. ✿ 𝚂𝚙𝚛𝚒𝚗𝚐 𝚋𝚛𝚎𝚎𝚣𝚎

المفروض يعني أكون قافله السوشيال ميديا بشكل عام علشان
أخلص أبحاثي و أنجح و كده بس ها أنا ذا ~
كلاكيت تالت مره بداية جديده .

. ✿ 𝚂𝚙𝚛𝚒𝚗𝚐 𝚋𝚛𝚎𝚎𝚣𝚎
15.5.2020

عَدى 90 يوم على آخر مره نزلت فيها الشارع .
كنت فاكره إنه هيبقى ممتع إني أقعد في بيتنا و أخد بريك من السفر
و الكليه و الـكاميرات و المايكات و الـProjects و الـScripts.
بس أكتشفت إن الراحة و التفكير متعب أكتر منهم بمستويات لا تُحصى،
إلي هو أنا بفكر حرفياً في كل وقت و أي مكان و أي حاجة، حتى النُكت
و الاسئلة الهزليه التي لا تهدف إلا للمتعه و لا شيء غير المتعه بقيت بفكر فيها << ده موضوع مرعب أكتر مما يُمكن تصوره.
طول الفترة الأخيره كنت ناقمه على إنشغالي و ليه معنديش وقت كافي علشان أقعد مع نفسي ، دلوقتي بحمدالله إني مكنش عندي وقت < كانت هتبقى تسجيل لأول حالة وفاة لـشخص مخنوق بحبل أفكاره.
من بداية الكورونا و أنا حرفياً مفيش حاجة مررتها مرور الكرام، كل حاجة لازم تبقى تحت فحص و ملاحظة و ليه و فين و إزاي.
و أنتهى بيا الأمر إلى إني محتاجة حد يقتلني أو يخدرني عقبال ما نخلص إلي إحنا فيه ده لأنه تو ماتش تفكير و أنا مينفعش أتساب في مكان لوحدي مع فص مُخي الأيسر و الأيمن أكتر من 3 دقايق .
~
حتى الإنشغال و الأيام المتعبه إلي مكنش في وقت فيها أنك تفكر نعمة من عند الله.

كُل التجارب إلي مريت بيها أول مره سجلت بتكرر تاني بمُنتهى الدقه :
الشعور بالتوهان ✔️
مفيش حاجة أعملها مع ذلك بدخل برضو ✔️
مستغربه كل حاجة و كل حد حرفياً ✔️
وقعت في غرام قسم غرائب و عجائب تاني _رغم انه يعتبر مفيهوش مواضيع أصلا_ ✔️
داخله في فترة اللاب بيلتقط أنفاسه الآخيره و تحركاتي محبوسه في إمكانيات الـMobile المحدوده ✔️
مش عارفه إزاي ممكن أتكلم مع حد ✔️
أفكار لمواضيع بس مش عارفه ابدأ إزاي ✔️
حاسه الوضع غريب ✔️
بستخدم نفس الإيمو بنفس العدد و الترتيب بشكل لا إرداي ✔️

التكرار ده لطيف بشكل غريب كأنه مفيش حاجة أتغيرت كأنه لسه 2015 الموضوع كأني دخلت آلة زمن، أتمنى الموضوع يكمل المره ديه للآخر بدون إعتزالات و كده

من أول لَحظه بدأت أخطط لمستقبلي مش فاكره إني كان عندي حِلم إني أدخل كليه أو تخصص محدد، حتى لـاللحظه الأخيره يوم ما أعلن عن مجموعي في الثانويه مكنتش عارفه هدخل إيه أو هروح فين و هاجي منين، كان هدفي الوحيد على مر سنين عُمري إني يكون عندي القدره إني أنشر نوع من السعادة و الراحه بين الناس heart0.
لحد اللحظة ديه لسه مش مقرره هتخصص في إيه بس أتمنى إن أيً كان المكان إلي هوصله يكون مُتفرع منه و لو طريق واحد علشان أوصل لهدفي مهما كانت المشاق و الصعوبات أتمنى إني أقدر أتخطاها heart0
مش عارفه ليه واخده المدونه ديه بشكل جَدي أوي أكتر من الاتنين الي فاتوا ، يمكن الحجر قلب معايا بعمق شويتين ، أتمنى تكون مكان ألطف في المستقبلheart0

^ بحاول أفهم إيه ده !!
أكتشلي الفيس التاني كريتيڤ و خاصة إنه بيتلاعب بالكلام بما إن الكوڤيد من عائلة فيروسات تشبه التاج تحت الميكروسكوب.
بس ستيل مش عارفه ممكن نستخدمهم في ايه !