتغدى عندهم لكن لأن راسي ملفوف بشاش مابيهم يشوفونه ... واضطريت اتهرب منهم وتعذرت باي شي .. المشكلة الحين امي تبيني اتغدى عندها بكرة ... وهي دايما تتذمر اني ما ازورها يعني لو اتعذر منها بكرة راح تزعل مني .. وش السوات ؟



وصلت بيتي ودخلت و لقيت رايد بالمطبخ و يحاول يطبخ الغدا لكن كالعادة ما اشوف بالقدر الا ماء يغلي ورز يتراقص بالماء



التفتت لرايد اطالعه



عمر = الحين هذا تسميه غدا ؟



ضحك رايد



رايد = ههههههههههههه نعمه



ابتسمت .. مسكين الضحكة ماتنشاف منه الا نادرا



عمر = طف عنه بس .. ابروح اجيب من المطعم



نقز رايد وجا عندي



رايد = عطني المفتاح انا ابروح عنك



تنهدت .. و طلعت مفتاحي وعطيته



عمر = طيب .. و انتبه من نايف



رايد = يأذيني نايف عادي .. بس مايأذي احد بسببي ( ومد يده ) عطني فلوس للغدا



عطيته الفلوس وطلع



عرفت من الشباب ان نايف مايروح الا على اللموزين .. ومايروح لاهله ابد .. ومايمشي بالشارع الا متلثم ... من وين تمسكه الهيئة والشرطة وهو مايستخدم سياره عشان يوقفه تفتيش والا أي شي .. و مايركب السيارة الا كراكب ماهو كسائق



بسيطة يانايف .. اجل دانه هااه



اتصلت على امي .. وقلت لها ان هالاسبوع علي اختبارات ..





والحمد الله مشت عليها ..





 

رد مع اقتباس
إضافة رد

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

المواضيع المتشابهه
الموضوع كاتب الموضوع المنتدى مشاركات آخر مشاركة
خالد و بندر *مكتملة* JAN روايات عامية 6 08-10-2020 09:45 PM
سلع أرواح محرمة *مكتملة* JAN روايات عامية 77 08-08-2020 11:43 PM
بنات أكشن*مكتملة* JAN روايات عامية 31 07-04-2020 07:23 PM
هفوات أنانية *مكتملة* JAN روايات عامية 41 06-27-2020 07:09 PM
عَشآن الحُب!*مكتملة* AM. روايات عامية 82 06-23-2020 07:48 PM

شرح حديث

علف


الساعة الآن 09:56 PM